1, 2. Ihi yamesenene kubhanga Sawúlu mu mbanza ya Damasku?

 MAYALA ala ni njinda yavulu amuya mu mbanza ya Damasku, mwanda bhanga ima yayibha. O maxibulu a Jezú a azembe kyavulu, ene anda ku akatula mu jinzo jâ ni nguzu yoso, ku akuta, ku a sebhulula, ku akoka kate mu Jeluzaleme phala kukala bhu pholo dya akwa inzo yabetakota yakufundisa ya Jijudé, o afundixi yá ala ni njinda yavulu.

² O mutwameni wa kibuka kya athu exile ni njinda amwixana Sawúlu, o maku mê ezalele kyá ni manyinga. a Tu izuwa kudima mwene wamono kuma kima kyambote o makamba mê kububa ni matadi Xitevá katé kyafu, o dixibulu dya fiyele dya Jezú. (Ika. 7:57–8:1) Maji Sawúlu kasangulukile ngó mu kuzukutisa o akayedi a Jezú atungile mu Jeluzaleme. Mwene wamesenene kyavulu kuzubha o akwa ngeleja yiyi a ixanene “Njila ya Nzambi.”—Ika. 9:1, 2; Tala o kaxa “ O ungana wexile nawu Sawúlu ku Damasku,” mu difwe 69.

3, 4. (a) Ihi yabhiti ni Sawúlu? (b) Ibhwidisu yebhi itwanda dilonga?

³ Mu kithangana kyenyókyo Sawúlu amumwikina ku mukengeji. O makamba mê akexile kwenda kumoxi, amono o mukengeji akala ni woma, katena kuzwela kima. Sawúlu wakituka kifofo yu wabu bhoxi, wevu dízwi dyatundu ku dyulu, dyambe: “Sawúlu, Sawúlu, mukonda dyahi wa mu ngizukutisa?” Mwene wadiwanene kyavulu, yu webhwidisa: “Éye nanyi Ngana?” O kitambwijilu kyevu Sawúlu sé phata kya mubhangesa kukala ni woma: “Éme Jezú, yó wa mu muzukutisa.”—Ika. 9:3-5; 22:9.

⁴ Ihi itutena kudilonga mu izwelu yadyanga ya Jezú kwa Sawúlu? Mbote yahi itukatula mu kutokwesa o ima yabhiti ni Sawúlu kyoso kyakituka dixibulu? Madisá ebhi ututena kukatula mu kumona kyebhi o kilunga kyakalakala ni kutululuka kwa kexile naku kyoso Sawúlu kya kituka Kidistá?

5, 6. Ihi itudilonga ku izwelu ya Jezú kwa Sawúlu?

⁵ Kyoso Jezú kyexile muzwela ni Sawúlu mu njila ya kuya ku Damasku, Mwene kebhwidisa: “Mukonda dyahi wamuzukutisa o maxibulu mami?” Maji kala kyotumbule kyá kudima, mwene wambe: “Mukonda dyahi wa mu ngizukutisa?” (Ika. 9:4) Kiki kilondekesa kwila Jezú udivwa kyayibha kyoso kyatalesa hadi ku akayedi’ê.—Mat. 25:34-40, 45.

⁶ Se amukuzukutisa mukonda dya kixikanu kyé kwa Kidistu, ejiya kwila Jihova ni Jezú ejiya kyambote yoso iwamudibhana nayu. (Mat. 10:22, 28-31) Nange Jihova kanda katula kindala o kizukutisu kitwamudibhana nakyu. Maji lembalala kwila, Jezú wamono o ima yabhange Sawúlu phala kujibha Xitevá, wamono we Sawúlu kukatula o maxibulu afiyele mu jinzo jâ mu Jeluzaleme. (Ika. 8:3) Né kiki Jezú kabhange kima phala kukatula o kizukutisu kyenyókyo. Maji Jihova bhukaxi ka Kidistu wabhana kwa Xitevá ni ku maxibulu amukwa o nguzu yabhindamene phala kukolokota fiyele.

7. Ihi iwatokala kubhanga phala kukolokota mu izukutisu?

⁷ Eye we utena kukolokota mu izukutisu. Kyebhi? (1) Kolokota mu ufiyele wé kwa Jihova kiza ki kizé. (2) Bhinga o kikwatekesu kwa Jihova. (Fil. 4:6, 7) (3) Ehela Jihova “kuvutwila phonzo.” (Lom. 12:17-21) (4) Dyelela kwila Jihova wanda kubhana nguzu phala kukolokota katé mwene kyanda mona kwila o kithangana kya ku kukatula o kizukutisu kyabhixila kyá.—Fil. 4:12, 13.

