KIFUA 50.000 athu endele o njila mu ku tunda mu Babilonha katé mu Jeluzaleme. Maji kia bhixila koko, a sange Jeluzaleme kála kibhela kia hatu. Ki mua tungile muthu. Akua Izalaiele a bhingile ku i tunga dingi.

O kima kia dianga o ku bhanga kiexile o kalatódio. Kiene o kididi kia satela o ibhaku phala Jihova. Kia bhiti ji mbeji, akua Izalaiele a mateka ku tunga o tembulu. Maji o jinguma ja akua Izalaiele a zukamene nau ka mesenene kuila ene ai tunga. A a kuatesa uôma phala ka i tunge. Mu kusukáko, o jinguma a bhange kuila o sobha ia Pélesa u bhana kitumu phala ku palalesa o kikalakalu.

Kua bhiti kiá mivu. Akua Izalaiele ala kiá mu 17 dia mivu, tundé kia xisa Babilonha. Jihova ua tumikisa jipolofeta jê, Ajeu ni Zakadiia, phala ku tangela o mundu, kuila a mateke dingi ku tunga. O mundu ua dielela dingi kua Nzambi, i a belesela o jipolofeta. Sumbala kua kexile kitumu kia fidisa ku tunga, maji né kiki, ene a mateka ku i tunga muene.

Kienhiki, o disoladi dia Pélesa a dixana Tetenai uebhula ku akua Izalaiele, mukonda diahi ene akexile mu tunga o tembulu. Akua Izalaiele a tambuijila kuma kioso kia kexile hanji ku Babilonha, o Sobha Silu ua tumina: ‘Ndenu mu Jeluzaleme ni mu tunge o tembulu ia Jihova Nzambi ienu.’

Tetenai ua tumikisa mukanda mu Babilonha, iu uebhula se o difundu, Silu ua bhanene muene o kitumu kiki. Kienhiki, o sobha iobhe ia Pélesa ua tambuijila mu mukanda. Kuma Silu ua bhanene muéne o kitumu kiki. O sobha ua soneka kiki: ‘Ehelenu akua Izalaiele ku tunga o tembulu ia Nzambi iâ. Eme Ngi mi tumina ku a kuatekesa.’ Mu mivu iuana o tembulu a i zubha, kienhiki, akua Izalaiele a sangulukile kiavulu.

Kua bhiti dingi mivu iavulu. Tundé kia zubha o tembulu kua bhitile kia 48 a mivu. Athu mu Jeluzaleme exile ji ngadiama, o mbanza ni tembulu ia Nzambi ki ia iukile. Mu ku vutuka mu Babilonha, Ejidala mukuá Izalaiele ua mono kuma ua tokalele ku iudika kiambote o tembulu ia Nzambi. Eie uejiia ihi ia bhange?

Ejidala uai kua sobha ia Pélesa Artaxexe, o sobha íii iambote ua mu bhana ima iavulu phala ku iambata mu Jeluzaleme. Ejidala ua bhingi akua Izalaiele akexile mu Babilonha phala ku mu kuatekesa kuambata o ima mu Jeluzaleme. O 6.000 ja athu a xikina kuia. Ene ambata phalata iavulu ni imbamba ia kamúkua iambote.

Ejidala ua thandanganhele mu konda mu njila mua kexile athu aiibha. O athu iâ, eji nhana o phalata, ni ulu ni kua jibha. Kienhiki, Ejidala ua bhongolola o mundu, kála ki ua mu mona mu fikula. Mbe, muéne ua sambe-phe kua Jihova phala ku a kuatekesa mu njila iâ, ia ku vutuka mu Jeluzaleme.

Jihova ua a kuatekesa. Mu ku bhita mbeji jiuana mu njila a bhixila kiambote mu Jeluzaleme. Kiki ki kidikisa kuma Jihova, u kuatekesa uoso u mu dielela?