1, 2. (a) Kilwezu kyebhi kyadibhele nakyu Phawulu ni makamba mê ku Efezu? (b) Ihi itwandamona mu kibatulu kiki?

 ATHU avulu exile mulenga ni kubhanga jibuya javulu mu ikoka ya mbanza ya Efezu. Kwamoneka kibuka kya athu exile ni njinda yavulu! O mundu wakwata makamba ayadi a poxolo Phawulu, ya a akoka katé mu kididi kyadikota. O kikoka kyadikota mwexile mubhanga wenji, kyaxala sé athu. Ene ayi mu kididi kya dikota mwexile kyá o athu akexile ni njinda. Mu kididi kiki mwejitena kubokona 25.000 a athu. Athu avulu kejidile se mukonda dyahi mu mbanza mwexile kavwanza, maji nange abanzele kwila amesenene kubhanga kyayibha ku tembulu yâ ni kwa nzambi yâ ya muhatu Alitemiza. Anga amateka kudikola, exi: “Alitemiza o nzambi ya akwa Efezu wala ni kutena!”—Ika. 19:34.

² Lwamukwá dingi Satanaji wamesenene kufidisa o kusanzumuka kwa njimbu yambote ya Utuminu wa Nzambi bhukaxi ka kibuka kya athu exile ni njinda. Kubeta o jiselevende ja Jihova, ki wene ngó mubhetu wa Satanaji. Mu kibatulu kiki, twandadilonga o mibhetu yatele Satanaji phala kufidisa o kikalakalu kya kuboka ni kubwikisa o kutululuka mu kilunga, ku hama ya dyanga. Kyabetakota, twandamona kwila Satanaji walweza mukonda “o mak’â Jihova akexile mu dimwanga dingi ni kutena kwoso, athu avulu akexile mu xikana.” (Ika. 19:20) Mukonda dyahi o Jikidistá jojo aditundu kyambote? Mu kidi Jihova mwéne utukwatekesa kuditunda kyambote. Maji kala kyexile mubhanga o Jikidistá ku hama ya dyanga, twabhingi we kubhanga o mbandu yetu. Ni kikwatekesu kya nzumbi ikôla ya Jihova, tutena kulondekesa idifwa yandatukwatekesa kuditunda kyambote mu ukunji wetu. Kyadyanga tumone o phangu ya Apolo.

3, 4. Ihi yamono Akila ni Pidisila yalungu ni kwijiya kwexile naku Apolo? Ene abhange ihi?

³ Kyoso Phawulu kyexile mu kwenda o njila yê ya katatu kala mukunji wa jixi jengi, mu kuya ku Efezu, Apolo kwene kyá kwakexile. Apolo wexile Judé, mukwa Alexandiya, ku Ijitu. O mbanza yiyi yafumanene. Apolo wexile ni idifwa yavulu yambote. “Mwene wexile mesene mukulonga, wexile ni kwijiya kwavulu kwalungu ni Mikanda Ikôla.” Mwene we “wexile muthu waswina.” Ni kuswina kwoso, mu dilombe wexile mulonga mwakexile Jijudé.—Ika. 18:24, 25.

⁴ Akila ni Pidisila evwile diskulusu dyê. Ene asangulukile kyavulu mu kumwivwa “kulonga yalungu ni Jezú ni kidi kyoso.” O ima yazwelele yalungu ni Jezú, yexile ima ya kidi. Maji o dikaza didi amono kwila Apolo kwamukambele kima, mukonda “wejidile ngó yalungu ni batizu yabokele Nzwá.” O dikaza didi dyalenduka, exile ni ufunu wa kutunga jibalaka, kexile ni hele mukonda dya kwijiya kwavulu kwexile naku Apolo. Mu veji dya kiki, “amwixana bhu mbandu, ya a mu lombolwela kyambote o njila ya Nzambi.” (Ika. 18:25, 26) Kyebhi kyadivu o diyala dyodyo wexile ni kwijiya kwavulu? Mwene walondekesa o kidifwa kyatokala kukala nakyu o Jikidistá joso, o kulenduka.

5, 6. Ihi yabhangesa Apolo kukala ni valolo yavulu ku mesu a Jihova, ni ihi itudilonga ku phangu yê?

