DISÁ 44
O Kwila Jifesa Joso Jisangulukisa Nzambi?
Jihova wamesena kwila tusanguluka, tukala ni kithangana kya kunyoha. Maji o kwila jifesa joso jimusangulukisa? Kyebhi kitutena kulondekesa kwila twazolo Jihova mu maka yá?
1. Mukonda dyahi jifesa javulu kijisangulukisa Jihova?
Eye nange wandadiwana mukwijiya kwila, Jifesa javulu kijilungu ni milongi itunda mu Bibidya, mba jalungu ni akwajingeleja ja makutu. O jifesa jiji, nange jalungu ni wanga mba yatundu mumilongi ya kwila o muthu kyoso kyafwa ukala ni mwenyu mukididi kyengi. Sayi jifesa jalungu ni ijila yawanga ni kuta jisorte. (Izaya 65:11) Jihova watendelesa o jiselevende jê: “Tundenu mu mundu wâ, mudikalele . . . kana kubabata kima kya ufusa.”—2 Kolindu 6:17. a
2. Kyebhi Jihova kya divwa ya lungu ni jifesa jibhana kijingu kyavulu ku athu?
Jihova utudimuna phala kitubwe kumubhetu wakudyelela ‘ku athu.’ (Tanga Jelemiya 17:5.) Sayi jifesa ajibhanga phala kubhana kijingu ku athu kala o masoladi mba jinguvulu. Jifesa jamukwa jibhana kijingu ku ixi mba mu ijila ya ixi. (1 Nzwá 5:21) O jifesa jamukwa jalungu ni isangela ya jinguvulu ni athu akamukwa. Mudyé, kyebhi Jihova kya divwa se tubhanga mbandu mu jifesa jiximanesa athu mba isangela yene muzwela ima ki ilungu ni vondadi Yê?
3. Ima yebhi yayibha yene mubhanga mujifesa kijisangulukisa Nzambi?
O Bibidya ifidisa o ‘kukodiwa ni jifesa ja kukodiwa.’ (1 Phetele 4:3) Sayi jifesa o athu kakala dingi ni kilunji abhanga ima ya ufusa. Phala tukale tumakamba a Jihova, twabhingi kulenga o ima ya ufusa.
DILONGE DINGI
Sota kwijiya kyebhi ki utena kusangulukisa Jihova ni kusola kyambote se wandabhanga mbandu mujifesa ki jimusangulukisa mba kana.
4. Ditune jifesa kijisangulukisa Jihova
Tanga Efezu 5:10, mukusuluka bhanga o ibhwidisu ya kayela:
-
Se twandabhanga mbandu mufesa ihi itwabhingi o kwijiya?
-
Jifesa jebhi jene mubhanga dingi mudyembu mu watungu?
-
Mudyé, o kwila o jifesa jiji jisangulukisa Jihova?
Mukifika, wadibwidisa kya se ihi ibanza Nzambi ya lungu ni jifesa ja uvwalukilu? O Bibidya ki izwela ya lungu ni selevende ya Jihova wabhangele fesa ya uvwalukilu. O jifesa jiyadi ja uvwalukilu jotumbule mu Bibidya, jexile ja athu kexile musidivila Nzambi. Tanga Dimatekenu 40:20-22 ni Matesu 14:6-10. Mukusuluka bhanga o ibhwidisu ya kayela:
-
Ima yebhi yadifu yabhiti mu jifesa jiyadi jiji ja uvwalukilu?
-
Mudyé, kyebhi Jihova kya banza ya lungu ni jifesa ja uvwalukilu kala kitwatange mu jivelusu jiji?
Nange udibhwidisa: ‘Kyebhi Jihova kyanda divwa, se ngibhanga mbandu mu jifesa ja uvwalukilu ni jifesa jamukwa jofidise mu Bibidya?’ Tanga Makatukilu 32:1-8, tala OVIDYU mukusuluka bhanga o ibhwidisu ya kayela.
-
Mukonda dyahi twabhingi kwijiya ni kidi kyoso o kima kisangulukisa Jihova?
-
Kyebhi kitutena kubhanga kiki?
Kyebhi ki utena kwijiya se o fesa ki isangulukisa Nzambi
-
O kwila yene ya lungu ni ilongesu ki itundu mu Bibidya? Sota kwijiya se o fesa yiyi yamateka kwebhi.
-
O kwila yene ibhana kijingu kyavulu ku athu, ku isangela ni ku jixi? Etu tubhana dingi kijingu kwa Jihova mukonda twadyelela kwila mwene ngó wandazubha o hadi yoso ku mundu.
-
O kwila o ima yene mubhanga o athu mu jifesa jiji, jalungu ni itumu ya Bibidya? Twabhingi kukala ni wendelu wambote.
