Mu Hebalaiku, Betele kilombolola “Inzo ia Nzambi.” (Dimatekenu 28:17, 19) Dijina dia tokala phala o jinzo ji tunga o Jimbangi ja Jihova ku mundu uoso, bhuoso bhua kuatekesa o kikalakalu kia kuboka. O kibuka kia Utuminu, kiala mu mbanza ia Nova Iorque, ku Estados Unidos, bhenhobho, ene a langa o ikalakalu ia jifiliiale ja jixi joso. Oso a kalakala ku Betele, a exana muiji ua Betele. Kala muiji, ene a tunga kumoxi, a kalakala kumoxi, adia kumoxi ni ku di longa kumoxi o Bibidia.—Jisálamu 133:1.

Betele kididi ki ki difu, kuene ku di bhakula athu mu vondadi iâ. Ku Betele joso, kuene maiala ni ahatu jikidistá a di bhakula phala ku bhanga o vondadi ia Nzambi ni kusidivila mu thembu ioso, mu kuta kupholo o Utuminu. (Matesu 6:33) Sé-ku muthu a mu futa mu ioso ia bhanga, maji enioso ala ni dixilu dio iudike kiambote, kúdia ni ku tambula kikuatekesu phala kusuua o ibhindamu iâ ia xitu. O jiphange joso ku betele ala ni kikalakalu. Saí iá ala mu maxilu a kusoneka, a kulamba, mba kusidivila kúdia. A mukua, a sokejeka o madivulu, a zelesa o maxilu, a sukula izuatu ni ima ia mukua dingi.

Kididi ki kuatekesa o kikalakalu kia kuboka. O kikalakalu kia beta-kota ku Betele joso, o ku ijidisa o kidi kia Nzambi ku athu oso. Mu kifika, o kadivilu kaka. A ka soneka ni kikuatekesu kia kibuka kia Utuminu, iá a ka tumikisa ku jiphange joso ene mu lungulula o madivulu ku mundu uoso. A ji katula kopia javulu mu filiiale ji bhanga o kikalakalu kiki. Mu ku suka-ko, a ji tumikisa ku 110.000 ia ilunga ndenge. O miji ioso ia Betele a bhanga o sidivisu ioso íii, phala kukuatekesa o kikalakalu kia beta dingi kota—kuboka o njimbu iambote.—Marku 13:10.

• Nanhi u sidivila ku Betele, ni ihi ia bhanga phala n’a suu o ibhindamu iâ?

• Kikalakalu kiebhi kia beta-kota kiene mu kuatekesa o Betele joso?