DISÁ 01
Kyebhi o Bibidya Itena Kukukwatekesa?
Etwenyoso twala ni ibhwidisu yalungu ni mwenyu, hadi, kufwa, ni ibhwidisu yalungu ni hádya. Etu we izuwa yoso twabhingi kikwatekesu phala kubatula maka alungu ni kukala ni kitadi kyasoko phala kudikila o ibhindamu yetu, ni kyebhi kitutena kukala ni mwiji wasanguluka. Athu avulu amona kwila, o Bibidya ki itambwijila ngó o ibhwidisu imoneka kumwenyu, maji ibhana we milongi yambote yene mwakwatekesa mukizuwa ni kizuwa. O Bibidya itena kukwatekesa athu oso.
1. O Bibidya itambwijila ibhwidisu yebhi?
O Bibidya itambwijila o ibhwidisu yiyi yabetakota: Kyebhi kyamateka omwenyu? Mukonda dyahi twala kumwenyu? O athu ene mutala hadi mukonda dyahi? Ihi ibhita ni muthu kyoso kyafwa? Mukonda dyahi kwala ita yavulu se athu oso amesena okutululuka? Ihi yandabhita ni ixi kuhádya? O Bibidya ituswinisa kusota o itambwijilu ya ibhwidisu yiyi. Mazunda a athu ene musangamu itambwijilu yene mwasangulukisa kyavulu.
2. Kyebhi o Bibidya itena kutukwatekesa kusanguluka kumwenyu?
O Bibidya itubhana itendelesu yambote. Mukifika, yene ilonga kyebhi omiji itena kuzediwa mukidi. Itutangela se ihi itubhanga kyoso kitukala ni héle yavulu, ni kyebhi kitutena kusanguluka ni salu yetu. Wandadilonga ihi izwela o Bibidya yalungu ni maka yá ni milongi yamukwa dingi, kyoso kituya ni kudilonga kumoxi okadivulu kaka. Eye wandaxikina kwila, ‘o Mikanda [yoso yala mu Bibidya] . . . yambote.’—2 Timote 3:16.
O divulu didi, kidibhinganesa o Bibidya. Maji dyandakukwatekesa kutokwesa o Bibidya mudyé. Mu kyenyiki, twamukuswinisa kutanga o jivelusu ja Bibidya jimoneka mu madisá ni kujisokesa ni milongi iwamudilonga.
DILONGE DINGI
Ejiya kyebhi o Bibidya itena kukwatekesa o athu, kyebhi kitutena kuwabhela ku itanga ni mukonda dyahi kima kyambote kusota kikwatekesu phala ku itendela.
3. O Bibidya itena kutwendesa
O Bibidya yedi kala kandeya, kamwika kyambote. O Bibidya itena kutukwatekesa kusola o ima ni unjimu, itena we kututangela o ima yandabhita kuhádya.
Tanga Jisálamu 119:105, mukusuluka bhanga o ibhwidisu yakayela:
-
Kyebhi omusoneki wa Salámu yiyi, kyexile mumona o Bibidya?
-
Abha eye, kyebhi ki umona o Bibidya?
4. O Bibidya itena kutambwijila o ibhwidisu yetu
Sayi muhatu wasange mu Bibidya o itambwijilu ya ibhwidisu yexile mudibhanga mumivu yavulu. Tala OVIDYU, mukusuluka bhanga o ibhwidisu yakayela.
-
Ibhwidisu yebhi yexile nayu omuhatu amulondekesa muvidyu?
-
Okudilonga o Bibidya kwamukwatekesa kyebhi?
O Bibidya ituswinisa kubhanga ibhwidisu. Tanga Matesu 7:7, mukusuluka bhanga o kibhwidisu kyakayela:
-
Ibhwidisu yebhi iwala nayu? Okwila mu Bibidya mwala o itambwijilu?
5. Eye utena kuwabhela okutanga o Bibidya
Athu avulu awabhela kutanga o Bibidya, ene mukatulamu mbote yavulu. Tala OVIDYU, mukusuluka bhanga o ibhwidisu yakayela.
-
Kyebhi kyene mudivwa ominzangala a atange muvidyu, mumaka alungu ni kutanga?
-
Sumbala ene kawabhela kutanga, mukonda dyahi awabhela kutanga o Bibidya?
O Bibidya yamba kwila, yene itena kutubhana milongi ituswinisa, ni milongi itubhana kidyelelu. Tanga Loma 15:4, mukusuluka bhanga o kibhwidisu kyakayela:
-
Okwila wawabhela o ikanenu ya Bibidya iswinisa ni ikanenu yalungu ni kidyelelu?
6. Akwetu atena kutukwatekesa kutendela o Bibidya
Mukutanga o Bibidya, athu avulu ene mumona kwila, kuzwela o ima yalamu ni athu engi, kukwatekesa. Tanga Ikalakalu 8:26-31, mukusuluka bhanga o kibhwidisu kyakayela:
-
Kyebhi kitutena kutendela o Bibidya? Tala ojivelusu 30 ni 31.
Odiyala mukwa Etiyopya wabhingile kikwatekesu phala kutendela o Mikanda Ikôla. Athu avulu lelu ene mumona kwila, kuzwela o ima yene mutanga mu Bibidya ni athu engi, kwene mwakwatekesa
ATHU AVULU AMBA: “Kudilonga o Bibidya kuzanga kithangana.”
-
Ihi iwejizwela? Mukonda dyahi wejizwela kiki?
IHI IWADILONGO
O Bibidya ibhana milongi yalungu ni mwenyu, itambwijila ibhwidisu yabetakota, iswinisa, ibhana we kidyelelu ku athu.
Kubhitulula
-
Milongi yebhi itutena kusanga mu Bibidya?
-
Ibhwidisu yebhi itambwijila o Bibidya?
-
Ima yahi iwamesena kwijiya mu Bibidya?
TOKWESA DINGI
O Bibidya yala ni itendelesu yambote phala etu lelu.
“O Ilongesu ya Bibidya—Itukwatekesa mu Ithangana Yoso” (O Mulangidi No. 1 2018)
Tala kyebhi o Bibidya ya kwatekesa diyala wexile mudibhana ni ixinganeku yayibha tundé undenge.
Dilonge omilongi ya Bibidya yalungu ni kukala ni mwiji wazediwa.
“12 Kya Ima Ikwatekesa Omwiji Kuzediwa” (Despertai! No. 2 2018, mu Phutu)
O Bibidya itena kukatula o ixinganeku yayibha yala ayu athu avulu yalungu ni kutumina ongongo.
Mukonda Diahi Tua Tokala ku dilonga o Bibidia?—Vidyu Yoso (3:14)
Eye Nange Wandawabhela we o Maka Yá
IBHUIDISU IENE MU BHANGA DINGI O ATHU
Kyebhi o Jimbangi ja Jihova Kyene Mulonga o Bibidya?
Ni ukexilu ubhe yú wakulonga o Bibidya wa Jimbangi ja Jihova, eye utena we kutanga o jivelesu mu Bibidya yoso yoso iwamesena. Divwa kyambote phala kwixana muthu kumwiji wé mba kamba dyé kudibunda neye mukudilonga o Bibidya.
