EIE u kanza o kibundu ku muxi. U ki nuha, anga u ki ta mu kinda muala o ibundu ia mukuá. Ua kalakala mu ola javulu, maji ku ua bhuila kana, ua mu divua muene kiambote, anga u suluka ni ku kalakala dingi. O manh’ê ua zukama ua mu kanza ué ibundu, ua mu zuela ni kisangusangu kioso ni jindandu jê ni makamba ala ku mu kuatekesa. Muéne uala kilumba—eie u di lembalala kiebhi kiexile muéne m’ukulu kioso ki uexile mona-ndenge. Ki bhonza ku xikina kuila eie ua mu mono kioso kia kexile mu kuka ku mundu uokulu ua bhiti kiá. Eie ua mu mono ué kioso kia kexile mu kata, eie ua mu kuata bhu lukuaku kioso kia zubha o kufua, eie ua didi kiavulu ku mbila iê. Maji kindala muéne uala kumoxi ni akuâ, uala ku muenhu ni sauidi iambote!

Tuejiia kuma, o kithangana kiki kia zukama. Tuejiia ué kuila ikanenu ioso ia Nzambi ki i kamba ku di kumbidila. Mu mbandu íii tua-nda di longa iebhi o ikanenu ia Utuminu ia-nda di kumbididila ku hádia, katé kia-nda mateka o Alumajedone. Tua-nda di longa ué ikanenu ia mukuá ia-nda di kumbidila kioso kia-nda bhita o Alumajedone. Tua-nda mona ué o kithangana kia-nda mateka o Utuminu ku tumina mu ixi ioso, ni ku bhangulula o ima ioso ku ubhe!