1, 2. Mukonda diahi o Bibidia ujitu ua mbote ua Nzambi?

KIEBHI ki u divua se a ku bhana ujitu kua kamba diê? Eie u jikula o ujitu ni lusolo, u sanguluka mukonda kamba diê ua ku banze. Eie u mu sakidila o ujitu.

² O Bibidia ujitu ua Nzambi. Tu sanga-mu milongi ki tu tena ku i sanga mu madivulu amukuá. Mu kifika, o Bibidia i tu tangela kuila Nzambi ua bhange o diulu ni ixi, ua bhange o diiala dia dianga ni muhatu. Mu Bibidia tu sanga-mu milongi i tu kuatekesa kioso ki tu kala ni maka. I tu longa kiebhi Nzambi kia-nda kumbidila o vondadi iê ia ku bhanga o ixi palaízu. O Bibidia ujitu ua mbote!

3. Ihi i ua-nda kuijiia kioso ki ua-nda di longa o Bibidia?

³ Mu ku di longa o Bibidia, ua-nda kuijiia kuila Nzambi ua mesena u kala kamba diê. Kioso ki ua-nda muijiia kiambote, ua-nda kala kamba diê dia kazola.

4. O kuila saí divulu dia sokela ni Bibidia?

⁴ O Bibidia a i soneka mu 2.600 a madimi, ene mu bhanga mazunda ni mazunda a ji Bibidia. Athu avulu ku mundu ene mu tanga o Bibidia mu dimi diâ. Semana joso, mazunda a athu a tambula o Bibidia! Sé phata, se-ku divulu dia mukua dia sokela ni Bibidia.

5. Mukonda diahi tu zuela kuila o Bibidia ‘mak’â Nzambi?’

 ⁵ O Bibidia ‘mak’â Nzambi.’ (Tanga 2 Timote 3:16.) Maji saí athu a banza: “O athu ene a soneka o Bibidia, kienhiki kiebhi ki di tena ku kala divulu dia Nzambi?’ O Bibidia i zuela: “Athu a zuela jinga mu kutula o Njimbu i tunda kua Nzambi kala kioso kia a tuma jinga kuzuela kuala o Nzumbi Ikôla.” (2 Phetele 1:21) Kia difu ni mukua uenji u bhinga ku musoneki ué ku soneka mukanda. O mukanda ua tokala kua nanhi? Ua tokala ku mukua uenji. Kiene kimoxi, o Bibidia ia tokala kua Nzambi, ki i tokala ku athu a i soneka kana. Nzambi muéne ua a tumina ku soneka o ibanzelu iê. Mu kidi, o Bibidia “Maka ma Nzambi.”—1 Tesalonika 2:13; tala o Kibandekesu 2.

6, 7. Mukonda diahi tu zuela kuila o Bibidia iala ni kibanzelu kimoxi?

⁶ O Bibidia a i soneka mu 1.600 ja mivu ndenge. O athu a soneka o Bibidia ka kexile ku muenhu mu kithangana kimoxi. Saí iá a dilongo mu jixikola ja katunda, amukuá kana. Mu kifika, saí musoneki uexile dotolo. Amukuá exile idimakaji, amukuá atambi, abhidi, jipolofeta, afundixi, ni jisobha. Sumbala ki muthu umoxi ua soneka o Bibidia, maji o Bibidia ioso iala ni kibanzelu kimoxi. O Bibidia ki i tange kima mu kibatulu kimoxi, mu kibatulu kia mukuá i tanga kima kiéngi. *

⁷ O ibatulu ia dianga ia Bibidia, izuela kiebhi kia mateka o maka ku mundu, o ibatulu ia sukina i tu tangela kiebhi Nzambi kia-nda batula o maka enhá, mu ku bhanga o ixi palaízu. O Bibidia i tanga musoso ua jimidi ni jimidi ja mivu ku dima, i tu londekesa kuila o ikanenu ioso ia Nzambi i dikumbidila.

