1, 2. Kiebhi o kafunga ka ilunga kia tumbula o athu a fiiele a a tange mu Bibidia, ni mukonda diahi o athu enhá eji kala makamba ambote?

 PHANG’ETU ia muhatu, kioso kia zubha o kuívua o diskursu dia bhange o kafunga ka ilunga uexile kiá muadiakimi, uambe: “Muéne ua tumbula o athu a a tange mu Bibidia kala makamba mê okulu.” O phange íii ua lungu mu kuzuela ia lungu ni kafunga ka ilunga​—o kafunga ka ilunga, uene mu di longa kiá o Mak’â Nzambi mu mivu iavulu, kienhiki kioso muéne kia kexile mu zuela ia lungu ni athu a a tange mu Bibidia, uexile kala ua mu zuela ia lungu ni kamba diê diokulu ua mu ijidile kiambote.

² Ki kieji fuama ku kala makamba mê, o a athu a a tange mu Bibidia? O kuila athu a kidi phala eie? Xinganeka kiebhi ki ueji divua, kuenda, ni kuzuela nau, ni ku dijiia kiambote ni athu enhá, ki kale maiala ni ahatu kala, Noué, Mbalahamu, Lute, Elija, ni Estere. Xinganeka ku milongi i kolokotesa ieji ku bhana​—ieji ku u suínisa ku muenhu uê.​—Tanga Jisabhu 13:20.

3. (a) Kiebhi ki tu tena ku katula mbote mu ku di longa o phangu ia maiala ni ahatu a kixikanu a a tange mu Bibidia? (b) Ibhuidisu iebhi i tua-nda di longa?

³ Mu kithangana kia-nda ‘fukununa . . . o athu ambote,’ o athu a-nda kala ni ukamba iú ua kidi. (Ika. 24:15) Maji né muene lelu, tu tena ku katula mbote mu ku di longa ku athu, maiala ni ahatu a a tange mu Bibidia. Kiebhi? O poxolo Phaulu u tambuijila kiambote: ‘Kaiele-nu ió mu kixikanu kiâ, ni muanhu uâ, a tambula o ima ia a kanene.’ (Jihe. 6:12) Kioso ki tu mateka o ku di longa ia lungu ni maiala ni ahatu a kixikanu, tua-nda di longa ibhuidisu i tu bhangesa ku xinganeka mu izuelu ia Phaulu: Maji o kixikanu ihi ni mukonda diahi tua bhingi tu kala ni kixikanu? Kiebhi ki tu tena ku kaiela o athu a fiiele a a tange mu Bibidia?

4. Ihi iene mu banza o athu ia lungu ni kixikanu, ni mukonda diahi ene a di nganala?

⁴ O kixikanu, kídifua kia iuka, athu oso a-nda di longa o kídifua kiki mu divulu didi. Lelu athu avulu kene mu bhana valolo ku kídifua kiki, o kixikanu, mu ku banza kuila o kixikanu kilombolola ku xikina se ku mona o jipolova. Maji ene mu di nganala. O kixikanu ki bhinga jipolova; ki kima kia ku divua ngó kana; ki ku xikina ngó mu kima. O ku xikina mu kima sé polova kiluezu kia dikota;  mukonda o kibanzelu ki tena kuíza lelu, mungu kana; o ku xikina ngó kua Nzambi ki kiene ngó kia bhingi, mukonda o ‘madimonho ué a xikina, anga a teketa ni uôma.’​—Tiia. 2:19.

5, 6. (a) O kixikanu kietu, tu kilondekesa mu ima iiadi iebhi ki tu tena o ku i mona? (b) Kiebhi kia tokala ku kala o kixikanu kietu? Bhana kifika.

⁵ O kixikanu kia kidi, ki ku xikina ngó mu kima. Ijiia kiebhi ki jimbulula o Bibidia o kixikanu. (Tanga Jihebeleu 11:1.) Phaulu ua jimbulula kuila, o kixikanu a kilondekesa mu ima iiadi. O kia dianga, a kilondekesa mu ima ‘ki tu tena ku i mona.’ O mesu metu ka tena ku mona o ima ia nzumbi​—kala o ku mona Jihova Nzambi, Mon’ê, mba o Utuminu ua mu tumina kiá ku diulu. O kia kaiiadi, o kixikanu kijila mu ‘ima i tua mu kingila’​—o izulukutu ki luua i bhita. Kindala ki tu tena ku mona o mundu uobhe, ua-nda bheka o Utuminu ua Nzambi. O kuila kiki kilombolola kuila o kixikanu kietu mu ku kingila o ima íii ki iala ni jipolova?

