1-3. Ihi ia monene Phetele mu kizuua kieniókio, ni ihi ia kexile mu bhita mu usuku?

 PHETELE ua kexile mu kuendesa o baluku ni nguzu iavulu mu usuku. O kuila muéne ua kexile mu mona kimuikinu mu kaxi ka kalunga m’usuku? O maku ni dikunda diê dia kexile ku mu kata mukonda dia nguzu ia kexile mu bhanga phala kuendesa o baluku. O kitembu kia kexile ku mu bhusa ni ku bhusa ué o menha a kalunga ka Ngalileia. O mabhuku a menha akexile mu di beta-beta ku baluku ni ku betesa Phetele. Muéne ua suluka ni kuendesa o baluku.

² Phetele ni makamba mê a tundile, anga Jezú u xala ubheka uê ku mbandu ia kalunga. Mu kizuua kieniókio ene a monene Jezú ku disa midi ni ji midi ja athu akexile ni nzala ni tu mbolo ni tu mbiji. Mukonda dia kiki, o mundu ua mesenene ku bhanga Jezú ku kala sobha, maji muéne ka mesenene ku dita mu maka a jinguvulu. Ua mesenene ué ku kuatekesa o akaiedi’ê phala ka dite mu maka a jinguvulu. Mu ku lenga o mundu, ua tumina o maxibulu mê ku bokona mu baluku ni kuia ku sámbua dia kalunga, muéne anga u banda ku mulundu phala ku samba.​—Mar. 6:35-45; tanga Nzuá 6:14-17.

³ Kioso o maxibulu kia tundu, o dieji dia kexile kiá mu boba. Maji ene endele ngó kilómetulu jofele. Mukonda dia ku bhuila ni jibuia ja kitembu ni mabhuku, ka tenene ku di zuelesa mudiâ. Nange Phetele ua kexile mu xinganeka kima.

4. Ihi ia bhangesa Phetele ku kala phangu iambote phala etu lelu ku i kaiela?

⁴ Kua kexile ima iavulu phala ku i xinganeka! Phetele ua diangele kuijiia Jezú dia Nazalé mivu iiadi ku dima. Muéne ua di  longele kiavulu ni Jezú, maji kua kexile hanji ima iavulu phala muéne kuijiia. O vondadi iê ia ku tolola o iluezu​—kala o uôma ni phata​—ia mu bhangesa ku kala phangu iambote phala etu lelu ku i kaiela. Tu tale se mukonda diahi.

5, 6. Kiebhi kiexile o muenhu ua Phetele?

⁵ Phetele nuka ueji jimba o kizuua kia di sange ni Jezú. O phang’iê Mandele, muéne ua diangele kuíza ni njimbu, kioso kiambe: ‘Etu tua sange Mexiia.’​—Nzuá 1:41.

⁶ Phetele ua tungile mu Kafanau, mbanza ia kexile ku mbandu’a Kalunga ka Ngalileia. Muéne ni Mandele akexile mu tamba kumoxi ni Tiiaku ni Nzuá, an’a Zebedeu. Phetele ka tungile ngó ni muhatu’ê kana, maji ua tungile ué ni ukouê ni phang’iê, Mandele. Phala ku dikila o muiji uê uoso mu ku tamba jimbiji, kua bhingile muene nguzu iavulu ni uhete. Tu tena ku xinganeka o maiala ku kalakala mausuku avulu​—ku takula o mauanda’â mu kalunga ni ku bhongolola o jimbiji. Tu tena ué ku xinganeka o maiala ku bhita ola javulu ni ku sola o jimbiji ja ku sumbisa, ku tunga o maunda ni ku a zelesa.

7. Ihi iévu Phetele ia lungu ni Jezú, ni mukonda diahi iexile njimbu iambote?

⁷ O Bibidia i tu londekesa kuila, Mandele uexile dixibulu dia Nzuá dia Batizu. Sé phata Phetele ua kexile mu kuívua kiambote phang’iê kioso kia kexile ku mu tangela o njimbu ia kexile mu boka Nzuá dia Batizu. Saí kizuua, Mandele ua mono Nzuá kulondekesa Jezú mukua Nazalé ni kuzuela: “Talenu! Ió muène o Kambudi ka Nzambi!” Mu kithangana kieniókio, Mandele ua kituka mukaiedi’a Jezú iu ua zuela ni ku sanguluka kuoso kua Phetele: Mexiia ua bhixila! (Nzuá 1:35-40) Midi jiuana ja mivu ku dima, kioso Adá ni Evua kia bhukumukine, Jihova Nzambi ua kanene kuila kueji kuíza muthu ua katunda phala ku bhulula o athu ni ku a bhana kidielelu. (Dim. 3:15) Mandele ua di sangele ni muthu iú ueji Bhulula o mundu, o Mexiia! Phetele ua bhangele lusolo phala kuijiia ué Jezú.

