ATHU oso a bhita mu ibhidi katé muene ni ji selevende ja Nzambi. O mukua jisálamu ua soneka: “Hele jivula jandekele ku ngi kuata mu muxima.” (Jisálamu 94:19) Jezú uambe kuila, mu izuua isukidila-ku, o “makubhindama ma muehu,” eji bheka ibhidi iavulu benge-benge phala ku sidivila Jihova. (Luka 21:34) Abha eie? O kuila uene mu bhita mu ibhidi ia lungu ni ku kamba kitadi, maka ku muiji mba ku kata? Kiebhi Jihova kia tena ku ku kuatekesa ku dibhana ni ibhidi íii?

Etu ki tu tena ku dibhana ni ibhidi i moneka ku muenhu uetu sé kikuatekesu. O poxolo Phaulu ua soneka: “A tu xina mbandu ni mbandu. Tu kala mu jiphata . . . ; a tu kuama.” Maji muéne uambe ué kuila “ka tu tolola,” “ki tu kala ni kikote,” “ki tu jimi o mbutu.” Ihi i tu kuatekesa o kukolokota? “O nguzu i lenda”—i tunda kua Nzambi ietu, ua tena ioso, Jihova.—2 Kolindo 4:7-9.

Xinganeka kiebhi ki ua tambula “o nguzu i lenda” m’ukulu. O kuila ua di lembalala hanji kiebhi kia ku kuatekesa ku diskursu di uevu, o ku bandekesa o henda iê ia kidi kua Jihova? O kuila o kixikanu kiê ku ikanenu ia Jihova, kia dimendala dingi kioso ki ua zuela ku akuenu ia lungu ni Palaízu? Kioso ki tu diongeka mu iônge ni jiphange jetu, tu di kuatekesa mu ku di suínisa o kixikanu kietu, kiki ki tu bhana dingi nguzu phala ku dibhana ni ibhindamu ia muenhu, tu kala ué ni kutululuka phala kusidivila Jihova ni kisangusangu.

Mu kidi, eie u tena ku divua kala a mu ku sunga ku mbandu jiiadi mu kithangana kimoxi. Mu kifika, Jihova ua tu bhingi ku dianga ku sota o Utuminu ni kubhanga o kikalakalu kia nzumbi ni kusuína. (Matesu 6:33; Luka 13:24) U bhanga kiebhi, se o kizukutisu, uhaxi, mba maka ku muiji, a mu ku bhindamesa? Mba o salu iê ia mu ku bhinga thembu iavulu ia tokalele ku i bhana mu kilunga? Bhu kaxi ka ibhindamu íii—ni thembu ni nguzu ia tolo phala ku di bhana ni ibhindamu íii—eie u bhuila. Nange u banza kuila, Jihova ua mu ku bhinga ué kiavulu mu kikalakalu kiê.

Jihova uejiia ioso. Muéne ka tu bhingi ima iavulu, ki tu tena ku i bhanga. Muéne uejiia kuila, etu tua bhingi ithangana phala kunhoha, phala kudivua kiambote mu íii i tu bhanga.—Jisálamu 103:13, 14.

Mu kifika, tala kiebhi Nzambi kia kuatekesa Elija. Kioso Elija kia kexile ni uôma, muéne ua lengele mu kikangalakata, o kuila Jihova ua bazela o polofeta iê iu ua mu tumina kuvutuka mu kikalakalu kiê? Kana. Luiadi lua muvimba, Jihova ua tumikisa o anju iê phala kubalumuna Elija phala ku mu bhana kúdia. Né kiki, mu ku bhita  40 a izuua, Elija ua kexile hanji ni hele ni uôma. Ihi ia bhange Jihova phala ku mu kuatekesa? Kia dianga, Jihova ua londekesa kuila ueji mu langa. Kaiadi, Jihova ua kuatekesa Elija ni “dízui dia lenduka kiambote.” Mu ku suka-ku, Jihova ua jimbulula kuila, mu ixi mua kexile hanji jimidi ni jimidi ja athu akexile ku mu bheza ni ufiiele uoso. Mu kubhita ithangana, Elija ua suínine dingi mu kubhanga o ikalakalu ia upolofeta. (1 Jisobha 19:1-19) Ihi i tu di longa ku musoso iú? Kioso Elija kia kexile mu bhita mu ibhidi iavulu, Jihova ua mu talatala ni henda ni muanhu uoso. Jihova ka lunguluka. Muéne u tu kuatekesa kála kia kuatekesa Elija.

Kioso ki u banza kubhana kima kua Jihova, dianga kubanza se ua-nda tena muene mba kana. Kana kusokesa o ima i u tena o kubhanga lelu ni ima i ua tenene o kubhanga m’ukulu. Mu kifika: O muthu uala ni ufunu ua kulenga, se u kala mbeji javulu mba mivu sé kulenga, kioso kia vutuka o kulenga, muéne ku dimatekenu ka tena luua kulenga kála kia kexile mu lenga m’ukulu. Mu veji dia kiki, muéne u mateka kulenga bhofele katé kia kala ni nguzu i mu kuatekesa o kukolokota. O Jikidistá ja difu ni athu akua kulenga. Ene a lenga phala kutambula kima ku pholo. (1 Kolindo 9:24-27) Mukonda diahi ku banze kubhanga kima ki u mona kuila u tena ku ki bhanga mu kindala kiki? Mu kifika, eie u tena kubanza kuia mu iônge mu kilunga. Bhinga kua Jihova n’a ku kuatekese kubhanga kiki. Kioso ki ua-nda kala dingi ni nguzu mu nzumbi, eie ua-nda ‘lola, ni kumona kuila Jihova uene ni mbote.’ (Jisálamu 34:8) Di lembalale kuila, kima kioso-kioso ki ua bhange phala Jihova—né muene kima kiofele—Jihova u ki bhana valolo—Luka 21:1-4.

Kiebhi Jihova kia kuatekesa June kuvutuka kua muéne? Muéne u tu tangela: “Eme nga bhingi kua Jihova phala ku ngi kuatekesa. O mbalakaji iami, ua ngi tangela kuila, kua-nda bhita kiônge ku mbanza iami. Eme nga banzele kuia kizuua kimoxi mu kiônge. Nga sangulukile mu ku kala kumoxi ni mundu ua Jihova! O kiônge kiki, kiexile o kikuatekesu ki nga kexile mu kingila. Mu kiki, nga sanguluka mu kusidivila dingi Jihova. O muenhu uami lelu, uala dingi ni valolo. Eme ngejiia kuila ki ngala dingi ubheka uami, mba ki ngi diungu. Eme ngi sakidila Jihova, ua ngi bhana o kithangana kia kuvutuka.”