KIBATULU 5
“Twatokala tu Tumaka Nzambi Kala Nguvulu Yetu”
O jipoxolo exile ni ukexilu utena kukala phangu yambote phala o Jikidistá joso ja kidi
Adikatula mu divulu dya Ikalakalu 5:12–6:7
1-3. (a) Mukonda dyahi o jipoxolo a ambata mu inzo ya kufundisa? Maka ebhi exilebhu? (b) Mukonda dyahi twatokala kwijiya o ima yabhange o jipoxolo?
O AFUNDIXI a Inzo Yabetakota ya Kufundisa ya Jijudé ala ni njinda yavulu! O jipoxolo ja Jezú amwafundisa mu inzo yiyi ya kufundisa. Kikuma kyahi kyate ene? Zuze Kayafa, o mukunji wadikota wala we kala mwendexi wa inzo ya kufundisa yenyiyi, umateka kuzwela ni jipoxolo mu ukexilu wayibha, mwene wamba: “Twa mifidisa kyá phala ki mulonge mu dijina didi.” O mwendexi wa inzo yakufundisa, kuma wexile ni njinda kandalele ne ngó kutumbula o dijina dya Jezú. Zuze Kayafa wasuluka: “Enu mwezalesa Jeluzaleme ni ulongelu wenu, enu mwamesena kubheka o manyinga ma diyala didi kuthandu dyetu.” (Ika. 5:28) Ihi yexile mulombolola o izwelu yiyi? Yexile mulombolola kwila: O jipoxolo atokalele kusola kweha o kuboka, mba kusola o kwazukutisa!
2 Kyebhi o jipoxolo kyejidibhana ni maka enyá? Jezú mwene wabhanene o kitumu kya kuboka, mwene wakitambwile we kwa Nzambi. (Mat. 28:18-20) O kwila o jipoxolo eji kweha o kuboka mukonda dya wôma wa athu? Inga ejiswina na suluke ni kuboka? Mu kidi, o maka exile o kusola o kutumaka Nzambi mba o athu. Sé hele, poxolo Phetele wazwela bhu kididi kya jipoxolo joso. Mwene wazwela ni kuswina kwoso mu inzo ya kufundisa.
3 Kuma tu Jikidistá ja kidi, ni kwila o kitumu kya kuboka kya lungu we ni etu, twatokala kwijiya se ihi yabhange o jipoxolo kyoso kya abalakala kwa mufundixi wa inzo ya kufundisa. Mu kukumbidila we o kitumu kiki kya tu bhana Nzambi, nange tutena kudibhana we ni izukutisu yavulu. (Mat. 10:22) O jinguma jetu atena ku tufidisa kubhanga o kikalakalu kya kuboka. Ihi itwanda bhanga se kiki kibhita netu? Phala ku tu kwatekesa mu maka enya, kima kyambote kuxinganeka mu phangu ya kuswina ya jipoxolo ni mu ima yabhange ande dya kwa ambata mu inzo ya kufundisa. a
“O anju ya Jihova yajikula o mabhitu” (Ika. 5:12-21a)
4, 5. Mukonda dyahi Kayafa ni Jisadusewu amateka kukala ni “difuba dyavulu” dya jipoxolo?
4 Lembalala kwila, kyoso o jipoxolo mu veji yadyanga kya atendelesa phala kweha kuboka, o poxolo Phetele wambe: “Kitutena kudixibha mu kuzwela o ima i twamono ni ima itwevu.” (Ika. 4:20) Kyoso kyabhiti o maka enyoso ya, poxolo Phetele, poxolo Nzwá, ni jipoxolo ja mukwa asuluka mu kuboka mu tembulu. O jipoxolo abhange madiwanu a makota kala o kusaka o jihaxi ni kukaya madimonyo. Ene abhange o kima kiki bhu “mbalanda ya Solomá,” kiki, kididi kyadikota kyexile bhumbandu ya lwiji ya tembulu, bhwexileko Jijudé javulu exile mudyongeka bhenyobho. Nange katé mwene o kizuzumbya kya Phetele kyexile mu saka o athu! Avulu a asake mu ukexilu wa xitu axikina o njimbu ya kwasaka mu nzumbi. Mukonda dya kiki, “athu avulu, mayala ni ahatu axikana Ngana, akexile we mudyongeka nawu.”—Ika. 5:12-15.