8, 9. Nange kyebhi kyadivu Ananiya kyoso kyatambula o kikalakalu kya kuzwela ni Sawúlu?

⁸ Kyoso Jezú kyatambwijila o kibhwidisu kya Sawúlu, “Éye nanyi Ngana?” Jezú wamutangela: “Balumuka, bokona mu mbanza. Mwenyomo, anda kutangela se ihi i watokala o kubhanga.” (Ika. 9:6) Sé kumona kima, Sawúlu amwambata mu inzo mwejikala mu Damasku, mwene wasambe mu izuwa itatu, kadile kima, kanwine we kima. Mu kithangana kiki Jezú wazwela yalungu ni Sawúlu ku dixibulu mu mbanza yenyoyo amwixana Ananiya: “O Jijudé atungile mwenyomo akexile ku muzwela kyambote.”—Ika. 22:12.

⁹ Xinganeka kyebhi kyadivwile Ananiya kyoso kyatambula o njimbu yiyi! O Mutwameni wa kilunga Jezú Kidistu amufukunwine wakexile muzwelane, wamusolo phala kubhanga o kikalakalu kiki kya katunda. Yu wexile ujitu wadikota, maji kikalakalu kyabhonzo! Kyoso Ananiya kyejidile kwila watokalele kuzwela ni Sawúlu, wambe: “Ngana, eme ngevu athu avulu kuzwela yalungu ni diyala didi, ni ima yoso  yayibha yabhange mwene ku maxibulu mé mu Jeluzaleme. Mwene weza bhabha ni kutena kwa mubhana o akunji a makota kwa kukuta oso a kuxikana.”—Ika. 9:13, 14.

10. Ihi itwadilongo yalungu ni Jezú mu ukexilu watalatala Ananiya?

¹⁰ Jezú kabazela Ananiya mukuzwela o kima kyexile mu mutandanganyesa. Maji wa mubhana itendelesu yatokala. Walondekesa kwila wexile mu mubhana valolo mu kumutangela se mukonda dyahi wamesenene kwila Ananiya mwéne weji kunda Sawúlu. Jezú wambe kiki yalungu ni Sawúlu: “Ndé, mukonda o diyala didi nga musolo phala kubhana umbangi walungu n’eme ku akwa jixi jengi, ku jisobha ni ku an’a Izalayele. Mukonda nganda mwijidisa o hadi yanda tala mukonda dya dijina dyami.” (Ika. 9:15, 16) Ni kuxila kwoso Ananiya wabelesela Jezú. Mwene wadisange ni Sawúlu, yu wa mwambela: “Sawúlu phang’yami, o Ngana Jezú wa kutukulukila mu njila mu wejile, wa ngi tumikisa phala umone dingi ni wizale ni nzumbi ikôla.”—Ika. 9:17.

11, 12. Ihi itwadilongo ku ima yabhiti ni Jezú, Ananiya ni Sawúlu?

¹¹ Twadilongo ima yavulu ni yabhiti ni Jezú, Ananiya ni Sawulu. Twadilongo kwila Jezú wamukwendesa o kikalakalu kya kuboka kala kyakanena ku maxibulu mê. (Mat. 28:20) Sumbala lelu kazwela ni athu kala kyazwelele ni Ananiya, Jezú wamukwendesa o kikalakalu kyakuboka bhukaxi ka kimbadi kya fiyele, yo a asolo kwa mwene phala kutambula konda ya akwa dibhata dyê, mu izuwa yetu. (Mat. 24:45-47) Ni itendelesu ya Kibuka Kya Utuminu, sayi aboki ni aboki athembu yoso, a atumikisa phala kusanga woso wandala kwijiya dingi yalungu ni Kidistu. Kala ki twamono mu kibatulu kyabhiti, avulu mudya asambe kwa Nzambi mu ku mubhinga kikwatekesu, anga a akundu ku Jimbangi ja Jihova.—Ika. 9:11.