⁶ Kana! Phaulu ua jimbulula kuila o kixikanu kia kidi, kiala ni jipolova. Kioso muéne kia jimbulula kuila o kixikanu, kijila mu ‘jipolova’ iu ua jimbulula kuila, o kixikanu kiala kala “mukanda mu osoneke o kima kia ku tokala.” Xinganeka muthu ua mesena ku ku bhana inzo. Muéne ueji ku bhana mukanda ulondekesa kuila o inzo ia ku tokala ni kuzuela, “íii o inzo iê ia ubhe.” Kiki ki kilondekesa kuila eie ua-nda tunga mu mukanda ua ku bhana muéne; muéne ua mesena kuzuela kuila, o mukanda o polova ia kuila o inzo ia ku tokala, ni kuila o ku tambula o mukanda kuedi kala ua tambula kiá o inzo. Kiene kimoxi ué, o polova, iene ki tu bhangesa ku kala ni kixikanu.

7. O kixikanu kia kidi ki bhinga ihi?

⁷ Kienhiki, o kixikanu kia kidi, ki bhinga ku kala ni kidielelu kia kolo kia lungu ni Jihova Nzambi. O kixikanu ki bhangesa kuila, tu mona Jihova kala Tata ietu ia kazola, ni ku dielela kuila o ikanenu iê ioso ia-nda di kumbidila. Maji o kixikanu kia kidi, ki bhinga dingi kima. Kala o kima kiala ku muenhu, ki bhinga a ki dikila phala ku kala ku muenhu. A tokala a kilondekesa mu ima i tu bhanga, se ki tu kilondekesa, o kixikanu ki fuá.​—Tiia. 2:26.

8. Mukonda diahi o kixikanu kima kiala ni valolo?

⁸ Mukonda diahi o kixikanu kima kiala ni valolo? Phaulu ua tambuijila. (Tanga Jihebeleu 11:6.) Ki tu tena ku zukama kua Jihova né ku bhanga ima i mu uabhela, se ki tu kala ni kixikanu. Kienhiki, o kixikanu kiene kia bhingi se tua mesena ku kumbidila o vondadi ia muthu: ku zukama ni ku ximana o Tata ietu ia diulu, Jihova.

9. Kiebhi Jihova kiene mu londekesa kuila tua mesena o kixikanu?

⁹ Jihova uejiia kuila tua mesena kiavulu o kixikanu, mukonda dia kiki muéne u tu  bhana phangu ia athu, i tu longa kiebhi ki tu tena o ku kolesa ni kulondekesa o kixikanu. Muéne u besoala o Kilunga ni phangu ia athu a fiiele a kala ku pholo mu kilunga. O Maka Mê a zuela: ‘Kaiele-nu o kixikanu kiâ.’ (Jihe. 13:7) Muéne uene mu tu bhana dingi ima ia mukuá. Phaulu ua soneka ia lungu ni “kifuxi kionéne kia jimbangi javulu,” maiala ni ahatu a xisa phangu iambote ia kixikanu phala etu lelu. (Jihe. 12:1) O majina a soneka Phaulu mu divulu dia Jihebeleu 11, alungu ni jimbangi javulu ja fiiele, kene ngó, ene oso ka a zuela. O Bibidia iezala ni misoso ia lungu ni maiala ni ahatu, minzangala ni adiakimi, ni athu a itala ioso akexile ni kixikanu, ala ni ima iavulu phala ku tu longa mu thembu íii ia kambe o kixikanu.

10. Kiebhi o ku di longa ubheka uetu, ku tena ku tu kuatekesa ku kaiela o phangu ia athu a kixikanu a a tange mu Bibidia?

¹⁰ Eie ku tena ku kaiela phangu ia muthu, ku muijiia kiambote. Kioso ki ua-nda mateka ku tanga o divulu didi, ua-nda mona kuila kua bhingile ku tokuesa kiavulu phala ku ku kuatekesa kuijiia kiambote o maiala ni ahatu a kixikanu. Mukonda diahi ku tokuese dingi ia lungu ni maiala ni ahatu enhá a kixikanu? Kioso ki ua-nda di longo mu ubheka uê, tokuesa dingi o kuijiia kuê kua Bibidia bhu kaxi ka madivulu metu u uala nau. Kioso ki ua-nda mateka o ku xinganeka mu milongi i ua mu di longa, xinganeka kiambote mu misoso ia athu a a tange mu Bibidia. Xinganeka o athu, ivua o mazui, ni kuívua o dizumba. Xinganeka ué kiebhi kia kexile mu divua o athu a a tange mu musoso. Mu ku di longa ia lungu ni athu enhá a fiiele, a-nda kala athu a kidi phala eie​—a mukuá a-nda kala kála makamba mê kiá, okulu.

11, 12. (a) Kiebhi ki u tena ku kala kamba dia Mbalamu ni Salai? (b) Kiebhi ki u tena ku kaiela o phangu ia Hana, Elija, mba ia Samuuele?