⁵ Mukonda dya kuxikina o kikwatekesu kya Akila ni Pidisila, Apolo watenene kubhanga dingi mu sidivisu ya Jihova. Mwene wayi mu mbanza ya Akaya, yu “wakwatekesa athu avulu axikanene Ngana.” Mwene waditundu kyambote mu kubokela o Jijudé exile mulonga kwila Jezú kexile o Mexiya amukanene. Luka wasoneka: “Mwene wakexile mu londekesa ni kuswina kwoso kwila o Jijudé ja tondalele, mu kwa londekesa bhukaxi ka Mikanda Ikôla kwila, Jezú mwéne o Kidistu.” (Ika. 18:27, 28) Apolo wakituka dibesá dyadikota phala o ilunga! Mwene wakwatekesa phala ‘o mak’â Jihova adimwange dingi ni kutena kwoso.’ Ihi itutena kudilonga ku phangu ya Apolo?

⁶ O Jikidistá abhingi kulondekesa o kulenduka. Kala muthu mudyetu wala ni mauhete avulu, sayi yá mauhete a avwala nawu kyá, mba atambula mukonda dya ima yabhiti ku mwenyu, amukwá hanji akala ni mauhete mukonda dya kudilonga. Maji o kulenduka kwetu kwatokala kukala kota, o mauhete metu ndenge. Se kitubhange kiki, o mauhete metu atena kutubhekela maka. Atena kutubhangesa kudizangeleka mba kukala ni ukumbu. (1 Ko. 4:7; Tiy. 4:6)  Se tukala ni kulenduka kwa kidi, twandabhanga yoso ni yoso phala kumona akwetu kala kota etu ndenge. (Fil. 2:3) Kitwandadizokela kyoso kyatubazela, mba kudivwa kyayibha kyoso akwetu kyandatulonga. Kitwandadikwatenena mu kwijiya kwetu kyoso kitumona kwila, o kwijiya kwetu ki kwalungu ni itendelesu ya ubhe ya nzumbi ikôla. Se tulondekesa o kulenduka, Jihova ni Jezú andatubhana ikalakalu yavulu.—Luk. 1:51, 52.

7. Kyebhi Phawulu ni Apolo kyabhana phangu yambote yalungu ni kulenduka?

⁷ O kulenduka kutufidisa kukala ni unguma mba difuba. Satanaji wamesenene kyavulu kubhangesa o Jikidistá ja dyanga kudiwanuna mu ibuka ibuka. Wejisanguluka kyavulu se wejitena kubhangesa Apolo ni Phawulu, phange jiyadi akulu mu nzumbi, mukonda dya difuba kuzoka mudyâ se nanyi wabetele kota mu kilunga. Kiki kyejitena kubhita! Mukonda mu Kolindu, sayi Jikidistá exile muzwela: “Eme ngi mukayedi wa Phawulu,” amukwá exi, “eme ngi mukayedi wa Apolo.” O kwila Phawulu ni Apolo exile muswinisa o ukexilu yú wejitena kuwanuna o kilunga? Kana! Mu veji dya kiki, Phawulu wexile mubhana valolo ku yoso yexile mubhanga Apolo, mukonda dya kiki wexile mumubhana dingi ikalakalu. Apolo wexile mukayela o itendelesu ya Phawulu. (1 Ko. 1:10-12; 3:6, 9; Tit. 3:12, 13) Yiyi phangu yambote yalungu ni kulondekesa kulenduka kyoso kituya ni kukalakala ni jiphange jetu!

8. Njila yebhi mwabhiti Phawulu phala kuvutuka mu Efezu, ni mukonda dyahi?

⁸ Phawulu wakanene kuya ku Efezu, yu wakumbidila o kikanenu kyê. a (Ika. 18:20, 21) Tala ihi yabhange mwene phala kuvutuka ku Efezu. Mwene wexile mu Andiyokiya ya Sídya. Phala kuya ku Efezu, o kubhita ku Selewuxa yexile o njila yabhutu dingi. Maji mu veji dya kiki, mwene “wabhiti mu jisanzala mu kibatu kya Azya.” Sayi divulu dyamba kuma, kala kilondekesa Ikalakalu 18:23 ni 19:1, Phawulu wende 1.600 ya jikilómetulu! Mukonda dyahi Phawulu wasolo o njila yabhonzo? Mukonda wamesenene “kuswinisa o maxibulu oso.” (Ika. 18:23) Kala kyabhiti mu njila yê yadyanga ni ya kayadi, mu njila yê ya katatu kala mukunji wa jixi jengi Phawulu watokalele kubhanga nguzu yavulu, maji wadyelele kwila kyene o kima kyatokalele kubhanga. Lelu o tufunga twa ilunga ni ahatu’â ene mukayela o phangu ya Phawulu. Tusakidila o henda yene mulondekesa.