¹² Ananiya waxikina o kikalakalu kyatambwile anga amubesowala. O kwila  eye ubelesela o kitumu kyakuboka né mwene se o kikalakalu kiki kikubhangesa kutandanganya? Sayi aboki akala ni hele yakuboka inzo ni inzo, ni kuzwela ni athu ka ejiya. Amukwa amona kwila kibhonza kuboka mu ikoka, mu itanda, bhukaxi ka mikanda mba bhukaxi ka mutelembe. Ananiya watolola o woma we anga watenene kukwatekesa Sawúlu kutambula o nzumbi ikola. b Ananiya waditundu kyambote  mukonda wadyelele kwa Jezú, wamonene we kwila ku hádya Sawúlu wejikala phangy’ê mu nzumbi. Kala Ananiya tutena kutolola o woma wetu, se tudyelela kwa Jezú yo wamukwendesa o kikalakalu kya kuboka, se tukwatela henda ku athu katé mwene yo atukwatesa woma, ni kwamona kwila kuhádya andakala jiphange jetu mu nzumbi.—Mat. 9:36.

13, 14. Se wamudilonga o Bibidya maji ka kubatizala luwa, ihi i utena kudilonga ku phangu ya Sawúlu?

¹³ Ni lusolo Sawúlu wamateka kukumbidila yoso yadilongo. Kyazubha kumusaka, amubatizala anga wamateka kudibunda kumoxi ni maxibulu mu mbanza ya Damasku. Maji Sawúlu wabhange dingi kima kyamukwa. Mwene “wamateka kuboka mu malombe yalungu ni Jezú, kwila mwéne o Mon’a Nzambi.”—Ika. 9:20.

¹⁴ Se eye wamudilonga o Bibidya maji ka kubatizala luwa, o kwila wandakayela o phangu ya Sawúlu mu kukumbidila ni lusolo o ima iwamudilonga? O madiwanu abhange Jezú amono Sawúlu ni mesu mê, amukwatekesa kulungulula o ukexilu wê. Maji ki kyene ngó o kima kyamubhangesa kulunguluka, mukonda athu avulu amono we madiwanu abhangele Jezú maji kabhange kima. Mu kifika kibuka kya Jifalizewu amono Jezú kusaka diyala wakatele lukwaku, Jijudé javulu ejidile kwila Jezú wafukunwine Lázalu. Ne kiki ene kalondekesa kixikanu, kate mwene amuzembele. (Mál. 3:1-6; Nzw. 12:9, 10) Maji ki kyene kyabhange Sawúlu, mwene walungulula o ukexilu wê. Mukonda dyahi Sawúlu waxikina o njimbu yambote yamutudile, o akwâ kana? Mukonda mwene wexile ni woma wa Nzambi muveji dya athu, wexile we mulondekesa kisakidilu mu henda ya mulondekesa Kidistu. (Fil. 3:8) Se ubhanga we kiki, ki wanda kwehela kima kyosokyoso ku kufidisa kuboka o njimbu yambote ni kukala polondo phala kukubatizala.

15, 16. Ihi yexile mubhanga Sawúlu mu malombe? Ihi yabhange o Jijudé mu Damasku kyoso kyevu o njimbu yaboko mwene?

¹⁵ Kyoso Sawúlu kyexile muboka o njimbu yambote yalungu ni Jezú mu malombe, athu avulu nange exile mudiwana, amukwa hanji exile ni njinda, mukonda dya kiki exile mudibhwidisa: “Yú kimwéne o diyala wakexile mu zukutisa mu Jeluzaleme, o athu axikana mu dijina dya Jezú?” (Ika. 9:21) Kyoso Sawúlu kyexile mu jimbulula ku athu se mukonda dyahi walungulula o kibanzelu kyê kyalungu ni Jezú, mwene wexile mwa “lombolwela kyambote kwila Jezú,  mwéne o Kidistu.” (Ika. 9:22) Maji o kulombolola kyambote ki kyene o kima kyeji bhangesa o akwa kudizangeleka, athu axikinine mu Kijila kulungulula o ukexilu wâ. Né kiki Sawúlu keha kwabokela o njimbu yalungu ni Kidistu.

¹⁶ Mivu itatu kupholo o Jijudé mu mbanza ya Damasku exile hanji muzoka ni Sawúlu. Mu kusukaku, “asoto ndunge phala ku mujibha.” (Ika. 9:23; 2 Ko. 11:32, 33; Nga. 1:13-18) Kyoso Sawúlu ni maxibulu amukwa kyeza mu kwijiya o ndunge yiyi, Sawúlu walenge mu kaswekele, waxikina ku “mu kulumukisa mu kinda kyonene bhu njanela yexile mu kilumbu.” O athu akwatekesa Sawúlu kulenga, Luka wa atumbula kala “maxibulu mê [a Sawúlu].” (Ika. 9:25) O izwelu yiyi ilondekesa kwila sayi athu evu Sawúlu kuboka mu mbanza ya Damasku axikina o njimbu yê ya akituka maxibulu a Kidistu.

