KIOSO Davidi kia jibhile Ngoliia, Abinele mutuameni a masoladi a Izalaiele, ua mu ambatele kua Saúlu. Saúlu ua sangulukile kiavulu ni Davidi. Ua mu bhange mutuameni ua masoladi mê, iu ua mu ambata phala ku kala ku dibhata dia sobha.

Kioso o masoladi kia vutuka ku ita ni akua Fidíxa, ahatu embile: ‘Saúlu ua jibha jimidi, maji Davidi ua jibha makuinhi a jimidi.’ Kiki kia bhangesa Saúlu ku kala ni difuba, mukonda Davidi ua tambuile dingi kijingu, Saúlu ndenge. Maji o mon’a Saúlu, Jonata ka kexile ni difuba. Muéne ua zolele kiavulu Davidi, Davidi ua zolele ué Jonata. O kiiadi kiâ, a di kanena ku kala makamba katé ku hádia.

Davidi uexile muxiki uambote ua alapa, Saúlu ua zolele o mikumbi ia kexile mu xika. Maji kizuua kimoxi, o difuba dia Saúlu dia mu bhangesa ku bhanga kima kiaiibha. Kioso Davidi kia kexile mu xika o alapa, Saúlu ua kuata ku sosa iê, iu ua mu takula-iu, uambe: ‘Nga-nda phaphela Davidi ku phalelu!’ Maji Davidi ua lenge, inga o sosa i lueza. Saúlu ua lueze dingi mu ku takula o sosa kua Davidi. Kindala, Davidi uejidile kuma ua tokalele ku dilanga.

Ua lembalala o kikanenu kia bhangele Saúlu? Muéne ua kanene ku bhana mon’ê, kala muhatu ku diiala dieji jibha Ngoliia. Saúlu uambela Davidi kuma ua-nda mu bhana o mon’ê, Mikala, maji u diangela ku jibha 100 ia jinguma ja akua Fidíxia. Xinganeka ngó! Saúlu uakexile mu kinga kuma akua Fidíxia, a jibha Davidi. Maji ene ka ki bhange, kienhiki Saúlu uehela mon’ê ku kala muhatu ua Davidi.

Saí kizuua Saúlu uambela Jonata, ni ku jiselevende jê kuma, ua-nda jibha Davidi. Maji Jonata uixi kua tat’ê: ‘Kana ku bhanga kiaiibha kua Davidi. Muéne nuka ua ku bhangele kima kiaiibha. Uene mu ku bhanga ngó mbote. Muéne ua bhakuile o muenhu uê phala ku jibha Ngoliia, kioso ki ua mono kiki eie ua sangulukile.’

Saúlu uévu mon’ê, ni ua kanena kuma ka-nda bhanga dingi kiaiibha kua Davidi. Davidi a mu bhekele dingi kubhata, iu ua sidivila dingi Saúlu, kála kia kexile mu bhanga. Saí kizuua, Davidi kia kexile mu xika o muimbu, Saúlu ua takula dingi o sosa iê kua Davidi. O sosa ia lueza Davidi, ni ia tula ku phalelu. Iexile mu veji ia katatu! Kienhiki, Davidi uejidile kuma ua tokalele ku lenga!

Mu usuku uenió, Davidi uendele kubhata diê. Maji Saúlu ua tumikisa maiala phala ku mu jibha. Mikala uejidile o kikutu kia tat’ê. Kiki muéne ua tangela muadi uê: ‘Se ku lenge lelu mu usuku, mungu ua-nda fuá.’ Mu usuku uenió, Mikala ua kuatekesa Davidi ku lenga mu njanela. Davidi ua disueka mu sambuadi dia mivu, inga Saúlu ka tenene ku mu sanga.