1-6. Tanga musoso ulondekesa kwila o Jimbangi ja Jihova aboka mu ididi yoso.

 BEBEKA, munzangala Mbangi ya Jihova mu ixi ya Gana, o xikola mwakexile mudilonga yakituka o mbambe yê. Kyoso kyakexile muya mu xikola, mu mbwenga yê wexile mu kwambatamu madivulu metu. Mu kithangana kya kunyoha wexile mubhana umbangi ku jikoleka jê. Bebeka wexile mulonga o Bibidya ku jikoleka jê javulu.

² Mu kikolo kya Madagascar, ku Africa, dikaza aboki athembu yoso, mu ithangana yavulu exile mukwenda 25 a jikilometulu, mu mwanya watu. Ene exile mubhanga kiki phala kulonga o Bibidya ku athu atungu mu dyembu dyala dikanga.

³ Phala kusanga o athu atungu bhu mbandu ya jingiji ja Paraguai ni Paraná, o Jimbangi ja Jihova ku Paraguai kumoxi ni jiphange adibhakula, atundu mu 15 a jixi, abhange ulungu wa 130 a jimetulu, utena kwambata 12 a athu. Bhukaxi ka ulungu yú, o aboki a Utuminu aboko o njimbu yambote mu ididi yabhonzo, kejitena kubhixilabhu mu maukexilu engi.

⁴ O Jimbangi ja Jihova ku Alasca, akatula mbote mu kithangana kyabetakota, mu kixibhu. Kyoso kyabhixila o jinaviyu jambata o athu ala mu kithangana kya kunyoha ni ajitu, o Jimbangi ja Jihova a abokela ni madivulu mu madimi avulu. Mu ixi ya Alasca, sayi jiphange ni kikwatekesu kya kiphululu, ene mutula o njimbu yambote ku athu atungu ku maxokololo a ixi yiyi. O athu enyá a exana kala aleútes, atapascas, tsimshians ni tlingits.

⁵ Phangyetu papá Larry, watungu mu mbanza ya Texas, ku Estados Unidos, wexile muboka o njimbu yambote mu inzo mwalangela o athu akuka kyá. Mwene wabhiti mu kilwezu, anga wakituka kinema. Maji né kiki, papá Larry wexile muboka ni nguzu yoso. Wexile muboka ku akwâ o njimbu yambote ya Utuminu, yalungu ni  kidyelelu kyê kya kwila, bhukaxi ka Utuminu wa Nzambi wandavutuka dingi o kwenda.—Iza. 35:5, 6.

⁶ Phala kuya mu kyônge kya ilunga ku ixi ya Mianmar, Jimbangi ja Jihova atundu ku Mandalay endele izuwa itatu mu ulungu. Kuma amesenene kuboka o njimbu yambote ambata madivulu, anga a abhana ku athu engi exile mu ulungu. Kyoso o ulungu wexile mu kwimana mu mbanza mba dyembu dimoxi, ene exile mutuluka phala kubokela o athu atungu mu dyembu dyenyodyo. Mu kithangana kiki, sayi athu exile mu xala mu njila, athu engi exile mu haba, mukonda dya kiki kyoso o aboki kyexile muvutuka mu ulungu exile musanga athu engi, mu kiki o ulungu wedile kala “mbambe ya ubhe” phala o aboki.

7. Mu maukexilu ebhi o abhezi a Jihova aboka o njimbu yalungu ni Utuminu wa Nzambi, ni ihi yandala ene?

⁷ Kala kilondekesa ya jiphange jiji, o abhezi a Jihova ku mundu woso aboka ni kuswina yalungu “ni Utuminu wa Nzambi.” (Ika. 28:23) Ene aboka nzo ni nzo, bhu kaxi ka mikanda, azwela ni athu mu ikoka, ni mu mitelembe ya kafwetele. Aboka we kyoso kyamukwenda mu makalu ni mu kithangana kya kudya kusalu. Kabasa kithangana kimoneka muthu, ene aboka o njimbu yalungu ni Utuminu wa Nzambi. Sumbala o maukexilu a kuboka avulu, maji o Jimbangi joso ja Jihova amesena ngó kima kimoxi—o kuboka o njimbu yambote kwosokwoso kusanga o athu.—Mat. 10:11.

8, 9. (a) Mukonda dyahi o kikalakalu kya kuboka o njimbu ya Utuminu, madiwanu? (b) Kibhwidisu kyebhi kitwandatambwijila? Ihi itwatokala kwijiya?

