O Nzambi ia kidi, muene o Mubhangi ua ima ioso. Muéne kene ni dimatekenu nuka ué ua-nda kala ni disukilu. (Jisálamu 90:2) O njimbu iambote i tu sanga mu Bibidia ia mu tokala muéne. (1 Timote 1:11) Tua tokala ku mu bheza ngó muéne, mukonda muéne ua tu bhana o muenhu.—Tanga Dijingunuinu 4:11.

Se-ku muthu ua mono kiá Nzambi, mukonda muéne Nzumbi, kiki kilombolola kuila muéne, ua di tundu ku mienhu ioso mu ixi. (Nzuá 1:18; 4:24) Maji tu tena ku mona o ídifua ia Nzambi, mu ima ioso ia bhange. Mu kifika, o ibundu ni ithulu, i tu londekesa o henda iê ni unjimu uê. O ngongo ioso, ilondekesa o kutena kuê.—Tanga Loma 1:20.

Tu tena ku di longa dingi o ídifua ia Nzambi mu ku tanga o Bibidia. Mu kifika, o Bibidia i tu tangela ihi ia uabhela Nzambi, ni ihi ia mu ibhila, ni kiebhi muéne kia dibhana ni athu ni ihi ia bhanga mu ithangana ia mukuá.—Tanga Jisálamu 103:7-10.

Jezú uambe: “Tata ietu uene mu diulu, dijina dié a dixile.” (Matesu 6:9) Né muene Nzambi uala ni majina avulu a ujitu, muéne uala ngó ni dijina dimoxi. Kala dimi, o dijina dia Nzambi a di tumbula mu ukexilu ki u difu. Mu Kimbundu, o dijina dia Nzambi, “Jihova.” Maji saí athu a di tumbula, “Yahweh.”—Tanga Jisálamu 83:18.

Maji saí ji Bibidia, o dijina dia Nzambi, a di katula-mu, ia a bhinganesa-mu o majina a ujitu kala, Ngana, mba Nzambi. Maji kioso kia soneka o Bibidia o dijina dia Nzambi dia kexile-mu 7.000 dia ji veji.  Jezú uejidisa o dijina dia Nzambi, kioso kia kexile mu longa athu o mak’â Nzambi.—Tanga Nzuá 17:26.

Tala o vidyu O kwila Nzambi wala ni dijina?

O kuila o hadi ioso ku mundu, ilondekesa kuila Jihova Nzambi, ka tu suu? Saí athu amba kuila, muéne u tu talesa hadi phala ku tu polovala, maji kiki ki kidi kana.—Tanga Tiiaku 1:13.

Nzambi ua bhange o muthu ni ufolo ua ku sola. O kuila tu uabhela o ufolo uetu ua ku sola phala ku sidivila Nzambi? (Josuué 24:15) Maji athu avulu a sola ku bhanga ima ia iibha ku akuâ, mu ku a bhekela hadi iavulu. Jihova u luuala kiavulu mu ku mona o ima ioso ia iibha iene mu bhita.—Tanga Dimatekenu 6:5, 6.

Jihova, Nzambi ua mesena o mbote ietu. Muéne ua mesena kuila tu zediua ku muenhu. Kua kambe ngó bhofele, muéne ua-nda zubha o hadi ioso, ni athu ene mu bhanga o ima ia iibha. Kienhiki muéne ua lungu mu kuehela o hadi mu ngongo. Ku Disá dia 8, tua-nda di longa mukonda diahi muene ua lungu.—Tanga 2 Phetele 2:9; 3:7, 13.

Jihova u tu bhinga phala ku mu zukama, bhu kaxi ka misambu. Muéne ua mesena o mbote ia muthu ni muthu. (Jisálamu 65:2; 145:18) Muéne uala polondo phala ku loloka o ituxi. Muéne uejiia o nguzu i tu bhanga phala ku mu belesela, né muene se mu ithangana ia mukuá tu lueza. Kienhiki, sumbala tu akua ituxi, tu tena ku kala ni ukamba uambote ni Nzambi.—Tanga Jisálamu 103:12-14; Tiiaku 4:8.

Mukonda Jihova muéne ua bhana o muenhu uetu, tua tokala ku mu zola kiavulu, athu a mukuá ndenge. (Marku 12:30) Kioso ki uia ni kulondekesa o henda iê kua Nzambi mu ku di longa dingi ia lungu ni muéne, ni ku bhanga ioso ia mesena muéne, kiki kia-nda ku kuatekesa ku mu zukama dingi.—Tanga 1 Timote 2:4; 1 Nzuá 5:3.