Saúlu uexile diala mukuá Loma, a mu vuala mu mbanza ia Talasu. Muene uexile Falizeu uejiidile kiambote o Ijila ia Jijudé, ua zembele kiavulu o Jikidistá. Saúlu ua kexile mu zukutisa o Jikidistá ja ahatu ni maiala ku jinzo jâ, ni ku a kasa mu jikaleia. Kioso Xitevá kia mu buba ni matadi katé kiafu, muene uemanene ue kuenhoko phala kutala.

Maji Saúlu ka sangulukile mu ku zukutisa ngó o Jikidistá mu mbanza ia Jeluzaleme. Muene ua bhingi ku mukunji ua dikota, phala ku muehela kuia ku mbanza ia Damasku n’a zukutise ue o Jikidistá mu mbanza ienioió. Kioso Saúlu kia zukama mu mbanza ia Damasku, u sasumuka mukengeji ku diulu ua bhenha kua muene, iu ua dibhale. Muene uevu dízui diambe: ‘Saúlu, eie ua mu ngi zukutisa mukonda diahi?’ Saúlu ua tambuijila: ‘Eie nanhi?’ A mu tambuijila: ‘Eme Jezú. Balumuka uie mu Damásku, muene’omo a ka ku jimbuila kioso ua tokala kubhanga.’ Saúlu kia balumuka, ka tenene kumona kima, ua kituka kifôfo, o maiala akexile mu kuenda nê, a mu kuata bhu maku a muendesa katé mu mbanza.

Mu Damasku, mua tungile Kidistá ia fiiele a mu ixanene Hananiia. Jezú ua zuela nê mu kisuma: ‘Balumuka, uie k’onzo ia Juda, mu luua i exana ku luua Iaiuka, u ibhule-ku muthu dijina diê Saúlu.’ Hananiia uambe:‘Ngana, ngejiia kiambote o muthu ió! Muene ua mu ta o maxibulu mê mu kaleia!’ Maji Jezú ua mu tangela: ‘Katuka ngó uie. Eme nga solo Saúlu phala kuboka o njimbu iambote ku akua jixi jengi.’

Mu ku suluka, Hananiia kia sange Saúlu uambe: ‘Phange’ami Saúlu, Jezú ua ngi tumu ku ku tonesa o mesu.’ Mu kithangana kieniókio, Saúlu ua mateka kumona dingi. A mu longo ia lungu ni Jezú iú ua kituka dixibulu dié. Mu kiki, kia mu batizala, Saúlu ua mateka kuboka  mu malombe, kumoxi ni Jikidistá ja mukuá. U tena kuxinganeka kiebhi kia divu o Jijudé mu kumona Saúlu kulonga ima ia lungu ni Jezú? Ene a zuela: ‘Ki muen’iú ua kexile mu zukutisa o maxibulu a Jezú?’

Ku mivu itatu, Saúlu ua bokela o athu a tungile mu Damasku. O Jijudé a zembele Saúlu, i a bhange kikutu kia ku mu jibha. O jiphange kiéza mu kuijiia o kikutu, a mu kuatekesa kulenga. O jiphange a te Saúlu ku thandu dia kimbaka, anga a mu tulula mu musete ni mikolo.

Kioso kia bhixila mu Jeluzaleme, Saúlu ua soto ku diongeka ni jiphange. Maji ene a mu kuatele uôma. Kuexile dixibulu dia lenduka a mu ixanene Barnabé. Muene uambata Saúlu ku jipoxolo, anga ua xikinisa kuma, muene ua lungulula o ukexilu uê. Saúlu ua mateka kuboka o njimbu iambote ni kusuina kuoso, kumoxi ni kilunga mu Jeluzaleme. Mu ku bhita thembu a mu luku Phaulu.