ZUZE ua mesene kuijiia se o 10 dia jiphange jê aiibhile hanji. Kienhiki muéne uixi: ‘Enu mu alondi. Mueza mu londa o ukexilu ua ixi ietu.’

Ene exi, ‘Kana, etu ki tu alondi.’ ‘Etu tu athu ambote. Etu oso tu jiphange. Tuexile 12. Maji phange ietu ia mukuá kene dingi, o kasule ua xala kubhata ni tat’etu.’

Zuze ua difinjila kála ka ejiia. Muéne ua kuata Ximinhá kála pelêzu, iu uehela akamúkua kuambata o kúdia ni ku vutuka kubhata diâ. Maji muéne ua ambela: ‘Kioso ki mua-nda vutuka, muiza ni phangi’nu ia kasule.’

Kioso kia vutuka mu Kanana, o jiphange a tangela kua tat’â Jakobo ioso ia bhitile. Jakobo ua luualele kiavulu. Muéne ua didi, ‘Zuze uáfu kiá, o Ximinhá mua muxi dingi. Eme ki nga-nda kuehela dingi kuambata mona’mi ua kasule, Bejamí.’ Maji kioso kiabhu o kúdia, Jakobo uehela ué kuambata Bejamí mu Ijitu phala ku kala ni kúdia.

Kindala, Zuze ua mono o jiphange jê ku bhixila. Muéne ua sangulukile kiavulu mu ku mona phangi’ê ia kasule Bejamí. Maji ene mudiâ kejidile kuma muthu iú uonene Zuze. Zuze ua bhange kima phala ku polovala o 10 dia jiphange jê.

Muéne ua tumu o jiselevende jê kuízalesa o jisaku ja jiphange jê ni kúdia. Maji sé ene kuijiia, muéne ua tumu ku tula o kopho iê ia phalata, mu saku ia Bejamí. Kioso kia kexile kiá dikanga mu njila, Zuze ua tumikisa o jiselevende jê phala ku a kaiela. Kioso kia a sange, o jiselevende exi: ‘Mukonda diahi mua nhana o kopho ia phalata ia ngana ietu?’

O jiphange joso exi, ‘Etu ki tua nhana o kopho iê ia phalata.’ ‘Uoso a mu sanga ni kopho ia phalata mu dietu, mu jibhié-nu.’

O jiselevende a soto mu jisaku joso, o kopho ia phalata a i sange mu saku ia Bejamí, kála ki ua mu mona bhabha. O jiselevende exi: ‘Enu ndenu-enu kubhata, maji Bejamí kala uíza n’etu.’ Kienhiki, ihi ia-nda bhanga o 10 dia jiphange ja Zuze?

Ene oso a vutuka ni Bejamí ku dibhata dia Zuze. Zuze uambela jiphange jê: ‘Enu ndenu-enu kubhata, maji Bejamí ua-nda xala bhobha kála mubhika uami.’

Kienhiki Juda uixi: ‘Se ngi vutuka kubhata sé o muzangala tat’etu ua-nda fuá, mukonda muéne ua mu zolo kiavulu. Nga ku dióndo, nge-hele ngi xale kála ngi mubhik’ê, maji ehela o muzangala ku vutuka kubhata.’

Zuze ua mono kuila o jiphange jê ka kexile dingi kála mu ukulu. Ene ka iibhile dingi. Kienhiki, ndoko tu tale se ihi ia bhange Zuze.