UA MU mona o diembe dia mu tuluka ku mutué ua diiala. O diiala, Jezú. Muéne uala kiá mu 30 a mivu. O diiala uala bhu mbandu iê, Nzuá. Tua dilongo kiá maka alungu ni muéne. Ua lembalala kioso Madiia kiendele mu kunda Nzebele ndandu iê, ni kioso o mona kia tuka ni kisangusangu mu mala dia Nzebele? O mona ió uakexile mu mala, Nzuá. Maji ihi Nzuá ni Jezú ia mu bhanga?

Nzuá ua zubha ku bondeka Jezú mu menha a Ngiji ia Njolodá. Kiki kiene kia batizala o muthu. Kia dianga, muéne a mu bondeka koxi dia menha, iu ua mu zangula dingi. Kienhiki, kiene Nzuá dia Batizu kia kexile mu batizala athu. Maji mukonda diahi Nzuá ua mu batizala Jezú?

Nzuá ua bhangele kiki, mukonda Jezú ua bhingile Nzuá phala ku mu batizala. Nzuá uakexile mu batizala ió a mesene o muloloke ua ituxi ia kexile mu bhanga. Maji o kuila Jezú ua tele kiá kituxi, phala ku diela? Kana, Jezú nuka ua tele kituxi, mukonda muéne Mon’a Nzambi ia diulu. Kienhiki, kima kiéngi kia mu bhangesa ku bhinga kua Nzuá phala ku mu batizala. Ndoko tu tale se kima kiahi.

Ande dia Jezú kuia kua Nzuá, muéne uexile kalupindelu. O kalupindelu, ió u bhanga ima ni mabaia, kála meza, ialu, ni ji bangu. Zuze muadi ua Madiia uexile kalupindelu, muéne ua longo o ufunu iu kua Jezú. Maji Jihova ka tumu Mon’ê mu ixi phala ku kala kalupindelu. Muéne uakexile ni kikalakalu phala ku ki bhanga, o thembu ia Jezú ku mateka o kikalakalu kiki,kia bhixile kiá. Kienhiki, phala kuidikisa kuila uéza mu bhanga o vondadi ia Tat’ê, Jezú ua bhingi kua Nzuá phala ku mu batizala. O kuila Nzambi kia mu uabhela?

Kiene, muéne ua ki uabhela, mukonda kioso Jezú kia tundu mu menha o dízui ku diulu dixi: ‘Iú Mon’ami nga mu zolo.’ O diulu dia jikuka, inga kuíza o diembe di dia tuluka katé ku thandu dia Jezú. Maji ki diexile diembe. Dia difuile ngó. Mu kidi, iexile o nzumbi ikôla ia Nzambi.

Mu kienhiki, Jezú uakexile ni ima iavulu phala ku xinganeka, kienhiki muéne uai bhu kididi kia ubheka uê, iu ua bhange-ku 40 a izuua. Bhenhobho bhua mu monekena Satanaji. Kienhiki, mu veji jitatu, Satanaji ua fikisa ku bhangesa Jezú ku xibhaka o itumu ia Nzambi. Maji Jezú ka xikina.

Kienhiki, kia vutuka, Jezú uejiia maiala akexile akaiedi mba maxibulu a dianga. A exanene, Mandele, ni Phetele (a mu ixana ué Ximá), Filipe ni Natanaiele (a mu ixana ué Matulu). Jezú ni maxibulu’ê ubhe, ai katé ku Ngalileia. Bhenhobho mu Ngalileia, a tula mu mbanza ia Natanaiele mu Kanana. Jezú uendele mu fesa ionene ia ukaza, iu ua bhangele-mu o madiuanu a dianga. Eie uejiia se iexile ahi? Muéne ua bhilula o menha mu vinhu.