Tala Samuuele ua mu ta maji ku mútue ua diiala. Kiki kiene kia kexile mu bhanga ku athu kia a sola, phala ku kala sobha. Jihova ua tumina Samuuele phala ku ta maji ku mútue ua Saúlu. Máji a iuka, a nuha kiambote.

Saúlu ka di monene kuila muthu u tokala ku kala sobha. Muéne uambela Samuuele, ‘Eme ngi mukuá diembu dia Bejamí, o diembu dia ndenge mu Izalaiele.’ ‘Mukonda diahi ua mu zuela kuma, nga-nda kala ngi sobha?’ Jihova ua zolele Saúlu, mukonda muéne ka kexile ku di ta ku thandu dia akuâ. Mukonda dia kiki, muéne ua mu solo phala ku kala sobha.

Maji, Saúlu kexile ngadiama mba diiala dia tolo. Muéne mukuá muiji ua kitadi, uexile ué muzangala ua uabha iu ua lebhele. Muéne ua betele kota mu ku lebha mu Izalaiele! Saúlu uexile mukuá ku lenga ni lusolo, ni uexile ué diiala dia nguzu. O mundu ua sangulukile mukonda Jihova ua solele Saúlu phala ku kala sobha. Kienhiki, en’oso a mateka ku dikola: ‘Sobha kola muenhu!’

O jinguma ja Izalaiele akexile ni nguzu iavulu. Ene a bhekele ibhidi iavulu ku akua Izalaiele. Ande dia Saúlu ku kala sobha, akua Amone ejile mu bhânga nâ. Maji Saúlu ua bhongolola o masoladi a nguzu, iu ua nganhala o ita ku akua Amone. Kiki kia bhangesa o mundu ku sanguluka mukonda dia Saúlu ku kala sobha.

Kienhiki, mu ku bhita mivu Saúlu uendesa akua Izalaiele mu ikoué iavulu, ku thandu dia jinguma jê. Saúlu uakexile ni mona ua suina, a mu ixanene Jonata. Jonata ua kuatekesa akua Izalaiele ku nganhala ita iavulu. Akua Fidíxa exile jinguma jaiibha kinene ja akua Izalaiele. Saí kizuua, jimidi ja akua Fidíxia ejile mu bhânga ni akua Izalaiele.

Samuuele uambela Saúlu phala ku mu kingila katé muéne kia-nda bhixila, phala ku bhana o sata mba ujitu kua Jihova. Maji Samuuele uakexile mu nangena mu kuíza. Saúlu uakexile ni uôma kuma akua Fidíxa a-nda mateka o ita, kienhiki-phe muéne ua tuamena iu ua bhana o sata. Kioso Samuuele kia bhixila uambela Saúlu, kuma muéne ua bhukumuka. Samuuele uixi: ‘Jihova ua-nda sola muthu uéngi na kale sobha ia akua Izalaiele.’

Anga, Saúlu ua bhukumukine dingi. Kienhiki, Samuuele ua mu ambela: ‘Kia beta-kota ku belesela Jihova, o ku bhana sata ia mbudi ndenge. Mukonda dia ku kamba ku belesela Jihova, Jihova ka-nda kuehela ku kala sobha ia Izalaiele.’

Tua dilongo disá diambote. Kiki kidikisa kuma, kia beta-kota ku belesela Jihova mu ithangana ioso. Kidikisa ué, kuma muthu uambote kála Saúlu, u tena ku kala muthu uaiibha. Etu ki tua mesena ku kala tu athu aiibha, ki kiene?