TALA o ibundu íii ia mu tuta o maiala. Tala o kisaka kionene kia jiuva. Kua bhingile maiala aiadi ku kiambata ku mbangala. Tala o jifiku, ni jilomá. O ibundu íii ia uabha ia mu tunda kuebhi? Mu ixi ia Kanana. Lembalala kuma, ku Kanana kuene kua tungile Mbalahamu, Izake, ni Jakobo. Maji mukonda dia nzala ia kexile koko, Jakobo ni muiji uê endele mu tungila ku Ijitu. Kindala kua bhitile kiá 216 dia mivu, Mozé ua mu kuendesa akua Izalaiele mu ku vutuka ku Kanana. Ene a tula mu kikangalakata bhu kididi a ki xana Kadexi.

Mu ixi ia Kanana mua tungile athu a iibha. Kienhiki, Mozé ua tumikisa 12 kia alondi, iu uambela: ‘Tungununenu se athu avulu a tungu-mu, se ene akua nguzu iavulu. Tungununenu se o ixi ia uabha phala ku i dima. Ki mu dijimbe, mu ku vutuka mu bheka-ku ibundu.’

Kioso kia vutuka mu Kadexi, alondi a tangela Mozé: ‘Kidi muene, o ixi iambote.’ Kienhiki, phala kuidikisa kuila kidi, a bhana Mozé o ibundu ia bhekele. Maji o 10 dia alondi exi: ‘O mundu kuenhoko athu onene ni aiibha kinene. A-nda tu jibha se tu fikisa ku a tambula o ixi.’

Akua Izalaiele kiévu kiki uôma ua kuata. Exi, ‘Tamanu se tua fuile ku Ijitu, mba mu kikangalakata kuku.’ ‘A-nda tu jibha mu ita, an’etu ni ahatu-etu a-nda ku ambata. Ndoko tu sole mutuameni uéngi bhu kididi kia Mozé, ni tu vutuk’etu ku Ijitu!’

Maji kiiadi kia alondi a dielela kua Jihova, a fikisa ku tululukisa o mundu. Majina mâ Josuué, ni Kalebe. Ene exi: ‘Ki mu kale ni uôma. Jihova uala n’etu. Ki kia-nda bhonza ku tambula o ixi.’ Maji o mundu ka-ndalele kuívua. Katé ué a mesene ku jibha Josuué ni Kalebe.

Jihova ua dizangalele kiavulu, ni uambela Mozé: ‘Ki bhuale muthu uala ni 20 a mivu, ua-nda bokona mu ixi ia Kanana. Enu mua mono o madiuanu u nga bhangele mu Ijitu, ni mu kikangalakata, maji né kiki ki mua dielela kôkuami. Mukonda dia kiki mua-nda nhunga mu kikangalakata mu 40 a mivu, katé kiafuá o muthu ua sukina-ku. Josuué ngó ni Kalebe a-nda bokona mu ixi ia Kanana.’