1. Kithangana kiahi kia bhonzele ku muenhu ua Phetele?

 PHETELE nuka dingi ueji jimba o kithangana kia mu talele Jezú. O kuila o ukexilu ua kexile ku mu tala-nau Jezú, kia mu bhangesa ku banza kuila Jezú ua temene mba ua mu ditunine? Ki tuijiia, mukonda o Bibidia iamba ngó kuila, “Ngana anga u bhiluka, hé u ta mesu kua Phetele ni ku mu tonginina.” (Luka 22:61) Maji kioso Jezú kia mu tale, muéne ua tendela kuila ua luezele. Muéne ua mono kuila ua bhangele o kima kia mu tangele Jezú, o kima kia kanene kuila nuka ueji ku ki bhanga​—o ku dituna Ngana iê. Nange kia bhonzele phala Phetele, nange muéne nuka ua divuile kiki.

2. Disá diebhi dia bhingile ku di longa Phetele ni kiebhi ki tu tena ku katula mbote mu musoso iú?

² Maji muéne ua kexile hanji ni kidielelu. Mukonda Phetele uexile diiala dia kixikanu, mu kiki muéne ua kexile hanji ni kithangana kia ku balumuka ni ku di longa o disá dia beta o kota, dia longele Jezú. O disá dia ku loloka. Kala muthu mu dietu ua bhingi ku di longa o disá didi, mu kiki tu kaiele Phetele mu njila iê ia bhonzo.

3, 4. (a) Ihi iebhula Phetele kua Jezú, ni ihi ia kexile mu banza Phetele? (b) Kiebhi kia londekesa Jezú kuila Phetele ua kexile ni ibanzelu ia athu mu izuua iê?

³ Kua bhitile kia mbeji jisamanu kioso kia kexile mu Kafanau mua tungile, Phetele uebhula kua Jezú: “Mukuetu u ngi ta kituxi lukuxi, ni ngi mu loloka? Ngi mu loloka lusambuadi? Kuala Jezú: Eme ki ngi mu ambela lusambuadi; maji katé lumakuinhi sambuadi a masambuadi.”​—Mat. 18:21, 22.

⁴ O kuila Jezú ua kexile mu suínisa Phetele ku soneka o ituxi ioso i ta o athu? Kana. Mu veji dia kiki, muéne uambe kana 7, maji mu 77 a ji veji mu kulondekesa kuila o ku loloka ki kuene mbambe. (1 Kol. 13:4, 5) Jezú ua londekesa kuila Phetele ua  kexile ni ibanzelu ia athu mu izuua iê, ka uabhele ku loloka. Maji Nzambi u loloka o athu oso, sé ku bhinga kima.​—Tanga 1 Nzuá 1:7-9.

5. Kithangana kiebhi ki tu di longa ku loloka?

⁵ Phetele ka ditunu o ima ia zuela Jezú. Maji o kuila o disá dia mu longo Jezú, dia tula ku muxima uê? Saí ithangana tu di longa ngó ku loloka, kioso ki tu mona kuila tua bhingi muloloki ua akuetu. Mu kiki, tu lembalale o ima ia bhitile ande dia Jezú kufuá. Mu ithangana ienioió ia bhonzele, Phetele ueji bhinga kiavulu o muloloki ua Mesene iê.

Phetele ua Bhindamene Kiavulu o Muloloki

6. Ihi ia zuela Phetele kioso Jezú kia kexile mu longa o kulenduka ku jipoxolo, maji ihi ia bhangele Jezú?

⁶ O usuku ua sukina ua bhitile Jezú mu ixi​—ki kima kia ku jimba. Muéne ua kexile hanji ni ima iavulu phala ku longa ku jipoxolo jê​—kála o ku lenduka. Jezú ua londekesa o kulenduka mu ku sukula o inama ia jipoxolo jê, o kikalakalu kia kexile mu bhanga o abhika bhu bhata. Kia dianga, Phetele uebhula se mukonda diahi Jezú ua kexile mu bhanga o kikalakalu kieniókio. Anga u zuela kuila ka mesena kuila, Jezú u mu sukula o inama. Mu ku suka-ku, ua bhingile kua Jezú ku mu sukula o inama, katé muene ni maku ni mutué. Ni muanu uoso Jezú ua jimbulula o valolo ni ihi ilombolola o kima kia kexile mu bhanga.​—Nzuá 13:1-17.

