DISÁ 11
Mukonda Diahi Tuene mu Bhanga Iônge ia Makota?
México
Alemanha
Botswana
Nicarágua
Itália
Mukonda diahi o athu iá a sanguluka? Mukonda ala mu Kiônge. Kála o jiselevende ja Nzambi m’ukulu, akexile mu tambula milongi veji jitatu ku muvu, etu ué tuene mu diongeka mu ibuka ia makota. (Matendelelu 16:16) Mivu joso tuene mu bhanga Iônge itatu: kiônge kia ilunga, kia kizuua kimoxi, veji jiiadi ku muvu, ni kiônge kia dikota, kia izuua itatu. Mbote iahi i tu katula mu iônge íii?
Iene i suínisa o ukamba uetu ni jiphange ku mundu. Kala o akua Izalaiele kia kexile mu sanguluka mu kubheza Jihova ‘mu ku diongeka,’ etu ué tu sanguluka mu ku mu bheza kumoxi mu iônge íii. (Jisálamu 26:12; 111:1) Mu iônge íii tuijiia o jiphange jetu a tokala mu ilunga iéngi ni a tokala mu jixi jengi. Mu ola ia ku nhoha tu dia kumoxi ni jiphange jetu, kiene mu kala kithangana kia kusanguluka. (Ikalakalu 2:42) Tu mona ‘o ku di zola ni jiphange jetu ku mundu.’
Ene a tu kuatekesa kukula mu Mak’a Nzambi. O akua Izalaiele akexile mu katula mbote mukonda dia ku tendela kiambote o maka a mikanda ikola, mu kua ‘a tetulukisa kiambote.’ (Nehemiia 8:8, 12) Etu ué tu sanguluka ni milongi ia Bibidia i tu tambula mu iônge ietu. O milongi ene mu i katula mu ibatulu ia Bibidia. Madiskursu ambote, ni ifika, i tu longa kiebhi ki tu tena kubhanga o vondadi ia Nzambi ku muenhu uetu. O misoso ia jiphange jetu ene mu di tunda kiambote mu ibhidi mu izuua íii ia bhonzo, i tu suínisa. Mu iônge ia makota, ene mu londekesa-mu ji drama, ji tanga o misoso ia Bibidia i tu bhana milongi. Mu kiônge kia ilunga, a batizala-mu athu a mesena ku di bhakula kua Nzambi.
-
Mukonda diahi o kiônge kionene ni kiônge kia ilunga, ithangana ia ku sanguluka?
-
Mbote iahi i u katula mu kuia mu iônge íii?