Mbandu 4
Kikuma—“Ngi Sukule, u Ngi Zelese ku Ikuma Iami”
“O salu iami ia ubhe ia kexile mu ngi futa kiambote, ia lungulula o ukexilu ua muenhu ua muiji uami, maji ia ngi bhekela ku bhanga ima iibha. Nga mateka ku bhanga jifesa ja mundu, kudita mu ikalakalu ia jinguvulu, katé muene ni kuia mu ngeleja. Nga xisa o kilunga kia Jihova mu 40 a mivu. Mu kubhita thembu, nga kexile mu divua kuila, Jihova keji ngi loloka dingi. Nga kexile ué mu divua kuila ka tokala ku ngi loloka muene. Nga divuile kiki, mukonda eme ngejidile kiá o kidi kia Nzambi, ande dia kudita mu njila íii ia iibha.”—Martha.
O KIKUMA, ki bhangesa o muthu kudivua kia iibha. O Sobha Davidi ua soneka: “Mukonda ikuma iami ia ngi bhiti ku thandu, nga jikinina muene; ia ngi xina ni iene kala kimbamba kia dikota.” (Jisálamu 38:4) Saí Jikidistá a divua kia iibha ku muxima, mu kubanza kuila Jihova nuka dingi ua-nda kua loloka. (2 Kolindo 2:7) O kuila kiki kidi muene? Né muene se eie ua te kituxi kia dikota, o kuila Jihova ka-nda ku loloka? Kana, ua-nda kuloloka!
‘Zenu-phe Kiá, ni tu Batule o Maka Mudietu’
Jihova ka xisa o athu a te ituxi, maji a diela o ituxi iâ. Mu kidi, muéne u a tambulula! Mu kifika kia mon’a ua vutuka, Jezú ua sokesa Jihova ni tata ia henda, uexile ni mona ua xisa o muiji iu uai mu bhanga ima ia iibha. Mu kubhita thembu, o mona ua banze kuvutuka ku bhata. “Ki ala mù kuiza-phe, hanji uala dikanga, tat’â ua mu mono. Anga henda ia mon’ê i mu kuata, u lenga lusolo, u di bhubhala-nê, u mu bhana jibeju.” (Luka 15:11-20) O kuila eie ua-ndala kuvutuka kua Jihova, maji u divua kala “hanji uala dikanga” dia muéne? Kála o tata mu kifika kia Jezú, Jihova u ku kuatela henda. Muéne uala ni ngunzu, iu ua mesena kuila eie u vutuka.
Maji ihi i tuamba se u xikina kuila o ituxi iê iavulu, ia iibha kinene phala Jihova ku i loloka? Tua ku dióndo, xikina o izuelu ia Jihova iala mu divulu dia Izaia 1:18: ‘Zenu-phe kiá, ni tu batule o maka mudietu, eme Jihova. Né-mbé o ituxi ienu ia kusuka kala husu, ia-ndu zela mukuâ ni neve (o kikulakaji).’ Né muene o ituxi i moneka kála ia kusuka kiavulu se iala ku izuatu ia zele, hanji Jihova u i loloka.
Jihova ka mesena kuila eie u tala hadi mu kubanza mu ituxi i ua te. Ihi-phe i ua tokala o kubhanga phala kutambula o muloloki kua Nzambi ni kukala ni kitongoluelu kia zele? Tu di longe ima iiadi ia bhangele Sobha Davidi. Kia dianga, muéne uambe: “Ngi fisala kutondala kuami kua Jihova.” (Jisálamu 32:5) Lembalala kuila Jihova ua kuixana kiá phala ku mu zukama mu musambu, ni mu ‘batule o maka’ mudienu. Xikina o kixanu kiki. Fisala o ituxi iê kua Jihova ni ku mu tangela o ixinganeku iê. Davidi mu íii ia bhiti, ua sambe: “Ngi zelese ku ikuma iami. . . . Muxima uatoloka, uadiela muene, eie Nzambi ku dituna-u.”—Jisálamu 51:2, 17.
Kaiiadi, Davidi ua tambuile kikuatekesu ku mukunji ua tumikisa Nzambi, o polofeta Natane. (2 Samuuele 12:13) Lelu Jihova uene mu tumikisa o tufunga tua ilunga, ene mua longa phala ku kuatekesa o jiphange a te ituxi maji a diela, phala ku kala dingi ni ukamba ni Jihova. Kioso eie ki uixana o tufunga, ene a-nda ku ku kuatekesa bhu kaxi ka Mikanda Ikola ni misambu ia kidi, phala ku ku batamesa o muxima, ni u kale ni ixinganeku i ku kuatekesa o kuvutuka mu kilunga.—Tiiaku 5:14-16.
Jihova ua mesena kuila eie u kala ni kitongoluelu kia zele ni kusanguluka
‘Ua Zediua Uoso Kikuma Kiê Kióloloke’
Mu kidi, eie nange u divua kuila o kufisala o ituxi iê kua Jihova Nzambi ni kuixana o tufunga, ki bhonza phala eie ku ki bhanga. Davidi ua divuile uê kienhiki. Muéne ku dimatekenu, ua “dixibha” kufisala o ituxi iê. (Jisálamu 32:3) Maji mu ku bhita ithangana, muéne ua mono o mbote ijila mu ku fisala o kituxi ni ku lungulula o ukexilu uê.
O mbote ia dikota ia tambuile Davidi, o kukala dingi ni kisangusangu. Muéne ua soneka: ‘Ua zediua uoso kikuma kiê kióloloke, kituxi kiê kiabhu, a ki làmbe.’ (Jisálamu 32:1) Muéne ué ua sambe kua Jihova: “Ngi jikule, Ngana, o mizumbu; dikanu diami di kale mu ku tumbula jinga o fuma ié.” (Jisálamu 51:15) Davidi ua kexile ni nguzu ia kuzuela ia lungu ni Jihova ku athu mukonda dia kudivua kiambote ku muxima ni mukonda ué dia Nzambi ku mu loloka o ituxi iê.
Jihova ua mesena kuila eie u kala ni kitongoluelu kia zele ni kusanguluka. Muéne ua mesena ué kuila, eie u tangela akuenu ia lungu ni muéne ni ikanenu iê, sé eie kudivua kia iibha, maji ni muxima ua zele ni kusanguluka. (Jisálamu 65:1-4) Lembalala o kixanu kiê, kuila “muenhu uenu u biluke, mu vutuke kua Nzambi, o muène ituxi ienu phala a mi jimune-iu.”—Ikalakalu 3:19.
Kiki kiene kia bhiti ni Martha. Muéne uambe: “Mon’ami ua diiala ua kexile mu ngi tumikisa o tumadivulu, O Mulangidi ni Despertai!. Bhofele-bhofele, nga mateka kuzukama dingi kua Jihova. O kibhidi kia dikota phala kuvutuka kua Nzambi, o ku mu bhinga o muloloki ua ituxi ioso i nga tele m’ukulu. Maji, nga sambe kua Nzambi, nga mu bhingi o muloloki. Ngi divua kia iibha mu kuijiia kuila nga bhiti 40 a mivu dikanga dia Jihova. O ima ia bhiti ku muenhu uami, ilondekesa kuila o muthu u tena kuvutuka dingi ni kusidivila Nzambi ni kukala mu henda iê.”
