1, 2. (a) Mukonda diahi ki bhonza ku xikina kuila o ixi ia-nda kituka muene palaízu? (b) Ihi i tena ku tu kuatekesa ku suinisa o kixikanu kietu mu ikanenu ia Nzambi?

 PHANG’ETU ia diiala u bhixila mu kiônge, ua bhuila mukonda dia salu. O ngana iê ku salu, ua mu jijidika ku bhanga ima iavulu ni ku mu bhekesa njinda. Muéne ua thandanganha ué ni ibhidi ia ku dikila o muiji, o muhatu ué ua kumbama. Kioso o muimbu ua dianga mu kiônge ki u mateka, o phang’etu u divua kiambote mukonda uala mu Kididi kia Ubhezelu kumoxi ni jiphange jê. O muimbu ua lungu ni muenhu mu Palaízu, u mu suínisa ku di xanganeka kuila kuene kiá kuala. Iú uene o muimbu uê ua beta-o-kota, kioso muéne ni muiji uê kiaia ni kuimba, o mixima iâ i sanguluka kiavulu.

² O kuila ua divuile kiá kála o phange iú? Nange avulu bhu kaxi ketu a divu kiá kála o phange iú. Maji ki tu tokala ku jimba kuila o ukexilu ua iibha ua mundu iú u tena ku tu fidisa ku xikina kuila o ixi ia-nda kala muene Palaizu. Tuala mu “jithembu jabhonzo,” se-ku kima kilondekesa kuila o mundu iú sai kizuua ua-nda kituka palaízu. (2 Tim. 3:1) Ihi i tena ku tu kuatekesa ku xikina kuila o kidielelu kietu kia kidi? Kiebhi ki tuejiia kuila kua kambe ngó o Utuminu ua Nzambi ua-nda tumina o mundu uoso? Tu di longe ikanenu ia Jihova ia di kumbidila m’ukulu. Mu kiki tua-nda mona kiebhi o ikanenu íii, ni ia mukuá ia mu dikumbidila mu izuua ietu. Ni kixikanu kietu kia suina, tua mono kiebhi ki tua-nda katula mbote ku ikanenu íii ku hádia.

3. Kikanenu kiebhi kia kuatekesa o Jijudé ja kexile ku ubhika mu ixi ia Babilonha?

³ Xinganeka kiebhi kiexile o muenhu ua Jijude akexile ku ubhika mu ixi ia Babilonha ku hama ia kasamanu A.K.K. Athu avulu a kudila kuenhoko ku ubhika, kála kia bhitile ni jitata jâ, o muenhu ua bhonzele kiavulu. Akua Babilonha akexile mua tobhesa mukonda dia ku bheza Jihova. (Jisá. 137:1-3) Mu mivu iavulu, o Jijudé akexile ji fiiele, a naminine ku kidielelu kiki: Jihova ueji kua bheka dingi ku ixi iâ. Jihova ua a tangele kuila o ixi ieji iuka. Jihova uambele kuila  o mbanza ia Judá ieji kála palaízu kála o jaludim ia Edene! (Tanga Izaia 51:3.) O ikanenu íii ia tokalele phala ku tululukisa o mundu ua Nzambi, phala ka thandanganhe. Kiebhi? Tu di longe o ikanenu íii.