¹¹ Se u a ejiia kiambote, ua-nda mesena ku kaiela o phangu ia athu enhá. Mu kifika, xinganeka, ua tambula kikalakalu kia ubhe mu kilunga. Bhu kaxi ka kilunga kia Jihova, eie a ku suínisa ku sanzumuna dingi o ukunji uê. Nange a ku bhinga phala kuia mu kuatekesa bhu kidi kua bhindamena aboki a utuminu, mba a ku tumina ku bhanga kikalakalu kiéngi mu ukunji uê, eie u mona kuila ki uejidila ku bhanga o kikalakalu kiki. Kioso ki u xinganeka mu kikalakalu kia ku bhana ni ku samba, ki kima kiambote ku xinganeka mu phangu ia Mbalamu? Mbalamu ni Salai, akexile polondo phala ku xisa o jimbote mu mbanza ia Uli, mukonda dia kiki, a a besoala kiavulu. Se u bhanga kala kia bhangele ene, ua-nda ejiia dingi kiambote, m’ukulu ndenge.

¹² Kiene kimoxi ué, ihi i u bhanga se  muthu u bhixila anga u ku bhanga kia iibha, anga u luuala​—ni ku mona kuila ki beta-kota ku kala kubhata, mu iônge kuie-mu dingi? Se u di longa o phangu ia Hana ni ku mona kiebhi muéne kia divu kioso o mukajin’ê, Penina kia kexile mu ku mu talesa hadi, kia-nda ku kuatekesa ku sola kiambote​—ni ku mona kuila o Hana u kala kamba diê ué dia kazola. Kiene kimoxi ué se u mona kuila kuala dingi ni valolo, u tena ku kala dikamba dia Elija mu ku di longa o musoso uê ua lungu ni kiebhi kia kexile mu divua ni kiebhi Jihova kia mu kuatekesa. O minzangala ene mu a jijidika ku jikoleka, a tena ku kala makamba a Samuuele mu ku di longa kiebhi muéne kia di bhanene ni ukexilu ua iibha ua an’â Eli mu tembulu.

13. O kuila o ku kaiela o kixikanu kia muthu a mu tange mu Bibidia, ki bhangesa o muthu ku kala sé valolo? Jimbulula.

¹³ O kuila o ku kaiela o phangu ia athu enhá a a tange mu Bibidia, ku bhangesa ku kamba valolo bhu pholo ia Jihova? Kana! Ijiia kuila o Mak’â Jihova, o Bibidia, a tu suínisa ku kaiela o phangu ia athu a kixikanu. (1 Kol. 4:16; 11:1; 2 Tes. 3:7, 9) O athu u tua-nda di longa mu divulu didi, a kaiela uá o phangu ia athu akexile ku muenhu ande dia ene. Mu kifika, o Kibatulu 17 kia divulu didi, ki zuela kuila kioso kia kexile mu zuela, Madiia nange ua tumbula o izuelu ia Hana ni ku mu mona kala phangu ia tokala ku i kaiela. O kuila kiki kia bhangesa Madiia ku kala ni kixikanu kia tolo kua Jihova? Kana! O Phangu ia Hana, ia kuatekesa Madiia ku kolesa o kixikanu kiê, phala muéne ku tena ku kala ni dijina diambote bhu pholo ia Jihova Nzambi.

14, 15. Kiebhi kia bhange o divulu didi, ni kiebhi ki tu tena o ku di longa ni divulu didi?

¹⁴ O divulu didi a di bhange phala ku u kuatekesa ku suínisa o kixikanu kiê. O ibatulu ku pholo, “Kaiela o Kixikanu kiâ,” milongi ia tundu mu Mulangidi ua muvu ua 2008 ndu mu Mulangidi ua muvu ua 2013. Maji a bandekesa-ku milongi ia ubhe. Muala ué ibhuidisu phala ku di longa ni ku kumbidila o milongi ku muenhu uetu. Mu divulu didi muala ifikula iala ni ji kolo javulu ja iuka, o ifikula mu milongi iokulu a ji iukisa dingi. A bandekesa-mu ué ima ia mukuá kala, o ilondekesu ia thembu ni ji mapa. O divulu, Kaiela o Kixikanu Kiâ, falamenda ia tokala phala ku di longa mu ubheka, mu ubhezelu ku muiji, ni ku di longa mu kilunga. Miji iavulu a-nda uabhela uá kiavulu ku tanga o misoso mu divulu didi ni dízui dia suína.

¹⁵ Tua kingila kuila o divulu didi, di ku kuatekesa ku kaiela o kixikanu kia jiselevende j’okulu ja Jihova. Ni kuila diene di ku kuatekesa ku kolesa dingi o kixikanu kiê kioso ki uia ni ku zukama dingi kua Tata iê ia diulu, Jihova!