Sai diiala mukua Izalaiele, a muixana Elikana ua kexile ni kiiadi kia ahatu, Hana ni Penina, maji muene ua zolele dingi Hana. Penina ua kexile mu tobhesa Hana, mukonda Hana ka kexile ni tuana, maji Penina ua kexile ni tuana tuavulu. Muvu ni muvu, Elikana ua kexile mu kuambata o muiji uê, phala kubheza Nzambi mu balaka ia kutakanena, mu mbanza ia Silo. Saí kizuua, kioso ene kia kexile mu Silo, Elikana ua muene kuila kazola kê Hana ua luualele kiavulu. Muene uambe: ‘Hana nga ku dióndo kana kudila. Ngala ku mbandu ié. Eme nga ku zolo kiavulu.’

Mu kusuluka, Hana uai mu samba ubheka uê. Muene ua kexile mu dila, kioso kia kexile mu samba kua Jihova phala ku mu kuatekesa. Muene ua kanena: ‘Jihova se eie u ngi bhana mona, eme nga-nda kubhana-nê, phala muene ku kusidivila izuua ioso ia muenhu uê.’

Mukunji ua Dikota Eli, ua mono Hana ua kexile mu samba ku muxima uê, o mizumbu iê, iene ngó ia kexile mu zamba, iu ua banzele kuila Hana ua kodiuile. Hana ua tambujiila: ‘Kana, ngana iami, eme ki ngi kodiua kana. Eme ngala ni maka a bhonzo, nga mu zuela ni Jihova ia lungu ni maka enhá.’ Eli ua mono kuila, ua tondalele iu ua zuela kua muéne: ‘Nzambi a ku bhane ki  ua mesena.’ Hana mu kuívua o izuelu ia Eli, ua divu kiambote iu ua vutuka. Ande dia kutenesa muvu muene ua vuala mona iu ua mu luku o dijina dia Samuuele. U tena kuxinganeka o kisangu-sangu kia Hana mu kukala ni mona?

Hana ka jimbile o kikanenu kia bhangele kua Jihova. Kioso kia zubha o kusasa Samuuele, muene ua muambata phala kusidivila mu balaka ia kutakanena. Muene uambela Eli: ‘Iú o mona nga mu bhingi kua Jihova mu musambu. Mu izuua ioso ia muenhu uê, ngi mu bhakula kua Jihova.’ Mivu ni mivu, Elikana ni Hana, a kexile mu kunda Samuuele, ni ku muambatela izuatu ia ubhe. Jihova ua besoala dingi Hana ni tuana tutatu tua mala, ni tuiadi tua ahatu.