5 O Jisadusewu, atokalele mu ngeleja mwatokalele Kayafa amateka kukala ni “difuba dyavulu” mukonda dya kiki, atumina kuta o jipoxolo mu kaleya. (Ika. 5:17, 18) Mukonda dyahi o Jisadusewu exile ni njinda? O jipoxolo exile mulonga kwila Jezú amufukununa, maji o Jisadusewu kaxikinine ku difukunukinu. O jipoxolo exile mukwamba kwila, o muthu weji tena ngó kubhuluka, se ukala ni kixikanu kwa Jezú; maji o Jisadusewu exile ni wôma wa akwa Loma, mukonda exile mubanza kuma o athu ejixila Jezú kala Mutwameni wâ. (Nzw. 11:48) Mukonda dya kiki, o Jisadusewu exile mufidisa o kikalakalu kya jipoxolo!
6. Ananyi o jinguma jene muzukutisa o jiselevende ja Jihova mu izuwa ya lelu, ni mukonda dyahi kitudiwana ni maka enyá?
6 Kyene kimoxi we lelu, o atwameni a jingeleja asota kufunyisa dingi o jinguvulu phala kuzukutisa o jiselevende ja Jihova. Mu veji javulu ene mu funyisa o jinguvulu ni athu mu mitelembe phala kutufidisa kubhanga o kikalakalu kyetu kya kuboka. O kwila kyoso ene kyabhanga kiki, tusasumuka? Kana. O njimbu yetu itungununa o ilongesu ya jingeleja ja makutu. Mu kuxikina o kidi kya Bibidya, o athu alenduka o mixima, ene mu kweha o ilongesu ni ibhangelu ya makutu. (Nzw. 8:32) Kitudiwana mu kumona kwila, mu ithangana yavulu o njimbu yetu yene mubhangesa atwameni avulu ajingeleja kukala ni njinda mba difuba dyavulu.
7, 8. Mbote yahi yabhekela o kitendelesu kya anju ku jipoxolo, kibhwidisu kyahi kitwatokala o kudibhanga?
7 Kyoso kyexile mu kaleya mu kingila phala kwa fundisa, nange o jipoxolo exile mu dibhwidisa se eji kwa jibha ku jinguma jê. (Mat. 24:9) Maji mu usuku kwabhiti kima ka kifikile, “o anju ya Jihova yajikula o mabhitu a kaleya.” b (Ika. 5:19) O anju wa abhana o kitendelesu kiki: “Mu dilondekese mu tembulu, musuluke mu kubokela o mundu.” (Ika. 5:20) Sé phata o kitumu kiki, kyadyelelesa o jipoxolo kwila exile mubhanga o kima kyatokala. O izwelu ya anju nange ya akolokotesa kuswina mu ibhidi yengi yeji moneka. Mukonda dya kixikanu ni kuswina, o jipoxolo “mu kimene-mene abokona mu tembulu, anga amateka kulonga.”—Ika. 5:21.
8 Kala muthu mudyetu watokala kudibhwidisa: ‘Se ngexile mu dibhana ni ibhidi kala kyadibhanene nayu o jipoxolo, o kwila ngejitena kulondekesa kixikanu ni kuswina?’ Tutena kuswina mu kwijiya kwila, o jianju atukwatekesa kubhanga o kikalakalu kya katunda kya lungu ni kubhana umbangi walungu “ni Utuminu wa Nzambi.”—Ika. 28:23; Dij. 14:6, 7.
“Twatokala tu tumaka Nzambi kala nguvulu yetu, kana o athu” (Ika. 5:21b-33)
“Kyenyiki a abheka, ya atula bhu pholo ya adyakime a mundu ni ya mukunji.”—Ikalakalu 5:27
9-11. Ihi yabhange o jipoxolo kyoso o afundixi kya atumu phala kweha o kuboka? Phangu yebhi yaxisa o jipoxolo phala o Jikidistá joso ja kidi?
