1. Mukonda diahi o mukalakadi ua nguvulu, mukua Etiiopia, ua bhingile ku mu batizala?

‘TALESA, menha iá! Ihi i ngi fidisa o ku ngi batizala?’ O kibhuidisu kiki, a ki bhangele ku mukalakadi ua nguvulu, mukua Etiiopia, mu hâma ia dianga ia mivu. O Kidistá Filipe, ua mu idikisa kuma Jezú uexile o Mexiia  a mu kanena. O maka enhá a di longo mu Mikanda ikôla, a tula kiambote ku muxima ua diiala mukua Etiiopia, iu ua banze ku bhanga kima. Muéne ua bhingi phala ku mu batizala!—Ikalakalu 8:26-36.

2. Mukonda diahi eie ua tokala ku banza mu batizu?

² Se ua di longo kiambote, o ibatulu ia dianga ia divulu didi, ni Jimbangi ja Jihova, nange u dibhula, ‘Ihi i fidisa o ku ngi batizala?’ Eie ua di longo kiá o kikanenu kia Bibidia, kia lungu ni muenhu ua kalelaku mu Palaízu. (Luka 23:43; Dijingunuinu 21:3, 4) Eie ua di longo ué o kidi kia lungu ni ukexilu ua madifundu, ni difukunukinu. (Ndongixi 9:5; Nzuá 5:28, 29) Nange eie uene muia kiá mu iônge ia Jimbangi ja Jihova, ua mono kiá kuma ene ala ni ubhezelu ua kidi. (Nzuá 13:35) O kia beta-kota, eie ku mateka kiá o ukamba ué ni Jihova Nzambi.

3. (a) Ihi ia tumina Jezú ku akaiedi’ê? (b) Kiebhi kia batizala mu menha?

³ Kiebhi ki u tena ku londekesa kuila ua mesena ku sidivila Nzambi? Jezú uambe ku akaiedi’ê: “Enu-phe ndenu, mua ka longe jixibulu ku akua jixi joso, ni ku a batizala.” (Matesu 28:19) Jezú ua bhana o phangu, mu ku mu batizala mu menha. Muéne ka mu takuile ngó tu menha, né ngó ku mu tá tu menha ku mutué. (Matesu 3:16) O kizuelu “batizu,” kizuelu kia Ngeleku, kilombolola “kubondeka.” Kiki, o batizu ia Kidistá, a ki bhanga, mu ku bondeka o muthu koxi a menha ni ku mu zangula.

4. Ihi ilondekesa o batizu mu menha?

⁴ O batizu mu menha, o kima kia bhingi phala oso a mesena ku kala ni ukamba ni Jihova Nzambi. O batizu ilondekesa ku athu oso, o vondadi iê ia ku sidivila Nzambi. Kilondekesa ué kuila eie ua-ndala ku bhanga o vondadi ia Jihova. (Jisálamu 40:7, 8) Phala ku ku batizala, saí ima i ua tokala ku bhanga.

5. (a) Kima kiahi kia dianga ki ua tokala ku bhanga phala ku ku batizala? (b) Mukonda diahi o iônge ia jikidistá i kuatekesa?

⁵ Eie ua mateka kiá ku bhanga o kima kia dianga. Kiebhi? O kuijiia Jihova Nzambi, ni Jezú Kristu, nange mu ku di longa o Bibidia izuua ioso. (Tanga Nzuá 17:3.) Maji saí dingi ima i ua tokala ku di longa. O Jikidistá a-ndala ‘kuijiia kiambote o vondadi ia Nzambi.’ (Kolose 1:9) O kuia mu iônge ia Jimbangi ja Jihova, ia-nda ku kuatekesa ku bhanga kiki. (Jihebeleu 10:24, 25) O ku bhanga kiki izuua ioso, kua-nda ku kuatekesa ku bandekesa o kuijiia kuê kua lungu ni Nzambi.

6. Kuijiia kuahi kua Bibidia ku ua tokala ku kala na-ku phala ku ku batizala?

⁶ Mu kidi, eie ki ua bhingi ku di longa ioso iala mu Bibidia, phala ku ku batizala. O mukalakadi ua nguvulu, mukua Etiiopia ua kexile ni kuijiia, maji ua mesenene dingi kikuatekesu phala ku tendela kiambote o ibatu ia mukuá, ia Mikanda Ikôla. (Ikalakalu 8:30, 31) Kiene kimoxi ué, eie uala hanji ni ima ia vulu phala ku di longa. Mu kidi, eie nuka ua-nda suka o ku di longa ia lungu ni Nzambi. (Ndongixi 3:11) Kienhiki, ande dia ku ku batizala, eie ua tokala kuijiia o ilongesu ia dianga ia Bibidia ni ku i xikina. (Jihebeleu 5:12) O ilongesu íii, o kidi kia lungu ni ukexilu ua madifundu, o valolo dia dijina dia Nzambi, ni Utuminu uê.

