1, 2. Ananyi exile mutunda ku Filipe phala kuya ku Tesalonika? Nange exile mubanza mu ima yahi?

 KIKOKA mwexile mubhita athu avulu, kyobhange ku jingijiye akwa Loma, kyabhiti bhukaxi ka milundu. Sayi bhabha o athu exile mukwenda mu kikoka kyokyo, exile mu kwivwa jibuya ja jijumendu, ja malola a makalu, ja masoladi, ja jingeji ni ja athu exile ni ufunu wa kusonga. Makamba atatu, Phawulu, Sila ni Timote, exile mu kwenda mu kikoka kiki. Ene ende 130 ja jikilómetulu, tunde ku Filipe katé ku Tesalonika. Kuma Phawulu ni Sila exile hanji ni jifidila mukonda dya kwabeta ni jixikote mu mbanza ya Filipe, kya abhonzele kyavulu kwenda o njila yiyi.—Ika. 16:22, 23.

² Kyoso kyexile mukwenda o njila, o mayala atatu yá exile mudizwelesa phala kaxinganeke mu kulebha kwa njila. Ene asangulukile hanji mukuxinganeka kwila o kasalelu ni mwiji wê mu mbanza ya Filipe akituka Jikidistá. O kima kyabhiti mu mbanza ya Filipe kyabhangesa o aboki yá kusuluka mu kuboka o mak’â Nzambi. Maji kyoso kyexile mubhixila mu mbanza ya Tesalonika, nange exile mudibhwidisa se kyebhi o Jijudé kyeji kwatambulula. O kwila eji kwakaya ni kwabeta kala kyabhiti mu mbanza ya Filipe?

3. Kyebhi o phangu ya Phawulu mu kuswina ni kuboka kutena kutukwatekesa?

³ Ku pholo dya kwenda Phawulu wasoneka ku Jikidistá mu mbanza ya Tesalonika se kyebhi kya divu: “Kala ki mwejiya, sumbala twatale hadi ni ku tutalatala kyayibha ku mbanza ya Filipu, maji ni kikwatekesu kya Nzambi yetu twasange nguzu phala ku mitudila o njimbu yambote ya Nzambi, sumbala ni izukutisu yavulu.” (1 Te. 2:2) O izwelu yiyi ilondekesa kwila nange Phawulu wexile ni hele yakubokona mu mbanza ya Tesalonika mukonda dya ima yabhiti mu mbanza ya Filipe. O kwila wadivwile we kya kiki kala Phawulu? O kwila sayi bhabha umona kuma kukubhonza  kuboka o njimbu yambote? Phaulu wexile mu dyelela kwa Jihova phala ku muswinisa ni kumubhana o nguzu yabhindamene. Kudilonga o phangu ya Phawulu kutena we kukukwatekesa kubhanga kiki.—1 Ko. 4:16.

4. Mukonda dyahi tuzwela kwila nange Phawulu waxala dingi ithangana yavulu mu mbanza ya Tesalonika?

⁴ O Bibidya izwela kuma kyoso Phawulu kyexile mu mbanza ya Tesalonika mwene waboko mu dilombe mu jisábhalu jitatu. O kwila kiki kilombolola kuma mwene waxala ngó mu mbanza yiyi mu semana jitatu? Kana ngana. Ki twejiya se semana jikuxi jabhiti kyoso Phawulu kyayi mu veji yê ya dyanga mu dilombe tunde kya bhixila mu mbanza. O mikanda ya Phawulu yalondekesa kwila kyoso mwene ni makamba mê kya bhixila mu mbanza ya Tesalonika ene exile mukalakala phala kudidikila. (1 Te. 2:9; 2 Te. 3:7, 8) Kyoso mwene kyexile mu mbanza ya Tesalonika, mu luyadi o jiphange akwa Filipe amutumikisa imbamba phala kulanga o ibhindamu yê. (Fil. 4:16) Nange mwene waxala dingi ithangana yavulu mu mbanza ya Tesalonika.

