1-3. (a) Maka ebhi mu kilunga ku hama yadyanga, eji bhangesa o jiphange kudiwanuna mu ibuka ibuka? (b) Mbote yebhi itutena kukatula mu kudilonga o musoso yú mu divulu dya Ikalakalu?

 NI KISANGUSANGU kyoso, Phawulu ni Balanabé avutuka ku Andiyokiya ya Sídya kyoso kyazubha kubhanga o njila yâ ya dyanga kala akunji a jixi jengi. Ene asanguluka mukonda “Nzambi [wa] jikula o njila phala akwa jixi jengi axikane.” (Ika. 14:26, 27) Mu kikiphe, o athu mu mbanza yenyoyo exile ngó muzwela yalungu ni njimbu yambote. Anga “athu avulu” akwa jixi jengi ka asayele, axikana Ngana.—Ika. 11:20-26.

² O njimbu ya kwila athu avulu ka asayele akituka Jikidistá, yabhixila mu Judeya. Maji mu veji dya kusangulukisa athu oso, kiki kyavulumuna dingi o maka alungu ni kusaya. Kyebhi o Jikidistá Jijudé ni Jikidistá kexile Jijudé kyatokalele kuditalatala? O Jikidistá kexile Jijudé atokalele kumona kyebhi o Kijila kya Mozé? Kiki kyabheka maka mu kilunga, mukonda dya kiki o jiphange eji diwanuna mu ibuka ibuka. Kyebhi kyejibatula o maka enyá?

³ Kyoso kituya ni kudilonga o maka enyá mu divulu dya Ikalakalu, twandadilonga madisá avulu. Kiki kyandatukwatekesa kubhanga o ima ni unjimu se kumoneka maka mu kilunga eji tubhangesa kudiwanuna mu ibuka ibuka.

4. Sayi mayala akexile mulonga ihi? Kiki kitubhangesa kudibhanga kibhwidisu kyebhi?

⁴ O dixibulu Luka wasoneka: “Sayi mayala atundu ku Judeya, a kulumuka ku Andiyokiya amateka kulonga o jiphange, exi: ‘Se akamba ku mi saya kala kyósoneke mu Kijila kya Mozé, enu ki mwanda bhuluka.’” (Ika. 15:1) O Bibidya ki izwela se o “mayala” enyá exile Jifalizewu ande dya kukituka Jikidistá. Né mwene se  exile mba kana, nange a afunyisa ku Jifalizewu. Nange o mayala enyá ambe we kwila o jipoxolo ni tufunga mu Jeluzaleme éne a atendelesa kuzwela o maka enyá. (Ika. 15:23, 24) Mukonda dyahiphe o Jikidistá Jijudé exile hanji mu jijidika o Jikidistá akwa jixi jengi kwasaya, se 13 kya mivu kudima, Nzambi bhu kaxi ka poxolo Phetele, waxikinine kyá o athu akambele kwasaya mu kilunga kyê? a—Ika. 10:24-29, 44-48.

5, 6. (a) Nange ihi yabhangesa amoxi ku Jikidistá Jijudé kudikwatenena ku kijila kya kusaya? (b) O kwila o kikutu kya kusaya kyalungile ni kikutu kya Mbalahamu? Jimbulula. (Tala ku lwiji.)

⁵ Mukonda dya ima yavulu. Kyadyanga, Jihova mwéne wabhele o kitumu kya kusaya o mayala, phala kulombolola o ukamba wa katunda wakexile nawu o akwa Izalayele ni mwene. Jihova wabhana o kitumu kiki ande dya kubhana o Kijila kya Mozé. O kusaya kwamateka ni Mbalahamu ni mwiji wê. Ku pholo dya kwenda, a kubokwesa we mu Kijila. b (Iji. 12:2, 3) Mu Kijila kya Mozé, katé mwene o athu akwa jixi jengi, atokalele kwasaya ande dya kubhanga ikalakalu ya mukwá, kala o kubhanga o fesa ya Phasu. (Mak. 12:43, 44, 48, 49) Mu kidi, o Jijudé exile mumona o mayala akambele kwasaya, kala athu axidi, athu akwatesa jisonyi.—Iza. 52:1.

