ANDE dia Davidi kufuá, muéne ua bhanene o ilongesu ia Nzambi kua Solomá phala ku tunga o tembulu ia Jihova. Mu mivu ia kauana ia utuminu uê, Solomá ua mateka ku tunga o tembulu, iambatele sambuadi dia mivu ni kaxaxi phala ku i zubha. Makuinhi a hama ia midi ia maiala a kalakala mu ku tunga o tembulu, o ku i tunga kua bhingile kitadi kiavulu. Mukonda ai iukisa ni ulu iavulu ni phalata.

Mu tembulu mua kexile sala jiiadi jonene, kála kia kexile mu balaka. Maji o sala jiji, ja betele kota, o ja kexile mu balaka ndenge. Solomá ua tumina ku tula o álaka ia kikutu mu sala iala ku hota, o ima ia kamúkua ia balaka ai tudile mu sala ia kamúkua.

Kia zubha ku tunga o tembulu, a bhange fesa ionene. Solomá ua fukamene ku pholo ia tembulu iu ua sambe, kála ki ua mu mona mu fikula. Solomá uambela Jihova, ‘Sumbala o diulu dioso ki di soko phala eie,’ ‘kiebhi ki tena ku ku soka o tembulu íii. Maji Nzambi iami, nga ku dióndo ivua o mundu uê kioso kia samba bhu kididi kiki.’

Kioso Solomá kia zubha o musambu, ku diulu kua tundu túbhia. O túbhia tua jokotesa o iama ia kexile mu sata. O tembulu iezalele ni mukengeji ua Jihova. Kiki kiedikisa kuma Jihova uévu, iu ua sanguluka ni tembulu ni musambu ua Solomá. Kienhiki, athu ka kexile dingi múia mu kalatódio, mukonda o tembulu kiene kiá o kididi kia ubhezelu.

Mu thembu iavulu Solomá ua tumine ni unjimu uoso, o mundu ua sangulukile. Maji Solomá uakexile ni ahatu avulu a jixi jengi ka kexile mu bheza Jihova. Ua mu mona o muhatu ua mu bheza o kiteka? Mu kusukáko, ene a bhangesa Solomá kubheza ué o jinzambi ja makutu. Uejiia ihi ia bhiti kioso Solomá kia bhange kiki? Muéne ka kexile dingi mu talatala kiambote o mundu. Muéne uexile kiá muthu uaiibha, o mundu ka sangulukile dingi.

Kiki kia bhangesa Jihova ku dizangala ni Solomá, iu ua mu ambela: ‘Nga-nda ku katula o utuminu, nga-nda ku u bhana ku muthu uéngi. Ki nga-nda ki bhanga kindala ku muenhu uê, maji ku utuminu ua mon’ê. Maji ki nga-nda katula o mundu uoso ku utuminu ua mon’ê.’ Ndoko tu tale kiebhi ki kia bhiti.