1, 2. Ima yebhi yakatunda yejibhita mu njila yejibhanga Balanabé ni Sawúlu? Kyebhi o kikalakalu kyâ kyeji kwaketekesa kukumbidila o izwelu ya Ikalakalu 1:8?

 O JIPHANGE mu kilunga kya Andiyokiya asangulukile kyavulu. Mwaxaxi ka jipolofeta ni jimesene joso akexilemu Balanabé ni Sawúlu, a asolo kwala o nzumbi ikôla phala kuboka o njimbu yambote ku maxokololo. a (Ika. 13:1, 2) Kidi kwila sayi mayala a atumikisine kyá kala akunji akwa jixi jengi. Maji a atumikisine mu ididi mwakexile kyá Jikidistá. (Ika. 8:14; 11:22) Mu kithangana kyenyokyo, Balanabé ni Sawúlu kumoxi ni Nzwá dya Máluku, a atumikisine mu ididi o athu akambele kwivwa o njimbu yambote.

² Mu 14 kya mivu kudima ande dya kubhita o ima yiyi, Jezú wambe ku maxibulu mê: “Mwanda . . . kukala mu jimbangi jami mu Jeluzaleme, mu Judeya yoso, mu Samadiya, katé ni ku maxokololo a jixi.” (Ika. 1:8) O kikalakalu kyatambula Balanabé ni Sawúlu kyakwatekesa kyavulu kukumbidila o izwelu yiyi ya Jezú! b

3. Mu izuwa ya jipoxolo ihi yexile mubhonzesa o athu kwendela njila?

³ Lelu kuma twala kyá ni makalu ni iphululu o athu atena kyá kubhanga o njila ya makanga mu ola imoxi mba jiyadi. Maji ki kyene kyexile mu izuwa ya jipoxolo. Mu kithangana kyenyokyo o athu phala kubhanga njila abhingile mwene kwendela bhoxi, mu veji javulu abhingile  kwendela mu ididi yazendalala kuma o muthu wabhingile kwenda 30 a jikilometulu mu kizuwa kimoxi. Mukonda dya kwenda o njila yoso yiyi, o muthu wexile mubhwila kyavulu! c Mu kiki, sumbala Balanabé ni Sawúlu amesenene kyavulu kubhanga o kikalakalu kyâ, ejidile kwila ejibhinga kubhanga nguzu yavulu ni kuta ku pholo o ibhindamu ya akwâ phala kukumbidila o ikalakalu yâ.—Mat. 16:24.

4. (a) Ihi yakwatekesa kusola Balanabé ni Sawúlu? Ihi yabhange o jiphange ku Andiyokiya kyoso kyevu o kikalakalu kyatambula ene? (b) Kyebhi kitutena kukwatekesa yó atambula ikalakalu mu ilunga?

⁴ Maji mukonda dyahi o nzumbi ikôla yambe kwila Balanabé ni Sawúlu a asolo “phala kubhanga o ikalakalu” yoyo? (Ika. 13:2) O Bibidya ki itutangela. Maji twejiya kwila o nzumbi ikôla yene yakwatekesa phala kusola o mayala enyó. Ki kwala kima kilondekesa kwila o jipolofeta ni jimesene mu Andiyokiya kaxikina o maka enyá. Mu veji dya kiki, ene abhana o kikwatekesu kyoso kyabhindamene phala kukumbidila o kikalakalu kyâ. Xinganeka kyebhi kyadivu Balanabé ni Sawúlu kyoso o jiphange jâ mu nzumbi, sé kwakwatela lwimbi, ajejuwala, asambe, “atula o maku mâ kuthandu dya Balanabé ni Sawulu, ya a asula.” (Ika. 13:3) Etu we twatokala kukwatekesa yó atambula ikalakalu mu kilunga kya Nzambi, kala o jiphange a asola kala tufunga mu ilunga. Mu veji dya kwakwatela lwimbi, twatokala kwazola ni kwaxila “mukonda dya kikalakalu kyâ.”—1 Te. 5:13.