5. Kyebhi Phawulu kyakwatekesa o athu kutendela o Mikanda Ikôla?

⁵ Mukonda dya kukala ni kuswina kwa kuboka, Phawulu watena kuzwela ni oso adyongekele ku dilombe. O Bibidya izwela: “Kuma kyene o kifwa kyê, Phawulu . . . wazwela ni athu akexile mwenyomo, mu kwa kwatekesa kutendela o Mikanda Ikôla mu jisábhalu jitatu. Mwene wakexile mu kwa lombolwela ni kwa londekesa bhukaxi ka Mikanda Ikôla kwila, kyafwamene Kidistu kutala hadi, kufwa ni ku mu fukununa mw’alunga, wixi: ‘O yú mwéne o Kidistu, yú mwéne Jezú u nga mu mibokela-nê.’” (Ika. 17:2, 3) Phawulu kazwela ngó izwelu yafwama kana, maji wabhixidisa o maka ku mixima ya jingivwidi jê. Mwene wejidile kwila o athu exile muya mu dilombe ejidile ni kwila exile muxila o Mikanda Ikôla. Maji kexile mu itendela kyambote. Phawulu wakexile mu lombolola ni kulondekesa bhukaxi ka Mikanda Ikôla kwila, Jezú dya Nazalé wexile o Mexiya amukanene, mba Kidistu.

6. Kyebhi Jezú kyakwatekesa o maxibulu mê kutendela o Mikanda Ikôla ni ihi yabhiti?

⁶ Phawulu wakayela o phangu yaxisa Jezú yalungu ni kulonga bhukaxi ka Mikanda Ikôla. Mu kifika, mu ukunji wê, Jezú walondekesa ku akayedi’ê kwila o Mon’â muthu watokalele kutala  hadi, kufwa ni kumufukununa. (Mat. 16:21) Kyoso kyamufukununa, Jezú wamoneka ku maxibulu mê. Sé phata kiki kyalondekesa kuma o ima yazwelele ya kidi. Maji Jezú wabhange dingi ima yamukwá. O Bibidya izwela kiki yalungu ni Jezú: “Mwene wamateka kwa jimbulwila o ima yasoneka Mozé ni Jipolofeta ja mukwá yalungu ni mwene, kala kyosoneke mu Mikanda Ikôla.” Ku pholo dya kwenda ihi yabhiti? O maxibulu ambe: “O maka mê a tula ku mixima yetu, kyoso mwene kyakexile mu tu lombolwela kyambote o Mikanda Ikôla mu njila!”—Luk. 24:13, 27, 32.

7. Mukonda dyahi yoso itulonga yatokala kutunda mu Mikanda Ikôla?

⁷ O Mak’â Nzambi ala ni kutena kwavulu. (Jih. 4:12) Mukonda dya kiki, lelu o Jikidistá ja kidi yoso yalonga itunda mu Mak’â Nzambi kala kyabhangele Phawulu, o jipoxolo ja mukwá ni Jezú. Etu we tukwatekesa o athu kutendela o Mikanda Ikôla, twajimbulula o dilombolwelu dyê. Mu kutanga o Bibidya ku athu utusanga mu sidivisu ya kuboka, tulondekesa kwila o ima itulonga ya kidi mwene. Mu kidi o njimbu itwene muboka ki itunda mu ilunji yetu. Mu kukalakala ni Bibidya, tukwatekesa o athu kumona kwila o njimbu ituboka yatokala kwa Nzambi. Etu we ene mutulembalesa kwila o njimbu ituboka yalungu ni Mak’â Nzambi. O athu atena ku idyelela. Kwijiya o maka enyá kutubhangesa kuboka ni kuswina kwoso, kala kyabhangele Phawulu.

8-10. (a) O athu mu mbanza ya Tesalonika atambula kyebhi o njimbu yambote? (b) Mukonda dyahi sayi Jijudé akwatele difuba kwa Phawulu? (c) Ihi yabhange o Jijudé exile ni njinda?

