1, 2. Ibhuidisu iebhi iene bhanga o athu?

O ANA-NDENGE ebhula kiavulu. Eie né muene se ua a jimbuluila kiá o maka, ene a kuibhula dingi, ‘Mukonda diahi?’ Kioso ki u a tambuijila, ene a kuibhula dingi, ‘Maji mukonda diahi?’

² Ki kale se tu ana-ndenge mba tu adiakimi, etu enioso tu bhanga ibhuidisu. Saí bhabha, tu dibhuidisa se tua-nda dia-hi? Mba tua-nda zuata-hi? Mba tua-nda sumba-hi? Tu tena kuibhuidisa ima ia mukuá ia lungu ni muenhu mba ni ima ia-nda bhita ku hádia. Maji kioso ki tu kamba kusanga o itambuijilu ia tokala ia ibhuidisu ietu, ki tena ku tu bhangesa kubhuila mu ku i sota.

3. Mukonda diahi athu avulu a banza kuila ene ka tena kusanga o itambuijilu ia ibhuidisu iâ ia beta-o-kota?

³ O kuila o Bibidia iala ni itambuijilu ia ibhuidisu ia beta-o-kota i tuene mu dibhanga? Amoxi a xikina kuila kidi, maji amba kuila o Bibidia ia bhonzo kiavulu phala ku i tendela. Ene a banza kuila, o jimesene mba o atuameni a jingeleja, ene ngó ejiia o itambuijilu. A mukuá a kala ni jisonhi ja kuxikina kuila kejiia o itambuijilu ia ibhuidisu iâ. Ihi i u banza?

4, 5. Ibhuidisu iebhi ia beta-o-kota i uala na-iu? Mukonda diahi ua tokala kukolokota mu kusota o itambuijilu ié?

⁴ Eie nange ua mesena kuijiia o itambuijilu ia ibhuidisu íii: Mukonda diahi ngala ku muenhu? Ihi ia-nda bhita n’eme kioso ki nga-nda fua? Nzambi nahi? O Mesene ia fuma Jezú, uambe: ‘Bhinga, n’a ku bhane; sota, ni u sange; phupha, n’a ku jikuile.’ (Matesu 7:7) Kana  kubhuila mu kusota o itambuijilu ia tokala ia ibhuidisu iê.

⁵ Se u kolokota mu ku “sota,” ua-nda sanga o itambuijilu iê mu Bibidia. (Jisabhu 2:1-5) O itambuijilu ki i bhonzo ku i tendela kana. O ima i ua-nda di longa mu Bibidia, ia-nda kubhana kusanguluka ku muenhu lelu, ni kidielelu kiambote ku hádia. Tua-nda zuela ia lungu ni kibhuidisu kiene mu thandanganhesa athu avulu.

6. Mukonda diahi o athu ene mu banza kuila Nzambi kene mu suua o jiphaxi ja bhita na-ju?

⁶ Athu avulu a banza kuila Nzambi ka tu zolo. Ene amba kuila se Nzambi ua tu zolele, o mundu ueji kala kididi kiambote. Maji tuene mu mona ita, kudizemba, uadiama ku mundu uoso. O athu ene mu kata, a bhita mu jiphaxi, áfua. Saí athu ebhula, ‘Se Nzambi ua tu zolo, mukonda diahi u tuehela kubhita mu jiphaxi?’

7. (a) Kiebhi o atuameni a jingeleja ene mu longa o athu kuila Nzambi muthu ua iibha? (b) Mukonda diahi tu tena kuxikina kuila ki Nzambi uene mu bheka o mavuua?

⁷ Saí ithangana, o atuameni a jingeleja a bhangesa o athu kubanza kuila Nzambi muthu ua iibha. Se ku bhita divuua, ene amba kuila kiene kia mesenene Nzambi, kuila o divuua di bhita. Kioso ene kia zuela kiki, kifuá a mu zuela kuila Nzambi muéne ua bheka o divuua. Maji o Bibidia i longa kuila Nzambi, ka bhange ima iaiibha. O divulu dia Tiiaku 1:13, di tu tangela kuila Nzambi kene mu bheka jiphaxi ku muthu. Dizuela kuila: ‘O muthu kia kala mu ithangana ia malamba, k’ele, uixi: Nzambi muéne ua ngi bhekela o jiphaxi. Mukonda Nzambi ki muthu uaiibha, muène kene mu bheka jiphaxi ku muthu.’ Sumbala muéne kene mu fidisa o  mavuua, maji ki muéne uene mu a bheka kana. (Tanga Jobe 34:10-12.) Tu mone kifika.