⁸ O kwila eye umutangi wetu wa kazola, ubhanga mbandu ya kifuxi kya aboki a Utuminu, ene mukalakala mu 235 ajixi ndenge? Se kyene, eye wene mukwatekesa o kikalakalu kiki kya kuboka o Utuminu wa Nzambi ku mundu woso! Yoso itwabhange kyá ku mundu woso, madiwanu. Sumbala ni ibhidi ni izukutisu yavulu, kala o kwabalakala ku jinguvulu, maji né kiki o Jimbangi ja Jihova abhana umbangi yalungu ni Utuminu wa Nzambi ku athu a ifuxi yoso.

⁹ Kiki kitubhangesa kudibhwidisa: Mukonda dyahi seku kibhidi mba kizukutisu kya Satanaji kibhangesa o Jimbangi ja Jihova kweha o kikalakalu kya kuboka yalungu ni Utuminu? Phala kutambwijila o kibhwidisu kiki, twatokala kwijiya yabhiti ni jipoxolo ku hama ya dyanga. Mukonda etu twamusuluka ngó mu kubhanga o kikalakalu kyamateka mu izuwa ya jipoxolo.

10. Kikalakalu kyebhi kyabetele kota ku mwenyu wa Jezú, ni ihi yejidile mwene yalungu ni kikalakalu kiki?

¹⁰ Jezu Kidistu mwéne wabhange o kilunga kya Jikidistá, mwene wadibhakula mu sidivisu ya kuboka o njimbu yambote ya Utuminu wa Nzambi. Kiki kyexile o kikalakalu kya betelekota ku mwenyu wê. Mwene wambe: “Eme ngatokala we kuboka o njimbu yambote ya Utuminu wa Nzambi mu jimbanza ja mukwá, mukonda kyene kya ngi tumikisa.” (Luk. 4:43) Jezú wejidile kwila o kikalakalu kiki kyamatekene mwene, keji tena kukizubha ubheka wê. Mu kithangana ande dya kufwa, mwene wakanena kwila o njimbu yambote ya Utuminu eji kwitula “mu jixi joso.” (Mál. 13:10) Maji kyebhi kyejitena ku kibhanga ni ananyi eji ku kibhanga?

11. Kikalakalu kyebhi kya katunda kyabhana Jezú ku maxibulu mê, ni kikwatekesu kyebhi kyeji tambula ene?

¹¹ Kyoso Jezú kyafu, anga amufukununa, watukulukila o maxibulu mê yu wa abhana o kikalakalu kiki: “Mu kiki-phe, ndenu mwa kà longe maxibulu ku akwá jixi joso, ni kwa batizala mu dijina dya Tata, ni dya Mona, ni dya nzumbi ikôla, ni kwa longa kubelesela o ima yoso i nga mi tumu. Ijiyenu-kyu kwila, eme nganda kala ni enu izuwa yoso, katé ku dizubhilu dya mundu.” (Mat. 28:19, 20) O izwelu “eme nganda kala ni enu,” ilondekesa kwila o maxibulu a Jezú ejitambula o kikwatekesu kyê mu kubhanga o kikalakalu kiki kya kulonga ni kubhanga maxibulu. Ene ejibhindamena mwene o kikwatekesu kiki, mukonda Jezú wakanene ku maxibulu mê kwila “anda mi zemba kwala akwa jixi joso.” (Mat. 24:9) O maxibulu ejitena we kudyelela mu kikwatekesu kyengi. Ande dya kubanda ku dyulu, Jezú watangela o maxibulu mê kwila eji kwa swinisa ku nzumbi ikôla phala ene kukala jimbangi jê “katé ni ku maxokololo a jixi.”—Ika. 1:8.