⁸ Phawulu wamonene kyá o kidi kya izwelu yiyi ya Jezú: “O mubhika katúndu ngana yê. Se a ngi zukutisa, enu wenu anda mi zukutisa, se abelesela o maka mami, ene anda belesela we o maka m’enu.” (Nzw. 15:20) Kyene kyabhiti ni Phawulu mu Tesalonika. Sayi athu amesenene kwivwa o maka exile mwabokela Phawulu, amukwá kana. Luka wasoneka kiki yalungu ni yó amesenene kwivwa: “Sayi athu mudyâ [o Jijudé] axikana Ngana, anga adibunda kumoxi ni Phawulu ni Sila. Mundu wavulu wa Jingeleku exile abhezi a Nzambi axikana we, ni ahatu avulu afuma, kyene we kyabhange.” (Ika. 17:4) Sé phata o maxibulu yó a ubhe asangulukile kyavulu mu kwakwatekesa kutendela o Mikanda Ikôla.

⁹ Sumbala sayi athu awabhela o izwelu ya Phawulu, amukwá exile ni njinda. Sayi Jijudé mu Tesalonika akwatela difuba kwa Phawulu mukonda mwene wabhangesa “mundu wavulu wa  Jingeleku” kuxikina o njimbu yê. O Jijudé jojo alongele o Mikanda ya Hebalayiku ku Jingeleku, anga o Jingeleku axikinine o ubhezelu wa Jijudé. Mukonda dya kiki o Jijudé exile mubanza kwila o Jingeleku jojo ja atokalele. Maji kyedile kala Phawulu wexile munyana o Jingeleku jojo mu dilombe! O Jijudé njinda ya akwatele.

¹⁰ Luka ututangela o kima kyabhiti: “O Jijudé njinda ya akwata. Kyenyiki, exana mayala ayibha akexile mu nyunga-nyunga mu kitanda, adisokejeka mu kibuka, ya amateka kubhanga kavwanza mu mbanza. Ene abokona mu inzo ya Jasono mu kusota Phawulu ni Sila phala kwabheka bhukanga, bhwakexile o mundu. Kuma ene kasange Phawulu ni Sila, akoko Jasono ni jiphange ja mukwá, katé ku atwameni a mbanza, exi: ‘O mayala ene mubhekesa o kavwanza mu jixi joso eza we mumu, o Jasono wa atambulula kubhata dyê kala ajitu. O mayala yá, a mu bhukumukina o ijila ya Sézalu mu kuzwela kwila, kwala sobha yengi, o dijina dyê Jezú.’” (Ika. 17:5-7) O kima kyabhange o athu yó exile ni njinda kyabhangesa Phawulu ni makamba mê kudivwa kyebhi?

11. Itatesu yebhi yazwela kwa Phawulu ni akunji amukwá? Nange kitumu kyebhi kyexile mu xinganeka o akwa kutatela? (Tala ku lwiji.)

¹¹ O kibuka kya athu ala ni njinda kyadifwangana ni kalemba, kazanga yoso yala mu njila. Kiki kyene kyabhange o Jijudé phala kukaya Phawulu ni Sila mu mbanza ya Tesalonika. Kyoso o Jijudé kyabhangesa kukala “kavwanza” mu mbanza, ene asoto kuxikinisa o atwameni a jinguvulu kwila o maxibulu atele kituxi kyadikota. Kya dyanga ene atatela Phawulu ni maxibulu a mukwá kwila exile “mubhekesa o kavwanza mu jixi joso,” sumbala Phawulu ni akwâ kabhangele kiki! O kitatelu kya kayadi kyexile dingi kyadikota. O Jijudé ambe kwila Phawulu ni akunji a mukwá exile mulonga kuma kwexile sobha yengi, dijina dyê Jezú. Mu kuzwela kiki ene exile mubhukumukina o ijila ya mutumini wa dikota. a

12. Ihi ilondekesa kwila o Jikidistá mu Tesalonika ejitala hadi mukonda dya kitatelu?

¹² Lembalala kwila o atwameni a jingeleja atatela we Jezú mu kima kiki. Ene atangela Pilatu: “Twasange o diyala didi wakexile mu nganala o kifuxi kyetu . . . ni kuzwela kwila mwéne o Kidistu, o  sobha.” (Luk. 23:2) Pilatu mu kukala ni wôma wa kwila, o mutumini wa dikota wejibanza kuma amu mu lungulukila, wabalakala Jezú mu kufwa. Kyene we kimoxi, o ima yatatela ku Jikidistá mu Tesalonika yeji kwabhangesa kutala hadi. Sayi divulu dyamba kwila: “Sé phata o Jikidistá exile mu kilwezu kya dikota mukonda dya kitatelu kyokyo, mukonda se ‘muthu amutatela kwila wamulungulukila o mutumini wa dikota, o muthu yú ejimujibha.’” O kwila o jinguma aditundu kyambote?

