EIE UEJIIA o dijina dia diiala dia betele-kota ku nguzu, uakexile ku mundu? Muéne mufundixi a muixana Sansau. Jihova ua bhanene o nguzu kua Sansau. Ande dia ku mu vuala, Jihova uambela manh’â: ‘Ua-nda vuala mona. Muéne ua-nda tuamena mu bhulula akua Izalaiele ku akua Fidíxia.’

Akua Fidíxia exile athu aiibha a tungile mu Kanana. Ene akexile ni masoladi avulu, ia akexile mu bhanga ima iaiibha ku akua Izalaiele. Saí kizuua Sansau uakexile múia mu njila kua tungile akua Fidíxia, muéne ua bhânge ni hoji ionene. Maji Sansau ua jibha o hoji ni maku-a hatu. Muéne ua jibha ué hama ja akua Fidíxia.

Anga, Sansau ua zolo muhatu a mu ixana Dalila. O atuameni a akua Fidíxia a kanena Dalila, kala muthu u mu bhana 1.100 ia kitadi kia phalata, se muéne ua a tangela o kikutu ki bhangesa Sansau ku kala ni nguzu iavulu. Dalila ua mesenene muene o kitadi kioso. Muéne kexile dikamba dia kidi dia Sansau, né dia mundu ua Nzambi. Kienhiki, muéne ua jijidika mu ku ibhula Sansau se ihi i mu bhangesa ku kala ni nguzu iavulu.

Mu kusukáko, Dalila ua tena ku bhangesa Sansau ku tanga o kikutu kia nguzu iê. Muéne uixi, ‘O ndemba iami nuka ai bhutile.’ ‘Tundé kia ngi vuala, Nzambi ua ngi solo phala ku kala selevende iê ia kazola, a ixana Nazalé. Se ndemba iami ai bhuta, o nguzu iami ia-nda ngi bhua.’

Kioso Dalila kiévu kiki, ua zekesa Sansau ku maku mê. Muéne-phe uexana maiala phala ku mu batula o ndemba. Kioso Sansau kia balumuka, muéne kexile dingi ni nguzu. Akua Fidíxia eza, ni a mu ambata. Ene a mu tubula o mesu ni a mu bhange mubhika.

Kizuua kimoxi akua Fidíxia a bhange fesa phala kubheza nzambi iâ, Dangoni, ene a katula Sansau mu kaleia ni a mu bheka phala ku tonoka nê. Maji o ndemba ia Sansau ia kudile dingi. Sansau inga uambela o muzangala ua mu kuatele ku lukuaku: ‘Ngehele ngi kuate ku jiphiladi ja fikidila o inzo ioso.’ Sansau ua sambe kua Jihova mu ku bhinga nguzu, kienhiki ua kuata ku jiphiladi. Muéne ua dikola: ‘Ngi fué kiá kumoxi ni akua Fidíxia.’ Mua kexile 3.000 ja akua Fidíxia mu fesa kioso kia nhikisa ni nguzu ioso, o jiphiladi ja inzo ja lundumuka, ni ja jibha athu oso.