9. Mukonda dyahi kibuka kya maxibulu abhingile kwabatizala dingi, ni disá dyebhi ditudilonga?

 ⁹ Kyabhixila ku Efezu, Phawulu wasange kibuka kya 12 kya maxibulu a Nzwá dya Batizu. Ene a abatizala mu batizu ya Nzwá, maji mu kithangana kyenyokyo o batizu yoyo ki yexile dingi ni valolo. Ku mbandu ya mukwá, ene kejidile kima kyalungu ni nzumbi ikôla. Phawulu wa ajimbulwila o valolo ya kwabatizala mu dijina dya Jezú. Kala kyabhange Apolo, ene alondekesa kulenduka ni kwila exile ni hanji phala kudilonga dingi. Kyoso kya abatizala mu dijina dya Jezú, atambula o nzumbi ikôla ni mauhete bhukaxi ka madiwanu. Kiki kilondekesa kwila kukayela o itendelesu ya ubhe ya kilunga kya Jihova, kubheka mabesá.—Ika. 19:1-7.

10. Mukonda dyahi Phawulu wayi muboka mu xikola ya Tilanu, ni phangu yebhi yatuxila mwene?

¹⁰ Kwabhiti dingi kima kyakwatekesa o mak’â Jihova kudimwanga dingi. Ni kuswina kwoso, mu mbeji jitatu Phawulu waboko mu dilombe. Sumbala wakwatekesa “o mundu kuxikina o Utuminu wa Nzambi,” amoxi amateka kumuzukutisa. Mu veji dya kuzanga o kithangana kyê mu kuzwela ni yó “akexile muzwela kyayibha yalungu ni Njila ya Ngana,” yu wamateka kubhanga madiskulusu mu xikola ya Tilanu. (Ika. 19:8, 9) Yó amesenene kukula mu nzumbi atokalele kutunda ku dilombe ni kuya mu xikola ya Tilanu. Kala kyabhange Phawulu, kyoso kitumona kwila o mukwa dibhata kamesena kutwivwa mba wamesena ngó kuzoka, etu tumubhana dikunda. Mukonda kwene hanji athu avulu alenduka amesena kwivwa o njimbu yambote!

11, 12. (a) Kyebhi Phawulu kyangastala kyambote o kithangana kyê kyoso o athu kyakambele kukala kubhata? (b) Kyebhi o Jimbangi ja Jihova kyene mu kayela o phangu ya Phawulu mu ukunji wâ?

 ¹¹ Phawulu wexile mubhanga madiskulusu mu xikola yiyi izuwa yoso, nange tunde ku 11 dya ola ndu ku 16 dya ola. (tala o “nota de estudo mu Ika. 19:9, mu nwtsty, mu phutu.) Nange kyokyo kyexile o kithangana kyatululukile dingi ni kwila o kalolo kavudile we dingi, mukonda dya kiki athu avulu exile munyoha ni kudya kama kosokoso. Se Phawulu wabhange kiki mu mivu iyadi, mwene wangastala 3.000 ja ji ola mu kulonga o mak’â Nzambi. b Kiki kyene o kima kya mukwá kyabhangesa o mak’â Jihova kudimwanga dingi. Phawulu wexile mukalakadi waswina, yu wexile mulungulula o ukexilu wê wa kuboka ni kithangana phala kubokela dingi athu avulu. Mu kyenyiki ihi yabhiti? “Enyoso atungile mu kibatu kya Azya, kikale o Jijudé ni Jingeleku, evu o maka a Ngana.” (Ika. 19:10) Sé phata, ni kuswina kwoso Phawulu waboko yalungu ni Utuminu wa Nzambi!

¹² Lelu o Jimbangi ja Jihova akalakala we ni kuswina kwoso. Tubhanga nguzu phala kuzwela ni athu mu kithangana ni mu ididi mu tutena kwasanga. Tuboka mu ikoka, mu maloja, mu itanda ni mu ididi mwimanena o makalu. Tuzwela we ni athu bhukaxi ka mutelembe ni bhukaxi ka mikanda. Kyoso kituboka nzo ni inzo, tubhanga yoso ni yoso phala kusanga o athu mu kithangana kyala kubhata.

13, 14. (a) Jihova wabhana kwa Phawulu o kutena kwa kubhanga ihi? (b) Kilwezu kyebhi kyatele o twana twa Seva, ni kyebhi athu avulu ala mu jingeleja ja makutu kyene mu kayela o phangu yâ?

