DISÁ 5
Iebhi o Vondadi ia Nzambi Phala o Ixi?
1. Mukonda diahi Nzambi ua bhange o ixi
Jihova ua bhana o ixi ku diiala, ni muhatu. Iene o inzo ietu. O dikaza dia dianga Adá, ni Eva ka a bhange phala ku kala ku diulu—Nzambi ua bhangele kiá o ji anju phala ku kala ku diulu. (Jobe 38:4, 7) Nzambi ua te o dikaza dia dianga mu kididi kia iuka a ki ixana Jaludim ia Edene. (Dimatekenu 2:15-17) Jihova ua a bhana o ujitu ua ku kala ku muenhu mu ixi katé ku hádia ni muiji uê.—Tanga Jisálamu 37:29; 115:16.
Ku dimatekenu o jaludim ia Edene iene ngó iexile o palaízu. O dikaza dia dianga a a bhange phala ku i zalesa o ixi ni muiji uê. Mu ku bhita kithangana ene eji tambula konda lia ixi ioso ni ku i bhanga palaízu. (Dimatekenu 1:28) O ixi nuka a-nda i buika. Ia-nda kala inzo ia athu ku hádia ni hádia.—Tanga Jisálamu 104:5.
Tala o vidyu Mukonda Diahi Nzambi ua bhange o Ixi?
2. Mukonda diahi lelu o ixi ki palaízu?
Adá ni Eva ka belesela Nzambi, kienhiki Jihova ua a kaie mu jaludim. Mukonda dia kiki, o Palaízu ia di boto, se-ku muthu ua tena ku i bhanga dingi. O Bibidia izuela kuila: “Ngongo a i bhakula bhu maku a isuéia.”—Jobe 9:24.—Tanga Dimatekenu 3:23, 24.
O kuila Jihova ka mesena dingi kuila o athu a kala mu ixi katé ku hádia? Kana! Muéne o Muteni- ia-Ioso. Ka tena ku lueza. (Izaia 45:18) Muéne ua-nda bhanga kuila o athu a iuka kala kia mesenene.—Tanga Jisálamu 37:11, 34.
3. Kiebhi kia-nda bheka dingi o Palaízu?
O palaízu a-nda i bhanga mu ixi ku Sobha ia Utuminu ua Nzambi, Jezú. Mu ita ia Alumajedone, Jezú ua-nda tumina o ji-anju ku buika o jinguma joso ja Nzambi. Mu kusuka-ku Jezú ua-nda kuta Satanaji mu midi ia mivu. O mundu ua Nzambi ua-nda bhuluka, mukonda Jezú ua-nda ku a bhana itendelesu, ni ku a langa. Ene a-nda tambula o muenhu ua kalelaku mu Palaízu mu ixi.—Tanga Dijingunuinu 20:1-3; 21:3, 4.
4. Thembu kuxi kia-nda zubha o hadi?
Thembu kuxi Nzambi kia-nda zubha o kuiibha mu ixi? Jezú ua bhana “kijimbuete” kieji londekesa kuila dizubhilu dia zukama. O ukexilu ua mundu ua mu londekesa kuila o mienhu ia athu iala mu iluezu, ni kuila tuala ku “dizubhilu dia mundu.”—Tanga Matesu 24:3, 7-14, 21, 22.
Mu utuminu ua Jezú ua 1.000 ia mivu mu ixi, muéne ua-nda zubha o jiphaxi joso. (Izaia 9:6, 7; 11:9) Jezú ka-nda kala ngó Sobha, ua-nda kala Mukunji ua Dikota phala ku zubha o ituxi ia ió a zolo Nzambi. Kienhiki, bhu kaxi ka Jezú, Nzambi ua-nda zubha o mauhaxi, o ku kuka ni kalunga.—Tanga Izaia 25:8; 33:24.
5. Nanhi ua-nda kala mu Palaízu?
Mu Kididi kia Ubhezelu, ua-nda kuijiia athu a zolo Nzambi, a mesena ku bhanga o vondadi iê
O athu a belesela Nzambi, a-nda kala mu Palaízu. (1 Nzuá 2:17) Jezú ua tumikisa o akaiedi’ê ku sota o athu a lenduka, phala ku a longa ku kala athu a a xikina kua Nzambi. Lelu Jihova ua mu sokejeka athu a-nda kala mu palaízu mu ixi. (Sofoniia 2:3) Mu Kididi kia Ubhezelu kia Jimbangi ja Jihova, o athu a di longa ku kala mala ambote, jitata jambote, o ahatu, a kala ahatu ambote, ji mama jambote. O ana ni jitata a bheza kumoxi, a katula mbote mu njimbu iambote.—Tanga Mikeia 4:1-4.
