O KILUMBA ki ua mu mona bhabha, uala kiá ni 12 ia mivu. Jezú ua mu kuata ku lukuaku, o manh’â ni tat’â, a mu zukamena. Eie uejiia mukonda diahi ene a sanguluka? Tu tale.

O tat’â kilumba, uexile diiala dionene, a mu ixanene Jailu. Saí kizuua o mon’ê uakexile mu kata, kienhiki a mu tudile ku hama. Maji muéne ka disanzele. Uakexile mu kata kiavulu. Jailu ni muhatu’ê a thandanganhele kiavulu, mukonda afikile kuma o mon’ê nange ueji fuá. Muéne uexile mona umoxi-élele. Kienhiki, Jailu uendele mu sota Jezú. Muéne uevuile kiá, o madiuanu a bhangele Jezú.

Kioso Jailu kia sange Jezú, bhua kexile athu avulu a mu kondolokele. Maji Jailu ua tenene ku bhita i ua di takula ku inama ia Jezú. Muéne uambe, ‘Mon’ami ua mu kata kiavulu.’ ‘Nga ku dióndo, zakunu u mu sake.’ Jezú uambe, nga-ndaia.

Kienhiki-phe, mu kuenda, o mundu akexile ku a xina. Mu kithangana kieniókio Jezú uemana. Muéne uebhula, ‘Nanhi ua ngi babata?’ Jezú uévu kuma kua tundu kutena ku mu kutu uê, kienhiki muéne uejidile kuma saí muthu ua mu babata. Maji nanhi-phe? Uexile muhatu uakexile mu kata mu 12 ia mivu. Muéne ua zukamene iu ua babata mu izuatu ia Jezú, inga u disanza!

Kiki kia bhangesa Jailu ku sanguluka, mukonda ua mono kuma, phala Jezú ku saka muthu ki ku bhonzo. Maji kua bhixila o mukunji. Muéne ua tangela Jailu kuma, kana dingi ku bhindamesa Jezú. ‘O mon’ê uafu kiá.’ Kioso Jezú kia kivu, muéne uambela Jailu: ‘Kana ku thandanganha, muéne ua-nda kala kiambote.’

Kioso kia bhixila ku dibhata dia Jailu, athu akexile mu dila. Maji Jezú uixi: ‘Ki mu dile. O kilumba kafué. Muéne ua zeke ngó.’ Maji a mukuá elela Jezú, mukonda ejiidile kuma o mona uafú.

Jezú uambata pha’iâ, ni manh’â, ni jipoxolo jê jitatu, a bande katé mu dixilu mua kexile o kilumba. Muéne ua mu kuata mu lukuaku luê iu uambe: ‘Balumuka!’ Kienhiki muéne ua vutuka ku muenhu, kála ki ua mu mona bhabha. Muéne ua balumuka iu ua mateka o kuenda! Mukonda dia kiki, pha’iâ ni manh’â a sangulukile kiavulu.

Iú ki muene o muthu ua dianga a mu phaphumuna kuala Jezú, mu kaxaxi ka io afú. O ua dianga, i tanga Bibidia, uexile o mon’a mutudi, ua mbanza ia Naini. Jezú ua fukunuine ué Lázalu, phange ia Madiia ni Malata. Kioso kia-nda tumina kála sobha ia Nzambi, muéne ua-nda fukununa athu avulu. Kiki, ki ki tu bhekela kisangusangu?