¹³ Luka ututangela kwila Phawulu waditundu kyambote mu ukunji wê, mukonda “Nzambi wakexile mubhanga madiwanu a makota  bhukaxi ka Phawulu.” O athu akexile mu tula o izwatu yâ ni malesu ku mukutu wa mwene, ni kwa ambata bhwakexiile o jihaxi. O jihaxi ja kexile mu disanza, o jinzumbi jayibha ja kexile mu tunda mu mikutu yâ. c (Ika. 19:11, 12) O kutolola o jinzumbi jayibha kwabhangesa Phawulu kukala ni fuma. Kiki kyamubhekela we maka.

¹⁴ “Sayi Jijudé akexile mu kwenda mu ididi yavulu mu kukaya o madimonyo”, afikisa kubhanga we o madiwanu abhange Phawulu. Akexile mu tumbula o dijina dya Jezú ni dya Phawulu. Luka wazwela kwila sambwadi dya twana twa Seva, asoto kubhanga kiki. Ene exile twana twa mukunji wa dikota. Maji o dimonyo dya ambela: “Eme ngejiya Jezú, o Phawulu nga mwijiya we, maji enu a nanyi?” Mu kusuluka, o diyala wexile ni dimonyo wa ditakula kuthandu dyâ kala kyama. Ene anga alenga mu inzo yenyóyo ni thuxi ni jifidila mu mikutu. (Ika. 19:13-16) Kiki kyalondekesa kwila Phawulu wexile mubhanga o madiwanu ni kutena kwa Jihova, maji o athu enyó amufikisa kana. Lelu mazunda a athu afika kwila kabasa atumbula o dijina dya Jezú mba azwela kuma Jikidistá, andatena kyá kubhuluka. Maji Jezú walondekesa kuma o yó abhanga o vondadi ya Tat’ê, éne ngó andatena kubhuluka.—Mat. 7:21-23.

15. Kyebhi kitutena kukayela o phangu ya akwa Efezu se twala ni kima kyalungu ni wanga?

¹⁵ O kima kyabhiti ni twana twa Seva kyabhangesa athu avulu kukala ni wôma wa Nzambi, kukituka Jikidistá ni kuxisa o ima yalungu ni wanga. O wanga wavudile mu mbanza ya Efezu. Katé mwene o madivulu exile mulonga ima yalungu ni wanga. Athu avulu ku Efezu abheka o madivulu mâ alungu ni wanga, ya a ajokotesa bhu pholo dya mundu. O madivulu yá atele mazunda ni mazunda a jikwanza. d Luka wambe: “Kyenyiki, o mak’â Jihova akexile mu dimwanga dingi ni kutena kwoso, athu avulu akexile mu xikana.” (Ika. 19:17-20) Kiki kilondekesa kwila o kidi kya mak’â Jihova kyatolola o makutu ni wanga! Athu yá atuxila phangu yambote. Mu izuwa yetu we wanga wavulu. Kala kyabhange o akwa Efezu, se tumona kwila twala ni kima kyalungu ni wanga, ni lusolo lwoso twatokala ku kyeha! Tulengyenu o ima yiyi, né mwene se yate kyavulu.

16, 17. (a) Zwela kyebhi Demétulu kyamatekesa o kavwanza mu mbanza ya Efezu. (b) Kyebhi o akwa Efezu kyazokela o nzambi yâ?

¹⁶ Kindala twanda dilonga o mubhetu wa Satanaji utwatumbula ku dimatekenu dya kibatulu kiki. Luka wasoneka: “Kwa moneka kavwanza kadikota mukonda dya Njila ya Ngana.” Mwene kexile mutanga makutu. e (Ika. 19:23) Sayi diyala amwixana Demétulu mukwa kuyudika iteka ya phalata mwéne wamatekesa o kavwanza. Mwene wabhangesa o akalakadi ni akwâ kumubhana matwi mu kwalembalesa kwila o kitadi kyâ kyexile mutunda mu wenji wenyó. Wa atangela kwila o njimbu ya Phawulu yejizanga o wenji wâ mukonda o Jikidistá ja kidi kene mubheza o iteka. Wabhangesa o jingivwidi jê kukala ni njinda mu kwalembalesa kwila atokalele ixi yengi, ni kwila o nzambi yâ ya muhatu Alitemiza ni tembulu yobhakule kwa mwene a ijidile ku athu mu ngongo yoso, eji ku imona kyá “kala ki yala ni valolo.”—Ika. 19:24-27.

