UEJIIA ihi ia mu bonga athu bhoxi? Ia difuangana kála jeada. Ia zele, maji ki jeada; iexile kima kia kudia.

Kua bhitile kiá mbeji imoxi tundé akua Izalaiele kia tundile ku Ijitu. Ene akexile mu kikangalakata. Kuenhoko o kúdia kua tolele, kienhiki, o mundu uakexile mu dikola: ‘Tamanu se Jihova ua tu jibhile ku Ijitu. Kuenhoko tua kexile ni kudia kuoso ku tua-ndalele.’

Kienhiki Jihova uixi: ‘Nga-nda nokesa kúdia tundé ku diulu.’ Íii iene ia bhangele Jihova. Mu kimene kia kaiela, akua Izalaiele kia mono kima kia zele kia lauka, ene a dibhula mudiâ: ‘Kiki kima kiahi?’

Mozé uixi: ‘O kúdia kua mi bhana Jihova.’ Athu a kuixanene MANÁ. Ia uabhele kála mbolo io bhange ni uiki.

Mozé uambela athu, ‘Kala muthu u bonga ngó ia-nda tena kudia.’ A bhangele kiki mu imenemene ioso. Kioso kitua o muanha o maná i zunzumuka bhoxi.

Mozé uambe ué: ‘Kana muthu u bonga maná phala kizuua kiéngi.’ Maji saí athu ka belesela. Uejiia ihi ia bhiti? Mu kimene kia mukuá o maná ia bhakele, ia kuata mauindu ni ia kexile mu nuha kiaiibha!

Kizuua kimoxi ngó mu semana, Jihova ua tumina o mundu ku bonga o maná i soka phala izuua iiadi. Kiki kiexile o kizuua kia kasamanu. Jihova uambe kuma a tokalele ku bhaka kúdia phala kizuua kia mukuá, mukonda mu kizuua kia kasambuadi muéne ka-nda a bhana maná. Kioso kia bongo o maná phala o kizuua kia kasambuadi, ki ia kuate mauindu né ku nuha! Kiki kiexile madiuanu a mukuá!

Mivu ioso ia bhiti akua Izalaiele mu kikangalakata, Jihova ua adisa ni maná.