Phang’etu ia kazola:

Kala ki ua kijiia, o Bibidia divulu di zuela ia lungu ni athu. Mu Bibidia muala misoso ia athu exile ji fiiele, maiala ni ahatu, a di bhanene ni ibhidi kála etu lelu. Ene ‘akexile mu divua uá kála etu.’ (Tiiaku 5:17) Amoxi a kambele nguzu ia kukolokota mukonda dia ibhidi. A mukuá a divuile kia iibha ku muxima mukonda dia ima ia iibha ia zuelele o jindandu jâ mba iévu ku jiphange mu kilunga. Athu a mukuá a di tatela mukonda dia ima ia iibha ia bhangele m’ukulu.

O kuila o athu enhá a xisa o ubhezelu ua Jihova? Kana. Avulu exile kála o mukua Jisalamu ua sambe: “Ku nga tundu nga jimbila kala o mbudi; selevende ié ngana, mu sote; kuma itumu ié ki nga i jimbi kana.” (Jisálamu 119:176) O kuila eie ué kiene ki u banza?

Jihova ka jimbi o jiselevende jê ja xisa o kilunga. Maji muéne u a zukama​—saí ithangana muéne u bhanga kiki bhu kaxi ka jiselevende jê mu kilunga. Mu kifika xinganeka, kiebhi Jihova kia kuatekesa o selevende iê Jobe, ua bhiti mu mavuua avulu​—ua xala sé jimbongo, ua fundu an’ê oso, iu ua kuata uhaxi ua dikota. Jobe uevu ué izuelu ia iibha ku makamba mê a tokalele ku mu kuatekesa. Maji muéne ka bhana dikunda kua Jihova, sumbala saí kithangana muéne ka kexile mu xinganeka kiambote. (Jobe 1:22; 2:10) Kiebhi Jihova kia kuatekesa Jobe ku xinganeka kiambote?

Jihova ua kuatekesa Jobe mu ku tumikisa Edihu, uexile ué selevende iê. Kioso Jobe kia zuela ioso ia mu kexile ku muxima, Edihu uevu ioso, kiki kia mu bhangesa o kuzuela. Ihi ia zuela muéne? O kuila ua mu tatela mba ua mu bhangesa kudivua kuila muéne ua kexile ni kikuma? O kuila ua mu kuatesa jisonhi? O kuila Edihu ua di zangeleka kuila, muéne ua beta-o-kota o Jobe ndenge? Kana! Ni kikuatekesu kia nzumbi ia Nzambi, Edihu uambe: “Tala, eme ué nga tundu kua Nzambi kala eie; eme uami ué a ng’umbu ni mavu.” Edihu ua tululukisa Jobe: “Mukonda dia kiki, ki ngi ku bhekela uoma, mba o lukuaku luami lu ku nemena ku thandu diê.” (Jobe 33:6, 7) Mu veji dia kuvudisa dingi o malamba a Jobe, Edihu ni henda ioso ua mu bhana milongi iambote ni kikuatekesu kia bhindamene mu kithangana kieniókio.

Tua ku dióndo, ijiia-kiu kuma, o kadivulu kaka tua ka bhange ué ni ukexilu uenhú. Kia dianga, tuevu o jiphange a xisa o kilunga, etu tua soto kuijiia kiambote o ibhidi ia bhiti na-iu. (Jisabhu 18:13) Kaiadi, tua sambe etu tua tokuesa mu Mikanda Ikola misoso ilondekesa kiebhi Jihova kia kuatekesa o jiselevende jê m’ukulu, mu ibhidi kála i tuene mu bhita na-iu lelu. Mu ku suka-ku, tua sokesa o misoso íii ia Mikanda Ikola ni misoso ia jiphange jetu lelu, etu tua bhange o kadivulu kaka. Ni henda ioso tua ku bhingi, tanga kiambote o kadivulu kaka. Tua ku dióndo, tambula o umenekenu uetu ua henda.

Kibuka Kia Utuminu Kia Jimbangi ja Jihova