8, 9. Mukonda diahi ki kima kiambote kutatela Nzambi mukonda dia hadi ietu? Ta kifika.

⁸ Xinganeka munzangala uala hanji kubhata ni jitata jê. Tat’ê ua mu zolo kiavulu, ua mu longo kusola ni kubhanga o ima ni unjimu. O munzangala u bhukumukina o tata, u tunda ku bhata. Muéne u di ta mu kubhanga ima ia iibha, i mu bhekela ibhidi iavulu. O kuila eie ueji tatela o tata, mukonda dia kuehela o mona ku tunda ku bhata? Kana! (Luka 15:11-13) Kála o tata íii, Nzambi ka fidisa o athu a solo ku mu bhukumukina, mba kubhanga ima ia iibha. Mu kiki, kioso ki kubhita divuua, tua tokala kuijiia kuila, ki Nzambi ua bheka o divuua. Ki kima kiambote ku tatela Nzambi.

⁹ Nzambi uejiia se mukonda diahi ua mu kuehela hanji o ima iaiibha kubhita. Mu kibatulu kia 11, eie ua-nda di longa ihi i longa o Bibidia ia lungu ni maka enhá. Maji ua tokala kuijiia kuila Nzambi ua tu zolo kiavulu, ki muéne uene mu tu bhekela o hadi kana. Mu kidi, Muéne ngó u tena ku tu bhulula.—Izaia 33:2.

10. Mukonda diahi tu tena kudielela kuila Nzambi ua-nda zubha o kuiibha kuoso mu ngongo?

¹⁰ Nzambi muthu ukôla. (Izaia 6:3) Muéne u bhanga ngó ima ia zele ni iambote. Tu tena ku mu dielela. Muéne ka difu ni athu akua ituxi. Mukonda o athu akua ituxi a bhanga ima ia iibha. Katé muene o jinguvulu jambote, kene ni kutena kua kuzubha o ima iaiibha iene mu bhanga o athu. Kana-bhu nguvulu ua tundu Nzambi mu kutena. Muéne uala ni kutena kuavulu, mukonda dia kiki ua-nda zubha o kuiibha kuoso mu ngongo. Mu kiki, ki kua-nda kala dingi kuiibha katé ku hádia ni hádia.—Tanga Jisálamu 37:9-11.

11. Kiebhi kia divua Nzambi kioso kia mona o jiphaxi ji u bhita na-ju?

¹¹ Kiebhi ki divua Nzambi kioso kia mona o ima ia iibha iene mu bhita ku mundu ni ku muenhu uê? O Bibidia i longa kuila Nzambi, ua “uabhela o kubatula mu kidi.” (Jisálamu 37:28) Kienhiki, muéne ua uabhela o ima iambote, maji ua zembe o ima ia iibha. Muéne u divua kia iibha kioso kia mona athu a mu tala hadi. O Bibidia i zuela kuila, Nzambi kia mu ‘bhekele lamba ku muxima uê,’ kioso kia mono kuila, ixi iezalele ni kuiibha kuavulu. (Dimatekenu 6:5, 6) Nzambi ka lunguluka. (Malakiia 3:6) O Bibidia i zuela kuila mu kidi Nzambi ua ku zolo.—Tanga 1 Phetele 5:7.

12, 13. (a) Mukonda diahi etu tua zolo ni kusuua o athu, ni kiebhi ki tu divua mu kumona o hadi mu ngongo? (b) Mukonda diahi tua tokala kudielela kuila Nzambi ua-nda zubha o hadi ni kuiibha kuoso?

¹² O Bibidia i zuela ué kuila Nzambi ua tu bhange mu kidifuanganu kiê. (Dimatekenu 1:26) Kiki kilombolola kuila, Nzambi ua tu bhange ni ídifua iala na-iu muéne. Mu kiki, eie se uene mu divua kiaiibha mu kumona athu a mu tala hadi, ijiia na-kiu kuma Nzambi u beta kudivua kiaiibha eie ndenge! Kiebhi ki tua kijiia kuila kiki kidi?