8. Bhana ifika ilondekesa kuila o Bibidia divulu dia kidi.

⁸ O Bibidia ka i soneka phala kukala divulu dia xikola, maji o milongi iê ia lungu ni ungijiie milongi ia kidi. Kiene kia tokala kukala o divulu dia Nzambi. Mu kifika mu divulu dia Ijila, muala itendelesu ia Nzambi ia bhanene ku akua Izalaiele ia lungu ni jindunge ja kufidisa kusambukisa o mauhaxi. O itendelesu íii a i sonekene ande dia athu kuijiia kuila saí ibamba i bheka mauhaxi. O Bibidia i longa ué kuila se-ku kima kia kuata o ixi, iene ia nzenzama. (Jobe 26:7) M’ukulu o  athu ka xikinine kuila o ixi ki iexile kála ki tua ijiia lelu, maji o Bibidia ia tangele kiá kuila o ixi dikende.—Izaia 40:22.

9. O kulenduka kua asoneki a Bibidia mu kuzuela o kidi, ki tu londekesa ihi?

⁹ O Bibidia i tanga misoso ia kidi. Maji o madivulu a mundu kene mu tanga misoso ia kidi, mukonda o asoneki enhá kene mu zuela o kidi. Mu kifika, ene ka tanga o kidi kia lungu ni jiveji ja tolola o ixi iâ mu ita. Maji o asoneki a Bibidia a zuela o kidi, né muene kioso kia tolola o kifuxi kia Izalaiele mu ita. Ene a soneka ué o ituxi iâ. Mu kifika, mu divulu dia Dialuilu, Mozé u tu tangela kuila muéne ua tele kituxi, ia a mu bazela kua Nzambi. (Dialuilu 20:2-12) O kulenduka kua asoneki a Bibidia mu kuzuela o kidi, kulondekesa kuila o Bibidia ia tundu muene kua Nzambi. Kiki kilombolola kuila, tu tena kudielela mu milongi ia Bibidia.

10. Mukonda diahi o milongi ia Bibidia i tu kuatekesa kiambote lelu?

¹⁰ O Bibidia ‘mak’â Nzambi a i soneka phala kubhandulula, ni mu kulonga o kidi, ni mu kubazela itondalu, ni mu kuiukisa ia bhengalala.’ (2 Timote 3:16) Mu kidi, o milongi ia Bibidia i tu kuatekesa kiambote lelu. Jihova uejiia kiambote o ukexilu uetu, ni ibanzelu ietu. Muéne ua beta ku tuijiia, etu ndenge, ua mesena kuila tu sanguluka ku muenhu. Muéne uejiia o ima i tena ku tu bhanga kiambote ni ku tu bhanga kia iibha.

11, 12. (a) Milongi iahi iambote ia bhana Jezú mu divulu dia Matesu kibatulu 5 ndu 7? (b) Ihi dingi i tu longa o Bibidia?

¹¹ Mu divulu dia Matesu kibatulu 5 ndu 7, tu tanga-mu milongi iambote ia bhana Jezú ia lungu ni kuzediua,  kudibhana ni akuetu, ku samba, ni kiebhi ki tua tokala ku mona o kitadi. Sumbala kua bhiti kiá 2.000 ja mivu tundé kia bhana o milongi íii, iene i tu kuatekesa hanji lelu.

¹² Mu Bibidia, muala itumu ia bhana Jihova i tu kuatekesa ku zediua ku muiji, ku kala tu akalakadi ambote, kukala ni kutululuka ni akuetu. O itumu ia Bibidia i kuatekesa o athu oso.​—Tanga Izaia 48:17; tala o Kibandekesu 3.

13. Ihi iambe Izaia ieji bhita ni mbanza ia Babilonha?

¹³ Mu Bibidia muala ué ikanenu iavulu ia dikumbidila kiá. Mu kifika, Izaia ua kanene kuila o mbanza ia Babilonha eji ku i buika. (Izaia 13:19) Muéne ua tange kiebhi kieji tambula o mbanza. O mbanza ia kexile bhu kaxi ka ngiji, ia kexile ué ni ilumbu ni mabhitu onene. Maji Izaia ua kanene kuila o menha a ngiji eji bambukila kuengi, o mabhitu eji kua xisa a jikuka. O masoladi eji tambula o mbanza sé kubhânga. Izaia ua tumbula o dijina dia diiala dieji tambula o mbanza ia Babilonha, Silu.—Tanga Izaia 44:27–45:2; tala o Kibandekesu 4.

14, 15. Kiebhi kia dikumbidila o kikanenu kia tangele Izaia?