8. Ihi ilombolola o dijina dia Phetele, ni mukonda diahi saí athu ka xikina o dijina diê?

⁸ Phetele a mu ijidile mu dijina dia Ximá mba Ximinhá. Maji Jezú ua mu tale iu ua zuela: “‘Eie Ximá, mon’a Nzuá, tunde lelu a-nda ku ku ixana-phe Kefa’ (dilombolola Phetele).” (Nzuá 1:42) O dijina “Kefa” dilombolola “ditadi” mba “ndanji.” O izuelu ia Jezú iexile kikanenu. Muéne uejidile kuila Phetele ueji kala kála ndanji​—muthu ua suína, ua kolo, ua ku dielela, ueji kuatekesa ni ku suínisa o akaiedi a Kristu. O kuila kiene kia kexile mu di mona Phetele? Phetele nange ki kiene kia kexile mu di mona. Katé muene,  saí athu lelu, kioso kia tanga o divulu dia Matesu, dia Marku, dia Luka ni dia Nzuá, a mona kuila Phetele kexile muthu ua suínine, kana. Saí iá amba kuila, o Bibidia ilondekesa kuila muéne mukua uôma, mukua jiphata.

9. Ihi i mona Jihova ni Mon’ê ko kuetu, ni mukonda diahi eie u xikina kuila tua tokala ku dielela mu ukexilu uâ ua ku tala?

⁹ Tuejiia kuila Phetele ua kexile ué mu lueza. Jezú uejidile o iluezu iê. Maji Jezú, kala ki bhanga Tat’ê, Jihova, ua kexile mu sota ku tala o ídifua iambote ku athu. Jezú ua monene kuila Phetele ua kexile ni ídifua iambote, iu ua mesenene ku mu kuatekesa ku kula mu nzumbi. Lelu Jihova ni Mon’ê, a tala uá o ídifua ietu iambote. Nange i bhonza kiavulu ku xikina kuila tuala ni ídifua iambote phala ene ku mona ko kuetu. Maji tua tokala ku dielela mu ukexilu uâ ua ku tala ni kulondekesa kuila tua mesena kuma ene a tu longa, ku tu umba kala kia umbu Phetele.​—Tanga 1 Nzuá 3:19, 20.

10. Ihi ia mono Phetele, iu ua vutuka mu ku bhanga ihi?

¹⁰ Nange Phetele ua kexile mu kuenda ni Jezú mu ukunji ua bhangele ku pholo. Mukonda dia kiki, nange ua mono ué Jezú ku bhanga o madiuanu’ê a dianga mu ku lungulula o menha mu vinhu, kioso kiai mu fesa ia ukaza mu Kanana. Muéne uevu o njimbu iambote i bhana kidielelu ia Jezú ia lungu ni Utuminu ua Nzambi. Maji muéne ua xisa Jezú, iu ua vutuka ku kikalakalu kiê kia ku tamba jimbiji. Mu ku bhita mbeji, Phetele ua di sange dingi ni Jezú​—mu veji íii Jezú uexana Phetele phala ku kala mukaiedi’ê katé ku hádia ni hádia ku muenhu uê uoso.

11, 12. (a) Phetele ua kolokotele mu kikalakalu kiahi mu suku? (b) Mu kuívua Jezú, nange mu ihi mua kexile mu banza Phetele?