4. Kiebhi Jihova kia londekesa ku Jijudé kuila ueji ku a langa mu ixi iâ?

⁴ Kididi Kia Kondama. O Jijudé akexile abhika, keji vutuka mu palaízu ia kidi, kana, maji eji vutuka ku ixi ia kitukile ngundu mu 70 a mivu, athu a tolo ejidile o ixi ienioio. Mu izuua ioio, mu ixi muenhomo mua kexile ji hoji javulu, imbungu ni iama ia mukuá ia muxitu. O jitata nange a dibhuidisile: ‘Kiebhi ki nga-nda tena ku langa muhatua’mi ni tuana tuami? Abha o jimbudi ni jingombe jami—kiebhi ki nga-nda ji langa?’ Ki ki kituxi ku banza ku ima íii. Kienhiki, xinganeka ku kikanenu ki tu sanga mu divulu dia Izaia 11:6-9 ni kiebhi o kikanenu kiki kia kuatekesa o Jijudé. (Tanga.) Ni izuelu íii, Jihova ua londekesa ku abhika kuila ueji langa ki kale ene mba o imbamba iâ. O hoji ieji dia iangu, kiki kilombolola kuila, ki ieji dia o ibhaku ia Jijudé. O jifiiele keji bhinga ku kala ni uôma ua iama íii. Jihova ua kanene kuila o mundu uê eji tunga ni ku soma mu mbanza ia Judá katé muene ni mu kikangalakata ni mixitu.—Ize. 34:25.

5. Ikanenu iebhi ia kuatekesa o Jijudé a tundile ku ubhika ku dielela kuila Jihova ueji kua a bhana ioso ia bhingile?

⁵ Kudia Kuavulu. O Jijudé nange a thandanganhele dingi ni kima kia mukuá. ‘O kuila nga-nda tena ku dikila o muiji mu ixi mu tua muia? Kuebhi ku tua-nda tunga? O kuila tua-nda kala ni salu, o kuila o salu koko kua-nda beta o ku uabha o ki tua kexile ku ubhika ndenge?’ Bhu kaxi ka ikanenu iê, Jihova ua tululukisa ué o mundu uê phala ka thandanganhe. Jihova ua kanene ku mundu uê ua fiiele kuila ueji nokesa mvula iavulu ni kuila o mavu eji bhana kudia kua soko ni “mbolo.” (Iza. 30:23) Ia lungu ni ku kala ni jinzo ni salu iambote, Jihova ua tangela o mundu uê, uixi: “Ene-phe a kà tunga jinzo, anga a kala-mu; a kà dima milenga ia mivide, anga a kà dia idima iê. Ene ka kà tunga phala akuâ engi ku kala-mu; ka kà phapha phala athu engi ku i dia.” (Iza. 65:21, 22) Mu kidi, o muenhu uâ ueji uabha kiavulu o kia kexile ku ubhika mu ixi ia Babilonha ndenge. Maji kiebhi kieji kala o maka mâ a betele o ku bhonza—a a bhangesele kua ambata ku ubhika?

6. Uhaxi uahi ua katele kiá o Jijudé ni kiebhi Jihova kia suínisa o Jijudé a tundile mu Babilonha?

⁶ Ukamba Uambote ni Nzambi. Mivu iavulu ande dia kua ambata ku ubhika, o mundu ua Nzambi ua katele mu nzumbi. Bhu kaxi ka polofeta Izaia, Jihova ua tange ia lungu ni mundu uê: “Mitué ienu ioso iezala uhaxi; o mixima ienu ioso ia botomoka?” (Iza. 1:5) Ene exile ifofo ni maxilu mu nzumbi, mukonda ka kexile mu kuívua o milongi ia Jihova, a xitile o mesu mâ phala ka mone o itendelesu ia kexile mu bhana muéne. (Iza. 6:10; Jel. 5:21; Ize. 12:2) Se ene a bhitile dingi mu maka mua bhitile kiá, ku kondama kuahi  eji kala na-ku? Keji texa o ukamba uâ ni Jihova? O kikanenu kiki kia a kuatekesa kiavulu, kixi: “Mu kizuua kiná-phe o mixilu ia k’évua maka mu divulu, o ifofo ia kà ma muena mua vundu ni mu kitombe.” (Iza. 29:18) Mu kidi, Jihova ueji tena ku saka mu nzumbi o mundu uê, se ene a xikinine ku muivua; ueji kua bhana ué itendelesu ieji ku a kuatekesa ku kala ku muenhu.

7. Kiebhi kia dikumbidila o ikanenu ia Nzambi ku mundu uê ua tundile ku ubhika, ni mukonda diahi kiki kia tokala ku tu suínisa?