9 Kayafa ni afundixi amukwá atokalele mu inzo yabetakota ya kufundisa ya Jijudé, exile polondo phala kubatula o maka alungu ni jipoxolo. O afundixi kejidile o ima yabhitile mu kaleya. Ene atumu o alangidi a kaleya kuya mutakana o jipelezu. O alangidi adiwana kyavulu kyoso kyamono kwila o jipoxolo kexile mu kaleya sumbala “o kaleya kojike kyambote, [ni] alangidi emanene bhu myelu.” (Ika. 5:23) O kabhitangu ka tembulu wevu kwila o jipoxolo exile mu tembulu mu kubhana umbangi walungu ni Jezú Kidistu. Kiki kyene o kikalakalu kyabhangesa ku ata mu kaleya! O kabhitangu ni alangidi ni lusolo ayi mu tembulu phala kukwata ni kwambata o jipoxolo mu Inzo ya Kufundisa.
10 Kala kitwamono ku dimatekenu dya kibatulu kiki, ni njinda yoso o atwameni a jingeleja alondekesa kwila o jipoxolo atokalele kweha o kuboka. Mu kuzwelela o jipoxolo ni akwâ, ni kuswina kwoso Phetele wambe: “Twatokala tu tumaka Nzambi kala nguvulu yetu, kana o athu.” (Ika. 5:29) Kyenyiki o jipoxolo axisa phangu yambote phala o Jikidistá joso ja kidi. O phangu ya kwila, kitutokala kubelesela o jinguvulu kyoso kyatufidisa kukumbidila o itumu ya Nzambi ni kwila kyoso kyatutuma kubhanga o ima yatufidisa Nzambi. Mu kiki, ihi itwandabhanga se “o maungana” atufidisa kuboka o njimbu yambote? Kitwanda kwabelesela, mukonda twatokala kubhanga o kikalakalu kyatubhana Nzambi, o kuboka o njimbu yambote. (Lom. 13:1) Kyenyikiphe twandasota jindunge phala kusuluka mu kaswekele kubhana umbangi walungu ni Utuminu wa Nzambi.
11 Kitudiwana mu kwijiya kwila o kuswina kwa jipoxolo kwabhangesa o njinda ya afundixi kudibandekesa dingi, ya amesenene kujibha o jipoxolo. (Ika. 5:33) O jipoxolo jojo exile kyá ngó mu kingila kwajibha. Maji ene atambula o kikwatekesu mu ukexilu ka ufikile!
“Enu ki mwanda tena ku kibhwisa” (Ika. 5:34-42)
12, 13. (a) Kitendelesu kyebhi kyabhana Ngamadiyele ku akwâ, ni ihi yabhange ene? (b) Ihi itena kubhanga Jihova phala kukwatekesa o mundu wê? Ihi itutena kudyelela né mwene se Jihova utwehela ‘kutala hadi mukonda dya kukala tu athu ayuka’?
12 Ngamadiyele, “wexile mulongexi wa Kijila, a muximanene kyavulu kwala o mundu,” wabalumuka. c O diyala didi wejidile kyambote o itumu ya Jijudé, amuxila kyavulu ku akwâ mukonda kyoso kyamateka o kuzwela “watumu kutubhula o jipoxolo tu ithangana.” (Ika. 5:34) Ku dimatekenu Ngamadiyele watumbula izulukutu ya athu exile mu bhukumukina o jinguvulu, maji azoza kyoso kyajibha o atwameni’â. Maji mwene watendelesa o akwa inzo ya kufundisa kukwatela mwanyu ku jipoxolo ni kwa ehela kubhanga o kikalakalu kyâ, mukonda o Mutwameni wâ, Jezú Kidistu, wafwile tu ithangana kudima. O ima yazwela Ngamadiyele yatula ku mixima ya akwâ. Mwene wambe: “O mayala yá ki mudite nawu, maji ehenu-wu, ayá. Mukonda se o kikalakalu kiki kyatokala ku athu, kyanda bhwa, maji se kyatokala kwa Nzambi, enu ki mwanda tena ku kibhwisa. Maji se musuluka mu kubhanga kiki, mwa musota kubhânga ni Nzambi.” (Ika. 5:38, 39) O afundixi akayela o kitendelesu kyê. Maji né kiki, atumu kubeta o jipoxolo ni jixikote, anga “a afidisa kuzwela mu dijina dya Jezú.”—Ika. 5:40.