¹³ O Bibidia i tu longa kuila, “Nzambi henda.” (1 Nzuá 4:8) Nzambi u bhanga o ima ioso mukonda dia henda. Kienhiki, etu tu zola mukonda Nzambi henda. Xinganeka: Eie se ua kexile ni kutena, o kuila ueji zubha o hadi ioso ni kuiibha mu ngongo? Sé phata kiene ki ueji bhanga, mukonda ua zolo o athu. Abha Nzambi? Muéne uene ni kutena, kuma muéne ua tu zolo, tu tena kudielela kuila ua-nda zubha o hadi ni kuiibha kuoso mu ngongo. U tena kudielela kuila o ikanenu ioso i tua  tange ku dimatekenu dia divulu didi, ia-nda di kumbidila! Maji phala kudielela kiambote mu ikanenu íii, ua tokala kuijiia kiambote Nzambi.

14. O dijina dia Nzambi nanhi, ni kiebhi ki tuejiia kuila tua tokala kutumbula o dijina didi?

¹⁴ Eie se ua mesena kukala u dikamba dia muthu, ihi i u dianga ku mu tangela? U mu tangela o dijina diê. O kuila Nzambi uala ni dijina? Jingeleja javulu jene mu longa kuila o dijina diê, Nzambi mba Ngana kuabhu, maji iá ki majina kana. Ene majina a ujitu, kála “sobha” mba “mákulundu.” Nzambi u tu tangela kuila dijina diê Jihova. O divulu dia Jisálamu 83:18, di zuela: “Phala a k’ijiie kuma eie ngó uavu o dijina dié dia Jihova, kumoneka luiadi; eie-muène ngó Suke-ku mu ngongo ioso.” O asoneki a Bibidia, a soneka o dijina dia Nzambi jimidi ni jimidi ja jiveji. Jihova ua mesena kuila eie uijiia o dijina diê ni ku di tumbula. Muéne u ku tangela o dijina diê phala u tene kukala u dikamba diê.

15. O dijina Jihova, dilombolola ihi?

¹⁵ O dijina dia Nzambi Jihova, dilombolola kuila Nzambi u tena kubhanga kima kioso-kioso kia kanena muéne, ni kukumbidila o vondadi iê. Se-ku kima mba muthu  u tena ku mu fidisa. Jihova muéne ngó ua tokala kukala ni dijina didi. *

16, 17. Ihi i lombolola o dijina dia ujitu (a) “Muteni-a-Ioso?” (b) “Sobha inangenena?” (c) “Mubhangi?”

¹⁶ Kála ki tua tange kiá kudima, o divulu dia Jisálamu 83:18, diambe ia lungu ni Jihova: “Eie-muène ngó Suke-ku.” O divulu dia Dijingunuinu 15:3 di zuela ué: ‘Eie Jihova Nzambi Muteni-a-Ioso, o ikalakalu ié kukula  kuahi, ikalakalu idiuanesa kinéne! Eie, Ngana, u Sobha inangenena, o ixinganeku ié kuiuka kuahi. Ima ioso i u sola kubhanga, ia kidi!’ Ihi ilombolola o dijina dia ujitu “Muteni-a-Ioso?” Dilombolola kuila Jihova ua tundu athu oso mu ngongo mu kutena. O dijina dia ujitu, “Sobha inangenena,” dilombolola kuila tundé dia tundé, muéne Nzambi. O divulu dia Jisálamu 90:2, di tu londekesa kuila tundé xahulu katé ku hádia, muéne Nzambi u nangenena. Iá madiuanu!

¹⁷ Jihova muéne ngó o Mubhangi. O divulu dia Dijingunuinu 4:11, di zuela: ‘Eie u Jihova, Nzambi ietu, kia ku fuama o ku tambula o fuma ni ujitu ni unene. Mukonda eie muene ua bhange ioso mu vondadi iê.’ Kienhiki, ki kale o ji-anju mu diulu ni jithéthembua, o ibundu ni mixi ni jimbiji mu menha a kalunga—ioso i u xinganeka kuila iene mu ngongo, Jihova muéne ua i bhange!

18. Mukonda diahi saí athu amba kuma nuka a-nda kala makamba a Nzambi? Maji ihi i zuela o Bibidia ia lungu ni maka enhá?

¹⁸ Saí athu kioso kiévua o unéne ua Jihova, ene a kala ni uôma anga a banza, ‘Nzambi uala ni kutena kuavulu, muéne muthu uonene, uala dikanga ku diulu, mu kiki eme nanhi phala muéne ku ngi suua?’ Maji o kuila Nzambi ua mesena kuila tu divua kiki? Kana ngó. Jihova ua mesena kuila tu mu zukama. O Bibidia i zuela kuila Nzambi, “kana muthu ua mu kala dikanga.” (Ikalakalu 17:27) Nzambi ua mesena kuila eie u mu zukama, muéne u kanena kuila, ‘ua-nda ku zukama ué.’—Tiiaku 4:8.

