Mu hama ia dianga, o kibuka kiofele ‘kia Jipoxolo ni tufunga mu Jeluzaleme,’ a sidivila kala kibuka kia utuminu phala kubatula o maka mu kilunga kia Jikidistá a undu. (Ikalakalu 15:2) Kioso ene kia batuile o maka, akexile mu bhanga kiki mu kaxi ka mikanda ikola ni kuehela kua endesa ku nzumbi ikola ia Nzambi. (Ikalakalu 15:25) Kiene kimoxi ué lelu.

A mu kiendesa kua Nzambi phala kubhanga o vondadi iê. O jiphange a a undu a mu sidivila mu kibuka kia Utuminu, a zolo kiavulu o mak’a Nzambi, ala ni uhete ua ku batula o maka mu ukexilu ua tokala. Ene a diongeka mu semana joso, phala kumona o ibhindamu ia jiphange joso mu ixi. Kala mu hama ia dianga, a bhana itendelesu ia Bibidia, ki kale mu kaxi ka mikanda mba mu kaxi ka tufunga mba a mukua. Kiki, ki bhangesa ku kala ni kibanzelu kimoxi mu kaxi ka mundu ua Nzambi. (Ikalakalu 16:4, 5) O kibuka kia Utuminu ki langa o kúdia mu nzumbi, ki suínisa o kikalakalu kia Utuminu ni kusola o jiphange phala o ikalakalu mu nzumbi.

Kiene ki belesela o itumu i bhana Nzambi bhu kaxi ka nzumbi iê. O Kibuka kia Utuminu, ki sota Jihova o Suke-ku ia ngongo ioso ni Jezú uala kupholo dia kilunga, phala kutambula itendelesu. (1 Kolindo 11:3; Efezo 5:23) Ene ka di mono kuila a beta dingi kota, akuâ ndenge. Ene kumoxi ni Jikidistá joso a undu, “a nhenganana o Kambudi, [Jezú] ene a nhunga nê kuoso-kuoso ku a di tela.” (Dijingunuinu 14:4, NW) O Kibuka kia Utuminu, ki sakidila o misambu ietu i tu bhanga phala ene.

• A nanhi akexile ku kibuka kia utuminu mu hama ia dianga?

• Kiebhi lelu o kibuka kia Utuminu, ki sota o itendelesu ia Jihova?