Jihova Nzambi muéne o Mubhangi uetu. Muene o mubhangi ua ima ioso, ioio i moneka ku mesu ni ioio ki i moneka ku mesu. Ande dia kubhanga o ima i moneka, muéne ua bhange mazunda ni mazunda a jianju. Eie uejiia se jianju ihi? O jianju ja difuangana ni Jihova, ene athu mu nzumbi kala muéne. Etu ki tu tena ku mona Nzambi, kiene ué kimoxi ni Jianju ki tu tena ku ji mona. O anju ia dianga ia bhangele Jihova iexile mukuatekexi uê. O anju íii ia kuatekesa Jihova ku iudika o jithéthembua ni ngongo, jiplaneta ni ima ia mukuá. Ku jiplaneta jiji, ia mukuá o ixi ietu, o kididi kia iuka mu tua tungu.

Mu kiki, Jihova ua iudika o ixi phala o iama ni athu ku tunga-mu katé ku hádia ni hádia. Muene ua bhange o dikumbi mba muanha phala kumuikina o ixi. Muéne ua suluka mu kubhanga o milundu, misanza ia kalunga, ni jingiji.

Mu kusuluka ihi ia bhiti? Jihova uixi: ‘Nga-nda bhanga iangu, ithulu ni mixi.’ Mu kiki, kua moneka idifua iavulu ia ibundu, ibelevu, ni mafué a mukuá mu ixi. Jihova ua suluka ni kubhanga o iama —i dihuha, iendela mu menha, ni jinjila. Muene ua bhange ue, o iama iofele kala o mabhulu, ni ia makota kala o jinzamba. Kiama kiebhi dingi ki ua uabhela?

Jihova anga uambela ku anju ia dianga: ‘Tu bhange muthu.’ O athu iá eji di tungula ku iama. Ene eji bhanga ima iavulu. Kala o  kuzuela, kuolela, ni kusamba kua Nzambi. Ene eji kala ni kikalakalu kia kulanga o ixi ni iama. O kuila eie uejiia o dijina dia diiala dia dianga? Tu mone.