⁶ Kyenyiki o Jijudé Jikidistá abhingile kukala ni kixikanu ni kulenduka phala kuxikina o milongi yiyi ya ubhe. O Kikutu kya Kitumu akibhingana ku kikutu kya ubhe. Mu kiki o muthu keji kala mubhezi wa Nzambi, mukonda ngó dya kumuvwala kala Judé. O Jikidistá Jijudé, atungile mu ididi mwexile Jijudé javulu, kala mu Judeya, abhingile kuswina phala kuxikina Kidistu ni kuxikina akwa jixi jengi ka asayele kala jiphange jâ mu nzumbi.—Jel. 31:31-33; Luk. 22:20.

7. Kidi kyebhi kyakambe kutonginina o “mayala” akwa Judeya?

⁷ Kidi kwila o itendelesu ya Nzambi ki yalungulukile. Twamba kiki mukonda o kikutu kya ubhe kyalungile ni Kijila kya Mozé. (Mat. 22:36-40) Yalungu ni kusaya, Phawulu wambe: “Judé ya kidi, yó wala Judé mu muxima wê. O kusaya kwê kwa muxima, bhukaxi ka nzumbi ikôla, ki bhukaxi ka Kijila kyosoneke.” (Lom. 2:29;  Mate. 10:16) O “mayala” akwa Judeya katonginina o kidi kiki, mu kiki exile mulonga kwila Nzambi kabhwisile o kijila kya kusaya. O kwila ene ejixinganeka kyambote mu maka yá?

8. Mukonda dyahi ambata o maka alungu ni kusaya ku kibuka kya utuminu mu Jeluzaleme?

⁸ Luka wambe dingi: “Kyoso Phawulu ni Balanabé kyazubha kukwata jiphata ni kuzoka ni ene [sayi mayala], o jiphange [o tufunga] atumikisa Phawulu ni Balanabé ni akwâ ku jipoxolo ni tufunga mu Jeluzaleme, phala kubatula o maka enyá.” c (Ika. 15:2) O “jiphata ni kuzoka” kuku, kyalondekesa o kima kyexile mu xikina o athu. O jiphange mu kilunga kya Andiyokiya katenene kubatula o maka yá. Phala kukwatekesa o jiphange kukala ni muxima umoxi ni kutululuka, o kilunga kya Andiyokiya kyambata o maka “ku jipoxolo ni tufunga mu Jeluzaleme,” éne exile o kibuka kya utuminu. Ihi itutena kudilonga ni tufunga mu mbanza ya Andiyokiya?

9, 10. Phangu yebhi yambote yatuxila o jiphange mu Andiyokiya, Phawulu ni Balanabé?

⁹ Tudilonga kwila twatokala kudyelela mu kilunga kya Nzambi. Xinganeka mu maka yá: O jiphange mu Andiyokiya ejidile kwila, oso atokalele mu kibuka kya utuminu exile Jijudé. Né kiki, adyelele kwila o jiphange jojo ejitena kubatula o maka alungu ni kusaya, kala kyexile mu tendelesa o Mikanda Ikôla. Mukonda dyahi? O kilunga kyejidile kwila Jihova wejibatula o maka bhukaxi ka nzumbi yê ikôla ni bhukaxi ka Mutwameni wa kilunga kya Jikidistá, Jezú Kidistu. (Mat. 28:18, 20; Efe. 1:22, 23) Lelu’idi se kumoneka maka mu kilunga, tukayelyenu o phangu yambote ya Jikidistá mu Andiyokiya mu kudyelela mu kilunga kya Nzambi ni ku Kibuka Kya Utuminu.

¹⁰ Tudilonga we kwila twabhingi kulenduka ni kukala ni mwanyu. Phawulu ni Balanabé a asolo ku nzumbi ikôla phala kubokela akwa jixi jengi, maji kabanze kwila, mukonda dya ujitu yú akexile nawu atokalele kubatula o maka alungu ni kusaya mu Andiyokiya. (Ika. 13:2, 3) Mivu ku pholo, Phawulu wasoneka: “Ngana Jezú wa ngi tangele mu kisumwa kwila nga tokalele kubanda-ku [ku Jeluzaleme].” (Nga. 2:2) Lelu o tufunga abhanga nguzu phala kulondekesa  mwanyu ni kulenduka kyoso ki kumoneka maka atena kubhangesa o jiphange kudiwanuna mu ibuka ibuka. Mu veji dya kudikwatenena mu ibanzelu yâ, ene asota o kikwatekesu kya Jihova mu kutokwesa o Bibidya ni itendelesu yene mutubhana o kimbadi kya fiyele.—Fil. 2:2, 3.