12. Ibhwidisu yebhi itwatokala kudibhanga, ni mukonda dyahi twabhingi kwijiya o itambwijilu?

¹² Maji twatokala we kudibhanga o ibhwidisu yiyi: O kwila o jipoxolo ja Jezú ni maxibulu engi ku hama yadyanga, abhanene mwene valolo mu kikalakalu kyawu? O kibuka kiki kyatolo, o kwila abhana mwene umbangi wa lungu ni Utuminu wa Nzambi, sumbala ni izukutisu? O kwila atambula mwene o kikwatekesu kya Jezú ni kya nzumbi ikôla ya Jihova mu kubhanga o kikalakalu kiki? O itambwijilu ya ibhwidisu yiyi ni yamukwa tu isanga mu divulu dya Ikalakalu. Twabhingi mwene kwijiya o itambwijilu. Mukonda dyahi? Mukonda kala kya kanena Jezú, o kikalakalu kyabhana mwene  kyejisuluka “katé ku dizubhilu dya mundu.” Kyenyiki, o kikalakalu kiki phala o Jikidistá joso ja kidi, katé mwene etu twatungu mu izuwa yiyi yasukidilaku. Twawabhela kyavulu o misoso itusanga mu divulu dya Ikalakalu.

13, 14. (a) Nanyi wasoneka o divulu dya Ikalakalu, ni kyebhi kyeza mu kwijiya o ima yasoneka? (b) Ima yahi itusanga mu divulu dya Ikalakalu?

¹³ Nanyi wasoneka o divulu dya Ikalakalu? O divulu didi ki ditumbula se nanyi o musoneki, maji o izwelu yadyanga ilondekesa kwila o muthu wasoneka o divulu dya Luka mwéne we wasoneka o divulu dya Ikalakalu. (Luk. 1:1-4; Ika. 1:1, 2) Kyenyiki, tundé ukulu, Luka, o “musaki wa jihaxi” mukwa kujimbulula kyambote o misoso, mwéne ene mu mu tumbula kala o musoneki wa divulu dya Ikalakalu. (Kol. 4:14) O divulu dya tenesa 28 a mivu, tunde Jezú kyamufukununa mu muvu wa 33 K.K. ndu ku muvu wa 61, kithangana kyoso Phawulu kyatundu mu kaleya. Mu ima yasoneke Luka sayi bhabha wa ditumbulamu we, kiki kilondekesa kwila sayi izulukutu yabhiti, mwene we wexilebhu. (Ika. 16:8-10; 20:5; 27:1) Luka wexile mukwa kutokwesa kyavulu, nange mwene weza mu kwijiya o ima bhukaxi ka Phawulu, Balanabé, Filipe ni athu amukwa a atumbula mu divulu didi.

¹⁴ Ima yebhi itutena kusanga mu divulu dya Ikalakalu? Mivu kudima, mu divulu dyê, Luka wasoneka o ima yazwela Jezú ni ima yabhange. Maji mu divulu dya Ikalakalu mwene wasoneka o ima yazwela o akayedi a Jezú ni ima yabhange ene. O divulu dya Ikalakalu, ditanga ima yakatunda yabhange o athu, sumbala exile mwamona kala “athu oso-oso, kadilongele kyavulu.” (Ika. 4:13) O divulu didi di tujimbulula se kyebhi kyamoneka o kilunga kya dyanga ni ukudilu wê. Dilondekesa we se kyebhi o Jikidistá ku hama ya dyanga kyexile muboka ni kumona o ukunji wâ. (Ika. 4:31; 5:42) Dijimbulula se kyebhi o nzumbi ikôla ya akwatekesa kuboka o njimbu yambote. (Ika. 8:29, 39, 40; 13:1-3; 16:6; 18:24, 25) O divulu dya Ikalakalu disuluka mu kujimbulula o dyambu dya Bibidya, dyalungu ni kuzelesa o dijina dya Nzambi bhukaxi ka Utuminu wê mwa Kidistu. Dilondekesa we kwila o jipoxolo aditundu kyambote mu kuboka o Utuminu wa Nzambi sumbala ni izukutisu.—Ika. 8:12; 19:8; 28:30, 31.

15. Mbote yebhi itutena kukatula mu kudilonga o divulu dya Ikalakalu?

¹⁵ Kima kyambote kudilonga o divulu dya Ikalakalu, mukonda dikolesa o kixikanu kyetu! Kudilonga o phangu ya kuswina ni nguzu  yabhange o akayedi a Kidistu ituswinisa. Yanda tukwatekesa kukayela o phangu ya jiphange jetu ku hama ya dyanga. Twandakala dingi polondo phala kukumbidila o kikalakalu kyetu kya kubhanga “maxibulu.” O divulu didi di wamutanga kindala ni dyambu ‘Bhana Umbangi’ Walungu ni Utuminu wa Nzambi, a dibhange phala kukukwatekesa kudilonga kyambote o divulu dya Ikalakalu.