5. Ihi yabhingile kubhanga Balanabé ni Sawúlu phala kubhana umbangi mu kikolo kya Xipele?

⁵ Kyoso kyabhixila ku Selewuxa, o mbanza yexile ku mbandu ya musanza wa kalunga, yazukamene ku Andiyokiya Balanabé ni Sawúlu ayi katé ku kikolo kya Xipele, nange endele 200 ja jikilometulu. d Kuma amuvwalele ku Xipele, sé phata Balanabé wexile ni hanji yavulu phala kubokela o athu atokalele mu mbanza yoyo. Kyoso kyabhixila ku Salamina o mbanza yexile ku mbandu itundila o dikumbi, o mayala yá kafulu dingi kithangana. “Amateka kuboka o mak’â Nzambi mu malombe a Jijudé.” e (Ika. 13:5) Balanabé ni Sawúlu ayi mu jimbanza joso ja kikolo kya Xipele nange exile mubhana umbangi mu jimbanza ja makota kyoso kya kexile mu kwenda njila. Mu njila yabhange ene phala kubhanga o kikalakalu kyâ, nange endele 160 a jikilometulu!

6, 7. (a) Nanyi wexile Seluju dya Phawulu, ni mukonda dyahi Bale-Jezú wafikisa ku mufidisa kwívwa o njimbu yambote? (b) Kyebhi Sawúlu kyafidisa o ndunge ya Bale-Jezú?

 ⁶ O athu mu mbanza ya Xipele ku hama ya dyanga, exile mubheza jinzambi ja makutu. Kiki kyadimonekena dingi kyoso Balanabé ni Sawúlu kyabhixila ku Pafu, o dyembu dyala mu mbandu ifwila o dikumbi mu kikolo kyenyokyo. “Kwenyóko asange-ku Judé amwixana Bale-Jezú, wexile muloji ni polofeta ya makutu. Mwene wexile kumoxi ni nguvulu Seluju dya Phawulu, diyala dya kilunji.” f Ku hama ya dyanga ku Loma, athu avulu exile jinjimu, kala Seluju dya Phawulu, o “diyala dya kilunji,” exile musota o aloji mu kwabhinga kikwatekesu phala kubatula maka a makota. Maji né kiki Seluju dya Phawulu wadiwanene ni njimbu ya Utuminu, anga “wamesenene kyavulu kwívwa o mak’â Nzambi.” Maji Bale-Jezú kasangulukile ni kima kiki, mwene amwijidile we mu dijina dya Elimase dilombola “muloji.”—Ika. 13:6-8. 

⁷ Bale-Jezú kasangulukile ni njimbu ya Utuminu wa Nzambi, wejidile kwila phala kulanga o kididi kyê kya kukala ndongixi ya Seluju dya Phawulu watokalele “kufunyisa o nguvulu phala kakale ni kixikanu  kwa Ngana.” (Ika. 13:8) Maji Sawúlu kehela kwila o muloji yú ufidisa Seluju dya Phawulu kudilonga yalungu ni Jihova. Mu kiki ihi yabhange mwene? O Bibidya yamba: “Sawúlu amwixana we Phawulu, wezala ni nzumbi ikôla wa mutale swí [Bale-Jezú] wambe: ‘Eye u diyala wezala ni mangonya ni kuyibha kwoso, u mona wa Dyabhu, eye u nguma ya ima yoso yayuka! Mukonda dyahi wa musota kubhengalesa o jinjila ja yuka ja Jihova? Ívwa! O lukwaku lwa Jihova lwala ku thandu dyé, wa-nda kala u kifofo, wa-nda bhita kithangana sé kumona o mwanya.’ Mu kithangana kyenyókyo, ku mesu mê ku mu vunda, mwene wamateka kujingujuka ni [kubabata], mu kusota muthu phala ku mu kwata ku maku ni ku mwendesa.” g Ihi yabhiti mukonda dya madiwanu enyá? “Mu kumona o ima yabhiti, o nguvulu waxikana Ngana, mukonda wadiwana ni milongi ya Jihova.”—Ika. 13:9-12.