⁷ O kuila Jihova ua kumbidila o kizuelu kiê? O musoso u tambuijila o kibhuidisu kiki. O Jijudé a vutuka ku ixi iâ, a a besoala kiavulu, a tungile mu kididi kia kondama, akexile ni kudia kuavulu ia akexile ni ukamba uambote ni Jihova. Mu kifika, Jihova ua a lange bhu maku a athu a betele o nguzu ene ndenge. O iama ia muxitu ka di o ibhaku ia Jijudé. O Jijudé jojo ka mono o ima ioso ia lungu ni ikanenu ia soneka o polofeta Izaia, Jelemiia ni Izekiiele ia lungu ni palaízu—maji o ima ia mono o mundu ua Nzambi iene ngó ia bhingile o ku mona mu kithangana kieniókio. Kioso ki tu xinganeka ku ima ia bhangele Jihova phala o mundu uê m’ukulu, o kixikanu kietu kua muéne kia-nda kola dingi. Se o ima iofele ia di kumbidila m’ukulu, ia suínisa o Jijudé, kiebhi ki tua-nda kala kioso kia-nda di kumbidila dingi kiambote ku hádia? Tala o ima iene mu tu bhangela Jihova lelu.

8. “Ixi” iebhi iambote muala o mundu ua Nzambi lelu?

⁸ Lelu o mundu ua Jihova ka di bhange kifuxi kimoxi kana, ene ué ka tungu mu kididi kimoxi. Mu veji dia kiki, o Jikidistá ja a undu, a di bhanga, ‘izalaiele ia Nzambi.’ (Nga. 6:16) O makamba mê, o “jimbudi jamukuá” a di bunda kua ene mu “ixi,” ia nzumbi mua bheza kumoxi Jihova. O ku bheza Jihova, kuene o muenhu uâ. (Nzuá 10:16; Iza. 66:8) “Ixi” iebhi ia tu bhana Jihova? O ixi íii o palaízu mu nzumbi. Mu palaízu mumu mu nzumbi, o ikanenu ia Nzambi ia lungu ni ima iambote kála kiexile mu jaludim ia Edene, iene mu di kumbidila. Tala o ifika íii.

9, 10. (a) Kiebhi o kikanenu ki tu sanga mu divulu dia Izaia 11:6-9 kia mu di kumbidila lelu? (b) Ihi ilondekesa kuila o mundu ua Nzambi, mundu ua tululuka?

⁹ Kididi Kia Kondama. O kikanenu ki tu sanga mu divulu dia Izaia 11:6-9, ki tu londekesa o ukamba uambote uala bhu kaxi ka iama ia muxitu ni athu. O kuila o kikanenu kiki kiene mu di kumbidila kiá lelu? Kiene! O velusu ia 9, i tu londekesa se mukonda diahi o ima íii ia muxitu ki ia-nda kuatesa dingi uôma ku athu: “Mukonda o ixi ioso ia kézala ni kuijiia Nzambi, kala o menha kiezalesa kalunga.” O kuila o “kuijiia Nzambi” kulungulula o ukexilu ua iama? Kana, o athu ene a lungulula o ukexilu uâ mu kuijiia o Nzambi Suke-ku, ni ku sota ku kaiela o ukexilu uê ua ku tululuka. Kiki kiene ki bhangesa kuila, tu mona o kikanenu kiki ku di  kumbidila bhu kaxi k’etu mu palaízu ietu mu nzumbi. Mu Utuminu ua Nzambi, o akaiedi a Kristu ene mu di longa o kueha o maukexilu’â a iibha kála a iama, ni ku di bhana kiambote ni jiphange jâ mu nzumbi.