¹¹ Phetele ka kuatele né ngó mbiji imoxi mu usuku uenhó. O athambi a jimbiji a takuile o mauanda mâ veji javulu mu kalunga, maji ka kuatele mbiji, né ngó mbiji imoxi. Nange Phetele ua bhangele ioso mu uhete uê ua ku tamba phala ku kuata jimbiji, mu ku takula o uanda mu ididi ioso mua kexile mu dila o jimbiji. Sé phata kua kexile ithangana, muéne ni athambi a mukuá, a mesenene ku mona, ni ku bhangesa o jimbiji ku bokona mu uanda. Maji o ku banza kiki, kieji mu bhangesa ngó ku kala ni njinda iavulu. Maji phala Phetele, o ku tamba ki kuexile kitonokenu kana; kua kexile athu a bhindamene o jimbiji. Anga u tunda mu kalunga sé ku kuata mbiji. Né kiki, kua bhingile ku sukula o mauanda. Kienhiki, muéne ua kexile mu kalakala kiavulu kioso kia bhixila Jezú.

¹² O mundu ua kondolokele Jezú ni kuívua ioso ia kexile mu zuela. Mukonda dia ku kamba kididi kia soko, Jezú u bokona mu baluku ia Phetele, u mu bhinga ku sondoloka, ku kibumu anga  uxa-ku ka dikanga kófele. O mundu ua tenene kuívua o dízui dia Jezú, iu ua mateka o ku longa. Kienhiki, Phetele ni ió akexile kuenhoko evu kiambote ioso ia kexile mu zuela Jezú. Muéne ka bhuile mu kuívua Jezú kuzuela ia lungu ni diambu dia njimbu iê ia kuboka​—o Utuminu ua Nzambi. Iexile ujitu ua dikota ku kuatekesa Kristu ku sanzumuna o njimbu ia kidielelu ku ixi ienioió! Maji o kuila kiki kieji bhita muéne? Kiebhi Phetele kieji tena ku dikila o muiji uê? Nange Phetele ua xinganekene dingi mu hadi ia talele mu usuku sé ku kuata mbiji.​—Luka 5:1-3.

13, 14. Madiuanu ahi a bhangele Jezú kua Phetele, ni kiebhi kia divu muéne?

¹³ Kioso Jezú kia zubha o kuzuela, muéne uambela Phetele, uixi: “Tabhula-ku dingi ku musanza kuala menha a zongo, eie ni akuenu, mu te manda mu kutamba.” Phetele ua kexile ni phata iavulu. Muéne uambe: “Mesene, tua kalakala usuku uoso, ki tu kuata kima. Maji kuma eie ua kiambe, eme nga-nda ku tumaka, tu ta dingi o manda.” Phetele ua sukuile kiá o uanda. Mu kidi, Phetele ka mesenene dingi ku takula o uanda mu kalunga​—bhenge-bhenge mu kithangana kiki, o jimbiji ki ji kexile dingi mu sota kudia! Né kiki, muéne ua bhange kala kia mu tumina Jezú, nange ua tangela akuâ phala ku mu kaiela.​—Luka 5:4, 5.

¹⁴ Mu ku sunga o uanda, Phetele ua sasumuka mu ku mona kuila o uanda ua nemene kiavulu. Ni ku diuana, ua sungu ni nguzu ioso, anga u mona mbiji javulu jafú mu uanda! Ni ku sanguluka, ua bhingi phala athambi a mukuá akexile mu baluku iéngi ku mu kuatekesa. Kia bhixila, ene a mono kuila o jimbiji joso ja kuatele ki jeji soka mu baluku imoxi, kienhiki ezalesa o jibaluku jiiadi. O jimbiji javudile, o jibaluku​—anga ji kuata o ku boba mukonda dia ku nema kua jimbiji. Phetele ua diuanene kiavulu. Muéne ua monene kiá Kristu ku bhanga madiuanu, maji o kiki kia mu diuanesa dingi mukonda kia mu kuatekesa muéne, ni muiji uê. O Kristu ua kexile ni kutena kua ku bhangesa o jimbiji ku bokona mu uanda! Phetele anga u kala ni uôma. Phetele ua mu fukamena, iu uambe: “Ngi tundile, Ngana, bhu mbandu iami, mukonda eme ngi mukua ituxi.” Kiebhi Phetele kieji tena ku kaiela ió ua kexile mu kalakala ni kutena kua Nzambi?​—Tanga Luka 5:6-9.