8. Kyebhi kitutena kukayela o phangu ya kuswina ya Phawulu?

⁸ Phawulu kexile ni woma wa Bale-Jezú. Kyene kimoxi we netu, kitubhingi kukala ni woma kyoso o jinguma jetu kyafikisa kuzozesa o kixikanu kya yó amesena kwivwa o njimbu ya Utuminu. Kidi kwila, o kuzwela kwetu kwabhingi kukala “kwa ujitu kwotowe ni môngwa.” (Kol. 4:6) Ku mbandu ya mukwá kitwatokala kwehela kuma o jinguma jetu atufidisa kuboka, né kwehela kwila o woma utufidisa kuzwela o makutu ala mu jingeleja, jamusuluka mu “kubhengalesa o jinjila ja yuka  ja Jihova” kala kyabhange Bale-Jezú. (Ika. 13:10) Kala Phawulu, tubhange yoso phala kuboka o kidi ni kuswina kwoso ni kubhixidisa o kidi kiki ku mixima ya athu amesena kwivwa o njimbu yambote. Né mwene se sayi bhabha kitwamutena kumona o kikwatekesu kya Nzambi mu ukunji wetu kala kyabhiti ni Phawulu, tutena kudyelela kwila Jihova bhukaxi ka nzumbi yê ikôla wandabheka mu kilunga kyê o athu alenduka.—Nzw. 6:44.

9. Kyebhi Phawulu ni Balanabé kyabhana phangu yambote ku jiphange ala ku pholo mu ilunga ya lelu?

⁹ Sayi kima kyalunguluka kyoso o mayala yá kyatundu ku Pafu ya ayi ku Peleje, o mbanza yexile ku mbandu ya musanza wa kalunga ku Azya Menor. Ene endele ku musanza wa kalunga mu 250 ya jikilometulu. Ikalakalu 13:13, o kibuka kiki akixana kala “Phawulu ni akwâ.” O izwelu yiyi ilondekesa kwila nange Phawulu wexile mu kwendesa o kibuka kiki. Maji seku kima kilondekesa kwila Balanabé wexile ni difuba dya Phawulu. O mayala ayadi yá asuluka mu kukalakala kumoxi phala kubhanga o vondadi ya Jihova. Phawulu ni Balanabé abhana phangu yambote phala o jiphange ala ku pholo mu ilunga. Mu veji dya kudisokesa mudyâ mu kusota o fuma, o mayala yá alembalala o izwelu ya Jezú, yambe: “Enu oso mu jiphange.” Mwene wambe dingi: “Woso udizangeleka, anda mu tulula. Woso-phe uditulula, anda mu zangeleka.”—Mat. 23:8, 12.

10. Ibhidi yebhi yadibhana nayu Phawulu ni Balanabé mu njila yabhangele tundé ku Peleje katé ku Andiyokiya ya Pizidya?

¹⁰ Kyoso kyabhixila ku Peleje, Nzwá dya Máluku waxisa Phawulu ni Balanabé, anga wavutuka ku Jeluzaleme. Ki twejiya se mukonda dyahi mwene wabhange kiki. Phawulu ni Balanabé asuluka mu kwenda o njila, atundu ku Peleje ayi ku Andiyokiya mu Pizidya, mbanza yakexile mu Ngalásya. O njila yoyo yabhonzele kyavulu. Kuma o mbanza ya Andiyokiya ya Pizidya, o kulebha kwê kwa 1.100 ya jimetulu ku musanza wa kalunga. O ikoka ku milundu yazendalele ni kwila mwexile  we jibandi javulu. O kya mukwá mu kithangana kyenyokyo, Phawulu wakatele. h

11, 12. Kyoso kyazwela mu dilombe dya Andiyokiya mu Pizidya, kyebhi Phawulu kyabhangesa o athu kukala ni hanji ya ku mwivwa dingi?

¹¹ Mu Andiyokiya ya Pizidya, Phawulu ni Balanabé abokona mu dilombe mu kizuwa kya sabhalu. O Bibidya yamba: “Kyazubha kutanga o Kijila kya Mozé ni madivulu a Jipolofeta, o atwameni a dilombe a tumu kwa tangela, exi: ‘Enu akwetu jiphange, se mwala ni kizwelu kya kuswinisa o mundu, zwelenu.’” (Ika. 13:15) Mu kusuluka Phawulu wemana phala kuzwela.

