TALA o anju ia jikula o dibhitu dia kaleia. O maiala a mu a katula bhu kanga, jipoxolo ja Jezú. Ndoko tu tale se ihi ia bhange phala ku a ta mu kaleia.

Kua bhitile ngó thembu, tundé Jezú kia tumikisa o nzumbi ikôla ku maxibulu mê. Kia bhitile kiki: Mu ngoloxi Phetele ni Nzuá endele mu tembulu mu Jeluzaleme. Bhenhobho, bhu mbandu ia dibhitu bhua kexile o diiala diexile kinema. Athu akexile ku mu bheka izuua ioso bhu kididi kiki, phala ku bhinga jimola ku athu akexile mu bokona mu tembulu. Kioso kia mono Phetele ni Nzuá, muéne ua zukama phala ku bhinga jimola. Ihi ia bhange o jipoxolo?

Ene emana, ia mono o kinema. Phetele uambe, ‘Eme ki ngala ni kitadi, maji ngala ni kima ki nga-nda ku bhana. Mu dijina dia Jezú emana ni uende!’

Kienhiki, Phetele ua kuata ku lukuaku lua kinema, muéne uemana iu ua mateka o kuenda. Kioso athu kia mono kiki, ene a sangulukile kiavulu, mukonda dia madiuanu enhá.

Phetele uixi, ‘Tua bhange o madiuanu enhá ni ku tena kua Nzambi ua fukununa Jezú.’ Kioso muéne ni Nzuá kia kexile hanji mu zuela, saí atuameni a jingeleja a bhixila. Ene a temene mukonda Phetele ni Nzuá, akexile mu tangela o athu maka alungu ni difukunukinu dia Jezú. Kienhiki ene a a kuata, ni a takula mu kaleia.

Mu kizuua kia mukuá, o atuameni a jingeleja a diongeka. A tumina ku bheka Phetele ni Nzuá ni diiala dia sakele. O atuameni a jingeleja ebhula, ‘Mu kutena kua nanhi mua bhange madiuanu iá?’

Phetele ua ambela kuma mu ku tena kua Nzambi, ió ua fukununa Jezú mu kaxaxi ka ió afú. O akunji a jingeleja ka kijidile kiebhi kieji bhanga, mukonda o madiuanu exile kidi. Kienhiki, ene a tendelesa o jipoxolo kueha ku zuela o maka alungu ni Jezú, ni a ehela kuia.

Mu izuua ia kaiela-ku o jipoxolo a kolokota dingi mu kuboka maka alungu ni Jezú ni ku saka o jihaxi. O njimbu íii a ivu. Katé ué athu oso mu jimbanza ja kondolokele Jeluzaleme, a bhekele o jihaxi jâ phala ku a saka ku jipoxolo. Kiki kia bhangesa a tuameni a jingeleja ku kala ni difuba, kienhiki ene a kuata o jipoxolo, ia a takula mu kaleia. Maji ene ka kexile-mu, mu thembu iavulu.

Mu usuku, o anju ia Nzambi ia jikula o dibhitu dia kaleia, kála ki ua mu mona bhabha. O anju iambe: ‘Ndenu mu tembulu, kolokote-nu mu tangela athu.’ Mu kimene kia kaiela-ku, kioso atuameni a jingeleja kia tumina ku bheka o jipoxolo, ene ka a sange mu kaleia. Anga a a sangele mu tembulu mu longa, ia ambatele mu kididi kia ku Fundisa.

O atuameni a jingeleja ambe, ‘Tua mi tendelesa o kueha o ku zuela maka alungu ni Jezú.’ ‘Maji enu mua ezalesa Jeluzaleme ni ilongesu ienu.’ O jipoxolo ja tambuijila: ‘Kia dianga, tua tokala ku belesela Nzambi kála nguvulu ietu.’ Ene a kolokota mu kuboka “o njimbu iambote.” Ki phangu iambote phala etu?