7. O ku di longa o Bibidia ia tokala ku ku bhanga ihi?

⁷ Ki kua bhingi ngó ku kala ni kuijiia, mukonda, “o muthu-phe ua kambe o kuxikana ka tena kuuabhela Nzambi.” (Jihebeleu 11:6) O Bibidia i tu tangela kuma, saí athu mu mbanza ia Kolindo, kioso kiévu o njimbu ia Kidistá, “a xikana, anga a a batizala.” (Ikalakalu 18:8) Kiene kimoxi ué, mu ku di longa o Bibidia, eie ua-nda kala ni  kixikinu kuma, ene o Maka o bhuse kua Nzambi. A-nda ku kuatekesa ué, ku kala ni kixikinu mu ikanenu ia Nzambi, ni mu kutena kua ku bhulula mu sata ia Jezú.—Josuué 23:14; Ikalakalu 4:12; 2 Timote 3:16, 17.

8. Ihi ia-nda ku bhangesa ku zuelela akuenu ia lungu ni ima i uene mu di longa?

⁸ Ki uia ni ku di longa , ni ku dimendala o kixikinu kiê, ki ua-nda tena ku bhaka o ima i uene mu di longa. (Jelemiia 20:9) Ua-nda kala ni vondadi ia ku zuelela akuenu, o maka alungu ni Nzambi, ni ikanenu iê.—Tanga 2 Kolindo 4:13.

9, 10. (a) A nanhi u ua tokala ku mateka kuzuela nau o kidi kia Bibidia ki ua mu di longa? b) Ihi i ua tokala ku bhanga se ua mesena kuboka ni Jimbangi ja Jihova?

⁹ Eie u tena ku mateka kuzuela ni muanhu, o kidi kia Bibidia, ku jindandu jê, ku makamba mê, ku jivizinhu jê, ni makamba mê a sidivisu. Mu ku bhita thembu, eie ua-nda mesena kuboka ni Jimbangi ja Jihova. Se kiene, kana ku kala ni hele, ia kuzuela ni Mbangi ia Jihova ua mu ku longa o Bibidia. Se u londekesa kuila, uala kiá mu kitala kia kuboka inzo ni inzo, tufunga tu iiadi a kilunga, a-nda xikama ni eie, ni mesene iê.

¹⁰ Kiki-phe, eie ua-nda tena kuijiia kiambote o tufunga a Jikidistá, ene mu kuinga o kilunga kia Nzambi. (Ikalakalu 20:28; 1 Phetele 5:2, 3) Se tufunga tutu, a mona kuila eie uejiia kiambote o ilongesu ia dianga ia Bibidia, iu ua i xikina, uene mu belesela o itumu ia Nzambi, ni ua-ndala ku kala Mbangi ia Jihova, ene a-nda ku tangela kuila, eie uala kiá mu kitala kia kuboka o njimbu iambote kála muboki, ka mu batizala.

11. A mukuá a tokala ku bhanga ihi phala ku kala aboki?

¹¹ Lua kamúkua, nange saí ukexilu ku muenhu ué, ni ku ífua iê, i ua tokala kueha, phala ku kala muboki. Íii ia  lungu ni ima i ua kexile mu bhanga mu kasuekele. Kienhiki, ande dia ku bhinga phala ku kála muboki, eie ua tokala kueha o ituxi kála, o undumbu, o uhôlua, ni ku xibha diamba.—Tanga 1 Kolindo 6:9, 10; Ngalásia 5:19-21.