11, 12. Mukonda dyahi twatokala kukingila kwa Jihova?

¹¹ Sayi bhabha, twabhingi kukingila Jihova kutubhana dingi itendelesu mu kithangana kyatokala. Lembalala kwila o jiphange mu izuwa ya Phawulu abhingile kukingila katé ku 49 K.K.—kwabhiti 13 kya mivu tundé Kolonelyu kyamu undu ku 36 K.K.—ande dya Jihova kubatula o maka alungu ni kusaya. Mukonda dyahi Jihova wehela kubhita o mivu yoso yiyi? Nange mukonda wamesenene kubhana kithangana kya soko phala o Jijudé exile ni mixima yambote natene kuxikina o milongi yiyi ya ubhe. O kikutu kya kusaya kyate ni Mbalahamu, tata yâ amuzolele kyavulu, kyabhiti mu 1.900 a mivu. O dizubhilu dya kikutu kiki kyexile mwene kima kya katunda!—Nzw. 16:12.

¹² Ujitu wadikota kutulonga ni kutu umba kwa Tat’etu ya dyulu, mukwa henda, mukwa mwanyu! Kiki kitubhekela mbote mu ithangana yoso. (Iza. 48:17, 18; 64:8) Kyenyiki, kitujijile mu ixinganeku yetu ngó, mba kudivwa kyayibha kyoso o ima mu kilunga ilunguluka mba kyoso kitutendela jivelusu ja Bibidya mu ukexilu wa ubhe. (Ndo. 7:8) Se eye umona kwila sayi kima, né se kima kyofele ngó ki kubhangesa kukala ni ixinganeku yiyi, samba kwa Jihova, mubhinge kikwatekesu, xinganeka we mu milongi yambote itusanga mu divulu dya Ikalakalu 15. d

13. Kyebhi kitutena kukayela o mwanyu wa Jihova mu ukunji wetu?

 ¹³ Nange twabhingi kukala ni mwanyu mu kudilonga o Bibidya ni athu abanza kwila kubhonza kuxisa o milongi ya makutu mba ijila yofidise mu Bibidya yadikwatenena tundé ukulu. Se kiki kyamubhita n’eye, nange wabhingi kukingila o nzumbi ikôla ya Nzambi phala ilungulule o muxima wa dixibulu dyé. (1 Ko. 3:6, 7) Twabhingi we kusamba yalungu ni maka yá. Mu ukexilu wosowoso ni mu kithangana kyatokala, Nzambi wandatukwatekesa kwijiya o kima kyatokala kubhanga.—1 Nz. 5:14.

14, 15. Kyebhi o jiphange mu kilunga kya Andiyokiya kyalondekesa o henda yâ kwa Phawulu, Balanabé ni ku athu engi exile mukwenda nawu? Kyebhi ene kyalondekesa kwila exile dibesá phala o jiphange jâ?

¹⁴ Luka wambe dingi: “O jiphange mu kilunga a axinjikila, ene asuluka ni njila yâ. Abhiti ku Fenixa ni mu Samadiya, mu kujimbulula kyambote ku jiphange, kyebhi o akwa jixi jengi kyaxikina o milongi ya Ngana. Kiki kya asangulukisa kyavulu.” (Ika. 15:3) O jiphange mu kilunga axinjikila Phawulu, Balanabé ni athu engi exile mukwenda nawu. Kiki kyalondekesa kwila o jiphange a azolele kyavulu ni kwila amesenene kuma Nzambi u abesowala. Lwamukwá dingi, o jiphange mu kilunga kya Andiyokiya atuxila phangu yambote! O kwila eye uxila o jiphange jé mu nzumbi, “bengebenge yó [o tufunga] akalakala kyavulu mu kuzwela ni mu kulonga”?—1 Ti. 5:17.