¹⁰ Mu kifika, mu divulu didi tua di longo o maka alungu ni Jikidistá ku kamba ku di ta mu maka a jinguvulu—tua di longo kitumu kia Mikanda Ikola ki tu fidisa ku bhanga mbandu ku jinguvulu, tua di longo ué o izukutisu muene mu bhita o mundu ua Nzambi mu ku bhanga kiki. Ki kima kia ku diuana o ku sanga bhu kaxi ka mundu iú uezala ni kuiibha, “athu” a dituna ku bhanga ima ia iibha, né muene ni kua tangela kuila a-nda ku a jibha? Sé phata, kiki kilondekesa kuila o athu a xikina o Utuminu ua Mexiia, a sanguluka kiavulu ni kutululuka kála kia soneka polofeta Izaia! Jezú uambe kuila o akaiedi’ê eji beta kua ejiia mu ku di zola mudiâ. (Nzuá 13:34, 35) Mu kilunga, Kristu uene mu kuendesa o mubhik’ê, o ‘kimbadi kia fiiele’ phala ku longa o Jikidistá joso ku kala athu a tululuka, athu a henda ni ku bhanga mbote.—Mat. 24:45-47.

11, 12. Nzala iahi iene mu tala o mundu lelu, maji kiebhi Jihova kiene mu bhana kudia kua nzungule ku mundu uê?

¹¹ Kudia Kuavulu. O mundu ua mu bhita ni nzala ia dikota mu nzumbi. O Bibidia i tu dimuna: “Tala-ze, izuua i iza, nga-nda ku mi tumikisa nzala mu ngongo; ki nzala ia kudia  kúdia, mba dinhota dia kunua menha, maji nzala ia kuívua maka ma Jihova.” (Amoji 8:11) O kuila o mundu ua Utuminu ua Nzambi, a mu fua ué ni nzala? Jihova ua tangele kuila o ukexilu ua mundu uê ki ueji kala kála o ukexilu ua jinguma jê, muéne uixi: “Jiselevende jami a kà kala mu kudia, enu-phe mua kà tala hadi ni nzala; talesa, jiselevende jami a kà nuá maji enu-phe mua kà kala ni dinhota; talesa jiselevende jami ja k’ènda ni ku tana, maji enu-phe sonhi ja kà mi kuata.” (Iza. 65:13) O kuila eie uene mu mona o izuuelu íii o ku di kumbidila?

¹² O kudia kua nzumbi kuedi kála ngiji ia mu di sanzumuna kiavulu ni kuia mua nzongo. O madivulu metu, jividiu; iônge iofele ni ia makota; o milongi i tu sanga mu kijimbuete kietu mu internete—o ima ioso íii, kudia kua nzungule ku tua mu tambula, sumbala tuala ku mundu uezala ni nzala mu nzumbi. (Ize. 47:1-12; Joue. 3:18) Ki kima kiambote eie ku mona o dikumbidilu dia izuelu ia Jihova ia lungu ni ku tu bhana kudia kuavulu? O kuila uene mu dia muene ku meza a Jihova izuua ioso?

13. Kiebhi ki uene mu mona o kikanenu kia Jihova kia lungu ni mesu a ifofo ku jikuka ni maxilu kuívua, o ku dikumbidila?

¹³ Ukamba Uambote ni Nzambi. Lelu o athu ku mundu ala mua vundu, ka mu tala né kuivua mu ukexilu ua nzumbi. (2 Kol. 4:4) Maji Kristu ua mu saka mu nzumbi jihaxi javulu ku mundu uoso. Eie uene mu mona o mesu a ifofo ku jikuka ni maxilu kuívua? Se ua mono kiá athu a di longo o kidi kia lungu ni Mak’â Nzambi ni kueha o makutu a di longele mu jingeleja jâ a a tele mua vundu ni ku kamba kuívua o Mak’â Nzambi, kiki kilombolola kuila ua mu mona o kikanenu kiki ku di kumbidila, kixi: “Mu kizuua kiná-phe o mixilu ia k’évua maka mu divulu, o ifofo ia kà ma muena mua vundu ni mu kitombe.” (Iza. 29:18) Ji hama ni ji hama ja athu ku mundu uoso, ene mua saka mu nzumbi mivu ioso. Kala muthu kioso kia tunda mu Babilonha ia Dikota ni ku kala kumoxi n’etu mu palaízu ietu mu nzumbi, kilondekesa kuila o ikanenu ia Jihova i di kumbidila!