12. Mukonda diahi kua bhingi ku diela?

¹² Saí dingi ima i ua tokala ku bhanga phala ku ku batizala. O poxolo Phetele uambe: “Enu-phe dielenu, . . . mu vutuke kua Nzambi, o muène ituxi ienu phala a mi jimune-iu.” (Ikalakalu 3:19) O ku diela, kulombolola ku di tatela o ima i ua bhange m’okulu. O muthu ua tokala ku diela, se ua kexile ni ukexilu ua iibha, maji né muene se o muthu ua kexile mu bhanga ima iambote, ua tokala ku diela ué. Mukonda diahi? Mukonda, athu oso akua ituxi, a bhingi o muloloki ua Nzambi. (Loma 3:23; 5:12) Ande dia ku di longa o Bibidia, eie ki uejidile se iebhi o vondadi ia Nzambi. Kienhiki-phe, kiebhi ki ueji tena ku kumbidila o vondadi iê? Kua bhingi ku diela.

13. O ku bhiluka ihi?

¹³ O ku diela kua bhingi ku di bhilula, mba “ku xisa ku dima” o ima ia iibha. Eie ua tokala ku bhanga dingi ima ia mukuá, o ku diela ngó ki ki soko. Ua tokala ku xisa o ukexilu uê ua iibha uokulu, ni ku mateka kiá ku bhanga o ima iambote. O ima i ua tokala ku bhanga ande dia ku ku batizala o ku diela ni ku bhiluka o ima i ua tokala ku bhanga ande dia ku ku batizala.

14. Kima kiahi kia beta-kota ki ua tokala ku bhanga ande dia ku u batizala?

¹⁴ Kuala hanji kima kia beta-kota ki ua tokala ku bhanga, ande dia ku u batizala. Eie ua tokala ku di bhakula kua Jihova Nzambi.

15, 16. Ihi ijimbulula o ku di bhakula kua Nzambi, ni ihi i bhangesa o muthu ku bhanga kiki?

 ¹⁵ Kioso ki u di bhakula kua Jihova Nzambi mu musambu mu ubheka, eie u kanena ku bheza ngó muéne, katé ku hádia. (Matendelelu 6:15) Mukonda diahi muthu ueji mesena ku bhanga kiki? Banza o diiala ua mateka ku tangesa o muhatu. Kioso kiaia ni ku muijiia, ni ku mona o ífua iê iambote, muéne ua-nda ku mu uabhela dingi. Mu ku bhita thembu, muéne ua-nda mu bhinga mu ukaza. Mu kidi, o ukaza u bheka ikalakalu ia mukuá. Maji o ku zola, kua-nda mu bhangesa ku kazala nê.

¹⁶ Kioso ki uejiia Jihova ni ku mu zola, eie ua-nda sola ku mu sidivila sé hele, mba ku mu bheza sé dizubhilu. Muthu uoso-uoso ua mesena ku kaiela o Mona Nzambi, Jezú Kristu, ua tokala ku “jimba ku di xinganeka muène” (Marku 8:34) Tu di jimba ku di xinganeka mu dietu, mu ku dituna o ku bhanga o vondadi ietu, ni ima i tua mesena ku bhanga, i tu fidisa ku belesela Nzambi. Ande dia ku ku batizala, o kima kia tokala ku dianga ku muenhu uê, o ku bhanga o vondadi ia Jihova Nzambi.—Tanga 1 Phetele 4:2.

17. Mukonda diahi saí athu a kala ni hele ia ku di bhakula kua Nzambi?

¹⁷ A mukuá a lembua ku di bhakula kua Jihova, mukonda ala ni hele ia ku bhanga kiki. Mukonda se ene a di bhakula kála Kidistá, a-nda ku a fundisa kua Nzambi. Ene ala ni hele ia ku lueza, ni ku luualesa Jihova, kienhiki, ene a xinganeka kuma ka tokala ku di bhakula luua kua muéne.

18. Ihi ia-nda ku bhangesa ku di bhakula kua Jihova?

¹⁸ Kioso ki u suluka mu zola Jihova, eie ua-nda kala ni vondadi ia ku di bhakula kua muéne, ni ku bhanga ioso phala ku kumbidila o vondadi iê. (Ndongixi 5:4) Kioso ki  u di bhakula, eie ua-nda mesena “kuenda kioso kiandala Ngana [Jihova], ni ku bhanga jinga ioso ia mu uabhela kiambote muène.” (Kolose 1:10) Mukonda dia henda iê kua Nzambi, eie ua-nda mona kuila ki kia bhonzo ku bhanga o vondadi iê. Sé phata, ua-nda xikina mu kisoneku kia poxolo Nzuá kiambe kuma: ‘O henda ia kuzola Nzambi ienhi’íi, o ku kumbidila o ijila iê. O ijila iê-phe ki ia bhonzo ku i kumbidila.’—1 Nzuá 5:3.