17. (a) Ihi ibhanga o athu kyoso ki twatudila o njimbu ya Bibidya? (b) Ihi itwatokala kusuluka mu kubhanga ni mukonda dyahi?

¹⁷ Kyoso ki wamateka kuzwela ni jindandu jé, makamba ni athu amukwa yalungu ni ima yambote iwakexile mudilonga, nange wafikile kwila enyoso eji xikina o kidi kya Bibidya ki wexile mwatudila. Nange amoxi axikina maji avulu kana. Mu kidi, nange o jindandu jé akutalatala kala u nguma yâ. (Mat. 10:32-38) Maji se usuluka mu kubandekesa o uhete wé wakujimbulula o Mak’â Nzambi ni kukala ni wendelu wambote, katé mwene o athu yo amukuzukutisa atena kulungulula o ukexilu wâ ni kuxikina o njimbu yambote.—Ika. 17:2; 1 Ph. 2:12; 3:1, 2, 7.

18, 19. (a) Ihi yabhiti kyoso Balanabé kyazokela Sawúlu? (b) Kyebhi kitutena kukayela o phangu ya Balanabé ni ya Sawúlu?

¹⁸ Tutendela se mukonda dyahi o maxibulu akexile ni woma kyoso Sawúlu kyabhixila mu Jeluzaleme yu wa atangela kwila wexile kya dixibulu dya Kidistu. Maji kyoso Balanabé kyamuzokela, o jipoxolo amuxikina. Kyenyiki Sawúlu wabhiti nawu kithangana. (Ika. 9:26-28) Sawúlu wexile muthu wadimuka, maji kexile “ni jisonyi ja [kuboka] o njimbu yambote.” (Lom. 1:16) Mwene waboko ni kuswina kwoso mu Jeluzaleme, o kididi bhwa matekene kuzukutisa ni undanda woso o maxibulu a Jezú Kidistu. O Jijudé mu Jeluzaleme aluwalele kyavulu, amono kwila o muthu amudyelele kyavulu wayi ku mbandu ya jinguma jâ, o Jikidistá. Kyenyiki amesenene kumujibha. O Bibidya yamba kwila “o jiphange kyevu o ima yiyi, a kulumuka-nê ku Sezaleya, ya a mutumikisa ku Tálusu.” (Ika. 9:30) Sawúlu wabelesela o itendelesu yabhana Jezú bhukaxi ka kilunga. Mukonda dya kiki kikale mwene mba o kilunga akatula mbote yavulu.

¹⁹ Twamono kwila Balanabé mwene o muthu wadyangele kukwatekesa  Sawúlu phala o maxibulu amukwa amumone mu ukexilu wambote. Sé phata o henda yalondekesa Balanabé yakwatekesa o jiselevende ja Jihova kukala ni ukamba wambote. Kala kyabhange Balanabé o kwila wene mukwatekesa ni muxima woso o aboki a ubhe mu kilunga mu kukalakala nawu mu sidivisu yakuboka ni mu kwakwatekesa kukula mu nzumbi? Se ubhanga kiki wanda tambula mabesá avulu. Se u muboki wa ubhe wene muxikina o kikwatekesu kyene mu kubhana kala kyabhangele Sawúlu? Mu kukalakala ni aboki ala ni uhete wavulu, eye we wanda bandekesa o uhete wé mu ukunji, wanda sanguluka kyavulu, wanda kala ni ukamba wambote ni jiphange mu kilunga, o ukamba utena kunangenena kate kuhádya ni hádya.

20, 21. Kyebhi o jiselevende ja Nzambi mu ukulu ni mu izuwa ya lelu, kyene mukatula mbote mu kithangana kya kutululuka?

²⁰ Kyoso Sawúlu kyakituka Kidistá yu waxisa o mbanza ya Jeluzaleme, “o ilunga yoso mu Judeya, mu Ngalileya ni mu Samadiya [yakexile] ni kutululuka.” (Ika. 9:31) Ihi yabhange o maxibulu mu ithangana yoyo yambote? (2 Ti. 4:2) O Bibidya yamba kwila ene “exile mu diswinisa.” O jipoxolo ni jiphange jamukwa exile ku pholo dya kilunga, akexile mukolesa o kixikanu kya maxibulu ni kwa endesa. Enyoso “akexile mu belesela Jihova, ni kwa kwatekesa bhukaxi ka nzumbi ikôla.” Mu kifika, Phetele wayi mu swinisa o maxibulu atungile mu mbanza ya Lida mu mbandu ya Salone. O nguzu yê yabhangesa “athu atungile mu mbanza ya Lida” ni mu jimbandu jenyojo, kuxikina Ngana. (Ika. 9:32-35) O maxibulu kehela kwila ima yakamukwa ya alandukisa, ene akexile mudikwatekesa mudya ni kuboka o njimbu yambote. Mukonda dya kiki “o ilunga yexile mu dibandekesa.”