14. Mu ihi mu tua tokala o ku xinganeka phala ku kolesa o kixikanu kietu?

¹⁴ Kala kibatulu mu divulu didi, kilondekesa kuila Kristu uene mu kuendesa o akaiedi’ê ku palaízu mu nzumbi mu izuua íii isukidila-ku. Tu kolokote ni ku xinganeka ku mabesá oso u tuene mu tambula lelu mu palaízu ietu mu nzumbi. Mu ku bhanga kiki, o kixikanu kietu ku ikanenu ia Jihova kia-nda kola dingi.

15. Mukonda diahi tua tokala ku dielela kuila o ixi ia-nda kala palaízu?

¹⁵ Tundé ukulu, Jihova ua mesena kuila o ixi ioso i kale palaízu. Muéne ua tele Adá ni Eva mu jaludim ia Edene iu ua a tumu kuizalesa o ixi ioso ni athu ni ku langa o iama ioso. (Dim. 1:28) Maji Adá ni Eva a kaiela Satanaji mu ku  bhukumukina Nzambi, kienhiki a sumbisa o muiji uâ uoso ku ituxi ni kufua. Maji né kiki, o vondadi ia Nzambi ki i lunguluka kana. Izuelu ioso i tunda mu kanu diê, i di kumbidila. (Tanga Izaia 55:10, 11.) Kienhiki, tu tena ku dielela kuila o muiji ua Adá ni Eva a-nda zalesa o ixi íii ni ku langa kiambote o ima ia bhange Jihova. Mu ku bhita thembu, o ia zuelele ku Jijudé a tundile ku ubhika ia lungu ni palaízu, ia-nda di kumbidila mu maukexilu oso! Tala o ifika íii.

16. Kiebhi o Bibidia ijimbulula o ku kondama kua-nda kala mu palaízu?

¹⁶ Kididi Kia Kondama. O izuelu ioso i tu sanga mu divulu dia Izaia 11:6-9 ia-nda di kumbidila ki mu nzumbi ngó ni mu xitu ué. O maiala, ahatu ni ana-ndenge, ka-nda kala ni uôma, bhuoso-bhuoso bhua kala. Se-ku kiama mba muthu ua-nda kuatesa uôma kua akuâ. Xinganeka ku hádia ku kala mu ixi ni kuzoua mu ngiji, izanga, ku banda o milundu, ku tonoka ku mikau sé uôma. Mu usuku, kua-nda bhinga ku kala ni uôma. O izuelu i tu sanga mu divulu dia Izekiiele 34:25 ia-nda di kumbidila, o mundu ua Nzambi ua-nda “tunga ni kukondama mu kikangalakata hé [ua] kà zek’é muene mu matutu.”

17. Mukonda diahi tua tokala ku dielela kuila Jihova ua-nda tu bhana ioso i tua bhindamena kioso o Utuminu uê kia-nda mateka ku tumina o ixi ioso?

¹⁷ Kudia Kuavulu. Xinganeka o kithangana ki kua-nda kala uadiama, nzala mba ku kata. O kudia kua nzungule kuene na-ku o mundu ua Nzambi lelu, kilondekesa kuila o Sobha Mexiia ua-nda dikila o mundu uê mu maukexilu oso. Kioso Jezú kia kexile mu ixi, muéne ua londekesa kuila u tena ku kumbidila o ikanenu íii, mbata muéne ua disa jimidi ni jimidi ja athu akexile ni nzala ni tu mbolo ni tu mbiji tuofele. (Mat. 14:17, 18; 15:34-36; Mar. 8:19, 20) Kioso o Utuminu ua Nzambi kia-nda kuata mu tumina o ixi ioso, o ikanenu kála íii ia-nda di kumbidila mu ukexilu ua xitu: “Jihova ua-nda ku ku bhana o mvula ku mbutu iê i u kuna bhoxi, u ku bhana ué mbolo, o phembele ja’ixi; mavu ia a-nda kuima muene kiasoko; mu kizuu’okio ibhaku ié ia kà dila jinga mu mâkela madixala.”—Iza. 30:23.

