Jihova uambe kua Mozé: ‘Banda ku mulundu. Eme nga-nda soneka o ijila iami mu ditádi ni ngi ku bhana-iu.’ Mozé ua bande ku mulundu anga u kala-ku 40 a izuua ni mausuku. Kioso Mozé kia kexile ku mulundu, Jihova ua soneka o Kuinhi dia Ijila mu matádi aiiadi anga u a bhana kua Mozé.

Mu kubhita kithangana, o akua Izalaiele a kexile mu banza kuila, Mozé keji vutuka dingi. Ene ambela Alá: ‘Tuandala muthu phala ku tu endesa. Bhanga nzambi phal’etu!’ Alá uambe: ‘Ngi bhekelienu o ulu.’ Anga u bhanga o kandumbe kangombe. O mundu uambe: ‘Íii o nzambi ietu ia tu katula ku Ijitu!’ Ene a bhangele fesa ia katunda, mu kubheza o kandumbe kangombe. O kuila o kiki kiaiibha? Kiene, mukonda o mundu ua kanene kubheza ngó Jihova. Mu kiki, ene ka kumbidila o kikanenu kiâ.

Jihova ua mono o kima kia kexila mu bhita, anga uambela Mozé: ‘Kulumuka katé ku mundu. Ene a mu  ngi xibhaka iá a mu bheza nzambi ia makutu.’ Mozé anga ua kulumuka ku mulundu, ni ibasakasa ia matádi a ijila bhu maku.

Kioso Mozé kia kexile mu zukama, uevu o mundu ua mu kuimba. Anga ua a mono mu kina ni kufukamena o kandumbe kangombe. Mozé njinda ia mu kuata. Muene ua takula o ibasakasa ia matádi bhoxi, anga i sasujuka. Muene ni nguzu ioso ua bulu o kangombe. Anga uebhula Alá: ‘Mukonda diahi, uehela o mundu ku kuxikinisa kubhanga o kima kiki kiaiibha?’ Alá ua tambuijila: ‘Kana kuthathamana. Eie uejiia kiambote o ukexilu ua mundu iú. Ene a mesenene nzambi, mu kiki eme nga te o ulu mu túbhia anga nga bhange o kangombe kaka!’ Alá ka tokalele kubhanga o kima kiki. Mozé ua vutuka ku mulundu anga ua diondela o mundu kua Jihova.

Jihova ua loloka o athu a mesenene ku mu belesela ni muxima uoso. O kuila ua tendela se mukonda diahi kiexile kima kiambote akua Izalaiele kubelesela o kitumu kia Jihova bhu kaxi ka Mozé?