²¹ Ku disukilu dya hama ya 20, o Jimbangi ja Jihova mu jixi javulu akexile ni kutululuka kala kyakexile nakyu o maxibulu. Sayi jinguvulu jakexile mu zukutisa o mundu wa Nzambi mu mivu yavulu, mu kithangana ni mbandu jafu, mukonda dya kiki mu jixi jenyiji sayi ima yakexile mufidisa o kikalakalu kyetu kyakuboka a ikatula. Mu jixi jamukwa o jinguvulu akatula mwene o ifidisu yoso. Mazunda a Jimbangi ja Jihova atenene kuboka mu ididi mubhita athu avulu. Mu kubhanga kiki atambula mabesá avulu.

22. Kyebhi ki utena kukalakala kyambote ni ufolo u wala nawu?

²² O kwila wamukatula mbote ku ufolo u wala nawu? Se watungu mu ixi o jinguvulu ehela o Jimbangi ja Jihova kuboka ni ufolo woso, Satanaji wamesena kyavulu ku kufunyisa phala ni udisunge mu  kusota o jimbote kana o ima yalungu ni Utuminu wa Nzambi. (Mat. 13:22) Kana kwehela kukufunyisa, bhanga yoso phala ni ukalakale kyambote ni ufolo u wala nawu. Lembalala kwila o kithangana kiki phala kuboka ni kuswinisa o kilunga, ni kwila o ima itena kulunguluka mu kithangana ni mbandu.

23, 24. (a) Madisá ebhi utudilonga ku musoso wa Tabita? (b) Twatokala kukala polondo phala kubhanga ihi?

²³ Tala yabhiti ni dixibulu dya muhatu amwixana Tabita mba Doloka. Mwene watungile mu Jope o mbanza yazukamene ni mbanza ya Lida. O phange yiyi yafiyele wexile mukalakala kyambote ni kithangana kyê ni mawuhete exile nawu. “Mwene wakexile mubhanga ima yavulu yambote ni kukwatekesa we kyavulu o jingadyama.” Mu kithangana ni mbandu, wakatele, yu wafu. c O kufwa kwê kwabhekela dilamba dya dikota ku maxibulu ku Jope, bengebenge ku atudi akexile mwalondekesa henda kwa Tabita. Kyoso Phetele kyabhixila mu inzo mwakexile mu sokejeka o kimbi kya Tabita phala ku mufunda, mwene wabhange madiwanu akambele luwa kubhanga ku jipoxolo ja Jezú Kidistu. Phetele wasambe yu wabheka dingi Tabita ku mwenyu! Utena kuxinganeka o kusanguluka kwexile naku o atudi ni maxibulu amukwa kyoso Phetele kya abhingi phala kubokona mu dixilu anga amono kwila Tabita wexile dingi ku mwenyu? O izulukutu yiyi ya aswinisa kyavulu phala kudibhana ni izukutisu yeji kwiza kupholo! Tutena kutendela se mukonda dyahi “athu oso mu mbanza ya Jope evu yalungu ni madiwanu enyá.” Anga avulu mudyâ “axikana o Ngana.”—Ika. 9:36-42.

²⁴ O musoso wa Doloka utulonga madisá ayadi adikota. (1) O mwenyu ki ulaleka kubhita, kyenyiki twatokala kubhanga yoso phala tukale ni dijina dyambote bhu pholo ya Jihova kabasa twala hanji ni kithangana! (Ndo. 7:1) (2) O kidyelelu kya difukunukinu, kya kidi mwene. Jihova wamono o ima yavulu yambote yexile mubhanga Tabita, yu wamubesowala mukonda dya ima yiyi. Mwene wanda lembalala o kikalakalu kyoso kitwamubhanga ni nguzu yoso. Anga se tufwa ande dya Alumajedone, wanda tufukununa.  (Jih. 6:10) Mu kiki kikale se twala “mu ithangana yabhonzo,” mba twala mu kithangana kya kutululuka, tukolokotyenu mu kuboka yalungu ni Jezú Kidistu.—2 Ti. 4:2.