16. O divulu didi dyandatukwatekesa mu maukexilu ebhi?

¹⁶ O divulu didi ditena kutukwatekesa mu maukexilu ebhi? Ditena kutukwatekesa mu maukexilu atatu: (1) Kutudyelelesa kwila Jihova, bhukaxi ka nzumbi yê ikôla, wandatukwatekesa mu kikalakalu kya kuboka o njimbu ya Utuminu ni kubhanga maxibulu. (2) Kuboka ni kuswina mu kukayela o phangu ya akayedi a Jezú ku hama yadyanga, (3) Kubandekesa o kuxila kwetu ku kilunga kya Jihova ni kwa yó ala kupholo dya kikalakalu kya kuboka ni kulanga o ilunga.

17, 18. Kyebhi kyasokejeka o divulu didi? Ihi itena ku kukwatekesa kutendela dingi o ima iwamudilonga?

¹⁷ Kyebhi kyasokejeka o divulu didi? Kyoso ki uya ni kudilonga wandamona kwila o divulu didi adiwanuna mu dinake dya jimbandu, o jimbandu joso jizwela yalungu ni divulu dya Ikalakalu. Kitwanda dilonga velusu mu velusu, maji twandakatula mbote mu madisá a izulukutu yosoneke mu divulu dya Ikalakalu ni kukumbidila itwadilongo. Kudimatekenu dya ibatulu, mwala izwelu ijimbulula o kima kyabetakota kyala mu kibatulu, ilondekesa we o jivelusu ja divulu dya Ikalakalu jitwanda dilonga.

 ¹⁸ Mu divulu didi mwala we ima ya mukwá itena kukukwatekesa mukudilonga o Bibidya ubheka wé. Kyoso ki uya ni kubanza mu musoso wa Bibidya, o jifoto jafwama janda kukwatekesa kutendela o izulukutu yala mu divulu dya Ikalakalu. Mu ibatulu yavulu mwala jikaxa jitena ku kukwatekesa kutendela dingi o ima i wamudilonga. Sayi jikaxa jizwela yalungu ni muthu amutumbula mu Bibidya ni kwila mwene wabhana phangu yambote itutena kukayela. Jikaxa jamukwa jizwela yalungu ni ididi, izulukutu, idifwa mba athu engi a atumbula mu divulu dya Ikalakalu.

19. Ibhwidisu yebhi itwatokala kudibhanga mu ithangana ni ithangana?

¹⁹ O divulu didi ditena kukukwatekesa o kuditonginina mudyé. Né mwene se wala kya umuboki wa Utuminu mu mivu yavulu, sayi ithangana watokala kubanza se wazolo mba wamusuwa hanji o kikalakalu kya kuboka. (2 Ko. 13:5) Dibhwidise: ‘O kwila ngamumona o sidivisu ya kuboka kala kikalakalu kingatokala kukibhanga ni lusolo? (1 Ko. 7:29-31) Ngamuboka o njimbu yambote ni kuswina kwoso? O kwila ngidyelela ku ima ingamuboka? (1 Te. 1:5, 6) O kwila ngibhanga yoso ingitena mu kikalakalu kya kulonga ni kubhanga maxibulu?’—Kol. 3:23.

20, 21. Mukonda dyahi twatokala kuboka ni lusolo lwoso, ni ihi itwamesena kwila eye usuluka mu kubhanga?

²⁰ Ki twatokala kujimba o kikalakalu kyabeta kota kyatubhana: o kikalakalu kya kulonga ni kubhanga maxibulu. Kyoso o izuwa ki iya ni kubhita, twatokala kuboka dingi ni lusolo lwoso. O mundu yú wayibha wamuya kudisukilu dyê ni lusolo. Athu avulu ala mu kilwezu. Ki twejiya se athu akuxi ala ni mixima yambote andala kwívwa o njimbu yetu. (Ika. 13:48) Twatokala kwakwatekesa ande dya kwiza o dizubhilu.—1 Ti. 4:16.

²¹ Kyenyiki, tubhange yoso ni yoso phala tukayele o phangu ya akunji a Utuminu atungu mu hama ya dyanga. Twamesena kwila, kyoso ki uya ni kudilonga o divulu didi, dyene dikukwatekese kuboka ni kuswina kwoso, ni kwila, ukale ni nguzu mu kusuluka ‘mu kubhana umbangi walungu ni Utuminu wa Nzambi.’—Ika. 28:23.