7, 8. (a) Kiebhi Phetele kia polovala dingi o muanhu ua Jezú? (b) Kiebhi kia kolokota Jezú kulondekesa henda ni ukexilu ua ku loloka?

⁷ Maji, mu ku bhita kithangana o maxibulu akexile mu zoka se nanhi uexile o dikota mu kaxi kâ. Phetele ua zoko ué, ni ku dizangeleka. Maji, Jezú ua a bazela ni henda ioso, katé muene ua a ximana mukonda dia ima iambote ia bhangele; ene a londekesele kixikanu ni ufiiele ku Mesene iâ. Maji Jezú uambele kuila o jipoxolo joso jeji mu lenga. Phetele uambele kuila muéne keji mu lenga né muene se kua bhingile kufuá. Maji Jezú ua kanene Phetele kuila, ueji dituna Mesene iê mu veji jitatu mu usuku uenhó, ande dia dikolombolo ku kokola mu veji ia kaiiadi. Phetele ka ditunu ngó o ima ia mu kanene Jezú, maji ua di zangeleka ué bhu kaxi ka jipoxolo ja mukuá.​—Mat. 26:31-35; Mar. 14:27-31; Luka 22:24-28; Nzuá 13:36-38.

⁸ O kuila Jezú ua bazela Phetele? Mu kithangana kieniókio Jezú ua kexile mu mona ngó o ídifua iambote ia jipoxolo jê. Muéne uejidile kuila Phetele ueji mu lenga maji né kiki Muéne uambe: “Eme-phe nga ku diondela, Ximá phala o kuxikana kué ki  kúbhue ni ku lémbue. Eie-phe, hinu ki u vutuka dingi kokuami, kolokotesa jiphange jé.” (Luka 22:32) Jezú ua londekesa kuila ua xikinine mu ufiiele ua Phetele ni kuila né muéne se ua di bhalele ueji balumuka. Jezú ua londekesa ukexilu ua henda!

9, 10. (a) Mukonda diahi Phetele a mu bazela mu Jaludim ia Ngetesemane? (b) Ihi i tu longa ia bhiti ni Phetele?

⁹ Mu ku bhita kithangana, mu Jaludim ia Ngetesemane a bhingi dingi ku mu bazela. Jezú ua bhingi kua Phetele ni Nzuá ni Tiiaku ku mu langidila mukonda muéne ua kexile múia mu samba. Jezú mu ibhidi ua mesenene kikuatekesu, maji Phetele ni akuâ a zeka mu ithangana iavulu. Jezú ua londekesa henda ni ukexilu ua ku loloka, muéne uambe: ‘O muxima ua mesena ku luua ni tendasá, maji o xitu-phe ia bhuila.’​—Mar. 14:32-41.

¹⁰ Ki ku bhitile kithangana kiavulu kua bhixila mundu ambatele mianga, ni jixibhata, ni ji mbangala. Kiki kiexile kithangana kia ku di langa. Maji Phetele ka kingila, ua sungu o xibhata, iu ua batula o ditui dia Máluku uexile o mubhika ua nganga ia dikota. Jezú ni ku tululuka kuoso ua bazela Phetele, anga u katula o dítui dia diial’odio, anga u mu ilula, ua longo akaiedi’ê o milongi iene mu belesela o akaiedi’ê lelu. (Mat. 26:47-55; Luka 22:47-51; Nzuá 18:10, 11) Phetele a mu lolokele kiá kiavulu ku Mesene iê. Kiki ki tu lembalesa kuila etu tuene mu lueza veji javulu. (Tanga Tiiaku 3:2.) Nanhi mudietu ka bhindamena o muloloki ua Nzambi izuua ioso? Phala Phetele o usuku uenhó ua lebhele kiavulu. Maji o maka a dikota eji kuíza ku pholo.