13, 14. (a) Mukonda dyahi o akwa njinda alembwa kufidisa o kikalakalu kya kuboka mu mbanza ya Tesalonika? (b) Kyebhi Phawulu kyakayela o kitendelesu kya Kidistu kya kudimuka, ni kyebhi kitutena kukayela o phangu yiyi?

¹³ O akwa njinda alembwa kufidisa o kikalakalu kya kuboka mu mbanza ya Tesalonika. Mukonda dyahi? Kima kimoxi, ene katena kusanga Phawulu ni Sila. Ku mbandu ya mukwá, o jinguvulu ja mbanza kaxikinine mu itatesu yoso. Maji “ene kyazubha kutambula o lubhaku,” eha Jasono ni jiphange ja mukwá. (Ika. 17:8, 9) Mu kukayela o kitendelesu kya Jezú phala o Jikidistá ‘kudimuka kala o jinyoka, ni kukala sé kikuma kala o membe,’ Phawulu walenge phala kusuluka mu kuboka mu kididi kyengi. (Mat. 10:16) O kuswina kwa Phawulu kwamukwatekesa kulenga o kilwezu. Kyebhi o Jikidistá lelu kyatena kukayela o phangu yê?

¹⁴ Mu izuwa yetu, o atwameni a jingeleja ene mufunyisa kibuka kya athu phala kuzukutisa o Jimbangi ja Jihova. Ene amba kuma twene mubhukumukina ni kulungulukila o jinguvulu, mukonda dya kiki afunyisa o  jinguvulu phala kutuzukutisa. Kala kyabhiti ku hama ya dyanga, lelu o jinguma jetu atuzukutisa mukonda dya difuba. Né kiki, o Jikidistá ja kidi kene musota kudizokela mu ima yosoyoso yene mwatatela. Maji ene musota kulenga kudita ni athu ala ni njinda, mu kubhanga yoso phala kuboka ni paze, nange mu kuvutuka mu kizuwa kyamukwá kyoso o ima yala kyambote.

15. Kyebhi kyadivu o akwa Beleya mu kwivwa o njimbu yambote?

¹⁵ Phala ka abhange kyayibha, Phawulu ni Sila a atumikisa ku Beleya. O dikanga dya Tesalonika katé ku Beleya dyexile 65 ya jikilómetulu. Kyoso kyabhixila kwenyoko, Phawulu wayi ku dilombe phala kuzwela ni athu adyongekele kwenyoko. O athu amubhana matwi! Luka wasoneka kwila o Jijudé ku Beleya “amesenene dingi kudilonga, o akwa Tesalónika ndenge, mukonda axikina o mak’â Nzambi ni muxima woso. Ene akexile mutokwesa o Mikanda Ikôla izuwa yoso, phala kumona se o maka akexile mudilonga exile mwene a kidi.” (Ika. 17:10, 11) O kwila o izwelu yiyi yalondekesa kuma o athu mu Tesalonika axikina o njimbu yambote kexile ni valolo? Kana. Ku pholo dya kwenda Phawulu wa asonekena wixi: “Kyenyiki, kyene kitwene musakidila jinga Nzambi sé kufula, mukonda kyoso ki mwatambula o mak’â Nzambi, u mwevu kokwetu, mwa axikina kana kala maka a athu maji kala o mak’â Nzambi, a mu myendesa we enu, mu axikani.” (1 Te. 2:13) Maji ihi yabhangesa o Jijudé ku Beleya kumesena kudilonga dingi?

