Mu ixi ia Sídia mua tungile mona kilumba mukua Izalaiele, ua kexile dikanga dia muiji uê. Muéne a mu katuile bhu kaxi ka muiji uê ia a muambatele ku masoladi, akua Sídia. Muéne ua kituka selevende ia muhatu ua kabhitangu ka masoladi, a muixanene Naamane. O mona kilumba ua kexile mu bheza Jihova, sumbala o athu mu kaxi kê akexile mu bheza jinzambi jengi.

Naamane ua kexile ni uhaxi ua dikota, ua kexile mu kuivua ndolo iavulu ithangana ioso. O mona kilumba ua mesenene kiavulu ku mu kuatekesa. Ua tangela o muhatu ua Naamane, uixi: ‘Ngejiia muthu u tena kukuatekesa muadi uê. Mu mbanza ia Izalaiele muala polofeta ia Jihova, a muixana Ilizeu. Muéne u tena kusaka muadi uê.’

O muhatu ua Naamane ua tangela Naamane ioso ia zuelele o mona kilumba. Naamane ua mesenene kubhanga ioso phala kudisanza, mu kiki uai katé kudibhata dia Ilizeu mu mbanza ia Izalaiele. Naamane ua mesenene kuila Ilizeu u mu talatala ni kijingu kia dikota. Maji mu veji dia muéne kuia mu zuela ni Naamane, muéne  ua tumikisa o selevende iê kumenekena Naamane ni ku mu tula o njimbu íii: ‘Ndé mu zoua lusambuadi mu Ngiji ia Njolodá. Ua-nda disanza.’

Naamane ua luualele kiavulu. Muéne uambe: ‘Nga fikile kuila polofeta ueji bhinga ngó kua Nzambi iê ni kuta o maku mê kuthandu diami phala ku ngi saka. Mu veji dia kiki, ua mu ngi tuma kuia mu zoua mu ngiji íii ia Izalaiele. Jingiji jetu mu ixi ia Sídia ja beta-o-kota o íii ndenge. Mukonda diahi ki ngiii mu zoua kuenhoko?’ Naamane njinda ia mu kuata, anga u tunda mu dibhata dia Ilizeu.

O jiselevende ja Naamane ja mu kuatekesa phala kuxinganeka kiambote. A mu tangela: ‘Eie ku mesena kubhanga kima kioso-kioso phala kudisanza? O ia ku bhingi polofeta íii, ki i bhonzo ku i bhanga. Mukonda diahi ngué ku i bhanga?’ Naamane uevu o jiselevende jê. Uai mu ngiji ia Njolodá iu ua zouo lusambuadi. O kia zoua mu veji ia sukina, Naamane ua disanze. Muéne ua sakidila kiavulu iu ua vutuka mu sakidila Ilizeu. Naamane uambe: ‘Kindala ngejiia kuila Jihova muéne o Nzambi ia kidi.’ Mudiê, kiebhi kia divuile o mona kilumba, mukua Izalaiele, kioso kia mono kuila Naamane ua disanzele?