15. Kiebhi Jezú kia longo Phetele kuila muéne ka tokalele ku kala ni uôma ni ku kala ni phata?

¹⁵ Jezú anga u zuela ni henda ioso: ‘Ku kale ni uôma, tunde lelu, ua-ndu kala u muthambi ua athu.’ (Luka 5:10, 11) Ki kiexile  o kithangana phala ku kala ni phata mba uôma. Kienhiki, Phetele ka tokalele ku kala ni phata ia lungu ni kiebhi kieji tena ku dikila o muiji uê; ka tokalele ué ku kala ni uôma ua iluezu iê. Jezú ua kexile ni kikalakalu kia dikota phala ku ki bhanga, o sidivisu ia ukunji ieji lungulula o ima mu ngongo. Muéne ua kexile mu sidivila o Nzambi “mukua kuloloka kiavulu.” (Iza. 55:7) Jihova ueji dikila o ibhindamu ia Phetele ni ia Jezú mu ukexilu ua xitu ni ua nzumbi.​—Mat. 6:33.

16. Kiebhi Phetele, Tiiaku, ni Nzuá kia tambuijila kioso Jezú kia exana ni mukonda diahi kiki kiexile o kima kia tokalele o ku bhanga ene?

¹⁶ Phetele ua belesela Jezú kala kia bhangele Tiiaku ni Nzuá. ‘Kia zubha ku bheka o jibaluku, a xisa ioso, a kaiela Jezú.’ (Luka 5:11) Phetele ua londekesa o kixikanu kiê kua Jezú ni kua ió ua mu tumikisa. Kiki kiexile o kima kia tokalele o ku bhanga muéne.  O Jikidistá a katula o phata ni uôma uâ, a mu di bhakula mu ukunji mu ku sidivila Nzambi. O kidielelu kiki, ki kia-nda ku a luualesa kana.​—Jisá. 22:4, 5.

17. Ihi ia kexile mu lembalala Phetele mu mivu iiadi tundé kia di sangele ni Jezú?

¹⁷ Kua bhitile kiá mivu iiadi tundé Phetele kia di sangele ni Jezú, kienhiki Phetele ua kexile mu kuendesa o baluku mu Kalunga ka Ngalileia mu usuku uenhó ua kitembu kia dikota kála ki tua di longo kiá mu dimatekenu dia kibatulu kiki. Ki tu tena kuijiia se ihi ia kexile mu banza mu kithangana kieniókio. Muéne ua kexile ni ima iavulu phala ku xinganeka! Phetele ua mono Jezú ku saka ukouê. Ua mono ué kioso Jezú kia bhangele o Diskursu diê ku Mulundu. Mu ima ioso ia kexile mu bhanga ithangana ioso, Jezú ua londekesa kuila muéne uexile o muthu a mu Solele kua Jihova, o Mexiia. Mu ku bhita mbeji, o iluezu ia Phetele, kala o uôma ni ku kala ni phata, ia kexile mu sosolola kiá. Jezú ua solele Phetele phala ku tokala ku 12 kia jipoxolo! Né kiki, Phetele ka katuile luua o uôma uoso ni phata ia kexile na-iu kala ki tua-nda di longa ku pholo.

18, 19. (a) Zuela ihi ia mono Phetele mu Kalunga ka Ngalileia. (b) Kiebhi Jezú kia tambuijila Phetele?

¹⁸ Mu kilangidilu kia kauana kia usuku, mba mu ola ia 3 ia usuku kuila kua kexile kiá mu kúkia, Phetele ueha o kuendesa o baluku anga u xikama kiambote. Mu ku tala dingi​—mu menha​—kua kexile kima kia kexile mu kuenda! O kuila o mabhuku akexile mu di beta-beta? Kana, kiexile kima kiemanene. Kiexile diiala! Diiala muene dia kexile mu kuenda ku thandu’a menha a Kalunga! Kioso kia kexile mu zukama, uexile kala ueji ku a somboka. Ni uôma uavulu, o maxibulu a banzele kuila kisunji kia monene. O diiala dia zuela: “Tululukenu, eme! Ki mu kale ni uôma!” uexile Jezú!​—Mat. 14:25-28.

