Sota madivulu engi a tena kukwatekesa. Katula o izwelu yé mu Mak’â Nzambi, mu kutanga mwene mu Bibidya. Se ki bhana, tumbula ibhangelu ya jingijiye, minangu ya ubhe, kifika, mba kima kyengi kya bhiti, sota kwijiya ni kithangana kya soko se o ima i wa-nda zwela ya bhiti mwene. Sota kwijiya we se yókulu kyá.

Kalakala kyambote ni madivulu mu wa katula o milongi. Jimbulula o jivelusu mu kukayela (1) o ixinganeku ya jivelusu kudima ni jivelusu kupholo, (2) o njimbu ya Bibidya, ni (3) o madivulu a “kimbadi kya fiyele.” (Mat. 24:45) Mu kutumbula milongi ki yala mu Bibidya, tumbula-yu kala kya i soneka, sé kukatula mba kulungulula-ku kima.

Kwatekesa o jingivwidi kutendela kyambote o maka bhu kaxi ka ima i wa londekesa. Kyoso ki u tanga velusu mba kutumbula milongi yengi, bhanga ibhwidisu ya tokala mba ta kifika phala kukwatekesa o jingivwidi kutonginina mudyâ se ihi i wa mesena kuzwela.