18, 19. (a) Ihi ilombolola o izuelu i tu sanga mu divulu dia Izaia 65:20-22? (b) Ihi ilombolola o izuua ietu ku “soka ni izuua ia ukudilu ua muxi?”

¹⁸ Lelu athu avulu ka tena né muene ku xinganeka ku kala ni inzo ia fuama mba o ku sanguluka kuijila mu ku kala ni salu iambote. Ku mundu iú ua iibha, athu avulu a divua kuila ene mu kalakala kiavulu maji a nganhala kitadi kiofele, ka tena ku dikila kiambote o miji iâ, maji o jimvuama ni akua luimbi a nganhala kitadi kiavulu. Xinganeka kiebhi kia-nda kala o ixi kioso o kikanenu kiki kia-nda di kumbidila: “Ene-phe a kà tunga jinzo, anga a kala-mu; a kà dima milenga  ia mivide anga a kà dia midima iê. Ene ka kâ tunga phala akuâ engi ku kala-mu; ka kà phapha phala athu engi ku i dia; mbata izuua ia mundu uami ia kà soka ni izuua ia ukudilu ua muxi ni athu’ami òsole a kà kemba ni ikalakalu ia maku mâ katé mu ukukilu.”—Iza. 65:20-22.

¹⁹ Ihi ilombolola o mivu ietu ku “soka ni izuua ia ukudilu ua muxi?” kioso ki u kala bhu mbandu ia muxi ua dikota anga u tala bhulu, ku diuana mu ku xinganeka ku mivu iala na-iu o muxi uenhú—nange uene kiá bhobho ande dia uvualukilu ua jikuku jê? Nange u xinganeka kuila se u kalela-ku mu ku kala muthu mukua ituxi, o muxi iú ua-nda nangenena katé ku hádia ni hádia katé muene ki ua-nda fua ni ku kala kiá ngó ku ibanzelu ia athu. Jihova muthu uambote mu ku tu tangela kuila mu palaízu, o izuua ietu ia kà kala kála o izuua ia muxi—izuua iavulu iezala ni ku sanguluka! (Jisá. 37:11, 29) Mu kizuua kieniókio, katé muene ni mixi iene mu nangenena kiavulu, ia-nda lela kála iangu ni kuiza-ku mixi iengi, maji etu tua-nda kalela-ku mu ixi ku hádia ni hádia!

20. Kiebhi o mundu ua fiiele ua Utuminu ua-nda kala ni sauidi iambote?

²⁰ Sauidi Iambote. Lelu, se-ku muthu ku mundu u tena ku lenga o ku kata ni kufua. Etu oso, tu ji haxi—o uhaxi iú o kituxi. O sata ia Jezú iene ngó o milongo i tena ku tu saka. (Loma 3:23; 6:23) Mu Utuminu ua Midi ia mivu, Jezú ni ió a-nda tumina kumoxi ni muéne a-nda kuatekesa o athu ku katula mbote ku sata ia kukula kua Jezú ni ku zubha bhofele-bhofele o kituxi kioso ku athu. O kikanenu kia Izaia kia-nda di kumbidila kiambote: “Ki bhua kà kala mukua bhata mu Jeluzaleme uila: Nga kata, lémbua, mukonda o mundu ua kà tunga-mu, ki ua kà kala dingi ni kikuma mbata o ituxi iâ ioso a kà a loloka-iu.” (Iza. 33:24) Xinganeka o kithangana ki kua-nda kala dingi ifofo, maxilu mba inema. (Tanga Izaia 35:5, 6.) Jezú ua-nda saka o mauhaxi oso, ki kale mu xitu mba mu kilunji. O mundu ua fiiele ua Utuminu, ua-nda kala ni sauidi iambote!

