1, 2. Kibhuidisu kiahi ki ua tokala ku bhanga kioso ki u xisa o jingeleja ja makutu, ni mukonda diahi kia beta-kota ku banza kiki?

XINGANEKA kuila mu sanzala iê, a te-mu venenu. Saí muthu mu kasuekele ua venenala o menha bhu tabhu dia sanzala iê, kienhiki o muenhu ua athu uala mu iluezu. Ihi i ueji bhanga? Se phata, ueji sota ku tunda bhu sanzala mba ku sota ditabhu diéngi. Maji né kiki ueji dibhuidisa, ‘O kuila a ngi venenala?’

² Kiki, kiene mu bhita ué ni jingeleja ja makutu. O Bibidia i longa kuila o ubhezelu iú, uezala ni ilongesu ni ibhangelu ia iibha. (2 Kolindo 6:17) Mukonda dia kiki, eie ua tokala ku tunda mu “Babilónia ia dikota,” o kisangela kia mundu kia jingeleja ja makutu. (Dijingunuinu 18:2, 4) O kuila ua ki bhange kiá? Se ua ki bhange, ua tokala ku tambula kiximanu. Maji kua bhingi dingi kima, kana ku tunda ngó mu ubhezelu ua makutu. Kioso ki u tunda-mu, eie ua tokala u dibhudisa, ‘O kuila ngala hanji ni ima ia tokala ku jingeleja ja makutu?’ Tala jiphangu.

3. (a) Ihi izuela o Bibidia ia lungu ni ubhezelu ua iteka, ni mukonda diahi a mukuá, ku xikana o ukexilu ua Nzambi kia a bhonza? (b) Ihi i ua tokala ku bhanga ku ima ioso i uala na-iu ia lungu ni ubhezelu ua makutu?

³ Saí athu ala ni iteka, mba kalatódio, mu mabhata mâ. O kuila eie uala ué ni ima íii? Se uala na-iu, nange u banza kuila, kia iibha ku sambela Nzambi sé o kikuatekesu kia iteka. Nange, o ima íii i ku uabhela kiavulu. Maji Nzambi, muéne ngó uzuela se kiebhi kia tokala ku mu bheza, kienhiki o Bibidia i longa ué kuma muéne ka-ndala kuila tu mu sambela mu kaxi ka iteka. (Tanga Makatukilu 20:4, 5; Jisálamu 115:4-8; Izaia 42:8; 1 Nzuá 5:21) Kiki-phe, eie u tena ku kolokota mu ku zokela o ubhezelu ua kidi, mu ku buika o iteka ioso i uala na-iu ia lungu ni ubhezelu ua makutu. Mu kiki, ua tokala u i mona kála ki mona Jihova.—kála kima ‘kia iibha.’—Matendelelu 27:15.

4. (a) Kiebhi ki tuejiia kuila o ubhezelu ua akuku ki iala ni valolo? (b) Mukonda diahi Jihova ua fidisa o mundu uê ku bhanga o ukexilu uoso-uoso ua umbanda?

⁴ O ubhezelu ua akuku, ene mu u bhanga ué mu jingeleja ja makutu. Ande dia kuijiia o kidi kia Bibidia, saí athu a xikinine  kuila athu afú, ala ni muenhu ku diulu, ni a tena ku kuatekesa, mba ku bhanga kia iibha ku athu mu ixi. Nange eie ua bhangele kiá kima, phala ku tululukisa o akuku’ê afú. Maji kála ki ua di longo kiá mu Kibatulu 6 kia divulu didi, athu afú kejiia dingi kima, ene kala ué bhu kididi kioso-kioso. Kienhiki, o kuzuela ni athu afú, ki ki valela kima. Njimbu ioso-ioso i difuangana kála ia mu tunda ku ndandu jetu jafú, mu kidi, ia mu tunda ku madimonho. Mukonda dia kiki-phe, Jihova ua fidisa akua Izalaiele phala ka fikise kuzuela ni athu afú, mba ku bhanga umbanda uoso-uoso.—Tanga Matendelelu 18:10-12.