¹² Phawulu wamateka o diskulusu dyê ni izwelu yiyi: “Enu akwetu mu akwa Izalayele ni enu oso mwene muxila Nzambi.” (Ika. 13:16) Kiki kilondekesa kwila o athu exile mu kwivwa Phawulu exile Jijudé ni akwa jixi jengi axikinine o milongi ya Jijudé. Kyebhi Phawulu kyeji kwatekesa o athu yá se ene kexile mu bhana valolo ku ima yandabhanga Jezú phala kukumbidila o vondadi ya Nzambi? Kya dyanga, Phawulu wazwela yalungu ni mundu wa Izalayele, mwene wajimbulula kwila Jihova “wa zangeleka o mundu kyoso ene kya tungile ku ixi ya Ijitu kala asonyi” ni kwila kyoso Nzambi kya akatula ku ubhika, “wa akwatela mwanyu mu kikangalakata” mu 40 a mivu. Phawulu wambe we kyebhi o akwa Izalayele kyatena kutambula o Ixi yokanene ni kwila Jihova wa abhana “o ixi yâ, kala undundu.” (Ika. 13:17-19) Sayi athu amba kwila Phawulu watumbula jimbandu ja Mikanda Ikôla jotange ande dya mwene kumateka kuzwela. O athu enyá abhange kiki mu  kulondekesa kwila akexile muxila o kizuwa kya Sábhalu. Se kiki kidi, yiyi phangu ya mukwá ilondekesa kwila Phawulu wabhange “yoso phala kukwatekesa athu a idifwa yoso.”—1 Ko. 9:22.

13. Kyebhi kitutena kukwatekesa o athu kubhana mátwi ku njimbu itwamwatudila?

¹³ Etu we twatokala kukwatekesa o athu utwene mwabokela nakala ni hanji ya kwivwa dingi. Mu kifika, o kwijiya se o mukwa dibhata watokala mu ngeleja yebhi kyandatukwatekesa kusola milongi yambote phala mwene. Ku mbandu ya mukwá tutena kusola velusu ya Bibidya yejiya o mukwa dibhata. Sota jindunge jitena kukwatekesa o jingivwidi jé kumesena kwivwa dingi o njimbu iwamwatudila.

14. (a) Kyebhi Phawulu kyatudila o njimbu yambote yalungu ni Jezú ku athu? Kidimwinu kyahi kya abhana mwene? (b) Kyebhi o mundu kyadivu ni diskulusu dya Phawulu?

¹⁴ Mu kusuluka Phawulu wajimbulula kwila bhukaxi ka miji ya jisobha ja Izalayele, Nzambi wejibheka “mubhuludi . . . mwéne Jezú.” Maji ande dya mwene wejikwiza, Nzwá dya Batizu. Mwene we wajimbulula kyebhi Jezú kyamujibha, ni kyebhi kyamufukununa. (Ika. 13:20-37) Phawulu wambe: “Ejiyenu-kyu kwila, bhukaxi ka diyala didi, twa mu mi bokela o njimbu yalungu ni muloloki wa ituxi yenu. . . . Woso uxikana kakala dingi ni kikuma.” Kyenyiki Phawulu wadimuna o jingivwidi jê: “Alukenu phala o ima yazwelele o Jipolofeta ki ize kuthandu dyenu: ‘Ivwenu, enu mu akwa kutobhesa, mwanda diwana, mwanda fwa. Mukonda nga mubhanga kikalakalu mu izuwa yenu ki mwanda kixikina, né mwene se a mi tangela kyambote yalungu ni kikalakalu kiki.’” O athu adiwana kyavulu mu kwivwa o izwelu yiyi ya Phawulu. O Bibidya yamba: “O athu a a dyondela phala avutuke mu Sábhalu ya kayela. . . . Kyoso kyabhu o kyônge mu dilombe, Jijudé javulu ni yó axikinine o milongi ya Jijudé exile mubheza Nzambi, akayela Phawulu ni Balanabé.”—Ika. 13:38-43.