16. Mukonda dyahi o akwa Beleya a atumbula kala o athu “amesenene dingi kudilonga”?

¹⁶ O akwa Beleya kadikalanganza mu kwivwa milongi ya ubhe. Ene kalondekesa wôwa. Kyadyanga evu kyambote yoso yazwela Phawulu. Mu kusuluka atokwesa mu Mikanda Ikôla o ima ya ajimbulwila Phawulu. Ene exile mudilonga o Mak’â Nzambi kana ngó mu jisábhalu maji mu izuwa yoso. Ene abhange kiki “ni muxima woso,” mu kusota kutendela o milongi ya ubhe bhukaxi ka Mikanda Ikôla. Ene alondekesa kulenduka, ya alungulula o ukexilu wa myenyu yâ anga “avulu mudyâ axikana Ngana.” (Ika. 17:12) Kitudiwana mu kumona kwila Luka wa atumbula kala athu “amesenene dingi kudilonga”!

17. Mukonda dyahi o phangu ya akwa Beleya yambote, ni kyebhi kitutena kusuluka mu kukayela o phangu yâ né mwene se twamusidivila kyá Jihova mu mivu yavulu?

¹⁷ O akwa Beleya kejidile kwila o ukexilu wâ wa kutambula o njimbu yambote eji ku usoneka mu Mak’â Nzambi kala athu “amesenene  dingi kudilonga.” Ene abhange o kima kyamesenene Jihova Nzambi ni Phawulu. Etu we tuswinisa o athu kubhanga kiki: kudilonga o Bibidya phala kukala ni kixikanu kya kolo bhukaxi ka Mak’â Nzambi. Maji o kwila kyoso kitukituka Jikidistá kitubhingi dingi kukala ni vondadi ya kudilonga dingi? Kana. Mu veji dya kiki, twatokala kukala dingi ni vondadi ya kudilonga yalungu ni Jihova ni kukumbidila o milongi yê. Mu kubhanga kiki, twandakwehela Jihova ku tu umba ni kutulonga kala kyamesena mwene. (Iza. 64:8) Kyenyiki twandasangulukisa Tat’etu ya dyulu, kyoso kituya ni kubhanga dingi mu sidivisu yê.

18, 19. (a) Mukonda dyahi Phawulu watundu ku Beleya? Kyebhi kitutena kukayela o kukolokota kwa Phawulu? (b) Kindala Phawulu wejibokela ananyi, ni kwebhi?

¹⁸ Phawulu kaxala ithangana yavulu ku Beleya. O Bibidya yamba: “Kyoso o Jijudé jatungile mu mbanza ya Tesalónika kyevu kwila, Phawulu wexile we muboka o mak’â Nzambi ku Beleya, ayi kwenyóko phala kufunyisa ni kubhekesa kavwanza ku mundu. Mu kithangana kyenyókyo o jiphange ambata Phawulu katé ku ndundu ya kalunga, maji Sila ni Timote axala ku Beleya. O yó axinjikila Phawulu a mwambata katé ku Atena. Phawulu wa atangela phala Sila ni Timote a musange ni lusolo lwoso, ene anga avutuka.” (Ika. 17:13-15) O jinguma jojo ja njimbu yambote ajiji kyavulu, kexile mubhwila kana! Ene kasuku ngó mu kukaya Phawulu ku Tesalonika, ayi we ku Beleya, ya afikisa kubhekela dingi maka kwenyoko, maji alembwa. Phawulu wejidile kwila wexile ni jimbambe javulu phala kubokelamu, kyenyiki wayi mu boka mu kididi kyengi. Tukale we polondo phala tusuluke mu kuboka né mwene ni izukutisu ya yó amesena kufidisa o kikalakalu kyetu!

¹⁹ Mu kubhana umbangi ku Jijudé ku Tesalonika ni ku Beleya, Phawulu wamono kuma kima kyambote kubhana umbangi ni kuswina kwoso ni kukwatekesa o athu bhukaxi ka Mikanda Ikôla. Kyene we kitwatokala kubhanga. Maji kindala Phawulu wejibokela o athu adifu kyengi: O athu akwa jixi jengi, mu mbanza ya Atena. Kyebhi mwene kyejidibhana ni athu enyá? Twandamona mu kibatulu kya kayela.