5. Kwatekesa akwenu kuxila o kima kiwasolo
Kyoso akwenu kya kujijidika kuya mufesa ki isangulukisa Jihova nange kubhonza kudituna. Ni kuxila ni mwanyu woso, jimbulula se mukonda dyahi wasolo kiki. Phala kwijiya kyebhi ki utena kubhanga kiki, tala OVIDYU.
Tanga Matesu 7:12, mukusuluka bhanga o ibhwidisu ya kayela:
-
Kala kitwatange muvelusu yiyi, o kwila weji jijidika o jindandu jé phala kabhange mbandu mu jifesa jofidise mu Bibidya?
-
Kyebhi ki utena kujimbulula kumwiji wê kwila o kukamba kudilunga nawu mu jifesa kikulombolola kwila eye kwazolo?
6. Jihova wamesena kwila tusanguluka
Jihova wamesena kwila, tubhita ithangana yambote ni mwiji wetu ni makamba metu. Tanga Ndongixi 8:15, mukusuluka bhanga o kibhwidisu kya kayela:
-
Kyebhi o velusu yiyi ilondekesa kuma, Jihova wamesena kwila, tusanguluka?
Jihova wamesena kwila o mundu wê utonoka, abhita ithangana yambote kumoxi. Tala OVIDYU phala kumona kyebhi kiki kya dimonekena mu yonge yamakota ya jixi javulu.
Tanga Ngalásya 6:10, mukusuluka bhanga o ibhwidisu ya kayela:
-
O kwila twabhingi kubhanga mbandu mu jifesa jibhanga o athu phala kubhanga “mbote” ku akwetu?
-
Ihi yeji kusangulukisa dingi: kukujijidika kubhana ujitu mukonda dya fesa, inga kubhana ujitu mukonda eye wamesena ku ubhana?
-
Jimbangi javulu ja Jihova ene mudisokejeka phala kubhanga fesa ni kubhana maujitu kutwana twâ kabasa kizuwa. Se wala ni twana ima yebhi i utena kubhanga phala ene?
ATHU AVULU AMBA: “Kwijiya kwebhi kwamatekena o fesa kikwala ni valolo. O kyabeta kota, o kukala kumoxi ni mwiji ni makamba.”
-
Ihi iweji zwela?
IHI IWADILONGO
Jihova wamesena kwila tubhita ithangana yambote kumoxi ni mwiji ni makamba metu. Maji mwene we wamesena kwila, kitubhange mbandu mu jifesa jazembe mwene.
Kubhitulula
-
Ibhwidisu yebhi itena kutukwatekesa kwijiya o jifesa jazembe Jihova?
-
Kyebhi kitutena kukwatekesa o mwiji ni makamba kutendela o kima kitwasolo kya lungu ni jifesa?
-
Kyebhi kitwejiya kwila, Jihova wamesena kwila tusanguluka, tutonoka we?
TOKWESA DINGI
Tala o jifesa kene mu jibhanga ku Jikidistá.
“Mukonda Dyahi Sayi Jifesa o Jimbangi ja Jihova Kene mu Jibhanga?” (Milongi ya jw.org)
Tala ima iwana ituxikinisa kwila kubhanga o jifesa ja uvwalukilu kikusangulukisa Jihova.
“Mukonda Dyahi o Jimbangi ja Jihova Kene Mubhanga o Jifesa ja Uvwalukilu?” (Milongi ya jw.org)
Tala kyebhi o munzangala kya londekesa o kuxila kyoso kya mu sebhulula muxikola mukonda dya kudituna kubhanga fesa ya Natale.
Eye Wala ni Valolo Yavulu Bhu Pholo ya Jihova (11:35)
Mazunda a jikidistá adituna kubhanga fesa ya Natale. Ihi yabanza ene ya lungu ni kima kya solo?
“Ene Asange Kima Kyala Dingi ni Valolo” (O Mulangidi, 1 wa Kayadi wa 2012)
a Tala Kibandekesu 5 phala kumona ihi i utena o kubhanga bhukaxi ka athu abhanga o jifesa kijisangulukisa Nzambi.
Eye Nange Wandawabhela we o Maka Yá
IBHUIDISU IENE MU BHANGA DINGI O ATHU
Kyebhi o Jimbangi ja Jihova Kyene Mulonga o Bibidya?
Ni ukexilu ubhe yú wakulonga o Bibidya wa Jimbangi ja Jihova, eye utena we kutanga o jivelesu mu Bibidya yoso yoso iwamesena. Divwa kyambote phala kwixana muthu kumwiji wé mba kamba dyé kudibunda neye mukudilonga o Bibidya.