¹⁷ O izwelu ya Demétulu yabhangesa o athu kuzokela Alitemiza. O athu exile mukalakala ni phalata adikola mu veji javulu: “Alitemiza o nzambi ya akwa Efezu wala ni kutena!” Mukonda dya kiki o mbanza yoso yezala ni kavwanza, kyenyikiphe kwamoneka athu exile ni njinda yavulu. f Kuma wexile muta ku pholo o ibhindamu ya jiphange, Phawulu wamesenene kubokona mu kididi mwexile o athu exile ni njinda phala kuzwela nawu, maji amudyondele phala kabokonemu. Sayi diyala amwixana Xandele wemanene yu wamesenene kuzwela. Kuma wexile Judé, wamesenene kujimbulula o kutungula kwa Jijudé ni Jikidistá jojo. O kima kyazwela mwene ki kyabhangesa o mundu kudixibha. Kyoso kyamono kwila mwene wexile Judé, mu ola jiyadi enyoso exile mu dikola, exi: “Alitemiza o nzambi ya akwa Efezu wala ni kutena!” Tunde ukulu o athu ene mubhanga kavwanza ni jimvunda mukonda dya ngeleja yâ.—Ika. 19:28-34.

18, 19. (a) Kyebhi o dimixi dya mbanza kyatululukisa o mundu? (b) Kyebhi o jinguvulu kyene mulanga o mundu wa Jihova, ni kyebhi o ukexilu wetu utena kukwatekesa?

¹⁸ Mu kusukaku o dimixi dya mbanza watululukisa o mundu.  Mwene wakwatekesa o mundu kumona kwila o Jikidistá kamesenene kubwikisa o tembulu yâ ni nzambi yâ ya muhatu. Wa akwatekesa we kutendela kwila Phawulu ni akwâ kabhange kima kyayibha mu tembulu ya Alitemiza ni kwila se andalele kwafundisa atokelele kwambata o maka mu jinzo ja kufundisa. Nange o kima kya abhangesa kuxinganeka dingi o kwalembalesa kwila ejitena kukala ni maka ni akwa Loma mukonda dya kufundisa kyayibha ni kubheka o kavwanza kenyoko. Mu kusuluka, wamwanganesa o mundu. O athu amateka kukala ni njinda ni lusolo, éne amoxi atululuka ni lusolo mukonda dya izwelu yiyi yambote.—Ika. 19:35-41.

¹⁹ Yoyo ki yexile o veji yadyanga yalungu ni muthu wala ni ungana mu kukwatekesa o akayedi’a Jezú. Ki yejikala we o veji ya sukina. Poxolo Nzwá wamono kisuma kyalondekesa kwila mu izuwa yiyi isukidilaku, o jinguvulu ja mundu yú josokese ni ixi, eji ‘minya’ o nzungule dya izukutisu yejita Satanaji ku maxibulu a Jezú. (Dij. 12:15, 16) Kiki kyene kya mubhita. Mu veji javulu, o afundixi ene mulungisa o Jimbangi ja Jihova mu kwabhana ufôlo phala atene kudyongeka ni kutula o njimbu yambote ku athu. Mu kidi o ukexilu wetu utena kutukwatekesa kutambula o kikowe kiki. Nange o ukexilu wa Phawulu wabhangesa o jinguvulu ku Efezu kumuzola ni kumuxila, mukonda dya kiki amesenene o mbote yê. (Ika. 19:31) Twamesena kwila o ukexilu wetu ubhangesa o athu kukala ni ibanzelu yambote yalungu n’etu, mukonda kitwejiya se wene wanda kwakwatekesa kuxikina o njimbu yambote.

20. (a) Kyebhi ki udivwa mu kumona kwila ku hama ya dyanga ni mu izuwa yetu, o mak’â Jihova ene mu dimwanga ni kutena kwoso? (b) Ihi iwamesena kubhanga mu kumona kwila Jihova wene mutubhana o kikowe?

²⁰ Tusanguluka mu kumona kwila ku hama ya dyanga “o mak’â Jihova akexile mu dimwanga dingi ni kutena kwoso.” Tusanguluka we mu kumona kwila Jihova wene mutubhana kikowe mu izuwa yetu. Wamesena kubhanga o mbandu yé, né mwene se yofele, phala tutambule o kikowe kiki? Kayela o phangu ya athu utwadilongo mu kibatulu kiki. Kala u muthu walenduka, xikina o itendelesu ya ubhe itutambula ku kilunga kya Jihova, kalakala ni kuswina kwoso, lenga o wanga, bhanga yoso ni yoso phala kubhana umbangi bhukaxi ka ukexilu wé wambote.