¹⁹ Phetele ua tambuijila: “Ngana, ki ki kala eie-muène, ngi tume ngi ku sange koko, ku thandu’a menha.” Mu kuzuela kiki, ua londekesa o ku suína. Ni ku sanguluka mu ku mona o madiuanu enhá, Phetele ua mesenene kulondekesa dingi o kixikanu kiê kua Jezú. Phetele ua mesenene ku mona o kutena kua madiuanu a Jezú phala ku kolesa o kixikanu kiê. Ni ku lenduka kuoso, Jezú ua mu ixana. Phetele ua tuka mu menha ku mbandu’a baluku ni kuenda ku thandu dia menha a kalunga. Xinganeka kiebhi kia divu Phetele mu kuenda ku thandu dia menha kála ua mu kuenda bhoxi. Sé phata muéne ua sangulukile kiavulu mu kuia kua kexile Jezú. Maji mu ku bhita ithangana, muéne ua divu kiéngi.​—Tanga Matesu 14:29.

20. Kiebhi Phetele kia landuka, ni ihi ia bhitile? (b) Disá diebhi dia longo Jezú kua Phetele?

 ²⁰ Phetele ua tokalele ku tala ngó kua Jezú. Mukonda Jezú ni kutena kua Jihova, ua kexile mu langa Phetele ku mabhuku. Jezú ua kexile mu bhanga kiki mukonda dia Phetele ku kala ni kixikanu kua muéne. Maji Phetele ua landuka. O Bibidia i zuela: “Kia mono o kitembu kia nguzu-phe, uôma ua mu kuata.” Phetele ua mateka ku tala o mabhuku ku beta ku baluku, anga u kala ni uôma uavulu. Nange muéne ua kexile mu banza kuila ueji boba mu kalunga ni kufuá. Kioso o uôma uê kia kexile mu di bandekesa, o kixikanu kiê kia kexile ué mu zoza. O diiala, dia mu lukile o dijina dia, Ditadi mukonda dia ku suína kuê mu ku kolokota, ua mateka o ku boba kala ditadi, mukonda dia ku zoza kua kixikanu kiê. Phetele uejidile ku zóua mu kalunga, maji mu kithangana kiki, ka dielela mu uhete uê ua ku zóua mu kalunga. Muéne ua dikola: “Ngana ngi kudile!” Jezú ua mu kuata o lukuaku. Hanji mu menha, Jezú ua longo disá dia dikota kua Phetele, uixi: “Eie ua tolo o kuxikana, phata ia ku kuatela-hi?”​—Mat. 14:30, 31.

21. Mukonda diahi kiluezu kia dikota ku kala ni phata, ni kiebhi ki tu tena ku bhânga phala ku tolola o phata?

²¹ ‘Ku kala ni phata’​—kizuelu kia dikota! O phata ki tena ku jibha muthu. Se tu kala ni phata, o kixikanu kietu ki tena ku zoza ni ku bhangesa kuila tu boba mu nzumbi. Ki tu tokala ku kala ni phata! Kiebhi? Mu ku dilanga phala ki tu landuke. Se tu kuata ku tala o ima i tu kuatesa uôma, i tu luualesa, i tu bhangesa ku jimba Jihova ni Mon’ê, o jiphata jetu ja-nda di dibandekesa dingi. Se tu tala ngó kua Jihova ni kua Mon’ê, mu ima ia bhange kiá ni mu ima ia mu bhanga lelu, ni mu ima ia-nda bhanga kua ió a mu zolo, ki tua-nda kuehela kuila o phata i zozesa o kixikanu kietu.

22. Mukonda diahi tua tokala ku kaiela o kixikanu kia Phetele?

²² O kitembu kia sosoloka kioso Phetele kia kaiela Jezú mu baluku. O Kalunga ka Ngalileia ka tululuka. Phetele ni maxibulu a mukuá a dikola, exi: “Kidi kiene, eie u Mon’a Nzambi.” (Mat. 14:33) Phetele anga u sanguluka kioso ki kua mateka o kúkia. Muéne ka kexile dingi ni phata ni uôma. Kua kexile hanji njila ia lebha phala Phetele kuenda katé kieji kituka Kidistá kála o Ditadi dia zuelele Jezú. Maji muéne ka mesenene ku suka mu njila, ua mesenene ku kolokota o ku kula mu nzumbi. O kuila kiene ué ki ua mesena o ku bhanga? Ua-nda mona kuila kima kiambote ku kaiela o kixikanu kia Phetele.