SE UA fuile, kiebhi kieji kala mam’enu, se u kala dingi ni muenhu? Muéne ueji sanguluka kiavulu! Maji o muthu uafú kiá, u tena ku kala dingi ni muenhu? Kia bhitile kiá?

Tala o diiala bhobha, ni muhatu ni muzangala. O diiala polofeta Elija. O muhatu mutudi ua mbanza ia Seleta, o muzangala mon’ê. Kizuua kimoxi o muzangala ua katele. Mu kusukáko, muéne uafú. Elija uambela o muhatu: ‘Ngi bhane o muzangala.’

Elija uambata o muzangala uafú, iu ua mu tula ku hama. Kienhiki muéne ua sambe: ‘Jihova bhanga o muzangala iú, ku vutuka ku muenhu.’ Kienhiki, o muzangala ua mateka ku bhuima! Elija ua mu ambata kuala manh’â, iu uambe: ‘Tala, o mon’ê uala dingi ni muenhu!’ O manh’â ua sangulukile kiavulu.

O polofeta ia mukuá ionene ia Jihova, dijina diê Ilizeu. Muéne uexile múkuatekexi ua Elija. Maji, Jihova ua bhana ué ku tena kua Ilizeu phala ku bhanga madiuanu. Kizuua kimoxi, Ilizeu uai ku mbanza ia Suneme, kuenhoko kuexile muhatu ua mu bhange mbote. Mu bhita thembu, o muhatu ua vuala o mona.

Mu kimene o mona uai mu tala tat’ê uakexile mu kalakala mu díbhia. Mu bhita kithangana, o mona ua dikola: ‘Aiué o mutué uami!’ Kioso kia mu ambata kubhata o muzangala uafú. O manh’â ua luualele kiavulu! Ni lusolo muéne uendele mu takana Ilizeu.

Kioso Ilizeu kia bhixila, muéne uambatele o mona uafú ku dixilu. Muéne ua sambe kua Jihova iu ua zeka ku thandu dia mukutu ua mona. Kienhiki, o mukutu ua mona ua mateka o ku tema, muéne ua te ngaxexe mu sambuadi dia veji. Manh’â ua sangulukile kiavulu mu ku mona mon’ê ni muenhu!

Athu avulu afú kiá. Kiki ki luualesa o muiji uâ, ni makamba mâ. Etu ki tu tena ku bheka athu ku muenhu. Maji, Jihova u tena. Anga, tua-nda kuijiia se kiebhi muéne kia-nda bheka jimidi ja athu ku muenhu.