11, 12. (a) Kiebhi kia londekesa Phetele o ku suína, kioso kia kutu Jezú? (b) Kiebhi kia londekesa o phangu ia Phetele kuila muéne ka kumbidila ia kanene kua Ngana iê?

¹¹ Jezú ua bhingile ku mundu uejile mu ku mu kasa kuehela o jipoxolo jê kuia, mukonda ene akexile mu ku sota muéne. Kioso kia kexile mu kuta Jezú, Phetele ua kexile ngó mu tala. Muéne ua lenge ué kála kia lengele o jipoxolo ja mukuá.

¹² Phetele ni Nzuá nange emanene ku lumbu lua inzo ia Mukunji ua Dikota Anaji, mua matekene ku fundisa Jezú. Kioso kia mu katula mu inzo, Phetele ni Nzuá a mu kaiela “dikanga ku dima.” (Mat. 26:58; Nzuá 18:12, 13) Maji Phetele kexile mukuá uôma. Maji se phata kua bhingile ku suína phala ku kaiela o athu akexile mu kuambata Jezú. O mundu ua kexile ni mauta, Phetele ua kuamene-bhu kiá muthu. Maji ki tu mono lua o kixikanu kia kanene Phetele​—o vondadi ia kufuá ku mbandu ia Mesene iê sé kua bhingile.​—Mar. 14:31.

13. Uebhi o ukexilu u tu tena ngó ku kaiela Kristu?

 ¹³ Athu avulu lelu a sola ku kaiela Jezú “dikanga,” kála kia bhangele Phetele​—a ki bhanga mu ukexilu ka u mono kuala o athu. Maji kala kia soneka Phetele ku pholo, kuala ngó ukexilu umoxi ua ku kaiela Kristu, o ku mu zukama, ni ku kaiela o phangu iê mu ima ioso, né muene se ku moneka ibhidi.​— Tanga 1 Phetele 2:21.

14. Kiebhi kia kexile Phetele kioso kia kexile mu fundisa Jezú?

¹⁴ Phetele ua kaiela Jezú katé bhu dibhitu dionene dia inzo ia betele o kota mu Jeluzaleme. O inzo íii ia tokalele ku nganga ia dikota, Kaiafa uexile mvuama. O jinzo jiji akexile mu ji tunga ni ithádi bhu kaxi, ni dibhitu dionene ku pholo. Kioso kia bhixila Phetele, ka muehela ku bokona. Maji Nzuá ua kexile kiá m’onzo iu ua bhingi ku bokuesa Phetele. Maji Phetele ka kexile bhu mbandu ia Nzuá, ka di suínisa ué ku bokona mu inzo phala ku kala ku mbandu ia Mesene iê. Maji ua kexile mu kithádi mua kexile mu sungila o jiselevende, mu kuota, ni ku tala o umbangi ua kexile mu ta o jimbangi ja makutu, ja kexile mu bokona ni ku tunda bhu kididi mua kexile mu fundisa Jezú.​—Mar. 14:54-57; Nzuá 18:15, 16, 18.

15, 16. Jimbulula kiebhi o kikanenu kia Jezú kia lungu ni Phetele ku mu dituna veji jitatu kia di kumbidila.