19. Mukonda diahi eie, ku tokala ku kala ni hele ia ku di bhakula kua Nzambi?

¹⁹ Eie ku bhingi ku kala muthu uaiuka, phala ku di bhakula kua Nzambi. Jihova uejiia kuebhi ku u sukila, muéne  ka bhingi o ima ki u tena ku i bhanga. (Jisálamu 103:14) Muéne ua mesena kuila eie ue-nda kiambote, muéne u kolokotesa ni u ku kuatekesa. (Tanga Izaia 41:10.) Xikina kuila, se u dielela kua Jihova, ni muxima uoso, muéne ua-nda ‘iukisa o njila jê joso.’—Jisabhu 3:5, 6.

20. Mukonda diahi o ku di bhakula kua Jihova ki kima kia ku sueka?

²⁰ Mu ku xinganeka mu ima i tua di longo kiá, i tena ku ku kuatekesa ku di bhakula kua Jihova, mu musambu.  Athu a zolo Nzambi, a tokala ué ‘ku fisala ku athu, n’a bhuluke.’ (Loma 10:10) Kiebhi ki u tena ku bhanga kiki?

21, 22. Kiebhi ki u tena ku ‘fisala ku athu’ o kixikinu kiê?

²¹ Zuela ku kafunga uala ku pholo mu kilunga mu ua tokala, kuila eie ua mesena kiá ku ku batizala. Muéne ua-nda bhinga o tufunga tua kilunga, na bhitulule ni eie o ilongesu ia dianga ia Bibidia. Se o tufunga iá, a mona kuila eie uala kia mu kitala, a-nda kuambela kuila a-nda ku batizala mu kiônge kia-nda kuíza. * Mu iônge ienii, ene mu bhana diskursu dia lungu ni kijimbuluilu dia batizu. O mulongi-phe, u bhinga ió a-nda ku a batizala, na tambuijile o ibhuidisu iiadi mu ukexilu ua ku ‘fisala ku athu’ o kixikinu kiâ.

²² O batizu, ilondekesa kuila o muthu ua di bhakula kua Nzambi, iu ua kituka Mbangi ia Jihova. O ió a-nda ku a batizala, a a bondeka mu menha, ni a a zangulula phala kuidikisa ku athu oso kuila, a di bhakula kua Jihova.

23. Ihi ilombolola o batizu “mu dijina dia Tata, dia Mona, ni dia Nzumbi Ikôla”?

²³ Jezú uambe kuma o maxibulu mê, a tokalele ku a batizala “mu dijina dia Tata, ni dia Mona, ni dia Nzumbi Ikôla.” (Matesu 28:19) Kiki, kilombolola kuma o muthu a-nda mu batizala, ua xikina o ungana ua Jihova Nzambi ni Jezú Kristu. (Jisálamu 83:18; Matesu 28:18) Muéne u xikina ué, mu ibhangelu ia nzumbi ikôla, kála o nguzu ionene ia Nzambi.—Ngalásia 5:22, 23; 2 Phetele 1:21.

24, 25. (a) O batizu ilombolola ihi? (b) Kibhuidisu kiahi kia tokala ku ki tambuijila?

²⁴ Kienhiki, o batizu ki ku bondeka ngó mu menha. Maji kilombolola kima kia beta-kota. O ku bondeka mu  menha, kilombolola kuila o muthu ua xisa o ukexilu uê uokulu. O ku zangulula mu menha, kilombolola kuila kindala eie, uala kiá mu kitala phala ku bhanga o vondadi ia Nzambi. Ua tokala ku di lembalala kuma, eie ua di bhakula kua Jihova Nzambi, ki ku kikalakalu, mba ku athu, mba ku kisangela. O ku di bhakula kuê, ni batizu, o dimatekenu dia ukamba uê ni Nzambi—o ukamba uê ua kazola ni muéne.—Jisálamu 25:14.

²⁵ O batizu ki ku bhuluka kana. O poxolo Phaulu ua soneka: “Tutumbenu ni ujitu uoso ni uôma, phala mu mone o kubhuluka.” (Filipe 2:12) O batizu o dimatekenu ngó. Kua kambe hanji kibhuidisu phala ku ki tambuijila, kiebhi ki ngi tena ku kolokota mu henda ia Nzambi? O kibatulu kietu kia sukina-ku, kia-nda tambuijila o kibhuidisu kiki.