Luzia uambe: “A ngi vuala ni uhaxi ki u xikina milongo uene mu ngi bhekela ndolo javulu izuua ioso. O ukexilu ua muenhu uami ua ngi katula o kusanguluka.” Muene ua thandanganhele kiavulu mukonda sai bhabha ka kexile mu tena kutendela o milongi ia Bibidia, o kilunji kiê kia kexile dikanga. Maji o izuelu ia Jezú mu divulu dia Matesu 19:26: ia mu kuatekesa, iene iamba: “Kua Nzambi-phe iene ioso i xikina.” Luzia ua dilongo kuila sai maukexilu avulu a kudilonga o Bibidia. Mukonda dia jindolo ja kexile mu divua, muene ka tenene kutanga o Bibidia, mu kiki muene ua mateka kuívua o milongi íii bhu kaxi ka mitelembe. * Muene uambe “Sé o kikuatekesu kiki, ki ngi jiia se kiebhi ki ngeji tena kukala kiambote mu nzumbi.”

Mukonda dia kuluuala kiavulu sai bhabha Luzia ka tenene kubhanga kima kioso-kioso maji ua sange kikuatekesu mu mukanda ua 2 Kolindo 8:12: “Kuma se sai muthu uandala kubhana, Nzambi u xikina o ujitu, kala muthu kioso ki ala na-kiu.” O izuelu íii ia kuatekesa Luzia kumona kuila, Nzambi u sanguluka mu ioso ia bhanga né muene ni ibhidi.

O Fina tua mu tange ku dimatekenu, ua lembalala: “Kioso mona’mi kiafu mu 18 a mivu, o ndolo ia vudile  katé muene ki ngi kijidile kuila ngeji tena kukala dingi ku muenhu. Ima ioso ia lungulukile.” Maji muene ua sange kikuatekesu mu divulu dia Jisálamu 94:19, o mukua jisálamu uambe kua Nzambi: “Hele jivula jandekele ku ngi kuata mu muxima, maji mu ukamba ué, muxima uami ua batama dingi.” Fina uambe, “nga kexile mu samba kua Jihova phala ku ngi kuatekesa kusanga kima kia kubhanga ki tena ku ngi kuatekesa kusosolola o ndolo iami.”

Muene ua di bhakula mu kukuatekesa akuâ. Muene ua sokesa o muenhu uê ni lapi ia kupindala, né muene i bukuka maji i kala hanji ni valolo. Kiene ue kimoxi, né muene Fina ua divuile kiaiibha, muene ua dilongo kuila ueji tena hanji kukuatekesa akuâ. Muene uixi: Ni lusolo nga mono kuila, mu kaiela o ijila ia Bibidia, ni kuxinganeka kiebhi ki ngeji tena kukuatekesa o maxibulu-ami, uene o ukexilu ua Jihova ku ngi kuatekesa.” Fina ua soneka majina a athu a a tange mu Bibidia a dibhanene ni ibhidi iavulu. Muene uambe: “Sé phata, o athu iá a kexile mu samba kiavulu.” Muene ue ua dilongo kuila “kibhonza kusanga kikuatekesu sé ku tanga o Bibidia.”

O kudilonga o Bibidia kua mu kuatekesa kutala o ima iala ku pholo mu veji dia ima ia bhiti kiá. O kidielelu kiala mu divulu dia Ikalakalu 24:15 kiene mu mu kuatekesa, diene diambe: “Kuma hádia kukala difukunukinu dia athu aiuka ni athu abhukumuka.” O kuila muene u xikina ni kidi kioso kuila Jihova ua-nda fukununa mon’ê? Tu ehele Fina ku tambuijila: “Ngi tena kumona kia mona’mi mu palaízu. Ngala ni kidielelu kuila Jihova ua-nda bheka mona’mi, mu kithangana kia xindi. Ngi tena kuxinganeka mona’mi neme mu palaízu, ngi divua kala o kizuua ki nga mu vuala.”