5. Ihi i ua tokala ku bhanga se m’okulu ua kexile mu bheza o iteka, mba o akuku’ê afú?

⁵ Se m’okulu ua kexile mu bheza o iteka mba o akuku’ê, ihi i ua tokala ku bhanga? Tanga, ni ku xinganeka mu ibatulu ia Bibidia, ilondekesa kiebhi ki mona Nzambi o ima íii. Samba kua Jihova izuua ioso ia lungu ni vondadi iê, ia ku kolokota mu zokela o ubhezelu ua kidi, ni u bhinge ué o kikuatekesu kiê phala ku banza, kála kia banza muéne.—Izaia 55:9.

6, 7. (a) O athu a zuela kuila o natale fesa iahi, o kuila o akaiedi a Jezú akexile mu i bhanga? (b) O jifesa ja uvualukilu mu thembu ia maxibulu a Jezú, ja dilungile ni ihi?

⁶ O ubhezelu ua athu, u tena ku dilunga ni jingeleja ja makutu, kála o jifesa ja mundu. Mu kifika, xinganeka hanji o Natale. O natale ene mu ki tanga kuila, o fesa ia uvualukilu ua Jezú Kristu, o jingeleja javulu amba kuila Jikidistá, ene mu bhanga o fesa íii. Né kiki, ki kuala kima kilondekesa kuila o maxibulu a Jezú, akexile mu bhanga o fesa íii. O divulu Origens Sagradas de Coisas Profundas, izuela kuma: “Kua bhitile hâma jiiadi ja mivu, kioso kia vuala Kristu, se-ko muthu uejidile o kizuua, ka vulu a mesenene kuijiia o kizuua kia uvualukilu uê.”

⁷ Né muene se o maxibulu a Jezú ejidile o kizuua kia mu vuala, ene keji bhanga o fesa. Mukonda diahi? Mukonda, kála  kizuela O World Book Encyclopedia, o Jikidistá ja dianga, “akexile mu mona o jifesa ja uvualukilu, kála ijila ia jiphagão.” O jifesa ja uvualukilu ji tanga o Bibidia, ja jinguvulu jiiadi ngó, ka kexile mu bheza Jihova. (Dimatekenu 40:20; Marku 6:21) O jifesa ja uvualukilu akexile ué mu ji bhanga, phala ku ximana o jinzambi ja makutu. Mu kifika, o kizuua kia 24 ia mbeji ia Kasambuadi, akua Loma exile mu bhanga o fesa ia nzambi Diana. O kizuua kia mukuá, ene akexile mu bhanga o fesa ia nzambi iâ, o muanha, Apolo. Kienhiki, o fesa ia uvualukilu, akexile mu i funga ni ubhezelu ua makutu, ubhezelu ua kidi kana.

8. Jimbulula o ku difunga kua jifesa ja uvualukilu ni uôma ua ima ia madiabhu.

⁸ Saí dingi kima kia mukuá, kia bhangesa o Jikidistá ja dianga ku kamba ku bhanga o fesa ia uvualukilu ua Jezú. O maxibulu mê nange ejidile kuila o jifesa ja uvualukilu, ja kexile kumoxi ni uôma ua ima ia madiabhu. Mu kifika, saí akua Ngeleku, ni akua Loma, mu thembu iokulu, a xikinikine kuila o muthu kia mu vuala a mu endesa ku nzumbi, kienhiki, o nzumbi i mu langa ku muenhu uê uoso. O divulu, A Tradição dos Aniversários Natalícios, izuela kuma “O nzumbi íii ia dilungile ni nzambi a mu vuala mu kizuua kimoxi kia vuala o muthu.” Mu kidi, ki kieji uabhela Jihova se tu funga Jezú, ni ima ia madiabhu. (Izaia 65:11, 12) Kiebhi-phe o fesa ia natale a mu i bhanga ku athu oso?