15. Ihi yabhiti mu Sábhalu yakayela kyoso Phawulu kyabhange o diskulusu dyê?

¹⁵ Mu Sábhalu yakayela, “athu avulu mu mbanza a dibhongolola phala kwívwa” Phawulu. Kyoso Jijudé kyamono kiki, “difuba dya akwata, anga amateka kuzwela ima yavulu ya makutu yalungu ni yoso yakexile muzwela Phawulu.” Ni kuswina kwoso Phawulu ni Balanabé atangela o Jijudé, exi: “Kya dyanga abhingile ku mi bokela o mak’â Nzambi. Kuma mwa ditunu o maka enyá, mwa mono we kwila, ki mwa fwama kutambula o mwenyu wakalelaku, kindala twandaya mubokela o athu akwa jixi jengi. Mukonda Jihova watubhana o kitumu, kyambe: ‘Nga kusolo phala ukale u mukengeji wa akwa jixi jengi,  phala kwambata o njimbu ya kubhuluka katé ku maxokololo a jixi.’”—Ika. 13:44-47; Iza. 49:6.

16. Ihi yabhange o Jijudé kyoso kyevu o izwelu ya akunji a jixi jengi? Ihi yabhange Phawulu ni Balanabé kyoso kya azukutisa?

¹⁶ O akwa jixi jengi kyevu o maka enyá asanguluka, “oso a fwamena kutambula o mwenyu wakalelaku, axikana Ngana.” (Ika. 13:48) Mu kusuluka o mak’â Jihova adimwange mu ixi yoso. Maji kala kitwamono o Jijudé kasangulukile. Mu kidi, o akunji a jixi jengi a atangela kwila sumbala adyangele kwabokela o mak’â Nzambi, ene asolo kudituna o Mexiya, mu kiki Nzambi weji kwafundisa. “O Jijudé afunyisa o ahatu afuma akexile mubheza Nzambi ni mayala afuma a mbanza. Ene aswinisa we o athu phala kuzukutisa Phawulu ni Balanabé, anga a akaya mu mbanza yâ.” Ihi yabhange Phawulu ni Balanabé? “Ene a kukumuna o fufuta ya inama yâ, ya ayi ku Ikônyu.” O kwila o ubhezelu wa Jikidistá mu Andiyokiya ya Pizidya wabhu mu kithangana kyenyokyo? Kana! O maxibulu exile kwenyokyo “asangulukile kyavulu, ezalele we ni nzumbi ikôla.”—Ika. 13:50-52.

17-19. Kyebhi kitutena kukayela o phangu yambote ya Phawulu ni Balanabé, ni kyebhi o kubhanga kiki kyanda tusangulukisa?

¹⁷ O maxibulu yá afiyele adibhanene kyambote ni kizukutisu. O ukexilu wâ utulonga disá dya katunda. Etu kituxikina kweha kuboka o njimbu ya Utuminu né mwene se o athu afuma a mundu atujijidika kubhanga kiki. Tala kwila kyoso o athu mu Andiyokiya kya ditunu o njimbu, Phawulu ni Balanabé “a kukumuna o fufuta ya inama yâ,” ene kabhange kiki mukonda exile ni njinda, maji phala kulondekesa kuma keji kala ni kikuma mu ima yejibhita ni athu yá. O akunji yá a jixi jengi ejidile kwila katokalele kujijidika o athu kuxikina o njimbu yâ. Maji ejidile kwila atokalele kusuluka kuboka o njimbu. Sé phata asuluka kuboka kyoso kyayi ku Ikônyu!

¹⁸ Ihi yabhiti ni jiphange axala mu Andiyokiya? Sumbala o athu mu mbambe yâ kamesenene kwivwa o njimbu yambote, maji kiki ki kya afidisa kukala ni kusanguluka. Jezú wambe: “Azediwa yó évwa o maka ma Nzambi, anga abelesela!” (Luk. 11:28) Kiki kyene mwene kyamesenene kubhanga o maxibulu mu mbanza ya Andiyokiya ya Pizidya.

¹⁹ Kala Phawulu ni Balanabé, tudilembalale jinga kwila o kikalakalu kyetu o kuboka o njimbu yambote. O athu utwene mwabokela, ene atokala kusola se andaxikina o njimbu mba kana. Né mwene se o athu kamubhana matwi mu njimbu itwamwabokela tutena kudilonga disá mu phangu ya maxibulu ku hama ya dyanga. Mu kuwabhela o kidi ni kwehela o nzumbi ikôla kutwendesa, tutena kusanguluka né mwene ni izukutisu.—Nga. 5:18, 22.