Jezú ua kexile ni makamba atatu a kazola a tungile ku Bethânha. Ene exile Lázalu ni phange jê jiiadi ja ahatu Madiia ni Marta. Sai kizuua kioso Jezú kia kexile hanji ku sámbua dia Njolodá, Madiia ni Marta a mu tumikisa njimbu ia kubhindama, exi: ‘Lázalu ua mu kata.’ Tua kudióndo, zá ni lusolo luoso!’ Maji Jezú kai mu kithangana kieniókio. Muene ua bhange hanji izuua iiadi mu kididi mua kexile, mu kusuluka uambela o maxibulu mê: ‘Tuienu ku Bethânha. Lázalu uai ku kilu maji eme ngiia-phe ku mu phaphumuna.’ O jipoxolo ambe: ‘Se Lázalu uai ku kilu-phe, ua-nda balumuka.’ Kienhiki, Jezú ua a lomboluela kiambote uixi: “Lázalu uáfu.”

Kioso Jezú kia bhixila ku Bethânha, kua bhitile kiá izuua iuana tundé kia fundile Lázalu. Kuejile mundu uavulu mu didisa ni kukonda malamba a Marta ni Madiia. Kioso Marta kiévu kuma Jezú iu uiza, uai ku mu kauidila. Muene uambe: “Ngana, eie se ua kexile-bhu phang’ami hinu kafu.” Jezú ua mu ambela: ‘Phang’ié ua-nda fukunuka. Marta, eie u xikina mu kiki?’ Muene uambe: “Ngejiia kuma u fukunuka mu difukunukinu.” Jezú ua mu ambela: “Eme ngi difukunukinu ni muenhu.”

Marta uai kua kexile Madiia iu ua muambela: ‘Jezú uala bhabha.’ Madiia uai ni lusolo mu disanga ni Jezú, o mundu ua mu kaiela. Muene ua fukama bhu inama iê, ni kudila. Muene uambe: ‘Ngana, eie se ua kexile-bhu, phang’etu hinu uala ku muenhu!’ Jezú kia mono Madiia iu dila, ua mateka ue kudila. Kioso o mundu kia mono o masoxi mê, ene ambe: ‘Talesenu, Jezú ua zolele kiavulu Lázalu.’ Maji saí ia a dibhuidisa: ‘Mukonda diahi muene ka bhulula kamba diê?’ Mu kusuluka ihi ieji bhanga Jezú?

Jezú uai bhu mbila, ia xitile ni ditadi dionene. Muene ua tendelesa: ‘Katulenu o ditadi.’ Marta uambe uixi: “Maji muene kiki ua mu nuha kiá kiaiibha. Tundé kia mu fundu ua bhange-mu kiá izuua iuana.” Né kiki, ene a katula o ditadi anga Jezú ua sambe: ‘Tata nga ku sakidila kuma, eie ua ng’ivu. Eme nga kijiia kuma eie uene mu ngívua jinga, maji eme nga mu zuela ni dízui dia suina,  mukonda dia kifuxi kia ng’imanena bhabha, mbé ene ni a xikane kuma eie ua ngi tumu.’ Mu kiki, muene ua dikola ni dízui dia suina, uixi: “Lázalu, tunda ku kanga!” Kua bhiti kima kia kidiuanu: Lázalu ua tundu mu mbila, a mu ingile ni itetele ia kiaku. Jezú uambe: “Mu ingununienu o itetele phala ende.”

Avulu a mono o kidiuanu kiki, a xikana Jezú. Maji sai iá, ai mu ki tangela o Jifalizeu. Tundé o kithangana kienhokio, o Jifalezeu a mesene kujibha Lázalu ni Jezú. Juda dia Kadiota ua tokalele ue ku 12 kia jipoxolo, uai mu zuela ni Jifalizeu mu kasuekele, uambe: ‘Se ngi mi kuatekesa kusanga Jezú, mua-nda ngi futa kikuxi?’ Ene a bakana ku mu futa 30 a itadi ia phalata, mu kiki Juda ua kexile mu sota kithangana phala kuthelekala mba kusumbisa Jezú ku Jifalizeu.