¹⁵ Mu njila yâ, ene alondekesa kwila exile dibesá phala o jiphange jâ ku Fenixa ni ku Samadiya mu kwajimbulwila “kyambote . . . kyebhi o akwa jixi jengi kyaxikina o milongi ya Ngana.” Mwaxaxi ka athu yá nange mwexile Jikidistá Jijudé alengele mu jimbanza jiji kyoso kyajibhile Xitevá. Kyene kimoxi we lelu, o kwivwa kyebhi Jihova kyamubesowala o kikalakalu kya kubhanga maxibulu, kwene muswinisa o jiphange jetu, bengebenge yó amwazukutisa. Eye utena kukatula mbote ku misoso yiyi mu kuya ku yônge mu kilunga, yônge ya ilunga ni ku yônge ya makota, mu kutanga we o misoso yene mumoneka mu madivulu metu ni mu kijimbwete jw.org.

16. Ihi ilondekesa kwila o maka alungu ni kusaya abhingile mwene kwabatula?

¹⁶ Kyoso kyende o njila ya 550 ya jikilometulu mu mbandu ya lwiji, o kibuka kyokyo kyabhixila mu Jeluzaleme. Luka wasoneka: “Kyabhixila mu Jeluzaleme, o jiphange mu kilunga ni jipoxolo ni tufunga, a atambulula kyambote. Ene a atangela o ima  yoso ya bhangele Nzambi bhukaxi ka ene.” (Ika. 15:4) Majiphe “sayi athu atokalele ku kibuka kya Jifalizewu, axikinine Ngana, emana, ya ambe: ‘O athu ki Jijudé atokala kwa saya, ni kwa tendelesa kukumbidila o Kijila kya Mozé.’” (Ika. 15:5) Tumona kwila, o maka a kwila, o athu ki Jijudé atokalele kwasaya, abhingile mwene kwabatula.

17. Ananyi abhangele mbandu mu kibuka kya utuminu mu Jeluzaleme, ni mukonda dyahi o “tufunga” akexile musidivila kumoxi ni jipoxolo?

¹⁷ Jisabhu 15:22 yamba: “Bhwala o nzungule ya jindongixi, ndunge joso ji tunda ni kubhanduluka.” Kala kilondekesa o kitendelesu kiki, “o jipoxolo ni tufunga adyongeka phala kubatula o maka enyá [o maka alungu ni kusaya].” (Ika. 15:6) Kala kyene mubhanga o Kibuka Kya Utuminu mu izuwa yetu, “o jipoxolo ni tufunga” abhange o ima phala o mbote ya ilunga yoso. Ene exile o kibuka kya utuminu mu Jeluzaleme. Mukonda dyahi o “tufunga” akexile musidivila kumoxi ni jipoxolo? Lembalala kwila poxolo Tiyaku amujibhile ni kwila mu ka kithangana poxolo Phetele wexile mu kaleya. Kindala tudibhwidise: Se o kima kiki kyejibhita ni jipoxolo ja mukwá? Kukala ni jiphange ja mukwá akulu mu nzumbi kyejikwatekesa o kilunga kukala ni athu eji langa kyambote o kikalakalu kya Nzambi.

18, 19. Ihi yazwela Phetele? O athu akexile mu kyônge kyokyo atokalele kubanza mu ihi?

¹⁸ Luka wambe dingi: “Kyoso kyazubha kuzoka kyavulu, Phetele wemana yu wambe, wixi: ‘Enu akwetu jiphange, mwejiya kwila tundé kudimatekenu, Nzambi wa ngi solo mwaxaxi k’enu, phala o akwa jixi jengi evwe mu kanu dyami o njimbu yambote, n’a xikane. O Nzambi wejiya o mixima ya athu walondekesa kwila, wa axikina mu kwabhana o nzumbi ikôla, kala kya tubhanene. Mwene ka tutungula mwaxaxi kâ, maji mukonda dya kixikanu kyâ wa azelesa o mixima.’” (Ika. 15:7-9) Sayi divulu dyamba kuma, o kizwelu  mu Ngeleku akilungulula “kuzoka” mu velusu 7, kilombolola we “kusota, kwibhula.” Kiki kilondekesa kwila o jiphange azwela o ima ni kidi kyoso, kasweka kima, azwela yoso yexile mubanza.