¹⁴ Kua bhitile hama jiiadi ja mivu, tundé kia sonekene o kikanenu kiki, kiene kia bhixila o masoladi phala kutambula o mbanza ia Babilonha. Nanhi ua kexile ku pholo ia masoladi? Kála kia ki tangele kiá, uexile Silu, sobha ia Pélesa. O kithangana kia bhixile phala kukumbidila o kikanenu.

¹⁵ Kioso kia bokona o masoladi mu mbanza, akuâ  Babilonha akexile mu fesa. Ene a landukile mukonda a dielele ku ilumbu ni ku ngiji. Ande dia kubokona mu mbanza, Silu ni masoladi mê a bhangesa o menha mu ngiji kusosoloka. O menha a sosoloka kiavulu, kienhiki o masoladi akuâ Pélesa a tenene kubhita mu ngiji se ku boba. Maji kiebhi kieji bokona mu mbanza ia Babilonha se iene iexile ni ilumbu ionene? Kála kia ki tangele kiá, o mabhitu a a xisa a jikuka, o masoladi a bokona mu mbanza sé kubhânga.

16. (a) Ihi ia tange Izaia ieji bhita ni Babilonha? (b) Kiebhi ki tuejiia kuila o kikanenu kia Izaia kia dikumbidila?

 ¹⁶ Izaia ua kanene kuila mu mbanza ia Babilonha ki mueji tunga dingi muthu. Muéne ua soneka: “Ki mua kà kala dingi muthu u tunga-mu, ki mua kà kala u bhanga-mu dingi dibhata ku tunda muiji kuiza muiji.” (Izaia 13:20) Kiebhi kia di kumbidila o kikanenu kiki? O kididi mua kexile o mbanza ia Babilonha tu ki sanga mu 80 a ji kilómetulu ku sulu ia Bagdá, ku ixi ia Iraque, katé lelu kiala ngó kiphulungunzu kia hatu. Jihova ua buika Babilonha, “ni kiezu kia kibuikilu.”—Izaia 14:22, 23. *

17. Mukonda diahi tu tena kudielela mu ikanenu ia Nzambi?

¹⁷ Mukonda dia ikanenu iavulu ia dikumbidila kiá, tu tena kudielela ku ikanenu ia Bibidia ia-nda dikumbidila ku hádia. Tu tena kudielela kuila, o kikanenu kia Jihova kia kubhanga o ixi palaízu  kia-nda dikumbidila. (Tanga Dialuilu 23:19.) Tuala ni kidielelu kia ‘muenhu ki uàbhua. Nzambi ka moneka makutu, muène ua tu kanena-nau tundé xahulu ku dimatekenu dia ithangana ioso.’—Tito 1:2. *

18. Ihi ia zuela Phaulu ia lungu ni “kizuelu kia Nzambi?”

¹⁸ Tua di longo kuila, se-ku divulu dia difu ni Bibidia, o Bibidia iala ni kibanzelu kimoxi, kioso ki i zuela maka alungu ni ungijiie, mba misoso ia bhiti, iene i zuela o kidi, i tu bhana ué milongi iambote, tu sanga-mu ué ikanenu ia dikumbidila kiá. Maji o Bibidia i zuela dingi maka amukuá. O poxolo Phaulu ua soneka: ‘O kizuelu kia Nzambi kima kia muenhu kiala ni kutena.’ Ihi ilombolola o izuelu íii?​—Tanga Jihebeleu 4:12.

19, 20. (a) O Bibidia i ku kuatekesa kiebhi ku dijiia kiambote? (b) Kiebhi ki u tena kulondekesa kisakidilu ku ujitu ua Bibidia?

¹⁹ O Bibidia i tena kulungulula o ukexilu uê. I tena ku ku kuatekesa ku dijiia kiambote. Iene i tena ku ku kuatekesa kuijiia o ibanzelu iê. Mu kifika, tu tena kubanza kuila tua zolo Nzambi. Maji phala ku mu londekesa kuila tua mu zolo tua tokala ku belesela o milongi ia Bibidia.

²⁰ Mu kidi, o Bibidia divulu dia Nzambi. Muéne ua mesena eie u tanga o divulu didi, u di longa-diu, u di zola. Sakidila o ujitu iú mu ku di longa. Mu kiki, ua-nda kuijiia o vondadi ia Nzambi phala o athu. Mu kibatulu kia kaiela tua-nda di longa dingi ia lungu ni vondadi iê.