9. Kiebhi kia solo o kizuua kia 25 ia mbeji ia Kaiiadi, kála kizuua kia uvualukilu ua Jezú?

⁹ Athu a mateka ngó ku bhanga o fesa ia uvualukilu ua Jezú, mu kizuua kia 25 ia mbeji ia Kaiiadi, kia bhiti jihâma ja mivu kioso muéne kia xisa o ixi. Maji o kizuua kiki, ki kiene o kizuua kia vuala Jezú, muéne a mu vuala mu mbeji ia Katutu. * Mukonda diahi-phe o kizuua kia 25 kia mbeji ia Kaiiadi a ki  solo? A mukuá a zuelele kuma o Jikidistá, a “mesenene kuila o kizuua kiki, ki takajana ni fesa ia phagão ia akua Loma, ia londekesele o uvualukilu ua muanha.’” (The New Encyclopædia Britannica) Mu kixibhu, kioso o muanha ki ua kexilé mu moneka, o jiphagão akexile mu bhanga o fesa, phala o muanha ku vutuka. Mu kizuua kia 25 ia mbeji ia Kaiiadi, athu akexile mu banza kuila, kiene o kizuua kia mateka ku vutuka o muanha. Phala ku xikinisa o jiphagão ku kala jikidistá, o atuameni a jingeleja a bhange o fesa a ixana “Kidistá” *

10. Mukonda diahi m’okulu saí athu ka kexile mu bhanga o fesa mu Natale?

¹⁰ Tundé m’okulu, athu ejidile kuila o Natale ia tundu ku jiphagão. Mukonda ki fesa ia jikidistá, ki iala mu mikanda ikôla, o Natale a i fidisa mu ixi ia Inglaterra ni mu jimbanza ja mukuá ja América, mu hâma ia 17 ia mivu. Muthu uoso-uoso ua kambele kuia mu kalakala mu kizuua kia Natale, ueji futa múluta. Mu ku bhita thembu, o ukexilu uokulu ua vutuka dingi, ni a bandekesa-ku dingi maukexilu ubhe. Kienhiki, o athu a mateka dingi ku bhanga o fesa ia Natale mu jixi javulu. Mukonda dia Natale ku bhanga mbandu ia jingeleja ja makutu, ió a mesena ku bhanga o vondadi ia Nzambi, ka bhange o fesa íii, mba jifesa ja mukuá ja ubhezelu ua jiphagão. *

11. Mukonda diahi saí athu ene mu bhanga o jifesa ja mundu, ni ihi ia tokala ku beta-kota phala etu?

¹¹ A mukuá a xikina kuila o jifesa ja mukuá, kála o Natale, ja tundu ku jiphagão, maji ka ki mono kála kima kia iibha, kioso kia bhanga o fesa íii. Mukonda athu avulu ka banza kuila o jifesa jiji, ja lungu ni ubhezelu ua makutu. Ene a banza ngó kuila, ithangana íii, ithangana ia ku kala kumoxi ni muiji. Kiene ué ki u banza? Se kiene, nange o henda iê ku muiji, i ku bhonzesa ku kolokota mu ku zokela o ubhezelu ua kidi, ki o henda ku jingeleja ja makutu. Xikana kuila Jihova, o mubhangi ua muiji, muéne ua mesena kuila eie u dibhana kiambote ni jindandu jê. (Efezo 3:14, 15) Eie u tena ku suínisa o ukamba iú, mu maukexilu a mukuá sé ku luualesa Nzambi. O poxolo Phaulu ua soneka ia lungu ni ihi ia tokala ku beta-kota phala etu, kioso kiambe: “Sotenu kudilonga jinga ioso i uabhela kiambote Nzambi.”—Efezo 5:10.