¹⁹ O izwelu ya Phetele yalembalesa oso akexile mu kyônge kyokyo kwila mwene wamono kyoso o athu adyanga, akwa jixi jengi akambele kwasaya kya a undu ni nzumbi ikôla ku muvu wa 36 K.K., Kolonelyu ni mwiji wê. Mu kyenyiki, se Jihova kexile mutungula dingi o Jijudé ni akwa jixi jengi, o kwila o athu atokalele dingi kubhanga kiki? O kya mukwá, o kima kibhangesa muthu kumumona kwa Nzambi kala muthu wayuka, o kukala ni kixikanu kwa Kidistu, kana o kutumaka o Kijila kya Mozé.—Nga. 2:16.

20. Mu ukexilu webhi o Jijudé exile mu jijidika akwa jixi jengi kwasaya exile “mu lola Nzambi”?

²⁰ Mu kutumbula o Mikanda Ikôla ni kima kyojimbulule kwala o nzumbi ikôla, Phetele wambe: “Kyenyiki-phe, mukonda dyahi mwa mu lola Nzambi, mu ku twika imbamba ya neme ku maxibulu, o jikuku jetu n’etu, ki twatenene ku yambata? Maji twaxikana kwila, etu ni ene twa bhuluka mu ngalasa ya tulondekesa Ngana Jezú.” (Ika. 15:10, 11) Mu kidi, o Jijudé exile mu jijidika akwa jixi jengi kwa saya, exile “mu lola Nzambi,” mba kala kizwela Bibidya yengi ‘exile mu lola o mwanyu wê.’ Ene akexile mu jijidika akwa jixi jengi kubelesela o Kijila katenene kukikayela ku Jijudé. Mukonda dya kiki, o Kijila kyokyo kyexile mwabalakala o kufwa. (Nga. 3:10) Mu veji dya kujijidika akwa jixi jengi kwasaya, o Jijudé akexile mu kwivwa Phetele atokalele kubelesela Nzambi mukonda dya ngalasa yê yalondekesa bhukaxi ka Jezú.

21. Ihi yazwela Balanabé ni Phawulu yakwatekesa kubatula kyambote o maka alungu ni kusaya?

²¹ O izwelu ya Phetele yabhangesa o athu kuxinganeka mukonda “o mundu woso” wadixibha. Anga Balanabé ni Phawulu atange “o isumwa yavulu ni madiwanu abhange Nzambi bhukaxi kâ, ku akwa jixi jengi.” (Ika. 15:12) Kyenyiki, o jipoxolo ni tufunga ejitena kyá kutonginina o milongi yoso yatambwile katé mu kithangana kyenyokyo, ni kubatula o maka alungu ni kusaya mu ukexilu wejilondekesa se yebhi yexile o vondadi ya Nzambi.

22-24. (a) Kyebhi o Kibuka Kya Utuminu lelu kyene mu kayela o phangu ya kibuka kya utuminu ku hama ya dyanga? (b) Kyebhi o tufunga twoso kyaxila o kilunga kya Jihova kyoso ki kumoneka maka?

²² Kyene kimoxi we lelu, o jiphange atokala ku Kibuka Kya Utuminu kyoso kya dyongeka asota o itendelesu mu Mak’â Nzambi, asamba we ni muxima mu kubhinga o nzumbi ikôla. (Jisá. 119:105;  Mat. 7:7-11) Phala kubhanga kiki, kala phange watokala mu Kibuka Kya Utuminu utambula mukanda mwala o ima yoso yandazwela mu kyônge, natene kusamba ande dya kuya ku kyônge. (Jisa. 15:28) Mu yônge yiyi o jiphange jiji azwela yoso yamubanza ni kuxila kwoso. Mu ithangana yoso mu yônge yiyi atanga o Bibidya.

²³ O tufunga mu ilunga atokala kukayela o phangu yiyi. Se ku disukilu dya kyônge, o tufunga alembwa kubatula maka adikota, atena kubhinga kikwatekesu ku filiyale mba ku tufunga twa ilunga. Se kwabhingi, o filiyale itena kusoneka mukanda ku Kibuka Kya Utuminu.

²⁴ Jihova ubesowala o athu alondekesa kulenduka, ufiyele ni mwanyu, abatula we o maka kala kitendelesa o kilunga kyê. Se tubhanga kiki, Nzambi utubesowala ni kutululuka kwa kidi, twandakula we mu nzumbi ni kukala ni muxima umoxi mu kilunga. Yá ene o maka utwandadilonga mu kibatulu kya kayela.