KIOSO o ixi ki ia mateka o kuizala ni athu, mundu uavulu uakexile mu bhanga ima iaiibha kála Kaini. Maji saí diiala diexile kiéngi. O diiala didi a mu ixana Enoko. Enoko uexile diiala dia suína. Athu oso mu’axaxi kê, akexile mu bhanga ima iaiibha, maji Enoko ua kolokotele mu sidivila Nzambi.

Eie uejiia mukonda diahi athu mu izuua iná akexile mu bhanga ima iaiibha? Xinganeka ngó, Nanhi ua bhangesa Adá ni Eva ku bhukumukina Nzambi, ni kudia o kibundu kia zuelele Nzambi kuma kana ku kidia? Uexile anju iaiibha. O Bibidia i mu ixana Satanaji. Muéne ua bhangesa kuila athu oso a kale aiibha.

Saí kizuua, Jihova Nzambi ua tumina Enoko ku zuelela kima ku athu, maji ene ka ki uabhela. Muéne uambe kiki: ‘Saí kizuua Nzambi ua-nda buika athu oso aiibha.’ Athu a dizangala kiavulu kiévu kiki. Katé ué a-ndalele ku jibha Enoko. Enoko ua suínine phala ku zuela ku mundu ia lungu ni ioso ia mesenene ku bhanga Nzambi.

Nzambi kehele Enoko ku kala ni muenhu mu thembu iavulu mu’xaxi ka athu aiibha. Enoko uakexile ngó ni 365 ia mivu. Mukonda diahi tu zuela “365 ia mivu ngó”? Mukonda mu izuua ienioió exile athu a nguzu ni akexile mu kala ni mivu iavulu. O mon’â Enoko, Matúzala uakexile ni 969 dia mivu!

Kioso kiafú Enoko, athu aiibhile dingi kiavulu. O Bibidia izuela kuma o ‘ibanzelu iâ, iexile ngó iaiibha izuua ioso,’ o kiki ‘o ixi ioso iezalele ni usuéia.’

Eie uejiia mukonda diahi mu izuua iná mua kexile ibhidi iavulu mu ixi? Mukonda Satanaji ua sangele ndunge iéngi ia ku bhangesa athu ku bhanga ima iaiibha. Tua-nda kuijiia dingi maka alungu ni ienii.