19. (a) Kiebhi ki u tena kukala u dikamba dia Nzambi? (b) Ídifua iebhi ia Jihova i ua beta ku i uabhela?

¹⁹ Kiebhi ki u tena kukala u dikamba dia Nzambi? Jezú uambe: “O muenhu ki uábhua uenhú: Kuila oso a ku ijiie eie u Nzambi ia kidi imoxi-èlele, ni kuijiia ue Jezú Kristu, ió ua mu tumu eie.” (Nzuá 17:3) Suluka ni kudilonga o Bibidia, mu kubhanga kiki, ua-nda kuijiia kiambote Jihova ni Jezú. Ku hádia, ua-nda tambula o muenhu ua kalela-ku. Mu kifika, tua dilongo kuila, “Nzambi henda.” (1 Nzuá 4:16) Maji muéne uene dingi ni ídifua ia mukuá. O Bibidia i tu tangela kuila Jihova, “Nzambi ia jihenda, ua lenduka, u kokoloka mu kuthathamana, u kôla mu kukuatela henda, u fiiele u vula.” (Makatukilu 34:6) Jihova muthu “uambote, u lenguluka kuloloka.” (Jisálamu 86:5) Nzambi mukua muanhu, muéne fiiele. (2 Phetele 3:9; Dijingunuinu 15:4) Ua-nda di longa dingi ia lungu ni ídifua iê kioso ki uia ni kutanga o Bibidia.

20-22. (a) Kiebhi ki tu tena kukituka tu makamba a Nzambi, se ki tu tena ku mu mona? (b) Ihi i ua tokala o kubhanga se akuenu ka mesena kuila eie u dilonga o Bibidia?

²⁰ Kiebhi ki u tena kukala u dikamba dia Nzambi, se  eie ku tena ku mu mona? (Nzuá 1:18; 4:24; 1 Timote 1:17) Mu kudilonga ia lungu ni Jihova mu Bibidia, ua-nda tena ku muijiia kiambote ni ku mu mona kuila Muthu ua kidi. (Jisálamu 27:4; Loma 1:20) Mu kuijiia kiambote Jihova, eie ua-nda mu zola kiavulu, uanda kala u dikamba diê.

²¹ Ua-nda tendela kuila Jihova Tat’etu. (Matesu 6:9) Muéne ua tu bhana o muenhu, iu ua mesena kuila tu sanguluka ku muenhu. Jitata joso ja henda a mesena kuila an’ê a sanguluka ku muenhu. (Jisálamu 36:9) O Bibidia i londekesa kuila eie u tena kukituka u dikamba dia Jihova. (Tiiaku 2:23) Xinganeka. Jihova, o Mubhangi ua ngongo ioso, ua mesena kuila eie u kala u kamba diê!

²² Saí athu ka-nda mesena kuila eie u dilonga o Bibidia, mukonda dia uôma ua kuila eie u xisa o ngeleja iê. Ku tokala kuehela muthu ku ku fudisa kukituka u dikamba dia Jihova. Jihova o dikamba dia beta-o-kota di u tena kukala na-diu.

23, 24. (a) Mukonda diahi ua tokala ku suluka mu kubhanga ibhuidisu? (b) Ihi i tua-nda di longa mu kibatulu kia kaiela?

²³ Kioso ki uia ni ku dilonga o Bibidia, saí ima ki ua-nda i tendela kiambote. Mu kiki, kana kukala ni jisonhi ja kuibhula mba kubhinga kikuatekesu. Jezú uambe kuila, tua tokala kulenduka kála o ana-ndenge. (Matesu 18:2-4) O ana-ndenge ebhula kiavulu. Nzambi ua mesena kuila eie u sanga o itambuijilu ia ibhuidisu iê. Kienhiki, dilonge kiambote o Bibidia, phala u tene kumona se o ima i ua mu dilonga, kidi.—Tanga Ikalakalu 17:11.

²⁴ O ukexilu ua beta-o-kota ua kuijiia Jihova, o kudilonga o Bibidia. Mu kibatulu kia kaiela, tua-nda dilonga se mukonda diahi o Bibidia ki i difu ni madivulu a mukuá.