21. Ihi ia-nda bhita ni kalunga ni mukonda diahi u sanguluka ni kikanenu kiki?

²¹ Maji ihi i tuamba ia lungu ni kufua kuene mu kuijila mu kituxi? O kalunga, o ‘nguma ietu isukidila,’ kana-ku muthu mukua ituxi u tena ku i lenga, ki kale lelu mba mungu, iene i tu kuata. (1 Kol. 15:26) Maji o kuila o kalunga kaka, ku kuatesa uôma kua Jihova? Tala ihi ia tange Izaia: “O kalunga ua ka kà bhuisa-ku muene nzaká, kienhiki, Jihova ua kà kondona o masoxi mu pholo joso.” (Iza. 25:8) U tena ku xinganeka kiebhi kia-nda kala o kithangana kiki? Ki kua-nda kala dingi ji thambi, ji mbalale mba ku dila! Mu veji dia kiki, o athu a-nda dila ni ku sanguluka kioso Jihova kia-nda kumbidila o kizuelu kiê kia ku fukununa oso afu! (Tanga Izaia 26:19.) Mu ku suka-ku, o ndolo iene mu bheka o kalunga ku athu, ia-nda bhua.

22. Ihi ia-anda bhita kioso o Utuminu ua Mexiia ua-nda zubha ku bhanga o vondadi ia Nzambi mu ixi?

²² Ku disukilu dia Midi ia mivu, o Utuminu ua Nzambi ua-nda zubha ku kumbidila o vondadi ia Nzambi mu ixi, kienhiki Kristu ua-nda bhana o Utuminu kua Tat’ê. (1 Kol. 15:25-28) O athu a-nda kala polondo phala ku a tendala, kioso Satanaji kia-nda mu jituna ku dikungu ki di moneka hole.  Kioso kia-nda bhita o kizulukutu kiki, Kristu ua-nda bula o mutué ua kinhoka kiki kia iibha, Satanaji. (Dim. 3:15; Dij. 20:3, 7-10) Maji o athu a fiiele, a zola Jihova, a-nda tambula mabesá avulu. Se-ku izuelu ia mukuá i beta ku jimbulula o mabesá enhá kála o izuelu íii i tu sanga mu divulu dia Loma 8:21, kuila, o athu a fiiele a-nda “bokona mu ufolo ua fuma, ua an’a Nzambi.”

23, 24. (a) Mukonda diahi tu tena kuzuela kuila o ikanenu ia Nzambi ia-nda di kumbidila muene? (b) Ihi i ua-nda bhanga?

²³ O ikanenu íii ki njozi ngó kana. Sé phata Jihova ua-nda kumbidila o kizuelu kiê! Mukonda diahi? Lembalala o izuelu ia Jezú i tua di longo mu kibatulu kia dianga kia divulu didi. Muéne ua longo o akaiedi’ê o ku samba: “Utuminu ué uize. Vondadi ié a i bhange bhoxi, kala kiala ku i bhanga ku diulu.” (Mat. 6:9, 10) O Utuminu ua Nzambi ki ibanzelu ia athu kana. O Utuminu ua Nzambi kidi muene! Uene ua mu tumina kiá ku diulu. Katé lelu, o Utuminu ua Nzambi ua mu kumbidila o vondadi ia Jihova mu kilunga kia Jikidistá mu maukexilu avulu. Mukonda dia kiki, tu tena ku dielela kuila ikanenu ioso ia Jihova, ia-nda di kumbidila kioso o Utuminu ua Nzambi kia-nda mateka o kutumina o ixi ioso!

²⁴ Sé phata, tuejiia kuila o Utuminu ua Nzambi ua-nda kuiza. Tuejiia kuila izuelu ioso i tunda mu kanu dia Jihova ia-nda di kumbidila. Mukonda diahi tu zuela kiki? Mukonda O UTUMINU UA NZAMBI UA MU TUMINA KIÁ! O kibhuidisu ki tua tokala o ku bhanga, kienhiki: ‘O kuila o Utuminu ua Nzambi ua mu tumina o muenhu uami?’ Tu bhange ioso mu ku belesela o itumu ia Utuminu iú kindala phala tu tambule o mabesá ku hádia ni hádia!