¹⁵ Kioso kia kexile mu kuota, o kilumba kia bokuesele Phetele ua mu tonginina kiambote. Muéne ua mu lembalala. “Eie ue ua kexile ni Jezú dia Ngalileia.” Kuma a mu tukumukisa, Phetele ua ditunu kuila kejidile Jezú​—muéne ua di bhangesa kuila ka kexile mu kuívua ia kexile mu zuela o kilumba. Muéne uai ku dibhitu dionene phala ka mu mone, maji kilumba kia mukuá ua mu mono ua zuela ué ia zuelele mukuá: “Ial’ú hé ua kexile ni Jezú dia Nazalé.” Phetele ua loka: “Xinge phaietu muène! Iala muenhó ki nga mu’ijiia ngó.” (Mat. 26:69-72; Mar. 14:66-68) Nange mu veji ia kaiiadi kioso kia ditunu Jezú, Phetele uevu o dikolombolo ku kokola, maji muéne ua thandanganhele ni ima iéngi, ka lembalala o kikanenu kia Jezú, ki ku bhitile luua ji ola javulu.

¹⁶ Kioso kia kexile hanji mu di sueka, kua zukama athu. Maji kibuka kia athu akexile mu kitadi a mu zukama. Saí muthu ua kexile mu kibuka uexile ndandu ia Máluku a mu batuile o ditui kua Phetele. Muéne uambe kua Phetele: “Abha eme ki nga ku muene nê?” Phetele ua mesenene ku mu xikinisa kuila makutu. Kienhiki ua loko mu kuila kuíze kaxtiku ku thandu diê, se ua kexile mu tanga makutu. Phetele ua ditunu mu veji ia katatu. Phetele ka zubhile luua o kuzuela kioso kia kokola o dikolombolo ​​—⁠o veji ia kaiiadi iévu Phetele o di kolombolo ku kokola mu usuku uenhó.​—Nzuá 18:26, 27; Mar. 14:71, 72.

17, 18. (a) Ihi ia bhangele Phetele kioso kia mono kuila ka kumbidila o kima kia kanene kua Mesene iê? (b) Nange ihi ia xinganekene Phetele?

¹⁷ Mu kithangana kieniókio, Jezú uíza mu bhalanda i bhana ku kithádi. Kála ki tua mono ku dimatekenu dia kibatulu kiki, muéne ua sakukila Phetele. Phetele-phe anga u mona kuila, ka kumbidila ia kanena kua Mesene iê. Phetele ua luuale kiavulu mukonda dia ku lueza. Phetele ua kexile mu kuenda mu ikoka ia mbanza iezalele ni mukengeji ua dieji sé kuijiia kua mu ditela. Ka tenene ku kuata o masoxi, anga u kuata o ku dila.​—Mar. 14:72; Luka 22:61, 62.

¹⁸ Nange o muthu se u lueza mu ukexilu iú, u fika kuila ka tokala dingi ku mu loloka. Nange kiene ué kia xinganeka Phetele. O kuila kidi?

19. Kiebhi kia divu Phetele kioso kia lueza, kiebhi ki tuejiia kuila né kiki muéne ka bhuila?

¹⁹ Ki bhonza ku xinganeka kiebhi kia kexile mu divua Phetele kioso ki kuáki, o ima ieji bhita mu kizuua kieniókio, ieji bandekesa o ndolo iê. Sé phata muéne ua di tatela kiavulu kioso kiafu Jezú ni hadi iavulu mu ngoloxi’io! Phetele ua luualele kiavulu mu ku xinganeka kuila ua bandekesa o ndolo ia Mesene iê, mu kizuua kiê kia suku-ku mu ixi. Sumbala ua luualele kiavulu, maji Phetele ka thandanganhele kiavulu. Tua kijiia mukonda o Bibidia izuela kuila muéne ua kexile dingi ni jiphange. (Luka 24:33) Sé phata o maxibulu moso a diela o kima kia bhangele mu usuku uenhó, ia a kexile mu di suínisa mudiâ.