13 Kala kyabhiti mu ukulu, mu izuwa yetu Jihova utena we kubhangesa mayala a axila kyavulu kubhana itendelesu ikwatekesa o mundu Wê. (Jisa. 21:1) Bhu kaxi ka nzumbi yê ikôla, Jihova utena kubhangesa o jinguvulu, o abhangi a itumu, o afundixi kubhanga o ima yalungu ni vondadi yê. (Neh. 2:4-8) Maji né mwene se Nzambi utwehela ‘kutala hadi mukonda dya kukala tu athu ayuka,’ tutena kudyelela mu ima iyadi. (1 Ph. 3:14) Kya dyanga, Nzambi wandatubhana nguzu phala kukolokota. (1 Ko. 10:13) Kya kayadi, o jinguma jetu ‘kandatena kubhwisa’ o kikalakalu kya Nzambi.—Iza. 54:17.
14, 15. (a) Ihi yabhange o jipoxolo kyoso kyazubha kwabeta ni jixikote, ni mukonda dyahi? (b) Tanga musoso ulondekesa kwila o mundu wa Jihova ukolokota ni kusanguluka kyoso kya atalesa hadi.
14 O kwila o jipoxolo azozele mukonda dya kwabeta ni jixikote? Kana ngana! “Ene atundu mu Inzo ya Kufundisa ni kusanguluka.” (Ika. 5:41) Mukonda dyahi asangulukile? Ene kasangulukile mukonda dya ndolo yakexile mukwivwa mu kwabeta ni jixikote, kana. Maji asangulukile mukonda ejidile kwila exile mwazukutisa mukonda dya kukala fiyele kwa Jihova ni kukayela o phangu ya Jezú.—Mat. 5:11, 12.
15 Kala kyabhiti ni jiphange jetu ku hama ya dyanga, etu we tukolokota ni kusanguluka kwoso, kyoso kya mu tutalesa hadi mukonda dya njimbu yambote. (1 Ph. 4:12-14) Sumbala kitusanguluka kyoso kyatukwatesa wôma, kya tuzukutisa mba kya tuta mu kaleya, né kiki tusanguluka kyavulu mu kukolokota fiyele kwa Jihova. Tala o phangu ya phangyetu manu Henryk Dornik. O jinguvulu jayibha amutalesa hadi yavulu, maji wakolokota fiyele kwa Jihova. Mwene ulembalala kwila mu mbeji ya Kakwinyi ka 1944, o jinguvulu amutumikisa kumoxi ni phangyê mu kididi kya ikalakalu ya bhonzo. O athu exile mwazukutisa ambe: “O athu yá kitutena kwajijidika kubhanga kima. Ene awabhela kwatalesa hadi ni kwajibha.” Phangyetu manu Dornik wambe: “Sumbala kingawabhelele kutala hadi ni kufwa, maji o kutala hadi mukonda dya ufiyele wami kwa Jihova, kyene o kima kyexile mu ngisangulukisa.”—Tiy. 1:2-4.
Kala kyexile mubhanga o jipoxolo, twene we mu boka “nzo ni inzo”
16. Kyebhi o jipoxolo kyalondekesa kwila exile polondo phala kubokela o athu oso? Kyebhi kitwene mu kayela o phangu ya jipoxolo?
16 Ni lusolo lwoso o jipoxolo avutuka mu kikalakalu kyâ kya kuboka. Ni kukamba o wôma, “izuwa yoso, mu tembulu, [ni] nzo ni inzo, asulukile ni kulonga ni kuboka o njimbu yambote yalungu ni Kidistu Jezú.” d (Ika. 5:42) Ni kuswina kwoso exile polondo phala kubokela o athu oso. Kala kya atendelesa Jezú, ene exile mu bokela o athu mu jinzo jâ. (Mat. 10:7, 11-14) Sé phata, mu kubhanga kiki o jipoxolo atena kwizalesa o mbanza ya Jeluzaleme ni ulongelu wâ. Lelu, o Jimbangi ja Jihova, a ejiya mu kukayela o phangu yiyi ya jipoxolo, ya kuboka nzo ni inzo. Kyoso ki tuya mu jinzo joso jala mu dyembu dyetu, tulondekesa kwila twamesena kubokela o athu oso. Mu kubhanga kiki, enyoso andatena kwivwa o njimbu yambote. O kwila Jihova wamubesowala o kikalakalu kyetu kya kuboka nzo ni inzo? Kyene mwene! Mazunda a athu amuxikina o njimbu ya Utuminu wa Nzambi mu izuwa yiyi yasukidilaku, avulu mudyâ evu o njimbu yiyi mu veji ya dyanga kyoso o Jimbangi ja Jihova kyaphuphu ku mabhitu a jinzo jâ.
