DISÁ 45
Utuminu a u Uanuna
Kioso Solomá kia kexile mu bheza Jihova, mu ixi ia Izalaiele mua kexile kutululuka. Maji Solomá ua kazala ni ahatu avulu akua jixi jengi, o ahatu iá a kexile mu bheza iteka. Bhofele-bhofele, Solomá ua lungulula o ukexilu uê, ua mateka ué kubheza iteka. Jihova njinda ia mu kuatele. Muéne ua tangela Solomá: ‘O Utuminu ua Izalaiele a-nda u tambula ku muiji ué, ni ku u uanuna mu mbandu jiiadi. Nga-nda bhana o mbandu ionene ku selevende ié, anga o muiji ué ua-nda xala ngó ni mbandu iofele.’
Jihova ua londekesele o kibanzelu kiê mu ukexilu uengi. Saí selevende ia Solomá, Jelobouamu, muéne uexile mu kuenda njila, kioso kia disange ni polofeta Ahiia. Ahiia ua tandula o divunga diê mu 12 kia jimbandu anga uambela Jelobouamu: ‘Jihova ua-nda katula o utuminu ua Izalaiele bhu maku’a muiji ua Solomá ni ku u uanuna mu mbandu jiiadi. Kuata o kuinhi dia jimbandu jiji, mukonda éie ua-nda kala o sobha ia dikuinhi dia ifuxi.’ Sobha Solomá uevu o maka enhá, iu ua mesenene kujibha Jelobouamu! Mu kienhiki, Jelobouamu ua lengela ku Ijitu. Mu kubhita kithangana, Solomá uafu, mon’ê Lobouamu ua kituka sobha. Kioso Jelobouamu kievu kuila, Solomá uafu, ua vutuka mu Izalaiele.
Adiakime mu Izalaiele a tangela Lobouamu: ‘Eie se u talatala kiambote o mundu, ene a-nda ku kala fiiele.’ Maji o minzangala a kudile kumoxi ni Lobouamu a mu ambela exi: ‘Eie ua tokala kukala u muthu ua teme! Nemesa dingi o ikalakalu iâ!’ Lobouamu ua belesela o kitendelesu kia makamba mê. Muéne ua talatala o mundu ué mu ukexilu uaiibha, kiki kia bhangesa o mundu ku mu bhukumukina. Ene a bhange Jelobouamu kukala sobha ia kuinhi dia ifuxi, eza mu ixana mu dijina dia utuminu ua Izalaiele. O ifuxi iiadi ia mukuá ia kituka utuminu ua Judá, ene a londekesele ufiiele kua Lobouamu. Kindala kiki, o 12 kia ifuxi ia Izalaiele a i uanene kiá.
Jelobouamu ka mesenene kuila, o mundu uê u bheza mu Jeluzaleme, mua kexile o utuminu ua Lobouamu. O kuila uejiia se mukonda diahi? Jelobouamu ua kexile ni uoma kuila, ene eji mu bhanga ufe ni kuzokela Lobouamu. Mu kienhiki, muéne ua bhange ngombe, anga ua tangela o mundu uê: ‘Jeluzaleme iala dikanga. Enu mu tena kubheza bhabha.’ O mundu ua mateka kubheza o ngombe ia ulu, a xisa dingi Jihova.
“Ki mu sote ku di ta mu kikalakalu kimoxi ni iá a kambe kuxikana, kala enu uenu mua sokela-nâ. Kuma o kuiuka ku kala kiebhi mu kisangela ni kubhengalala? . . . Mba o muxikani u kala ni kima kiahi kumoxi ni ió ua kambe o kuxikana?”—2 Kolindo 6:14, 15