12. Londekesa se mukonda diahi tua tokala kueha ijila ni jifesa jala ni dimatekenu dia iibha?

¹² Nange eie u banza kuila o kua tundu o jifesa ja mundu, ki kiene kia mu ji bhanga lelu. O kuila kua bhingi muene kuijiia ku ja tundila? Kiene, kua bhingi muene! Phala ku londekesa: Xinganeka kuila eie ua mono o xupa-xupa mu dixidilu, o kuila ueji katula o xupa-xupa íii phala ku i dia? Mu kidi kana! O xupa-xupa íii ia xidi. Kála o xupa-xupa íii, o jifesa ja mundu, nange ji moneka kuila ja uabha, maji jene ja tundu mu ididi ia iibha. Phala tu kolokota mu ku zokela o ubhezelu uetu ua kidi, tua tokala ku kala ué ni kilunji kála kia kexile na-kiu o polofeta Izaia, uambela o abhezi a kidi: “Kana kubabata kima kia ufusa.”—Izaia 52:11.

13. Maka ahi a tena ku moneka kioso ki ukamba ku bhanga o jifesa ja mundu?

¹³ Ku moneka maka kioso ki u dituna ku bhanga o jifesa  jiji ja mundu. Nange o jikolega jê ja sidivisu, a dibhudisa se mukonda diahi, eie ki uene mu bhanga o jifesa ja mundu mu sidivisu. Ihi i ua-nda bhanga se a ku bhana o ujitu mu Natale? Kia iibha ku u xikana? Ihi i ua-nda bhanga se o kaza diê kale mu kixikinu kiê? Ihi i ua tokala ku bhanga phala o tuana tuê ka luuale, mu ku kamba ku bhanga o jifesa ja mundu?

14, 15. Ihi i ueji bhanga se muthu u ku menekena ni umenekenu ua lungu ni jifesa, mba se ua mesena ku ku bhana ujitu?

¹⁴ Kua bhingi ku kala ni kilunji kiambote, phala kuijiia se ihi i ua tokala ku bhanga mu ithangana ia mukuá. Se muthu u ku menekena ni umenekenu ua lungu ni jifesa, eie ua tokala ngó ku mu tambuijila ni ujitu. Maji xinganeka kuila, ua mu dibhana ni muthu uene mu mona izuua ioso, mba uene mu kalakala nê. Mu kithangana kiki, nange eie ua mesena kuzuela dingi maka alungu ni jifesa. Mu ithangana íii, ua tokala ku kala ni kilunji. O Bibidia i tu longa: “O kuzuela kuenu ku kale kua ujitu, kuotoue ni môngua, phala uoso ua m’ibhula, mu ijiie ku mu vutuila kiambote ni ujitu.” (Kolose 4:6) Aluka kiambote, phala ki u xinge akuenu. Ua tokala u a lombolola kiambote o kixikinu kiê ni uhete uoso. Ua ambela kuila eie ué, uene mu bhana ujitu ni ku tambula ujitu, ni kuia mu fesa, maji uene mu ki bhanga ngó mu ithangana iéngi.

¹⁵ Ihi i tuamba, se kuala muthu ua mesena ku ku bhana ujitu? Xinganeka o kithangana. O muthu u ku bhana, nange uzuela: “Eme ngejiia kuma eie ki uene mu bhanga o fesa íii. Maji né kiki, eme nga-ndala ku ku bhana o kima kiki.” Nange eie u banza kuila ku xikana o ujitu, mu kithangana kiki, ki kiene kimoxi ni ku bhanga o fesa. Mu ukexilu ua mukuá, se o muthu ua mu ku bhana o ujitu, kejiia o kixikinu kiê, eie ua tokala ku mu tangela kuila, ki uene mu bhanga o fesa íii. Kiki ki ku kuatekesa ku lombolola se mukonda diahi, eie u xikana o ujitu uê, maji ku tena ku mu bhana o ujitu mu kithangana kieniókio.  Lua kamúkua, kima kiambote ku dituna o ujitu, se o muthu ua mu ku bhana, u banza kuila eie ua-nda xibhaka mu kixikinu kiê, mukonda o kima kia mu ku bhana kia uabha kia vulu phala ku dituna-kiu.