“Mayala ala ni ukexilu wambote” atena “kubhanga o kikalakalu kiki” (Ika. 6:1-6)
17-19. Maka ebhi amoneka mu kilunga ejibhangesa o jiphange kudiwanuna? Ihi yabhange o jipoxolo phala kubatula o maka?
17 Ki kubhitile ithangana yavulu tundé kyabhangele o kilunga kya dyanga kya Jikidistá. Maji kwexile kilwezu mu kaswekele. Kilwezu kyahi? Maxibulu avulu exile mwabatizala, kexile akwa Jeluzaleme, ene amesenene kudilonga dingi ande dya kuvutuka ku mabhata mâ. Ene abhindamene kudya ni imbamba yamukwá, mu kyenyiki o maxibulu akwa Jeluzaleme asangele kitadi ni ima yamukwá phala kwa kwatekesa. (Ika. 2:44-46; 4:34-37) Maji kwamoneka maka “mu kithangana kya kuwana o kúdya,” o atudi exile muzwela o dimi dya Ngeleku, “akexile mwajimba.” (Ika. 6:1) Maji o atudi exile muzwela o dimi dya Hebalayiku kexile mwajimba. Nange o maka exilebhu, o katombo. Exile mwene maka adikota, mukonda o katombo kala ni nguzu ya kuwanena o athu.
18 O jipoxolo, o kibuka kya utuminu kyexile mulanga o ibhindamu ya kilunga mu kithangana kyenyókyo. Ene amono kwila katokalele “kuxisa o mak’â Nzambi, phala kuwanena o kúdya.” (Ika. 6:2) Phala kubatula o maka, ene atendelesa o maxibulu kusota sambwadi dya mayala “ezala ni nzumbi ikôla ni unjimu,” ejitena “kubhanga o kikalakalu” kyokyo. (Ika. 6:3) Kwabhingile mwene mayala exile ni ukexilu wambote mukonda, o kikalakalu ki kyalungile ngó ni kuwanena o kudya, maji kwabhingile we kukalakala kyambote ni kitadi, kusumba o ima ni kusoneka yoso yexile mu ngastala. O mayala oso a asolo exile ni majina mu dimi dya Ngeleku, nange kiki kyabhangesa o atudi exile mu zwela o dimi dya Ngeleku kudivwa kyambote. Kyazubha kusamba, ene asolo o sambwadi dya mayala phala “kubhanga o kikalakalu kiki.” e
19 O kwila kubhanga o kikalakalu kya kuwanena o kudya kwabhangesa o mayala enyó kufula kuboka o njimbu yambote? Kana ngana! Mwaxaxi kâ mwexile Xitevá, ku pholo dya kwenda, ni kuswina kwa dikota wabhana umbangi mu inzo ya kufundisa. (Ika. 6:8-10) Filipe wexile we mwaxaxi ka sambwadi dya mayala. Mwene amwixana mu Bibidya kala “Filipe o mukunji.” (Ika. 21:8) Sé phata, o sambwadi dya mayala asuluka mwene mu kuboka o njimbu yambote.