20. Ihi i tu longa o kima kia bhange Phetele kioso kia kexile kiambote?

²⁰ O musoso iú ulondekesa kuila Phetele ua kexile kiambote. Se selevende ia Nzambi u dibhala, o kima kia beta o kota ko ku dibhala, maji o vondadi iê ia ku balumuka mba ku diela o kituxi ni ku bhanga o kima kia tokala. (Tanga Jisabhu 24:16.) Phetele ua londekesa kixikanu mu ku diongeka ni jiphange né muene ni ku luuala. O muthu kioso kia luuala mba u kala ni kitongoluelu kia neme, u mesena ku kala ngó ubheka uê, maji kiki kiluezu kia dikota. (Jisa. 18:1) O kima kia tokala o kubhanga, o ku kala kumoxi ni jiphange, ni ku suína mu nzumbi.​—Jihe. 10:24, 25.

21. Mukonda dia ku kala ni jiphange jê mu nzumbi njimbu iahi ivu Phetele?

²¹  Kioso kia kexile kumoxi ni Jiphange, Phetele ua tambula njimbu ia mu thandanganhesa, kuila o kimbi kia Jezú ki ki kexile mu mbila. Phetele ni Nzuá a lengela ku mbila mua fundile Jezú, ia jikile ni ditadi. Nzuá uexile o ndenge, muene ua dianga ku bhixila. kioso kia sangele o mbila ia jikuka, muéne ka mesenene ku bokona. Maji Phetele kana. Né muéne ni ku bhuila muéne ua bokona. Mu mbila ki mu kexile kima!​—Nzuá 20:3-9.

22. Ihi ia bhangesele kuila Phetele ka kale ni phata mba ku luuala?

²² O kuila Phetele ua xikana kuila Jezú ua fukunukine? Ku dimatekenu kana, né muene kioso kiévu o ahatu kuzuela kuila kua moneka ji-anju ja a tangela kuila Jezú, ua fukunukine ku alunga. (Luka 23:55–24:11) Maji ku di sukilu dia kizuua Phetele ka kexile dingi ni phata mba ku luuala. Jezú ua kexile ku muenhu, muthu mu nzumbi ni kutena kuavulu! Muéne ua monekena ku maxibulu mê oso. Ande dia kiki, muéne ua dianga ku monekena Phetele. O jipoxolo ambe kuila: “Kidi kiene, Ngana ua fukunuka! Ua tukulukila Ximá!” (Luka 24:34) Kiene kimoxi ué, o poxolo Phaulu ua soneka ué ia lungu ni kizuua kia mu monekena Jezú, uixi: “Kutukulukila Phetele [a mu ixana ué Kefa], hé u tukulukila kiua o kuinhi ni kiiadi” kia jipoxolo. (1 Kol. 15:5) Kefa ni Ximá exile ué majina a Phetele. Jezú ua mu monekena o kizuua kieniókio​—kioso kia kexile ubheka uê.

23. Mukonda diahi o Jikidistá a ta kituxi lelu, a tokala ku lembalala ia bhitile ni Phetele?

²³ O Bibidia ki i jimbulula o ima ioso ia bhitile mu kithangana kieniókio. Jezú ni Phetele ene ngó ejidile o maka a tele kiiadi kiá. Maji tu tena ku xinganeka kiebhi kia divu Phetele kioso kia mono kuila Ngana iê ua kexile ku muenhu, muéne ua londekesele kuila ua luualele, ni kuila ua diela o kituxi kia tele. Phetele ua mesenene ngó o ku mu loloka. Nanhi u tena ku kala ni phata kuila Jezú ka mu loloka? O Jikidistá a ta kituxi lelu, a tokala ku lembalala ia bhitile ni Phetele. Ki tu tokala ku xinganeka kuila ki tu tokala o muloloki ua Nzambi. Jezú ua londekesa kiambote o ukexilu ua Tat’ê “mukua ku loloka kiavulu.”​—Iza. 55:7.

24, 25. (a) Jimbulula ihi ia bhitile mu usuku kioso Phetele kiai mu tamba mu kalunga ka Ngalileia. (b) Ihi ia bhangele Phetele kioso kia mono madiuanu a bhangele Jezú kioso ki kuáki?