16. Kiebhi ki u tena ku aluka kiambote mu ku di bhana ni jifesa ja mundu?

¹⁶ Ihi i tuamba se athu a muiji uê kale ni kixikinu kiê? Mu kithangana kiki ué, ua tokala ualuka. Ki kua bhingi ku di ta mu ífua mba jifesa joso ja solo o jindandu jê. Mu veji dia kiki, ua tokala ku xila o ibhangelu iâ, kála ki ua mesena kuila ene, a xila ué o ukexilu uê. (Tanga Matesu 7:12.) Eha o kima kioso-kioso, ki tena ku londekesa kuma ua mu bhanga o fesa ia mundu. Né kiki, lenduka kiambote, ku maka ka tokala ku fesa ia mundu. Eie ua tokala ku bhanga ioso mu ukexilu uambote u ku xisa ni kilunji kia zele.—Tanga 1 Timote 1:18, 19.

17. Kiebhi ki u tena ku kuatekesa o tuana tuê phala ka luuale, kioso kia mona akuâ a mu bhanga o jifesa ja mundu?

¹⁷ Ihi i ua tokala ku bhanga phala o tuana tuê ka luuale, mu konda o muiji ki ua mu bhanga o jifesa ja mundu? O ibhangelu iê, i uene mu bhanga ku mivu, iene ia-nda zuela. Saí jitata, a sola ithangana ia mukuá ku muvu, phala ku bhana ujitu ku tuana tuâ. Maji o ujitu ua beta-kota u bhana ku tuana tuê, o kithangana kiê, ni henda iê.

18. Kiebhi o ku dilunga ni Jikidistá mu iônge ku tena ku ku kuatekesa ku kolokota mu ku zokela o ubhezelu ua kidi?

¹⁸ Phala ku uabhela Nzambi, eie ua tokala ku dituna o ubhezelu ua makutu, ni ku kolokota mu ku zokela ni ku bhanga mbandu ku ubhezelu ua kidi. Ku bhanga kiki, kua bhingi ihi? O Bibidia izuela: “Tu di xinganekienu mudietu, tu di suinise mu ku dizola, ni kubhanga o mbote. Kana kufula ku di  bhongolola jinga, uila amoxi ki ene kufula, maji tu di longesa mudietu. Uila kiki, tu di suinisienu mudietu, kota-kota dingi kioso ki mu mona o Kizuua kia Ngana kí zukama.” (Jihebeleu 10:24, 25) O iônge ia Jikidistá, ithangana ia ku sanguluka, phala eie ku bheza Nzambi mu ukexilu ua mu uabhela. (Jisálamu 22:22; 122:1) Mu iônge íii, muala ku “di konda malamba” mu kaxaxi ka Jikidistá ja kixikinu.—Loma 1:12.

19. Mukonda diahi eie ua tokala kuzuela ni akuenu o ima i uene mu di longa mu Bibidia?

¹⁹ O ukexilu ua mukuá u tena ku zokela o ubhezelu ua kidi, o kuzuela ni akuenu, ia lungu ni ima i uene mu di longa mu Bibidia, ni Jimbangi ja Jihova. Athu avulu ene “mu di tula muenhu ni kukema” mukonda dia kuiibha kuoso, kuene mu bhita mu ngongo lelu. (Izekiiele 9:4) Nange, eie uejiia athu ala mu ukexilu iú ua kukema. O kuila u tena kuzuela nau, o kidielelu kia Bibidia kia lungu ni hádia? Mu ku dilunga ni Jikidistá ja kidi, ni kuzuela ni akuenu ia lungu ni ima iambote izuela o Bibidia, i uene mu di longa, ua-nda mona kuila o vondadi ia ku bhanga o ima ia lungu ni ubhezelu ua makutu iala hanji ku muxima uê, ia-nda bhua. Ijiia-kiu kuma eie ua-nda sanguluka, ua-nda tambula mabesá avulu, se u kolokota mu ku zokela o ubhezelu ua kidi.—Malakiia 3:10.