20. Kyebhi o jiselevende ja Nzambi lelu, kyene mukayela o phangu ya jipoxolo?
20 Lelu o jiselevende ja Jihova ene mukayela we o phangu ya jipoxolo. O jiphange a asola phala kulanga o ikalakalu mu ilunga, atokala kukala ni unjimu utunda kwa Nzambi ni kulondekesa kwila amwa endesa ku nzumbi ikôla. Bhu kaxi ka kitendelesu kya Kibuka Kya Utuminu, o mayala alondekesa kwila abelesela o itendelesu ya Mikanda Ikôla, a asola kala tufunga mba akwatekexi a tufunga. f (1 Ti. 3:1-9, 12, 13) O yó akumbidila o itendelesu yiyi, tutena kuzwela kwila a asolo kwala o nzumbi ikôla. O jiphange jiji ni kuswina kwoso alondekesa kwila, ala polondo “phala kubhanga o kikalakalu” kyatokala. Mu kifika, o tufunga atena kukwatekesa jiphange jafiyele akuka kyá abhindamena kikwatekesu. (Tiy. 1:27) Sayi tufunga adibhakula mu kutunga Ididi ya Ubhezelu, kusokejeka o yônge ya makota mba kuya mu jinzo ja kusaka ni kukunda o asaki phala kuzwela nawu o maka alungu ni manyinga. O akwatekexi a tufunga abhanga ikalakalu yavulu, ki yalungu ni kukunda o jiphange mba kwa longa. O mayala oso yá, atokala kulondekesa unjimu n’atene kulanga kyambote o ikalakalu yâ mu ilunga ni kukumbidila we kyambote o kikalakalu kyatubhana Nzambi: O kuboka o njimbu yambote ya Utuminu.—1 Ko. 9:16.
“O Mak’â Nzambi Akexile mu Dimwanga” (Ika. 6:7)
21, 22. Ihi ilondekesa kwila Jihova wabesowala o kilunga kya dyanga mu hama ya dyanga?
21 Ni kikwatekesu kya Jihova, o jiphange mu kilunga atenene kutolola o izukutisu ya jinguma jâ ni kubatula o maka ejimoneka mu kilunga. O athu atenene kumona o mabesá a Jihova, mukonda o Bibidya yamba: “O mak’â Nzambi akexile mu dimwanga, o maxibulu we asulukile mu kudibandekesa mu Jeluzaleme. Akunji avulu axikina o mak’â Nzambi.” (Ika. 6:7) Yiyi phangu imoxi ngó mu divulu dya Ikalakalu ilondekesa kwila o kikalakalu kyexile mu dimwanga mwene. (Ika. 9:31; 12:24; 16:5; 19:20; 28:31) Mu izuwa yetu o kwivwa kwila o kikalakalu kya kuboka kyamuya ni kudisanzumuna, kutuswinisa kyavulu.
22 Ku hama ya dyanga, o atwameni a jingeleja ni njinda yavulu amesenene kusuluka mu kubhanga yoso ni yoso phala kwimanesa o kikalakalu kya jipoxolo. Izukutisu yavulu yexile mu kwiza ku pholo. Xitevá amuzukutisa kyavulu. Yá ene o maka utwandadilonga mu kibatulu kya kayela.
a Tala o kaxa “ O Inzo Yabetakota ya Kufundisa ya Jijudé” mu difwe 43.
b O divulu dya Ikalakalu ditumbula o kizwelu jianju mu 20 a jiveji, yiyi yene o veji yadyanga. Mu divulu dya Ikalakalu 1:10 tusangamu o izwelu “mala ayadi ni izwatu yazele.” O izwelu yiyi yalungu ni jianju.
c Tala o kaxa “ Ngamadiyele Exile mu Muximana Kyavulu ku Jimesene,” mu difwe 45.
d Tala o kaxa “ Kuboka ‘Nzo ni Inzo,’” mu difwe 46.
e Nange o mayala enyó akexile mubhanga o ikalakalu yene mubhanga o tufunga, mukonda kyokyo kyexile kikalakalu kya katunda. Maji o Bibidya ki ilondekesa se thembu kuxi o athu amateka kwasola kala tufunga mu kilunga kya Jikidistá.
f Ku hama ya dyanga, mayala akulu mu nzumbi akexile musola o tufunga. (Ika. 14:23; 1 Ti. 5:22; Tit. 1:5) Lelu o Kibuka Kya Utuminu asola o tufunga twa ilunga. O tufunga twa ilunga asola o tufunga mu ilunga ni akwatekexi a tufunga.
