KUA BHITI mivu iiadi tundé kia tambula Babilonha ku akua Mediia ni akua Pélesa. Tala-phe ihi ia mu bhita kindala! Kiene, akua Izalaiele a mu tunda ku Babilonha. Kiebhi kia bhuluka? Nanhi ua ehela kuia?

O sobha ia Pélesa, Silu. Ande dia ku vuala Silu, Jihova ua tumina polofeta iê Izaia ku soneka maka alungu nê: ‘Eie ua-nda bhanga ioso i Nga-nda ku tumina. O mabhitu onene a-nda kua a jimba o ku a jika, phala eie ku tambula o mbanza.’ Silu ua-nda tambula Babilonha. Akua Mediia ni akua Pélesa, a bokona mu mbanza, kioso kia sange o mabhitu a jikuka.

Maji Izaia o polofeta ia Jihova ua zuelele ué kuma, Silu ua-nda tumina ku tunga dingi o Jeluzaleme ni tembulu. O kuila Silu ua bhanene muene o kitumu kienhiki? Kiene, muéne ua ki bhana. Silu uambe kua Izalaiele: ‘Ndenu mu Jeluzaleme mua tunge o tembulu ia Jihova, Nzambi ienu.’ Kienhiki, akua Izalaiele ai.

Maji akua Izalaiele a kamúkua ka tenene ku vutuka mu Jeluzaleme. Iexile njila ia dikanga, iexile 800 ia kilometu, a mukuá a kukile kiá, ni exile mu kata, ka tenene kuenda o njila ia dikanga. Maji kua kexile ué maka a mukuá, a lembuesa kuia. Maji Silu ua tangela ku iâ katenene kuia: ‘Bhanenu ulu ni phalata, ni imbamba ia mukuá ku iâ a múia mu tunga Jeluzaleme ni tembulu.’

Kienhiki, akua Izalaiele endele o njila mu ku vutuka mu Jeluzaleme, a tambula imbamba iavulu. Silu ua vutuile ué o jibasia ni jikopho ja katuile Sobha Nabukodonozolo mu tembulu ia Jihova, kioso kia buikile Jeluzaleme. O mundu uakexile ni imbamba iavulu phala ku iambata.

Ene a bhangele mbeji jiuana mu njila, kienhiki akua Izalaiele a bhixila mu Jeluzaleme. Kua bhiti muene 70 a mivu tundé kia buikile o mbanza, o ixi ia kexile sé muthu. Maji kindala Izalaiele ala dingi mu ixi iâ, ene a-nda kala ni ibhidi ia mukuá, kála ki tua-nda mona.