TALA mu fikula. Kala fikula idikisa o dibhebhu dia tumikisa Jihova ku Ijitu. Mu fikula ia dianga ua mu mona Alá ku beta mu Ngiji ia Nilu ni mbangala iê. Kioso kia bhangele kiki, o menha a ngiji a bhiluka manhinga. O jimbiji jafú, o menha a mateka ku nuha kiaiibha.

Anga, Jihova ua bhangesa mazote ku tunda mu Ngiji ia Nilu. Ene a bokona mu ididi—ioso ni mu majiku, ni mu jimbia ja ku bhangela jimbolo, ni ku ji hama ja athu ni mu ididi—ioso. Kioso kiafú o mazote akua Ijitu a ongeka, a mateka ku nuha kibuzu, o dizumba dia muangana mu ixi ioso.

Mu kusukáko, Alá ua beta ni mbangala iê bhoxi, ni ia kituka jina. Ibamba i numata. O jina jexile o dibhebhu dia katatu ku Ijitu.

O mabhebhu a mukuá a kuama ngó akua Ijitu, akua Izalaiele kana. O dibhebhu dia kauana diexile ia jihamue, ja bokuene mu mabhata oso a akua Ijitu, mu akua Izalaiele kana. O dibhebhu dia katanu dia kuata ku ibhaku. Ndumba ja jikamelu, jimbudi ni jihombo ja akua Ijitu jafú.

Kia kaiela-ku, Mozé ni Alá a kuata utokua a u takula bhulu. Íii ia bhekele jisanganbu jaiibha ku athu ni ku ibhaku. Diexile o dibhebhu dia kasamanu.

Mozé, u zangula o maku bhulu, Jihova–phe inga u tumikisa inuminu ni jinzanji. Iexile nvula ia matadi akua Ijitu nuka a imonene.

O dibhebhu dia kanake diexile kibuka kia kihoho. Nuka kuexile kihoho kiavulu. Kiene kiadi ioso ia subhukile ku nvula ia matadi.

O dibhebhu dia kavua diexile kitombe. O kitombe kia xiti o ixi ioso mu izuua itatu, maji akua Izalaiele akexile ni mukengeji.

Mu kusukáko, Nzambi ua tumina o mundu uê ku ta manhinga a kahombo, mba a kambudi ku thandu a mabhitu. Kiki-phe, o anju ia Nzambi ia bhitile mu kaxaxi ka akua Ijitu. Kioso o anju ki ia mono o manhinga, ka jibhile muthu mu inzo mua bhitile. Maji mu mabhata oso ki mu kexile manhinga ku mabhitu o anju ia Nzambi ia jibhile ana a phande-kumbi, a athu ni ia ibhaku. Kiki kiexile o dibhebhu dia 10.

Kioso kia bhitile o dibhebhu dia sukina-ku, Falaó ua tumina akua Izalaiele ku tunda. Mu usuku uenió o mundu ua Nzambi ua tundu mu Ijitu.