²⁴ Jezú uambela o jipoxolo jê kuila, a tokalele kuia mu Ngalileia, kuene kueji di sanga nê dingi. Kioso kia bhixila Phetele uai  mu tamba mu kalunga ka Ngalileia. A mukuá a mu kaiela. Phetele ua kexile dingi mu kizanga kua tungile. O jibuia ja baluku, ni mabhuku ni manda, a mu bhangesa ku divua kála uala kubhata. Mu usuku uenhó, ene ka kuata né ngó mbiji imoxi.​—Mat. 26:32; Nzuá 21:1-3.

²⁵ Maji mu kamene saí muthu ua exana, ua a ambela ku takula o manda ku mbandu ia mukuá ia baluku. Ene a bhange kala kia a tendelesa, a kuata 150 a mbiji! Phetele uejidile  o muthu muenhó. Ua tuluka mu baluku ni lusolo, iu uai katé kua kexile o muthu. Mu palaia Jezú ua bhana ku makamba mê mbiji io zuze ku makala. Muéne ua betele kuzuela ni Phetele.​—Nzuá 21:4-14.

26, 27. (a) Kithangana kiebhi kia bhana Jezú kua Phetele mu veji jitatu? (b) Phangu iahi ia bhana Jezú ia londekesa kuila ua loloka Phetele?

²⁶ Jezú uebhula Phetele: “Eie ua tundu iá mu ku ngi zola?”​—sé phata muéne ua kexile mu zuela o ndumba ia mbiji. O kuila Phetele ua betele ku zola o ufunu ua ku tamba, Jezú ndenge? Mukonda dia ku dituna Ngana iê mu veji jitatu, Jezú ua mu bhana kithangana kia kulondekesa o henda iê bhu kaxi ka jiphange jê. Mu veji jitatu Jezú ua mu londekesa kiebhi kia tokalele kulondekesa o henda íii: Mu ku ta ku pholo o sidivisu ia Nzambi mu ku langa o jimbudi ja Kristu, o akaiedi’ê​—Luka 22:32; Nzuá 21:15-17.

²⁷ Mu kiki, Jezú ua londekesa kua Phetele kuila muéne ni Tat’ê, akexile ni kikalakalu phala Phetele. Ni kikuatekesu kia Jezú, Phetele ueji bhanga kikalakalu kia dikota mu kilunga. O ujitu iú ua londekesa kuila Jezú ua mu lolokele! Sé phata o henda íii ia tula ku muxima ua Phetele, muéne ua di longo disá diambote.

28. Kiebhi kia kumbidila Phetele o dijimbuluilu dia dijina diê?

²⁸ Phetele ua kumbidila kiambote o kikalakalu kiê mu mivu iavulu. Muéne ua suínisa o phange jê kala kia tendelesa Jezú kioso kia zukamene o kufuá kuê. Phetele ua lange o jimbudi ja Kristu ni henda ioso. O diiala a mu ixanene Ximá, ua kumbidila kiambote o dijina dia mu bhele Jezú​—Phetele mba ndanji​—mu ku kala muthu ua suína ni ku kuatekesa o kilunga. Kiki tu tena ku ki mona mu mikanda iê ia soneka, o madivulu aiadi u tu sanga mu Bibidia. O mikanda íii, ilondekesa ué kuila Phetele ka jimbile o milongi ia mu bhanene Jezú ia lungu ni ku loloka.​—Tanga 1 Phetele 3:8, 9; 4:8.

29. Kiebhi ki tu tena ku kaiela o kixikanu kia Phetele ni henda ia Mesene iê?

²⁹ O disá didi di tu longa kima. O kuila izuua ioso tu bhinga kua Nzambi ku tu loloka o ituxi ietu? O kuila tu xikina o muloloki iú ni ku xikina mu kutena kuê kua ku tu zelesa? O kuila tu loloka akuetu? Se tu bhanga kiki, tua-nda kaiela o phangu ia Phetele​—ni henda ia Mesene iê.